ആകാശപുത്രി

അമ്പിളിനിലാവിലലിഞ്ഞു സ്വപ്നം കണ്ടവരിൽ ചിലർ നിലാവിന്റെ ഭംഗിയും തണുപ്പും വിഷയമാക്കി കവിതകളും കഥകളും രചിച്ചു. അമ്പിളി മാമനെ കൈയെത്തിപ്പിടിക്കാൻ ആഗ്രഹിച്ച ബാല്യം നമുക്കുണ്ടായിരുന്നു. പക്ഷെ ഒരു ബഹിരാകാശഗവേഷകയാകുക എന്ന രീതിയിൽ ചിന്തിച്ചവർ വളരെ കുറവായിരിക്കും.

ലളിതമായ കാര്യങ്ങൾ സ്ത്രീകൾക്കും വെല്ലുവിളി നിറഞ്ഞ മേഖലകൾ പുരുഷന്മാർക്കും നീക്കിവെച്ച സംസ്ക്കാരത്തിൽ ഇതിലൊട്ടും അത്ഭുതമില്ലല്ലോ. നല്ലൊരു കുടുംബിനിയാകുന്നതിനേക്കാൾ ഉത്തമമായിട്ടൊന്നും സ്ത്രീകൾക്കില്ലയെന്ന്, എന്നും ആൺമേൽക്കോയ്മ അടിവരയിട്ടുക്കൊണ്ടിരിക്കുന്നു.

എന്നാൽ ഇതിനൊന്നും ചെവികൊടുക്കാതെ ആകാശത്തിൽ മൂളിപ്പറക്കാൻ ആഗ്രഹിച്ച
സാഹസികയായ ഇന്ത്യൻ പെൺകുട്ടിയായിരുന്നു കൽപ്പന ചൗള.
നല്ലൊരു സർക്കാർ ഉദ്യോഗവും നല്ല കുടുംബവും എന്നതിനുപരി ശരാശരി ഇന്ത്യൻ സ്ത്രീകൾ സ്വപ്നം കാണാൻ ഭയന്നിരുന്ന കാലത്താണ് കൽപ്പന തന്റെ ഉറച്ച തീരുമാനമെടുത്തത്.അതു യാഥാസ്ഥിതകരെ തീർത്തും അലോസരപ്പെടുത്തി.

ഉയർന്ന വിദ്യാഭ്യാസം നേടിയിട്ടും എല്ലാ
തൊഴിൽമോഹങ്ങളും ത്യജിച്ചു് വീട്ടമ്മമാരായി ഒതുങ്ങിക്കൂടി, വിധിയെ പഴിക്കുന്നവർ ഇന്നും ധാരാളമുണ്ട്. വിദ്യാഭ്യാസം തൊഴിൽ സമ്പാദനത്തിനുള്ള മാർഗ്ഗം മാത്രമായി കരുതണം എന്നല്ല വിവക്ഷിക്കുന്നത്. തൊഴിൽ ചെയ്യാനും ആ മേഖലയിൽ വളരാനും ആഗ്രഹിക്കുന്ന സ്ത്രീകളെ കുറിച്ചാണ് പാരാമർശിക്കുന്നത്.

അതിരുകളില്ലാത്ത ആകാശം പോലെയായിരുന്നു,ബുദ്ധിമതിയായ പെൺകുട്ടിക്ക് നേരിടേണ്ടി വന്ന പ്രതിബന്ധങ്ങളുടെ വ്യാപ്തി.അവയെല്ലാം അതിജീവിച്ചാണ് കൽപ്പന ആകാശനീലിമയിലേക്ക് ധീരതയോടെ പറന്നുയർന്നത്.

അമേരിക്കയിലെ ഫ്ലോറിഡയിൽ, Kennedy Space Centre സന്ദർശനം എന്നും ഞാൻ ഓർമ്മിക്കുന്ന യാത്രയാണ്. അമേരിക്കൻ ബഹിരാകാശഗവേഷണങ്ങളുടെ കേന്ദ്രമായ
നാസയിലെ( NASA) ഒഴുകി നീങ്ങുന്ന അനേകം സന്ദർശകർക്കിടയിൽ ഒരു ബിന്ദുവായി നടന്നു നീങ്ങുമ്പോൾ വിജയവും പരാജയവും ഒരേ പ്രാധാന്യത്തോടെ ഓർമ്മിക്കപ്പെടുന്നതു കണ്ടു. ഒരു വിജയത്തിന്റെ ആഘോഷത്തിൽ മതിമറന്നിരിക്കാതെ വീണ്ടും അതെ ഉത്സാഹത്തോടെ ഭാവി വിജയങ്ങൾക്കായി അഹോരാത്രം ശ്രമിക്കുന്ന ഒരു കൂട്ടം മനുഷ്യരുടെ പ്രയത്‌നം, ചിത്രങ്ങൾ, സിനിമകൾ  പ്രദർശനവസ്തുക്കൾ എന്നിവയായി അവിടെ നിരത്തിയിരിക്കുന്നു.

NASA മൊത്തം പതിനേഴ് Apollo missions നടത്തിട്ടുണ്ടു്. അതിൽ Apollo1, Apollo13. എന്നിവ പരാജയമായിരുന്നു.

