സോഷ്യൽ മീഡിയയിൽ നമ്മൾ ദിവസവും പലതരം അഭിപ്രായങ്ങൾ കാണുന്നുണ്ട്. ചിലത് നമ്മളോട് പൂർണ്ണമായി യോജിക്കും. ചിലത് ഒട്ടും യോജിക്കില്ല. ചില പോസ്റ്റുകൾ വായിക്കുമ്പോൾ, “ഇത് എങ്ങനെ ഇങ്ങനെ ചിന്തിക്കാൻ പറ്റുന്നു?” എന്ന് പോലും നമുക്ക് തോന്നിയേക്കാം.
അവിടെ നിന്നാണ് പലപ്പോഴും പ്രശ്നങ്ങൾ തുടങ്ങുന്നത്.
വിയോജിപ്പ് ഉണ്ടാകുന്നത് സ്വാഭാവികമാണ്. നമ്മളെല്ലാവരും ഒരുപോലെ ചിന്തിക്കണമെന്നില്ലല്ലോ. ഒരാൾക്ക് ശരിയെന്ന് തോന്നുന്ന കാര്യം മറ്റൊരാൾക്ക് അങ്ങനെ തോന്നണമെന്നില്ല. നമ്മുടെ അനുഭവങ്ങളും സാഹചര്യങ്ങളും കാഴ്ചപ്പാടുകളും എല്ലാം വ്യത്യസ്തമാണ്.
അതുകൊണ്ട് അഭിപ്രായ വ്യത്യാസങ്ങൾ ഉണ്ടാകുന്നതിൽ തെറ്റൊന്നുമില്ല.
പക്ഷേ, വിയോജിക്കുമ്പോൾ നമ്മൾ എങ്ങനെ പെരുമാറുന്നു എന്നതാണ് പ്രധാനപ്പെട്ടത്.
“നിങ്ങൾ പറയുന്നതിനോട് എനിക്ക് യോജിപ്പില്ല” എന്ന് പറയുന്നതും, “നിങ്ങൾക്ക് ഒന്നും അറിയില്ല”, “നിങ്ങൾ ഇങ്ങനെയുള്ള ആളാണ്” എന്നൊക്കെ പറഞ്ഞ് വ്യക്തിയെ തന്നെ ആക്രമിക്കുന്നതും രണ്ടാണ്.
നമുക്ക് ഒരാളുടെ അഭിപ്രായത്തെ ചോദ്യം ചെയ്യാം. അതിലെ തെറ്റുകൾ ചൂണ്ടിക്കാണിക്കാം. നമുക്ക് അറിയാവുന്ന കാര്യങ്ങൾ പങ്കുവെക്കാം. മറ്റൊരു കാഴ്ചപ്പാട് പറയാം.
പക്ഷേ അതിനിടയിൽ ആ വ്യക്തിയെ അപമാനിക്കേണ്ട കാര്യമുണ്ടോ?
അവരുടെ കുടുംബത്തെക്കുറിച്ച് പറയേണ്ട കാര്യമുണ്ടോ?
അവരുടെ വ്യക്തിജീവിതത്തെ വലിച്ചിഴക്കേണ്ട കാര്യമുണ്ടോ?
ഇല്ല.
കാരണം, ഒരു അഭിപ്രായത്തോട് വിയോജിക്കാൻ ആ വ്യക്തിയെ അപമാനിക്കേണ്ട ആവശ്യമില്ല.
നമുക്ക് വളരെ ലളിതമായി പറയാം:
“ഈ അഭിപ്രായത്തോട് എനിക്ക് യോജിപ്പില്ല.”
“ഞാൻ ഇതിനെ കുറച്ച് വ്യത്യസ്തമായാണ് കാണുന്നത്.”
“എന്റെ അനുഭവം ഇതിൽ മറ്റൊന്നാണ് പറയുന്നത്.”
“നിങ്ങൾ പറയുന്നത് മനസ്സിലാകുന്നു. പക്ഷേ എനിക്ക് തോന്നുന്നത് ഇങ്ങനെയാണ്.”
ഇതൊക്കെ വിയോജിപ്പ് തന്നെയാണ്. പക്ഷേ അതിൽ ബഹുമാനമുണ്ട്.
മറ്റൊരു കാര്യം കൂടി.
എല്ലാ അഭിപ്രായങ്ങൾക്കും മറുപടി പറയേണ്ട ആവശ്യവുമില്ല.
ചിലരോട് സംസാരിച്ചാൽ നല്ലൊരു ചർച്ചയുണ്ടാകും. പരസ്പരം പുതിയ കാര്യങ്ങൾ മനസ്സിലാക്കാനും സാധിക്കും.
പക്ഷേ ചിലർ നമ്മളെ പ്രകോപിപ്പിക്കാൻ മാത്രമായിരിക്കും ശ്രമിക്കുന്നത്. അവിടെ വീണ്ടും വീണ്ടും മറുപടി പറഞ്ഞിട്ട് എന്ത് കാര്യം?
ചിലപ്പോൾ മിണ്ടാതിരിക്കുന്നതാണ് ഏറ്റവും നല്ല മറുപടി.
എപ്പോൾ സംസാരിക്കണം, എപ്പോൾ വിട്ടുകളയണം എന്ന തിരിച്ചറിവും പ്രധാനമാണ്.
നമ്മുടെ അഭിപ്രായത്തിൽ ഉറച്ചുനിൽക്കാം. ശക്തമായി വാദിക്കാം. മറ്റൊരാളുടെ അഭിപ്രായത്തെ ചോദ്യം ചെയ്യാം.
പക്ഷേ മറുവശത്തുള്ളത് നമ്മളെപ്പോലെ തന്നെ വികാരങ്ങളും അഭിമാനവും ഉള്ള ഒരു മനുഷ്യനാണെന്ന് മറക്കാതിരിക്കാം.
നമ്മളോട് യോജിക്കാത്ത എല്ലാവരും നമ്മുടെ ശത്രുക്കളല്ല.
ചില കാര്യങ്ങളിൽ യോജിക്കാം. ചില കാര്യങ്ങളിൽ വിയോജിക്കാം. എന്നിട്ടും പരസ്പരം ബഹുമാനിക്കാം.
സോഷ്യൽ മീഡിയയിൽ നമ്മൾ എഴുതുന്ന ഓരോ വാക്കും നമ്മുടെ അഭിപ്രായം മാത്രമല്ല കാണിക്കുന്നത്. നമ്മൾ എങ്ങനെയുള്ള മനുഷ്യരാണ് എന്നതും അത് കാണിക്കുന്നുണ്ട്.
അതുകൊണ്ട്…
വിയോജിക്കാം, പക്ഷേ അപമാനിക്കാതെ.
തിരുത്താം, പക്ഷേ തകർക്കാതെ.
ചോദ്യം ചെയ്യാം, പക്ഷേ പരിഹസിക്കാതെ.
ശക്തമായി പറയാം, പക്ഷേ മാന്യത കൈവിടാതെ.
അഭിപ്രായങ്ങൾ വ്യത്യസ്തമായിരിക്കട്ടെ.
ബഹുമാനം മാത്രം നഷ്ടപ്പെടാതിരിക്കട്ടെ.
Murshida Parveen
