ഭ്രാന്തിൽ തുടങ്ങി അംനീഷ്യ, ഒ സി ഡി വഴി ആർട്ടിഫിഷ്യൽ ലാറിനെക്സിൽ എത്തുമ്പോൾ…

ഭ്രാന്തിൽ തുടങ്ങി അംനീഷ്യ, ഒ സി ഡി വഴി ആർട്ടിഫിഷ്യൽ ലാറിനെക്സിൽ എത്തുമ്പോൾ…

Spoiler Alert: Abraham Ozler കാണാത്തവർ സൂക്ഷിക്കുക

പണ്ട് പണ്ട്, കേരളത്തിലെ മെഡിക്കൽ ടൂറിസത്തിന്റെയും ആയുർദൈർഘ്യത്തിന്റെയും ഒക്കെ കഥകൾ പാണന്മാർ പാടുന്ന കാലത്തിനും മുൻപ് (സോറി ഇപ്പോൾപാണന്മാർ ഇല്ലല്ലോ, അത് മീഡിയ/PR ടീം റീപ്ലേസ് ചെയ്തു) മലയാള സിനിമകളിൽ/മെഡിക്കൽ തീം ആയ സിനിമകളിൽ ഒക്കെ സ്ഥിരം വേട്ടമൃഗം ഭ്രാന്തും ബ്രെയിൻ ട്യൂമറും ആയിരുന്നു. അത് ക്ലിഷേ ആയിത്തുടങ്ങിയപ്പോൾ പിന്നെ ബ്ലഡ് ക്യാൻസർ, അംനീഷ്യ,കോമ ഒക്കെയായി താരങ്ങൾ. ഇന്റർനെറ്റിന്റെയും യൂട്യൂബിന്റെയും വരവോടെ നമ്മളിൽ നാലിൽ 3 പേരെങ്കിലും അര ഡോക്ടറോ മുക്കാൽ ഡോക്ടറോ ആയി മാറിയത് കൊണ്ട് ഇപ്പോൾ ശരിക്കും പെട്ടത് സിനിമാക്കാർ ആണ്! നല്ലോണം റിസേർച്ചും ഹോം വർക്കും ചെയ്യാതെ വല്ലതും ചെയ്താൽ പ്രേക്ഷകർ എടുത്തിട്ട് meme ഇട്ടു കളിക്കും!

മെഡിക്കൽ ടെർമിനോളജി/ശാരീരിക-മാനസികാരോഗ്യ പ്രശ്നങ്ങളിൽ ചിലത് മലയാളം സിനിമയിൽ വന്ന വഴി, അതിന്റെ വളർച്ച ഒക്കെ നോക്കിയാലോ?

*Luncay(ഭ്രാന്ത്): തനിയാവർത്തനത്തിലെ (1987) ബാലൻ മാഷും കുടുംബവും ഇപ്പോഴും നമ്മളെ കരയിപ്പിക്കുന്നത് ഈ വാക്ക് കൊണ്ടാണ്. പാരമ്പര്യമായി പകർന്നു വരുന്ന ഭ്രാന്തിന്റെ/ചിത്തഭ്രമത്തിന്റെ ജീനുകൾ ആണ് ഈ സിനിമയിലെ പ്രധാന ചേരുവ. താളവട്ടത്തിലെ വിനോദ് മറ്റൊരു ഉദാഹരണം. ബാക്കി ഉദാഹരണങ്ങൾ നിങ്ങൾ കമെന്റിൽ പറയൂ.

*Delusion (മിഥ്യാഭ്രമം): സത്യമല്ലാത്ത ഒരു കാര്യം വിശ്വസിക്കുക, അതിനനുസരിച്ചു പ്രവർത്തിക്കുക ഒക്കെ Delusion രോഗികളുടെ ലക്ഷണം ആണ്. കടുത്ത ദൈവ/മത വിശ്വാസികൾ അപ്പോൾ? സോറി ഞാൻ വിഷയത്തിൽ നിന്ന് തെന്നിമാറി.സിനിമയിലെ അത്തരം ചില കഥാപാത്രങ്ങൾ നോക്കാം. വടക്കുനോക്കിയന്ത്രത്തിലെ തളത്തിൽ ദിനേശൻ, ഭൂതക്കണ്ണാടിയിലെ വിദ്യാധരൻ, സദയത്തിലെ സത്യനാഥൻ…ബാക്കി ആരൊക്കെയാണ് മലയാളം സിനിമയിലെ delusion ന്റെ പല അവസ്ഥാന്തരങ്ങൾ പേറുന്ന കഥാപാത്രങ്ങൾ?

