പുരുവും ഇരയാണ് !!!!

“ആണ്ടവാ.. അതാണ് മരണം.. അവന്റെ ആത്മാവിപ്പോ സ്വർഗ്ഗത്തിൽ കിടന്ന് ആർമ്മാദിക്കുകയായിരിക്കും..”

ക്യാംപസ് തലമുറകളിൽ നിന്നും തലമുറകളിലേക്ക് വാമൊഴിയായി പറഞ്ഞു വന്ന ‘പതിനേഴു പോലും തികയാത്ത പാൽക്കാരൻ പയ്യന്റെ’ കഥ സിനിമയിൽ എത്തിയപ്പോൾ മലയാള സിനിമയിലെ മികച്ച ഡാർക്ക് കോമഡികളിൽ ഒന്നായി ഈ ഡയലോഗ് ഇന്നും ആഘോഷിക്കപ്പെടുന്നു.

പീഡിപ്പിക്കപ്പെട്ട പെൺകുട്ടി, എന്നത് പിന്നീട് ‘ഇര’യായും ‘അതിജീവിത’ യായും കാലത്തിനനുസരിച്ചു വിവേകവും പുരോഗമനവും കൈവരിക്കപ്പെടുന്ന സമൂഹം നാമമാറ്റം ചെയ്യപ്പെടുകയും, ‘നിർഭയ’ പോലെയുള്ള പദ്ധതികളിലൂടെ പുരുഷ മേൽക്കോയ്മ കീഴ്‌പ്പെടുത്തി വെച്ചിരുന്ന സ്ത്രീകൾക്ക് ധൈര്യവും ഊർജവും പകരുന്നുണ്ട്. വളരെ നല്ല കാര്യം തന്നെ.

പക്ഷെ പീഡിപ്പിക്കപ്പെടുന്ന പുരുഷൻ ഇന്നും പരിഹാസ്യനാണ്. ഞാൻ പീഡിപ്പിക്കപ്പെട്ടു എന്ന് പറയുന്ന ആണിനെ “രണ്ടും കെട്ടവനായും”, “#ണ്ടിക്ക് ഉറപ്പില്ലാത്തവനായും” ചാപ്പ ചാർത്തിക്കൊടുക്കുന്നതാണ് ഈ സമൂഹം.

കഴിഞ്ഞ ദിവസം ഒരഭിമുഖത്തിൽ ഫോട്ടോയെടുക്കുന്നതിനിടെ ഒരു പ്രായമായ സ്ത്രീ തന്റെ സ്വകാര്യഭാഗത്ത് സ്പർശിച്ച ദുരനുഭവം ദുൽഖർ സൽമാൻ വെളിപ്പെടുത്തിയപ്പോഴും, ഇതിനെതിരെ പ്രതികരിക്കുന്നവൻ പുരുഷനല്ലെന്നും പുരുഷൻ ഇത് ആസ്വദിക്കേണ്ടവനാണെന്നുമുള്ള തരത്തിൽ നോർമലൈസ് ചെയ്തുകൊണ്ടും, പുരുഷന്മാരുടെ ഇത്തരത്തിലുള്ള വെളിപ്പെടുത്തലുകൾ അറ്റെൻഷൻ സീക്കിങ് തന്ത്രം മാത്രമാണെന്നും, സ്ത്രീകൾ ഇത്തരം പ്രവർത്തികൾ ചെയ്യുന്നത് നമ്മളോടുള്ള സ്നേഹം കൊണ്ടാകുമെന്നും, സ്ത്രീകളെപ്പോലെ മോങ്ങാനും “മീ ടൂ” ആരോപണവുമായി ഇറങ്ങുന്ന നാണമില്ലാത്തവൻ എന്നും, ഇതൊക്കെ ആസ്വദിക്കേണ്ടവരാണ് നമ്മൾ ആണുങ്ങളെന്നും, ഉപദേശമായും, കളിയാക്കലും, പുച്ഛവുമായും പറയുന്ന പല വിധം പുരുഷ കേസരികളും പറയുന്നത് ഒരേയൊരു കാര്യമാണ്.

