ചെറുമലക്കാട്ടിലാണ് രുക്കു പ്രാവിന്റെ താമസം. അവളുടെ പ്രിയപ്പെട്ട കൂട്ടുകാരാണ് പങ്കി കാക്കയും നീലു പൊന്മാനും. ഒരു ദിവസം രാവിലെ അവർ ആഹാരം തേടി യാത്രയായി. നീലു പൊന്മാൻ അവരോട് യാത്ര പറഞ്ഞു തടാകക്കരയിലേക്ക് പോയി. പങ്കിയും രുക്കുവും യാത്ര തുടർന്നു. പെട്ടെന്നാണ് ഒരു വീടിന്റെ മുറ്റത്ത് അരി ഉണക്കാൻ ഇട്ടിരിക്കുന്നത് അവർ കണ്ടത്. ആ പരിസരത്ത് ആരെയും കാണാനില്ല. അവർ ഇരുവരും അരി ഇഷ്ടം പോലെ കൊത്തിത്തിന്നാൻ തുടങ്ങി. ഒരുവിധം വിശപ്പടങ്ങിയപ്പോൾ പങ്കി കാക്ക മാവിന്റെ കൊമ്പിൽ വിശ്രമിക്കാൻ തുടങ്ങി. എന്നാൽ രുക്കു വീണ്ടും തീറ്റ തുടർന്നു. കുറെ നേരം കഴിഞ്ഞിട്ടും രുക്കുവിനെ കാണാഞ്ഞപ്പോൾ പങ്കി പതുക്കെ അങ്ങോട്ടെത്തി നോക്കി. രുക്കു അപ്പോഴും അരിമണികൾ തിന്നുകൊണ്ടിരിക്കുകയാണ്.
“രുക്കൂ, നിനക്ക് വിശപ്പ് കെട്ടില്ലേ ഇത് വരെ?”, പങ്കി ചോദിച്ചു.
“വിശപ്പൊക്കെ മാറി. ഇത്രയും നല്ല കോള് കിട്ടിയപ്പോൾ ഇനിയും കഴിക്കാമല്ലോ
എന്ന് കരുതി”, രുക്കു പറഞ്ഞു.
” നീ ഇപ്പോൾ ആവശ്യത്തിന് കഴിച്ചില്ലേ നമുക്ക് ഇനി കുറച്ച് നേരം കാഴ്ചകൾ കണ്ട് പറക്കാം “, പങ്കി നിർബന്ധിച്ചു വിളിച്ചപ്പോൾ രുക്കു മനസ്സില്ലാ മനസ്സോടെ പങ്കിക്കൊപ്പം വന്നു.
![](https://koottaksharangal.com/wp-content/uploads/2023/08/ad_Banner_1-copy.webp)
കാഴ്ചകൾ കണ്ടു പറന്നു നടക്കുമ്പോൾ ഒരു അമ്പലത്തിനു മുന്നിലെ ആൽത്തറയിൽ ഇലകളിൽ പായസം ഇരിക്കുന്നത് അവർ കണ്ടു. രുക്കു താഴേയ്ക്ക് പറന്നിറങ്ങി ആർത്തിയോടെ പായസം തിന്നാൻ തുടങ്ങി. പെട്ടെന്ന് അവളുടെ കൊക്ക് പൊള്ളി. പായസത്തിനു നല്ല ചൂടുണ്ടായിരുന്നു. ഇത് കണ്ട് പങ്കി അവിടെ ഇരിക്കുന്നുണ്ടായിരുന്നു.
“എന്തിനാ ഇത്ര ധൃതി രുക്കൂ. സാവകാശം കഴിച്ചാൽ പോരേ? അതല്ലേ നിന്റെ ചുണ്ട് പൊള്ളിയത്?”, പങ്കി ചോദിച്ചു.
“പായസം കണ്ടപ്പോൾ എനിക്ക് കൊതിയടക്കാൻ ആയില്ല പങ്കീ ” രുക്കു പറഞ്ഞു.
“നീ ഇങ്ങിനെ വയർ അറിയാതെ തിന്നേണ്ട. അസുഖം വല്ലതും വരും ” പങ്കി പറഞ്ഞു.
അതൊന്നും ശ്രദ്ധിക്കാതെ രുക്കു വീണ്ടും പായസം കഴിക്കാൻ തുടങ്ങി.
കുറച്ച് കഴിഞ്ഞപ്പോൾ “അയ്യോ, എനിക്ക് വയർ വേദനിക്കുന്നേ ” എന്ന് പറഞ്ഞു രുക്കു ഉറക്കെ കരയാൻ തുടങ്ങി. കരച്ചിൽ കേട്ട് പങ്കി നോക്കുമ്പോൾ രുക്കു വയറുവേദന എടുത്ത് പുളയുകയാണ്.
“നിന്നോട് ഞാൻ അപ്പോഴേ പറഞ്ഞതല്ലേ രുക്കൂ ആവശ്യമില്ലാതെ വാരിവലിച്ച് കഴിച്ചാൽ എന്തെങ്കിലും അസുഖം വരുമെന്ന് ” പങ്കി പറഞ്ഞു.
“എനിക്കൊട്ടും വയ്യായേ ” രുക്കു വീണ്ടും കരയാൻ തുടങ്ങി.
“ഞാൻ പോയി നീലുവിനെ വിളിച്ചിട്ട് വരാം. അവൾക്ക് ചില മരുന്നുകളൊക്കെ അറിയാം ” പങ്കി നീലുവിനെ വിളിക്കാൻ പോയി.
അവർ തിരിച്ചെത്തുമ്പോഴേക്കും രുക്കു ആകെ അവശയായിരുന്നു. നീലു ചില ഇലകൾ തിരുമ്മി അതിന്റെ നീര് രുക്കുവിന്റെ വായിലേക്ക് ഒഴിച്ച് കൊടുത്തു. കുറച്ചു കഴിഞ്ഞപ്പോഴേക്കും അവളുടെ വയറുവേദന കുറഞ്ഞു.
“നന്ദി നീലൂ, പങ്കീ. നിങ്ങളില്ലായിരുന്നെങ്കിൽ ഞാനിപ്പോൾ മരിച്ചു പോയേനെ ” രുക്കു പറഞ്ഞു.
“ഇനിയെങ്കിലും നീ ആഹാരത്തോടുള്ള ആർത്തി കുറയ്ക്ക് രുക്കൂ ” നീലുവും പങ്കിയും ഒന്നിച്ചു പറഞ്ഞു.
‘ഇനി ഞാൻ ആവശ്യത്തിന് മാത്രമേ ആഹാരം കഴിക്കൂ. പങ്കി പറഞ്ഞിട്ടും അനുസരിക്കാതിരുന്നിട്ടാണ് എനിക്ക് ഇങ്ങിനെ വന്നത്. ഇനി ഞാൻ ഇങ്ങിനെ ചെയ്യില്ല ” രുക്കു പറഞ്ഞു. പങ്കിയും നീലുവും അത് കേട്ട് ആശ്വാസത്തോടെ ചിരിച്ചു. എന്നിട്ട് അവർ ഒരുമിച്ച് ചെറുമലക്കാട്ടിലേക്ക് പറന്നുപോയി.
തന്മയ
9 years
Std :4
SHCLPS, തൃശൂർ
4 Comments
മനോഹരം 👌👌
നല്ല കഥ മോളു, ഇനിയും ഒരുപാട് എഴുതണം ട്ടോ 😍👍
❤️❤️🥰🥰
👏🏻👏🏻🥰