സ്വപ്നങ്ങൾ യഥാർഥ്യമാകുമ്പോൾ

അവരിന്നു ഒത്തിരി സന്തോഷത്തിൽ ആണ്…

ആരെന്നല്ലേ… കുറച്ചു പെണ്ണുങ്ങൾ…

വായിക്കാൻ ഒത്തിരി ഇഷ്ടമുള്ള, ഈ എഴുതുന്നവർ ഇതൊക്കെ എങ്ങനെ എഴുതുന്നു എന്ന് ചിന്തിച്ചു അന്തം വിട്ടിരുന്ന, വീട്ടിലെ ജോലികളും കുട്ടികളും കുടുംബവും കഴിഞ്ഞാൽ വേറെ ഒന്നിനും സമയമില്ല എന്ന് ചിന്തിച്ചിരുന്ന, വേറെ എന്തെങ്കിലും ആവശ്യം ഉണ്ടോ എന്ന് പോലും തിരിച്ചറിയാതിരുന്ന കുറെ പെണ്ണുങ്ങൾ.

സോഷ്യൽ മീഡിയകളിലെ എഴുത്തും ബഹളവും ഒന്നും ദഹിക്കാത്ത, അതിന്റെ പുറകെ വരുന്ന ഇഴകീറിയുള്ള അഭിപ്രായങ്ങളും തർക്കങ്ങളും പേടിയുള്ള കുറെ പെണ്ണുങ്ങൾ. അവർക്ക് സമാധാനത്തോടെ വായിക്കാനായി ഒരിടം കിട്ടിയപ്പോൾ, ഒരുപോലെയുള്ള ഒത്തിരി പേര് ഒത്തു കൂടി. വായിക്കുന്നതിനൊപ്പം എഴുതിയവരെ കൂടെ പരിചയപ്പെട്ടപ്പോൾ, അവരും നമ്മളെ പോലെ തന്നേ ആണല്ലോ അപ്പോൾ നമുക്കും എഴുതി നോക്കാമല്ലോ എന്നൊക്കെ ചിന്തിക്കാൻ തുടങ്ങി ആ പെണ്ണുങ്ങൾ.

ഓരോരുത്തരുടെയും താൽപ്പര്യത്തിനനുസരിച്ചു എഴുതാനുള്ള അവസരങ്ങളുണ്ടായി. എന്തെഴുതും എന്ന് ആലോചിച്ചു നിൽക്കുന്നവർക്ക് ചെറിയ ചെറിയ ഇരയിട്ട് കൊടുക്കാനും, സമ്മാനങ്ങളും നിർദ്ദേശങ്ങളും കൊടുത്തു പ്രോത്സാഹിപ്പിക്കാനും അവിടെ ചിലരുണ്ടായിരുന്നു.

വായിക്കുക എന്നല്ലാതെ ഒരിക്കലും ഒരു കഥയൊന്നും എഴുതുന്നുണ്ടാവില്ല എന്ന് കരുതിയവർ ദിവസവും പുതിയ പുതിയ കഥകൾ എഴുതി. പലരും അതൊക്കെ കൂട്ടി വെച്ചു പുസ്തകങ്ങളായി പ്രസിദ്ധീകരിച്ചു തുടങ്ങി.

സന്തോഷത്തിന്റെ പാരമ്യത്തിൽ, ഭാവിയിലേക്കുള്ള എഴുത്തിന്റെ നൂറു നൂറു സ്വപ്നങ്ങളുമായി നിൽക്കുമ്പോൾ വെള്ളിടി പോലെ ഒരു വാർത്ത വന്നു. ആ ഇടം അവർക്ക് നഷ്ടമാകുന്നു. കീറി മുറിയുന്ന വേദനയിലും അവർ ഉള്ളത് വെച്ച് ആശ്വസിക്കാൻ ശ്രമിച്ചു. ഒന്നും സാധിക്കില്ല എന്ന് തോന്നിയിടത്തു നിന്ന് ഇത്രയും ആയില്ലേ, ഇത്രേം കൂട്ടുകാരെ കിട്ടിയില്ലേ, ഇത്രയും അനുഭവങ്ങൾ കിട്ടിയില്ലേ… എന്നാലും…

എന്നാലും ഒരിക്കൽ കൂടെ പഴയത് പോലെ എഴുതാനും കൂട്ടുകൂടാനും പറ്റിയ ഒരിടം ഉണ്ടായിരുന്നെങ്കിൽ എന്ന് അവർ പരസ്പരം പറഞ്ഞു നെടുവീർപ്പിട്ടു. ചേർത്ത് പിടിച്ചു നടത്തിയിരുന്നവരുടെ വേദന, തങ്ങൾ അനുഭവിക്കുന്ന വേദനയേക്കാൾ വലുതാണെന്ന തോന്നൽ ആയിരുന്നിരിക്കാം, ആ കൂട്ടത്തിന്റെ നേതാക്കൾ ആയ രണ്ടു പേർക്ക് അടുത്ത തലത്തിലേക്ക് ചിന്തിക്കാനുള്ള ധൈര്യം കൊടുത്തത്.

പിന്നീട് ആ രണ്ടു പേരുടെ യാത്ര, വിശ്വസിച്ചു പുറകിൽ കൂടിയവരുടെ സ്വപ്നങ്ങളെ കൂടെ മുറുക്കിപ്പിടിച്ചുകൊണ്ടായിരുന്നു. അങ്ങനെ അവരിന്നു ആ യാത്ര തുടങ്ങുകയാണ്. ഒത്തിരി കൂട്ടുക്കാർക്ക് കൂട്ടിനു കൂട്ടക്ഷരങ്ങളുമായി.

ആശംസകൾ