ഇന്ന് ഫെബ്രുവരി 14 വാലന്റൈൻസ് ഡേ, മനസിലുള്ള പ്രണയം തുറന്നുപറയാനും സമ്മാനങ്ങൾ കൊടുത്തും വാങ്ങിയും പ്രണയം ആഘോഷിക്കുമ്പോൾ, ആ ദിനം എങ്ങിനെ നമ്മളിലേക്ക് എത്തിയെന്നുള്ള ചരിത്രത്തിലേക്ക് ഒന്ന് പോയി വരാം…
268 മുതൽ 270 വരെ റോമൻ ചക്രവർത്തിയായിരുന്ന ക്ലോഡിയസ് രണ്ടാമൻ എന്നന്ന മാർക്കസ് ഔറേലിയസ് ക്ലോഡിയസ് ഗോത്തിക്കസിന്റെ ഭരണ കാലത്ത് വാലൻന്റൈൻ എന്നൊരാളായിരുന്നു കത്തോലിക്ക സഭയുടെ ബിഷപ്പ്.
വിവാഹം കഴിഞ്ഞാൽ പുരുഷന്മാർക്ക് കുടുംബം എന്നൊരു ചിന്ത മാത്രമേയുള്ളൂ എന്നും യുദ്ധത്തിൽ ഒരു വീര്യവും അവർ കാണിക്കുന്നില്ല എന്നുതോന്നിയ ചക്രവർത്തി, റോമിൽ വിവാഹം നിരോധിച്ചു.
എന്നാൽ, ബിഷപ്പ് വാലൻന്റൈൻ പരസ്പരം സ്നേഹിക്കുന്നവരെ മനസ്സിലാക്കി അവരുടെ വിവാഹം രഹസ്യമായി നടത്തിക്കൊടുക്കാൻ തുടങ്ങി. വിവരം അറിയാനിടയായ ക്ലോഡിയസ് ചക്രവർത്തി വാലൻന്റൈനെ ജയിലിൽ അടച്ചു. ബിഷപ്പ് വാലൻന്റൈൻ ജയിലറുടെ അന്ധയായ മകളുമായി സ്നേഹത്തിൽ ആയി.
ഇതറിഞ്ഞ ചക്രവർത്തി വാലന്റൈന്റെ തല വെട്ടാൻ ആജ്ഞ നൽകി. തലവെട്ടാൻ കൊണ്ടുപോകുന്നതിൻ്റെ തലേന്ന് അദ്ദേഹം അന്ധയായ തന്റെ പ്രണയിനിക്ക് കത്തെഴുതി. എന്ന് സ്വന്തം വാലന്റൈൻ എന്ന് പറഞ്ഞുകൊണ്ടായിരുന്നു കത്ത് അവസാനിപ്പിച്ചത്. എഡി 270 ഫെബ്രുവരി 14 ആം തിയതി അദ്ദേഹത്തിന്റെ തലവെട്ടി. ആ കത്ത് ജയിലർ മകൾ സമ്മാനിച്ചു. അതിൽ ഒരു മഞ്ഞപ്പൂവ് ഉണ്ടായിരുന്നു. അത് നോക്കിയപ്പോൾ പെൺകുട്ടിയുടെ കാഴ്ച തിരിച്ചുകിട്ടിയെന്ന് പറയപ്പെടുന്നു.
അഞ്ചാം നൂറ്റാണ്ടിന്റെ അവസാനത്തിൽ പോപ്പ് ഗെലാസിയസ് ആണ് ബിഷപ്പ് വാലൻന്റൈന്റെ ഓർമ്മയ്ക്കായി ഫെബ്രുവരി 14 ആം തിയതി സെന്റ് വാലന്റൈൻസ് ദിനമായി പ്രഖ്യാപിച്ചത്.
അതിനു ശേഷമാണ് ഫെബ്രുവരി 14 ആം തിയതി വാലൻന്റൈൻ ദിനം ആഘോഷിക്കാൻ തുടങ്ങിയത്.
