വളരെ ആകാംക്ഷയോടെ വായിക്കാനെടുത്ത പുസ്തകമാണ് BC 261. പക്ഷേ എന്റെ ആദ്യവായന ഇടക്ക് മുറിഞ്ഞു പോയി. ചരിത്രം എന്റെ ഇഷ്ടവിഷയമാണെങ്കിലും പലവിധ ഉത്തരവാദിത്തങ്ങൾ ഒറ്റയിരുപ്പിനുള്ള വായനയെ തടസ്സപ്പെടുത്തി.
അവിചാരിതമായ കാരണങ്ങളാൽ പിന്നെ ആ വായന നീണ്ടുപോയി. അപ്പോഴൊക്കെയും ഞാനെഴുതിയ കഥയിലെ പൂർവ്വജന്മവും നാഡീ ജ്യോതിഷവും ആവർത്തിച്ചു കാണുന്ന സ്വപ്നവും ഒക്കെ നോവലുമായി എങ്ങനെ ബന്ധപ്പെട്ടു കിടക്കുന്നു എന്നറിയാനുള്ള ആകാംക്ഷ ബാക്കിയായി.
ചരിത്രവുമായി ബന്ധപ്പെടുത്തി ഒരു കഥ പറയുമ്പോൾ തീർച്ചയായും നമ്മുടെ മനസ്സും ശരീരവും ആ കാലഘട്ടത്തിലൂടെ സഞ്ചരിക്കണം. സൂക്ഷ്മമായ ഓരോ രംഗങ്ങളും ഭാവങ്ങളും നമ്മൾ കണ്ടും അനുഭവിച്ചും അറിയുന്നെങ്കിൽ അതു കഥാകാരമാരുടെ ആഖ്യാന മികവ് കൊണ്ടുതന്നെയാണ്. പുസ്തകത്തിന്റെ പുറംചട്ടയിൽ തുടങ്ങുന്ന നിഗൂഢതകൾ നമ്മെ കൊണ്ടെത്തിക്കുന്നത് ഒരു വിസ്മയ ലോകത്തേയ്ക്കാണ്. മലയാളത്തിൽനിന്ന് ലോകോത്തരമായ ഒരു ക്ലാസ്സ് സൃഷ്ടിയെന്നു നിസ്സംശയം പറയാം.
ഓരോ രഹസ്യങ്ങളുടെ ചുരുളുകൾ നിവരുമ്പോഴും പ്രിയറി ഓഫ് സയണിനേയും ഡാവിഞ്ചി കോഡിനേയും ഓർമ്മിപ്പിച്ചു. ആദ്യമൊരു കൊലപാതകവും അതിനെത്തുടർന്ന് കണ്ടെത്തുന്ന നിഗൂഡമായ ചില രഹസ്യങ്ങളുമാണ് രണ്ടു നോവലുകളിലേയും പ്രമേയമെങ്കിലും തീർത്തും വ്യത്യസ്തമായ കഥാപരിസരങ്ങളിലൂടെ നമ്മെ ചരിത്രത്തിലേക്ക് കൈപിടിച്ചു നടത്തുന്നു. ഡാവിഞ്ചികോഡിൽ കോഡ് ഡീകോഡ് ചെയ്യുന്നതു പോലെ തന്നെ ഇവിടെയും ചില പസിലുകൾ പോലെയുള്ള രേഖാചിത്രങ്ങൾ സോൾവ് ചെയ്തു പോകുമ്പോഴാണ് കഥ പുരോഗമിക്കുന്നത്. അതുകൊണ്ടു തന്നെ നമുക്ക് അനായാസം വർത്തമാന കാലത്തിൽനിന്ന് ചരിത്രത്തിലേക്ക് നടന്നുകയറാൻ സാധിക്കുന്നു.
ഇല്യുമിനാറ്റിയും പ്രിയറി ഓഫ് സയണും പോലെയുള്ള നിഗൂഡസംഘടനകൾ രഹസ്യമായി ലോകത്തെ നിയന്ത്രിക്കുന്നുവെന്നത് കാലങ്ങളായി പ്രചരിച്ചുവരുന്നതാണ്.’ ലൂസിഫർ’ പോലെയുള്ള സിനിമകൾ ഇതിനെ സാധൂകരിക്കുകയും ചെയ്യുന്നു. സമൂഹത്തിന്റെ സമസ്ത മേഖലകളിലും അത്തരം സംഘടനകളുടെ സ്വാധീനമുണ്ടെന്ന് വിശ്വസിക്കുന്നവരുമുണ്ട്. രണ്ടായിരത്തിമുന്നൂറ് വർഷം പഴക്കമുള്ള രഹസ്യങ്ങൾ നമ്മെ കൊണ്ടെത്തിക്കുന്നത് അത്തരം ചില നിഗൂഡതകളിലേക്കാണ്.