“പീഡിപ്പിക്കപെട്ടാൽ പുരുഷൻ മിണ്ടരുത്!!.”

പണ്ട്, പീഡിപ്പിക്കപ്പെട്ട വിവരം പുറത്തു പറഞ്ഞാൽ നമുക്കും കുടുംബത്തിനുമാണ് ചീത്തപ്പേര് എന്ന് പെൺകുട്ടികളെയും സ്ത്രീകളെയും പഠിപ്പിച്ച ‘കുല ബോധം’ മാറ്റിപ്പറയാൻ ശീലിപ്പിച്ച ആധുനിക സമൂഹം ഇപ്പോഴും പുരുഷൻ പീഡിതനാകുന്ന വിഷയം അംഗീകരിക്കാൻ എന്തിന് വിസമ്മതിക്കുന്നു ?

ചരിത്രാതീത കാലം മുതൽ തന്നെ manhood, masculinity എന്നിവ സ്ത്രീകൾക്കും, കുട്ടികൾക്കും, ലിംഗേതരർക്കും മുകളിൽ ഡോമിനസ് അഥവാ കീഴ്പ്പെടുത്തലുകളെ അടയാളപ്പെടുത്തുന്നുണ്ടെന്ന കാര്യം പറയേണ്ടതില്ലലോ? അതിനാൽ താൻ ലൈംഗികമായി കീഴ്‌പെട്ടുവെന്ന പുരുഷന്റെ ഏറ്റുപറച്ചിൽ പുരുഷകുലത്തിന് അപമാനമാണെന്നാണ് സമൂഹം വിലയിരുത്തുന്നത്.

വരട്ടെ… ഈ സമൂഹമെന്ന് പറയുമ്പോൾ, നമ്മൾ മലയാളികൾ ഇങ്ങനെയൊക്കെയാണ്. ഇത് ഇന്ത്യയിൽ മാത്രമേയുള്ളു. നാട്ടിൻ പുറത്തുള്ളവരുടെ കാഴ്ചപ്പാടാണ് എന്നിങ്ങനെയുള്ള ക്യാപ് ഇടരുത്.

തീർച്ചയായും ഇതൊരു ആഗോള ചിന്താഗതിയാണ്.

സ്ത്രീകളാൽ മാത്രമല്ല, സ്വവർഗ്ഗത്തിൽ നിന്നുള്ള ബോഡി ഷെയ്മിങ് ഏറ്റവും കൂടുതൽ നേരിടേണ്ടി വരുന്നത് പുരുഷന്മാരാണ് എന്നാണ് പലപ്പോഴും തോന്നിയിട്ടുള്ളത്‍. കൗമാരത്തിൽ നിന്നും പൗരുഷത്തിലേക്ക് വളരുന്ന പ്രായത്തിൽ കൂട്ടുകാരുമൊത്ത് ഒന്നിച്ചു കുളിക്കാൻ വല്ല കുളത്തിലോ പുഴക്കടവിലോ പോയാൽ, കൂട്ടത്തിൽ ഉള്ള ഒരുത്തനെ സാധാരാണ കളിയാക്കുന്നത് എന്ത് പറഞ്ഞിട്ടാണെന്നു ഒന്നിച്ചു പോയവർക്കറിയാം. കുളിക്കാൻ തന്നെ പോണം എന്നില്ല. ഒന്നിച്ചു ഒന്ന് മൂത്രമൊഴിക്കാൻ പോയാലും പലപ്പോഴും ഇതു തന്നെ ഗതി.

