രമണന്റെ ഇരുപത്തഞ്ചു വർഷങ്ങൾ, ചിരിയുടെയും.

പഞ്ചാബികളുടെ കയ്യിൽ നിന്നും കടം വാങ്ങി മീൻ പിടിക്കാൻ വേണ്ടി കടലിലേക്കു പോയ ബോട്ട്, ആദ്യത്തെ വലയിൽ തന്നെ ജബൻ കുടുങ്ങുകയും ചെകിള പൊളിച്ചു നോക്കിയപ്പോൾ ജീവൻ ഉള്ളതായി കാണുകയും ചെയ്തത് കൊണ്ട് മീൻ പിടിക്കാൻ നിൽക്കാതെ കരയിലേക്ക് തിരിച്ചു വിടുകയും ചെയ്‌ത “ദയാലുവായ രമണൻ.”

ബോട്ടിൽ കിടക്കുന്ന ഡെഡ് ബോഡി എങ്ങാനും ചത്തുപോയാൽ ഉത്തരം പറയേണ്ടി പറയേണ്ടി വരുമെന്ന് സ്വന്തം മുതലാളിക്കു മുന്നറിയിപ്പ് നൽകുന്ന “കരുതൽ ഉള്ള രമണൻ.”

ആരാണെന്നും എന്താണെന്നും അറിയാത്തതു കൊണ്ട് പുറത്തു വിടാൻ കഴിയാതിരിക്കുകയും, അതെ സമയം തന്നെ തെറ്റൊന്നും ചെയ്യാത്തത് കൊണ്ട് അകത്തിടാനും പറ്റാത്ത സന്നിഗ്ദാവസ്ഥയിൽ ജബനെ പാറാവുകാരന് കൂട്ടായി വാതിലിൽ നിർത്തിയാൽ മതിയെന്ന് കൂളായി പരിഹാരം നിർദ്ദേശിക്കുന്നെ “ബുദ്ധിമാനായ രമണൻ.”

സ്വന്തം തൊഴിൽ ദാതാവ് ആയിരുന്നിട്ടു പോലും കടം തിരിച്ചടക്കുന്നതിൽ വീഴ്ച വരുത്തിയ മുതലാളിയെ ചെറ്റ എന്ന് മുഖത്തു നോക്കി വിളിച്ച “ധൈര്യവാനായ രമണൻ.”

മൂകനും ബധിരനുമായ ജബന്റെ വീടും കുടിയും കണ്ടു പിടിക്കാൻ മുതലാളിയുടെ കയ്യിൽ നിന്നും പീഡനം ഏറ്റുവാങ്ങുന്ന “ത്യാഗിയായ രമണൻ.”

പഞ്ചാബികൾ പിടിച്ചെടുത്ത ബോട്ട് തിരിച്ചു പിടിക്കാൻ വേണ്ടി മുതലാളിയോടൊപ്പം എന്തിനും തയ്യാറായി, സോണിയയുമായി മല്ലയുദ്ധത്തിനു തയ്യാറാകുന്ന “ക്ഷത്രിയ വീര്യമുള്ള രമണൻ.”

വീട് പോലെ ഇരിക്കുന്ന കല്യാണപ്പന്തൽ കണ്ടു, അത് കെട്ടിയവനും കെട്ടിയവളും ഒരാൾ തന്നെയെന്ന് കേട്ട് അതെങ്ങനെ സാധ്യമാകും എന്നും ലോജിക്കൽ ഡിഫൻസ് ഉയർത്തുന്ന “ഫിലോസഫിക്കൽ രമണൻ.”

കല്യാണം നടക്കേണ്ട അന്ന് തന്നെ അത് മുടങ്ങിയെന്നറിയുമ്പോൾ അന്നുണ്ടാക്കിയ ബിരിയാണിയും സദ്യയും ഒക്കെ എന്ത് ചെയ്‌തുവെന്നോർത്ത് വിലപിക്കുന്ന “മനഃസാക്ഷിയുള്ള രമണൻ.’

പഞ്ചാബികളുടെ വീട്ടിൽ പണയ ഉരുപ്പടിയയായി വിട്ടുപോകുമ്പോഴും മുതലാളിയെ എങ്ങനെ പിരിഞ്ഞിരിക്കും എന്ന് സങ്കടപെടുന്ന – “മുതലാളീ…..” എന്ന് ഉറക്കെ വിലപിക്കുന്ന “സ്നേഹവാനായ രമണൻ.”

ചെരിപ്പുകൾ പോളിഷ് ചെയ്യാൻ പറയുമ്പോൾ അത് ചെയ്യാൻ ഒട്ടും അറിയാതിരുന്നിട്ടും പഴയ ചെരിപ്പുകൾ പോളിഷ് ചെയ്തു പഠിച്ചു പുതിയ ചെരിപ്പുകൾ പോളിഷ് ചെയ്യാൻ തയ്യാറാകുന്ന, നല്ല തുണികൾ അലക്കാൻ അറിവുള്ളതിനാൽ അതറിയാത്ത ഉണ്ണിയെ അതേൽപ്പിച്ചു വിലകൂടിയ തുണികൾ കേടാക്കാൻ തയ്യാറാകാത്ത, തീരുമ്പോ തീരുമ്പോ പുതിയ പണി കിട്ടുന്ന കുടത്തിൽ നിന്നും വന്ന ഭൂതത്തെപ്പോലെ പണിയെടുക്കുന്ന “കഠിനാധ്വാനിയായ രമണൻ .”

ചപ്പാത്തിക്ക് പകരം ചോറ് കഴിക്കുന്നതിനാൽ ഹിന്ദി അറിയാത്ത “മലയാളിയായ രമണൻ.”

എല്ലാത്തിലുമുപരി സ്വന്തം മുതലാളിയുടെ ബോട്ട് പഞ്ചാബികൾ പിടിച്ചെടുക്കുകയും താൻ തന്നെ പണയ വസ്തുവായി ഇരിക്കുകയും ചെയ്യവേ, എല്ലാ കടങ്ങളും വീട്ടാനും സ്വന്തമായി ബിസിനസ് ചെയ്യാനും മതിയാകുന്ന ഏഴര ലക്ഷം രൂപ സത്യസന്ധമായി കൈമൾ മാഷുടെ വീട്ടിൽ, പൊട്ടിപ്പൊളിഞ്ഞു പാളീസായിട്ടും ലാഭത്തിൽ ഓടുന്ന ‘ജൂണിവേഴ്സല് ആൻഡ് ജൂണിവേഴ്‌സൽ’ കമ്പനിയുടെ ലാഭ വിഹിതമായി എത്തിച്ചു കൈമൾ മാഷുടെ കുടുംബത്തെ രക്ഷപെടുത്തുന്ന “മഹാനായ രമണൻ.”

എന്ന്, റിലീസായി ഇരുപത്തഞ്ച് വർഷങ്ങൾ കഴിഞ്ഞിട്ടും പഞ്ചാബി ഹൗസ് പടർത്തി വിട്ട ചിരിയോളങ്ങളിൽ ഇന്നും നീന്തി തുടിക്കുന്ന ഒരു പ്രേക്ഷകൻ…..