അപാരമായ ദൃശ്യമികവാണ് ഈ നോവലിൽ എടുത്തുപറയേണ്ട ഒന്ന്. ഒരു സിനിമ കാണുമ്പോൾ ഉള്ളിൽ പതിയുന്ന ദൃശ്യങ്ങളല്ല, ഭാവനയുടെ, ഫാന്റസിയുടെ ഒരു പുതിയ ലോകം തുറന്നിടാൻ കഥാകൃത്തുകൾക്കായിട്ടുണ്ട്. രാത്രി ഒരു മണി പൊരുന്തമൺ ജംഗ്ഷൻ എന്ന ഭാഗം ഭയവും ഉദ്യേഗവും നിറഞ്ഞ നെഞ്ചിടിപ്പോടെയല്ലാതെ വായിക്കാൻ പറ്റില്ല. ആ ഇരുളിലെ സൂക്ഷ്മായ ഓരോ ശബ്ദങ്ങളും ചെവിയിൽ പതിയുന്ന പോലെ…
ഒരു കൊലയാളിയുടെ രൂപം കൺമുന്നിൽ നിൽക്കുന്നത് പോലെ…
സിനിമകളിൽ ഇടവേളയ്ക്കു മുമ്പും ശേഷവും എന്നപോലെ പൊരുന്തമൺജംഗ്ഷന് മുമ്പുള്ള ആദ്യ പകുതി കൊലയാളിയിൽനിന്ന് വരദന്റെ മുഖ:ചിത്രം കണ്ടെടുക്കുന്നതോടെ രണ്ടാംപകുതി വായനക്കാർക്ക് ഊഹിച്ചെടുക്കാമെന്ന് തോന്നും. ആദ്യ പകുതിയിലെ സൂചനകളും വരദനുമായി സാദൃശ്യമുള്ള മുഖചിത്രവും കാണുന്നതോടെ സസ്പൻസ് തീർന്നുവെന്നു കരുതുന്നവർക്കുള്ള മറുപടിയാണ് രണ്ടാം പകുതിയിലെ വിസ്മയക്കാഴ്ചകൾ. കൊടുംകാടിന്റെ വന്യതയും ബൈഗകളും റാസ്നവയും ഒക്കെയായി നമ്മെ എൻഗേജ് ആക്കി നിർത്തും. അവിടെനിന്ന് രണ്ടായിരം വർഷത്തോളം പിന്നിലേക്ക് നമ്മളും അനായാസമായി നടന്നുകയറും. അവസാനപേജ് വരെ ഉദ്യേഗഭരിതമായി നിർത്തുന്ന രചനാ ശൈലി.
2023 ലെ ഏറ്റവും മികച്ച നോവലുകളിൽ ഒന്നാണ് BC 261 എന്നതിൽ സംശയമേതുമില്ല. ഒരുപാട് മികച്ച രചനകൾ ഇനിയും രഞ്ജു കിളിമാനൂർ ലിജിൻ ജോൺ രണ്ടുപേരിൽനിന്നും ഉണ്ടാകട്ടെ. ഒത്തിരിയേറെ അംഗീകാരങ്ങൾ തേടി വരട്ടെ
ആശംസകൾ… !
©seenanavaz
5 Comments
Nice review
എന്തായാലും വായിക്കണമല്ലോ😍😍
ഇറങ്ങിയ ഉടനെ പുസ്തകം വായിക്കണമെന്നു ആഗ്രഹിച്ചിരുന്നു നടന്നില്ല . സീനയുടെ റിവ്യൂവായിച്ചപ്പോ ഇപ്പൊ തന്നെ വായിക്കാൻ തോന്നുന്നു. പെട്ടെന്ന് സംഘടിപ്പിക്കണം.
❤️🥰
എന്തായാലും വായിക്കണമല്ലോ😍😍