ബസ്സുകളിലും തിരക്കുള്ള മറ്റ് പൊതു ഇടങ്ങളിലും അപ്രതീക്ഷിതമായി ഇരു തുടകള്‍ക്കും നടുവിലേക്ക് അരിച്ചിറങ്ങി വരുന്ന വൃത്തികെട്ട കൈ നേരിടേണ്ടി വന്നിട്ടില്ലാത്ത ബാല്യവും, കൗമാരവും, യൗവനവും എത്ര പുരുഷന്മാർക്കുണ്ട്? അതായത് ദുൽഖറിനെ മാറ്റിനിർത്തിയാലും പുരുഷൻ പീഡിപ്പിക്കപ്പെടുന്നത് സ്ത്രീയാൽ മാത്രമല്ല എന്നും തറപ്പിച്ചു പറയേണ്ടിയിരിക്കുന്നു.

ശാസ്ത്രീയ പഠനങ്ങൾ പറയുന്നത്, പുരുഷന്മാരാൽ പീഡിപ്പിക്കപ്പെടുന്ന സ്ത്രീകളും, സ്ത്രീകളാൽ പീഡിപ്പിക്കപ്പെടുന്ന പുരുഷന്മാരും തമ്മിൽ അനുപാത വ്യത്യാസം ഉണ്ടെങ്കിലും, പീഡിപ്പിക്കപ്പെടുന്ന പുരുഷന്മാർ എല്ലാക്കാലത്തും ഉണ്ടെന്നാണ്. ഓർക്കുക അസ്വസ്ഥത ഉണ്ടാക്കുന്ന ഓരോ സ്പർശനവും പീഡനം തന്നെയാണ്.

അല്ലയോ മാന്യ മഹാ ##കളെ.. അനുവാദമില്ലാതെ ഒരാളുടെ ശരീരത്തിലേക്ക് അതിക്രമിച്ചുള്ള കടന്നുകയറ്റം എന്നും തെറ്റാണ്. നിങ്ങൾ കരുതുന്നത് പോലെ സ്ത്രീകൾ നടത്തുന്ന ശാരീരിക കടന്നുകയറ്റമെന്നത് എല്ലാ ആണുങ്ങളും ആസ്വദിക്കാറുമില്ല. പെണ്ണിനെ തൊടാൻ ഒരാണിന് കൺസെന്റ് വേണമെന്നതും, നേരെ തിരിച്ചാകുമ്പോൾ കൺസെന്റ് പ്രസക്തമല്ല എന്നത് വെറും തെറ്റായ സോഷ്യൽ കണ്ടീഷനിംഗ് മാത്രമാണ്.

അതുപോലെതന്നെ പ്രസക്തമാണ് ആൺകുട്ടികൾക്ക് നൽകേണ്ട ലൈംഗിക വിദ്യാഭ്യാസവും. പെൺകുട്ടികൾക്കു രക്ഷിതാക്കളിൽ നിന്നും അദ്ധ്യാപകരിൽ നിന്നും ഇന്ന് ലഭിച്ചുകൊണ്ടിരിക്കുന്ന ലൈംഗിക വിദ്യാഭ്യാസമെന്നത്, ആൺകുട്ടികൾക്ക് ഇല്ലാത്തൊരു പ്രിവിലേജ് കൂടെയാണ്. ഒരാൺകുട്ടിക്ക് sex education നൽകേണ്ടത് അത്രകണ്ട് പ്രധാനമല്ല എന്ന് സമൂഹം കരുതുന്നതും എന്തുകൊണ്ട്?

ലൈംഗിക വിദ്യാഭ്യാസം എന്ന പേരിൽ സുഹൃത്തുക്കളിൽ നിന്നോ, സമപ്രായക്കാരിൽ നിന്നോ, ശരിയായി ലൈംഗിക വിദ്യാഭ്യാസത്തെ കുറിച്ചറിവില്ലാത്ത ignorant ആയ മുതിർന്നവരിൽ നിന്നോ ആണ് പല ആൺകുട്ടികളും നേടുന്ന അപകടകരമാം വിധം തെറ്റായ ലൈംഗിക അറിവുകൾ.

