ഇന്നലെയുടെ അഭ്രപാളികളിൽ
നാളെയുടെ ചക്രവാളങ്ങളിൽ
ഇന്നിന്റെ ആർദ്രതയിൽ
ഞാൻ തേടിയത് നിന്നെയായിരുന്നു…
നിൻ കണ്ണിനാഴങ്ങളിൽ
എന്റെ പ്രണയത്തെ
ഒളിക്കട്ടെ..
അത്രമേൽ ദീപ്തമായ്
നിന്നെ പ്രണയിക്കട്ടെ..
പ്രണയത്തിന്റെ ചുവന്ന
ഗുൽമോഹർ പൂക്കൾ
വീണ വഴികളിൽ
നമുക്ക് കൈകോർക്കാം..
നിഴൽ പരക്കുന്ന
സായം സന്ധ്യയിൽ
നിന്നോട് ചേർന്നു നിൽക്കാം
ചുംബനം കൊണ്ടുണർത്തിയ
സിരകളിൽ പ്രണയാഗ്നി നിറയട്ടെ
മഞ്ഞു പെയ്യുന്ന മകരപുലരിയിൽ
പെയ്തൊഴിയുന്ന ഇടവപാതിയിൽ..
ഞാൻ നിന്നോട് ചേർന്നിരിക്കട്ടെ..
എന്റെ ഹൃദയത്തെ ഉണർത്തുന്ന നിന്റെ ശ്വാസതാളത്തിൽ
അലിയട്ടെ..
എന്നുമെന്റേതെന്ന്
കാതരയായ് കാതിൽ ചൊല്ലാം…
പൊൻപുലരികളിൽ എന്റെ സൂര്യനാകുവാൻ
ആത്മാവ് കൊണ്ട് നിന്നെ പ്രണയിക്കട്ടെ..
പ്രണയത്തിന്റെ ചില്ലയിൽ കൂടൊരുക്കി
നിനക്കായ് കാത്തിരിക്കാം
നമുക്കായ് പെയ്ത മഴയിൽ
നനഞ്ഞ മണ്ണിൻ തണുപ്പിൽ കൂടുകൂട്ടാം..
പ്രിയപ്പെട്ട രാപ്പാടി
നിന്റെ യാനങ്ങളിൽ
എന്റെ ചില്ലകളിൽ നീ
രാപ്പാർക്കുക..
പ്രണയത്തിന്റെ മധുചഷകം
നിനക്കായ് കാത്തുവെക്കാം..
നിനക്കായ് വിടരുവാൻ
നിന്നിൽ വീണലിയാൻ..
നിന്നെ ഞാൻ പ്രണയിക്കുന്നു…
മഞ്ഞിന്റെ തണുപ്പോടെ
മഴയുടെ ശക്തിയേടെ
നീ എന്നിൽ പെയ്യുക..
അതിരുകളില്ലാതെ വാക്കുകൾക്കപ്പുറം
നീ എന്റെ പ്രണയമാണ്….
ഇന്നലെകൾക്കും നാളെകൾക്കുമപ്പുറം
നീ എന്റെ പ്രണയം സ്വീകരിക്കുക….
1 Comment
Good 😊