മാഡം സൂസു

മാഡം സൂസു (ഒരു കൊറോണക്കാലാനന്തര കഥ)

വാട്ട് സാപ്പിൽ ഫിസിക്കൽ ട്രെയിനിങ്ങിനെക്കുറിച്ചുള്ള മാഡം സൂസുവിൻ്റെ ക്ലാസ് കേട്ടിരിക്കുമ്പഴാ ഭാര്യ വന്ന് ഇന്ന് സ്കൂൾ മീറ്റിങ്ങുണ്ടെന്ന് പറഞ്ഞത്. ആദ്യം ഞാൻ മൈൻ്റ് ചെയ്തില്ലെങ്കിലും പിന്നേയാണ് എനിക്കോടിയത്, ഇവൾ സ്കൂൾ മീറ്റിങ്ങിന് പോയാൽ എനിക്ക് മറ്റവളുമായി ചാറ്റാമല്ലോ എന്ന്.

ഭാര്യയോട് സ്കൂൾ മീറ്റിൻ്റെ സമയം ചോദിച്ചറിഞ്ഞു മറ്റവൾക്ക് ഇൻബോക്സിൽ പോയി മെസ്സേജിട്ടു, മൂന്ന് മണിക്ക് വീഡിയോ ലൈവിൽ വരാമെന്ന്.

വീണ്ടും മാഡം സൂസുവിൻ്റെ സന്നിധാനത്തിൽ ഹാജരായി പഞ്ചപുച്ഛമടക്കി നിക്കുമ്പഴാണ് ഭാര്യ പിറകിൽ നിന്ന് തോണ്ടി പറഞ്ഞത് “മൂന്ന് മണി മറക്കണ്ടാന്ന്”.
ശേഷം മാഡം സൂസുവിനെ ഒന്നിരുത്തി നോക്കിയതിന് ശേഷം ഭാര്യ അവളുടെ പാട്ടിന് പോയി.

ലോക് ഡൗണും തോരാത്ത മഴയും കാരണം വീട്ടിൽ നിന്നും പുറത്തിറങ്ങാൻ പറ്റാത്തതിനാൽ മറ്റവളുമായി വീഡിയോ ചാറ്റ് കുറച്ചു ദിവസമായി നടക്കാറില്ല.

മുമ്പൊരു ദിവസം ഏതോ ഒരുത്തി ഞാൻ ഒറിജിനലാണോ എന്നറിയാൻ വേണ്ടി ഇൻബോക്സിൽ വന്ന സമയത്താണ് ഭാര്യയുടെ എഴുന്നള്ളത്തുണ്ടായത്.

എൻ്റെ പിറകിൽ നിൽക്കുന്ന ഭാര്യയെ കണ്ട് സൈക്കിളിൽ നിന്ന് വീണ ചിരിയുമായി നിൽക്കുന്ന ആ ഒരുത്തിയെ ഭാര്യ മൊബൈലോടെ പിടികൂടി വലിച്ചെറിഞ്ഞത് അയൽവാസി അടുക്കളപ്പുറത്തേക്ക് വലിച്ചുകെട്ടിയ ടാർപോളിനു മുകളിലേക്കായിരുന്നു.

മൊബൈൽ ടാർപോളിനു മുകളിൽ വീഴുന്ന ശബ്ദം കേട്ട് മാങ്ങയാണെന്ന് തെറ്റിദ്ധരിച്ച് എടുക്കാൻ വേണ്ടി ഓടി വന്ന അയൽവാസിയുടെ ഭാര്യ കാല് പിണച്ച് വീണപ്പൊ താങ്ങിയെടുത്തു ആശുപത്രീ കൊണ്ടുപോകാൻ ഭാര്യ തന്നെ ഓടിച്ചെല്ലേണ്ടി വന്നതിനാൽ പിന്നെ വീട്ടിൽ പ്രശ്നം ഒന്നും ഉണ്ടായില്ലാ എന്ന് മാത്രം.

അതു കൊണ്ട് മറ്റൊരു സീനിനു കൂടി ഈയുള്ളവന് ധൈര്യമില്ലാത്തതിനാൽ ചാറ്റിങ്ങും ചീറ്റിങ്ങുമൊക്കെ വെറും ടൈപ്പിങ്ങു മാത്രമായി.
ഞാനാണെങ്കി ടൈപ്പ് ചെയ്താൽ അത്യാവശ്യം പഞ്ചസാര കലർന്ന സാഹിത്യം കടന്നു വരുമെന്നതിനാൽ സൂക്ഷ്മതക്കു വേണ്ടി അതൊക്കെ വെട്ടിയൊഴിവാക്കി വീണ്ടും തപ്പിത്തടഞ്ഞ് എഴുതി വരുമ്പോഴേക്കും അവള് ഒരു നാല് ദോശയെങ്കിലും ചുട്ടിട്ടുണ്ടാകും.