അതിന്റെ പുറത്ത്, “ഒന്ന് മുട്ടിയാൽ അവളെ കിട്ടിയേക്കും” എന്ന ചിന്തയിൽ നിന്നോ, “ഇങ്ങോട്ട് കേറി മുട്ടിയാൽ, പിന്നൊന്നും നോക്കരുത് കേറിയങ്ങ് മേഞ്ഞോണം ” എന്നും മുതലായ ബുദ്ധിശൂന്യമായ അറിവുകളുമാണ് ആണുങ്ങളെ പലപ്പോഴും വെട്ടിലാക്കുന്നതും. അതിനാൽ sex education എന്നത് വരും തലമുറയിൽ എല്ലാവർക്കും പകർന്നു നൽകേണ്ട അറിവുകൂടിയാണെന്നും ഓർമ്മിപ്പിക്കുന്നു.

നിങ്ങളുടെ അഭിപ്രായപ്രകാരമുള്ള ആ സുഖ: സ്പർശനമെന്നത് അത് അനുഭവിക്കുന്നവർക്ക് ഒരു പരിധിയിലധികമായാൽ പീഡനം തന്നെയാണ്. ആ പരിധി എന്നത് 100% വ്യക്തിപരവുമാണ്. അതായത് ഉത്തമാ, ചിലർക്ക് അന്യരുടെ ഒരു സ്പർശനം തന്നെ അരോചകമായേക്കാം, ചിലർക്ക് അതിന് സ്പർശനത്തിന്റെ വ്യതിയാനം മാറണം. മറ്റു ചിലർക്കത് ആര് എവിടെ തൊടുന്നു എന്നതിനെ ആശ്രയിച്ചുമിരിക്കും. അതുകൊണ്ട്, പുരുഷനെ സ്ത്രീ തൊട്ടാലത് പീഡനമല്ല, പരമാനന്ദ സുഖമാണെന്ന ചിന്ത എല്ലാവരിലേക്കും അടിച്ചേൽപിക്കാൻ നിൽക്കരുത്.

ഇപ്പോഴും മനസിലാകാത്തത് പീഡനങ്ങളിൽ എന്തുകൊണ്ടാണ് എന്നും സ്ത്രീകളും, കുട്ടികളും മാത്രം ഇരകളാകുന്നത്? പുരുഷന്മാർ സ്ത്രീകളാൽ പീഡിതരാകാറില്ലേ? പുരുഷ പീഡനം എന്നൊന്ന് നമ്മുടെ നിയമ വ്യവസ്ഥയിൽ നിർവചിക്കപ്പെട്ടിട്ടുണ്ടോ? അങ്ങനെയെങ്കിൽ, കുറ്റക്കാരായവർ സ്ത്രീയോ പുരുഷനോ മറ്റുള്ളവരോ ആണെങ്കിൽ അതിനുള്ള ശിക്ഷ ലിംഗഭേദമന്യേ ആണോ ?

സ്വവർഗ്ഗത്തിൽ നിന്നും എതിർ ലിംഗങ്ങളിൽ നിന്നും ഉള്ള പീഡനം കൂടുതൽ നേരിടേണ്ടി വരുന്നതും പുരുഷനാണ്.
കൂടുതലും സ്ത്രീകൾ പീഡിപ്പിക്കപ്പെടുന്ന ലോകമായതിനാൽ, പുരുഷൻ നേരിടേണ്ടി വരുന്ന പീഡനം അപ്രസക്തമാകേണ്ടതില്ല. പീഡിതരാകുന്നവർക്ക് ഒരേയൊരു അടയാളം മതി “പീഡിതർ”. അതുപോലെ പീഡിപ്പിക്കുന്നവർക്കും ലിംഗഭേദമന്യേ എന്നും ഒരു പേര് മതി “പീഡകർ”.

****