ഇഷ്ടഭക്ഷണം – മുതിര ഉപ്പേരി
ഞെട്ടരുത്!
ന്യൂസിലാൻറിലെ വലിയ നഷ്ടങ്ങളിൽ ഒന്ന് മുതിര ലഭ്യമായിരുന്നില്ല എന്നതായിരുന്നു.
നേന്ത്രപ്പഴം, പൈനാപ്പിൾ എന്നിവ വലിയ സിറ്റികളിൽ മാത്രമേ കിട്ടൂ. മാങ്ങ ഓസ്ട്രേലിയയിൽ നിന്നു വരണം. ചക്കപ്പഴം ടിന്നിലടച്ചത് തായ് ലൻറ്കാരുടെ – ഇങ്ങനെ ആണ് കാര്യങ്ങൾ.
പതിനഞ്ചു വർഷം മുൻപ് മുതിര പോലുള്ള ഒന്ന് വാങ്ങി. പരിപ്പ് പോലെ എന്തോ രുചി. രൂപം മാത്രമേ ഉള്ളൂ. വാൾനട്ട് കണ്ട് ചക്കക്കുരു വാങ്ങിയ അവസ്ഥ ആയിരുന്നു.
ഏതാനും ആഴ്ച മുൻപ് മുതിര പാക്കറ്റ് ഒന്ന് കടയിൽ കണ്ട് വീട്ടിലേക്ക് വിളിച്ചു. പണ്ട് പെട്ടത് ഓർമ്മയില്ലേ എന്നായിരുന്നു മറുപടി.
പഴയ മുതിരസ്മരണകൾ വീണ്ടും എന്നെ പിന്തുടർന്നു. കുട്ടിക്കാലത്ത് നുയമ്പ് ൽ പള്ളിയിൽ പോകുന്നതിൻ്റെ ഒരു ലക്ഷ്യം കഞ്ഞിയും മുതിരയും തന്നെ – ദുഖവെള്ളി ഉള്ളത് ഗ്രാൻ്റ് ആകും. കടുമാങ്ങയുടെ എരിവ്, അത് ഒരുക്കാൽ കഞ്ഞി.
ടോപ്പപ്പ് മുതിര ഉപ്പേരി.
ആഹാ!
അതാണ് നിർവ്വാണ!
പിന്നെ കുറച്ച് കാലം കഴിഞ്ഞപ്പോൾ പള്ളിയിൽ കടല ഉപ്പേരി ആയിരുന്നു. മുതിര പാർശ്വവൽക്കരിക്കപ്പെട്ടു അവിടെയും.
“ഇനി വരുന്ന തലമുറക്ക് ഇത് കഴിക്കാൻ സാധ്യമോ?
അര മണിക്കൂർ കുതിർക്കണം
ഒരു മണിക്കൂർ ഇളക്കണം”
പള്ളി ട്രസ്റ്റിക്ക് തളിക വരവ്, റസീറ്റ് എഴുതൽ തുടങ്ങിയ പണികൾ ഉള്ളതിനാൽ കഞ്ഞിയും മുതിരയും ടേബിളിൽ എത്തുന്ന പതിവ് , 24 വയസുകാരൻ ആസ്ഥാനത്ത് എത്തിയപ്പോൾ നിലച്ചു. മുതിരപ്പേരി രുചി ആ കാലത്ത് മണത്തിൽ ഒതുങ്ങിയിരുന്നു.
കടയിലെ പാക്കറ്റ് എന്നെ മഥിച്ചു. ദുഃഖവെള്ളി ഫ്രോസൻ പാക്കറ്റിലെ മാങ്ങ കൊണ്ട് കടുമാങ്ങ ഉണ്ടാക്കി ആശ തീർക്കുന്ന പതിവ് ഉണ്ട്.
പാക്കറ്റ് ഹോർസ് ഗ്രാം തന്നെ എന്ന് ഉറപ്പു വരുത്തി. അങ്ങനെ 20 കൊല്ലത്തിൽ ആദ്യമായി മുതിരപ്പേരി വിണ്ടും രുചിച്ചു. !
ലോകത്ത് എവിടെ പോയാലും മുതിര തേടുന്ന കുന്നംകുളം കാരൻ