അങ്ങനെ പറയാനുള്ളത് മുഴുവൻ പറയാതെ വഴിവക്കിൽ തന്നെ തപ്പിത്തടഞ്ഞ് നിൽക്കുന്ന സമയത്താണ് ഭാര്യയുടെ സ്കൂൾ മീറ്റിങ്ങ്.

അങ്ങിനെ മൂന്ന് മണിക്ക് കുറച്ച് മുമ്പ് ഉറങ്ങുകയാണെന്ന വ്യാജേന കണ്ണടച്ച് കിടന്നെങ്കിലും അറിയാതെ ഒന്ന് മയങ്ങിപ്പോയി.
പക്ഷേ, ആഗ്രഹം പോലെ തന്നെ മൂന്ന് മണിക്ക് പത്ത് മിനിറ്റു മുമ്പ് തന്നെ ഞാൻ ഉണർന്നു.

വേഗം പോയി മുഖം കഴുകി മുടിയൊക്കെ ചീകി പൗഡറൊക്കെയിട്ടു സുന്ദരക്കുട്ടപ്പനായി മൊബൈലുമെടുത്തു കോലായിലേക്കോടി.
അവിടെയാകുമ്പൊ സ്കൂൾ മീറ്റിങ്ങിനു പോയ ഭാര്യ തിരിച്ചു വരുമ്പൊ കാണുകയും ചെയ്യാം വീഡിയോ നല്ല ക്ലിയറായി കിട്ടുകയും ചെയ്യും.

അങ്ങനെ കൃത്യം മൂന്ന് മണിക്ക് തന്നെ ഒരു ഹായ് വിട്ട് അവൾ ഓൺലൈനിലുണ്ടെന്ന് ഉറപ്പു വരുത്തി വീഡിയോ ചാറ്റിലേക്ക് കടന്നതും പിന്നിലൊരനക്കം.

തിരിഞ്ഞു നോക്കിയപ്പോൾ ഭാര്യയുണ്ട് പിന്നിൽ ഭദ്രകാളിയേപ്പോൽ നിൽക്കുന്നു.

ഫോണിലെ മെസ്സഞ്ചറിൽ അവളുടെ മുഖം തെളിഞ്ഞതും ഞാൻ സ്ക്രീൻ പൊത്തിപ്പിടിച്ചു തിരിഞ്ഞു നിന്നു ഭാര്യയോട് ചോദിച്ചു.
” സ്കൂളിൽ പോയില്ലെ” ചോദിച്ചതും ഭാര്യ ഫോൺ പിടിച്ചു വലിച്ചതും ഒരുമിച്ചായിരുന്നു.

ഭാഗ്യം എന്നല്ലാതെന്തു പറയാൻ,.

എൻ്റെ സ്ക്രീൻ പൊത്തിപ്പിടിക്കലിലും ഭാര്യയുടെ വലിയിലും വാട്സാപ്പിൻ്റെ നോട്ടിഫിക്കേഷനിൽ വിരൽ തൊട്ടു.നോട്ടിഫിക്കേഷൻ വന്നത് തടി കൂട്ടാതെ തീറ്റ എങ്ങനെ വർദ്ധിപ്പിക്കാം,,, സോറി, തീറ്റ കുറക്കാതെ തന്നെ എങ്ങിനെ തടി കുറയ്ക്കാം എന്ന ഫിസിക്കൽ ട്രയിനർ മാഡം സൂസുവിൻ്റെ ഗ്രൂപ്പ് വീഡിയോ ചാറ്റിൻ്റെ രണ്ടാം സെഷനിലേക്കായിരുന്നു.

ഹൊ! ഇതായിരുന്നോ എന്ന ഭാവത്തിൽ ഭാര്യ ഫോൺ തിരിച്ചു തന്നപ്പൊ രക്ഷപ്പെട്ടത് ഫോണും ഞാനും അയൽവാസിയുടെ ടാർപോളിന്നും ഒക്കെയായിരുന്നു.

അല്ലെങ്കിൽ കാണാമായിരുന്നു പൊടിപൂരം.

ഇതാണ് കാള പെറ്റു എന്ന് കേട്ടാൽ കയറെടുത്താലുള്ള അവസ്ഥ.

അന്ന് സ്കൂൾ മീറ്റ് ഓൺലൈനിലായിരുന്നു സൂർത്തുക്കളെ.

ഹുസൈൻ എം കെ