Feb 1, 2003 ഇൻഡ്യയേയും നടുക്കിയ ദിവസമായിരുന്നു. ഭാരതത്തിന്റെ സ്വന്തം ആകാശപുത്രിയെ (Kalpana Chawla ) ലോകത്തിന് നഷ്ടപ്പെട്ടതു് അന്നാണ്. ഇൻഡ്യൻ വംശജയായ ആദ്യത്തെ ബഹിരാകാശ യാത്രികയാണിവർ. ഇൻഡ്യൻ വംശജയായ ഈ അമേരിക്കൻ ശാസ്ത്രജ്ഞ പഞ്ചാബിലെ കർണാലിലാണ് (ഇപ്പോൾ ഹരിയാന) ജനിച്ചതും എഞ്ചിനീയറിംഗ് പഠിച്ചതും. ഭാവിയിൽ ഇന്ത്യയുടെ അഭിമാനമായി മാറിയ കൽപ്പന
പഠനത്തിൽ അതിസമർത്ഥയായിരുന്നു. അവർ ഉപരിപഠനാർത്ഥം അമേരിക്കയിലെത്തി. അവിടെ മികച്ച വിജയങ്ങൾ നേടി,നാസയിലെ ശാത്രജ്ഞയായി.

സ്പേസിലേക്കുള്ള അവരുടെ കന്നിയാത്ര 1997, Columbia Space shuttle-ൽ ആയിരുന്നു. രണ്ടാമത്തെ യാത്ര  flight STS-107-ൽ ആയിരുന്നു. അത് അനേകം ദൗത്യങ്ങൾ നടത്തിയ Columbia Space ഷട്ടിലിന്റെ അവസാനയാത്രയുമായിരുന്നു.

തന്റെ സ്വപ്നങ്ങൾക്ക് പിറകെ സഞ്ചരിക്കാൻ കൊതിച്ച അവർ mission Specialist / robotic arm operator ആയിരുന്നു. അവർക്കു നാൽപതു വയസ്സുള്ളപ്പോൾ ആയിരുന്നു ദാരുണ അന്ത്യം. അവസാനത്തെ ബഹിരാകാശയാത്രയിൽ വാഹനത്തിന്റെ ഇടത് ചിറകിൽ മാലിന്യങ്ങളും അവശിഷ്ടങ്ങളും (debris) അടിഞ്ഞുകൂടി സംഭവിച്ച പ്രവർത്തനവൈകല്യം താപനില നിയന്ത്രണാതീതമായി വർദ്ധിപ്പിച്ചു.തിരിച്ചു ഭൂമിയുടെ അന്തരീക്ഷത്തിൽ പ്രവേശിക്കുമ്പോൾ വ്യോമയാനം
(Space Craft) പൊട്ടിച്ചിതറി. അതിലുണ്ടായിരുന്ന ഏഴു യാത്രികരും മരണപ്പെട്ടു. NASA യുടെ ചരിത്രത്തിലെ കറുത്ത ഏടുകളിൽ, 2003 Feb 1, ദുരന്തം (Columbia diaster) എഴുതിച്ചേർക്കപ്പെട്ടു.

മരണാനന്തരം,അമേരിക്ക Congressional  Space Medal Of Honour നൽകി യാത്രികരെ ആദരിച്ചു.

കൽപ്പന ചൗളയുടെ അന്ത്യം നിർഭാഗ്യകരമായി പോയെങ്കിലും, ഭാരതത്തിലെ സ്ത്രീകൾക്കും പഠിക്കാനും അവളുടെ കഴിവുകൾ തെളിയിക്കാനും വളരെ ഉയരത്തിൽ പറക്കാനും സ്വപ്നങ്ങൾ എത്തിപ്പിടിക്കാനും  സാധിക്കും എന്നവർ തെളിയിച്ചു.

അകാലത്തിൽ പൊലിഞ്ഞ ആകാശപുത്രിയോടുള്ള ആദരം പ്രകടമാക്കി,ഭാരതത്തിലും വിദേശത്തും
അനവധി റോഡുകളും പാർക്കുകളും വിദ്യാഭ്യാസസ്ഥാപനങ്ങളും നാമകരണം ചെയ്യപ്പെട്ടു.ഭാരത സർക്കാർ ഉന്നത ബഹുമതികൾ അവർക്ക് നൽകി.

ഇന്നവർ, വളരാൻ കൊതിക്കുന്ന അനേകം പെൺകുട്ടികൾക്ക്, പെൺയുഗത്തിന്റെ വഴികാട്ടിയായി വാനിൽ മിന്നുന്ന നക്ഷത്രമാണ്.

നാസയിലെ Space Mirror Memorial എന്ന പ്രദർശനത്തിൽ ആകാശദൗത്യങ്ങളിൽ ജീവൻ നഷ്ടപ്പെട്ട ബഹിരാകാശ സഞ്ചാരികളുടെ ഓർമ്മകൾ പങ്കുവെയ്ക്കുന്നു. ഇവരുടെ സംഭാവനകളും ജീവത്യാഗവും അനുസ്മരിക്കപ്പെടുന്നു. അവിടെയും ഇന്ത്യയുടെ ആകാശപുത്രിക്ക് ഒരിടമുണ്ട്. അതിൽ ഭാരതത്തിലെ ഓരോ സ്ത്രീയ്ക്കും അഭിമാനിക്കാം.പെൺക്കുതിപ്പിന്റെ മറുവാക്കായി ചരിത്രം അവരെ അടയാളപ്പെടുത്തുന്നു.

#പെൺയുഗം.