വാഴയ്ക്കാ ബജി പണ്ടേ എന്റെ വീക്നെസ് ആയിരുന്നു.നല്ല ചൂടുള്ള ബജിയും,നല്ല കടുപ്പത്തിലുള്ള ചായയും.പേരൂർക്കട മണ്ണാമ്മൂല കൺകോർഡിയ സ്കൂളിനടുത്തു ഒരു ചെറിയ ചായക്കട ഉണ്ടായിരുന്നു.അവിടത്തെ ബജിയുടെ രുചി നാവിൽ നിന്നും ഇന്നും പോയിട്ടില്ല ഇതുവരെ.എന്നോടൊപ്പം പഠിച്ച സോണിയുടെ വീട് അതിനടുത്താരുന്നു.ഞാനും അവനും കമ്പൈൻസ് സ്റ്റഡി നടത്തിയിരുന്നത് ഈ ചായക്കടയിൽ ആയിരുന്നു. ഇത്തവണ നാട്ടിൽ പോയപ്പോൾ ആ ചായക്കടയിൽ പോയി ചൂടുള്ള ബജി കഴിക്കണമെന്നു തോന്നി.നിരാശയായിരുന്നു ഫലം ! ചായക്കട ഇരുന്നിടത്തു ഇരുനില ഷോപ്പിംഗ് കോംപ്ലക്സ്.അവിടെയുള്ള അടയാള അവശേഷിപ്പു കൺകോർഡിയ സ്കൂൾ മാത്രം. അനന്തപുരിയുടെ മുഖഛായ മൊത്തത്തിൽ മാറി.അവിടത്തുകാർ പലരും വീടും,പറമ്പും ഒക്കെ വിറ്റു മറ്റു പട്ടണങ്ങളിൽ കുടിയേറി.മധ്യ തിരുവിതാംകൂറുകാരും,വടക്കൻമാരും ആ സ്ഥലങ്ങൾ ഒക്കെ കയ്യേറി.ഇനിയും കുറേക്കാലം കഴിഞ്ഞാൽ തിരുവനന്തപുരത്തുകാരനെ വടക്കൻ ജില്ലകളിൽ മാത്രം കാണാൻ കഴിഞ്ഞെന്നു വരും.എന്നെ പോലെ പറിച്ചു നടപ്പെട്ട എത്രയോ അനന്തപുരിക്കാർ. എന്നാലും എന്റെ പ്രിയ നഗരമേ .. എത്രയൊക്കെ ആട്ടിപ്പായിച്ചാലും നിന്റെ മണ്ണിൽ നിൽക്കുമ്പോൾ അമ്മയുടെ ഗർഭപാത്രത്തിലിരിക്കുന്ന കുഞ്ഞിന്റെ കരുതൽ ആണ് എപ്പോഴും.
– സജീവ് അനന്തപുരി