*Schizophrenia: പ്രവൃത്തികൾക്ക് ചിന്തകളും വികാരങ്ങളുമായി പൊരുത്തമില്ലാത്ത അവസ്ഥ ഉളവാക്കുന്ന സങ്കീർണമായ, പല ലെയറുകൾ ഉള്ള ഒരു മാനസികരോഗമാണിത്. Dissociative identity disorder അല്ലെങ്കിൽ ദ്വന്ദ വ്യക്തിത്വം(ഡോ സണ്ണിയുടെ വാക്കുകളിൽ) ഉള്ള മണിച്ചിത്രത്താഴിലെ ഗംഗയാണ് പെട്ടെന്ന് ഓർമ വരുന്നത്.

*ബൈപോളാർ: ഡിപ്രെഷന്റെ താഴ്ചയും ഉന്മാദത്തിന്റെ ഉയർച്ചയും മാറി മാറി വരുന്ന അവസ്ഥയാണ് ഇത്. വടക്കുംനാഥനിലെ ഭരത പിഷാരടി ഒരുത്തമ ഉദാഹരണമാണ്.

*അംനീഷ്യ/അൽഷൈമേഴ്സ്: ഓർമ താൽക്കാലികമായി നഷ്ടപ്പെട്ട അംനീഷ്യ രോഗികൾ ഇഷ്ടം പോലെ മലയാളം സിനിമയിൽ കാണാം. ഇന്നലെയിലെ മായയാണ് പെട്ടെന്ന് ഓർത്തെടുക്കാവുന്ന ഒരു കഥാപാത്രം. എന്നാൽ ഓർമ്മകൾ ഇതളൂർന്ന് വീഴും പനിനീർ ദളങ്ങൾ ആകുന്ന മറവി രോഗം(അൽഷൈമേഴ്സ്) എന്ന് കേട്ടാൽ നമ്മൾ തന്മാത്രയും രമേശൻ നായരെയും മാത്രമാവും ഓർക്കുക അല്ലെ?

*ഒസിപിഡി: Obsessive-compulsive personality disorder ഉള്ളവർ ആരൊക്കെയാണ്? അഹത്തിലെ സിദ്ധാർത്ഥൻ? നോർത്ത് 24 കാതത്തിലെ ഹരികൃഷ്ണൻ? പിന്നെ ആരൊക്കെ?

*ആൽക്കഹോളിസം/സബ്സ്റ്റൻസ് അഡിക്ഷൻ: സ്പിരിറ്റിലെ രഘുനന്ദനും വെള്ളത്തിലെ മുരളിയും വെള്ളത്തിൽ ആശാന്മാർ ആണെങ്കിൽ മയക്കുമരുന്ന് അഡിക്ഷൻ അമൃതം ഗമയ മുതൽ ഈയടുത്ത് ഇറങ്ങിയ എബ്രഹാം ഓസ്‍ലെറിൽ വരെ കാണാം. എഴുത്തുകാരൻ ജയമോഹൻ പറഞ്ഞപ്പോൾ നമുക്ക് പൊള്ളിയെങ്കിലും അതിൽ ഇച്ചിരി സത്യം ഇല്ലാതില്ല. റീൽ ആയാലും റിയൽ ആയാലും ആൽക്കഹോളിസം ഒക്കെ ഒരു രോഗമാ എന്ന് ചോദിക്കുന്നവർ ആണല്ലോ നമ്മളിൽ അധികവും.

*നാർസിസ്റ്റ് പേഴ്സണാലിറ്റി ഡിസോർഡർ: അവനവനോട് തന്നെ അമിതമായ ഇഷ്ടവും പ്രാധാന്യവും തോന്നുകയും അതിനെത്തുടര്‍ന്ന് മറ്റുള്ളവര്‍ക്ക് തീരെ മൂല്യം കല്‍പിക്കാതിരിക്കുകയുമെല്ലാം ചെയ്യുന്നവരെയാണ് പൊതുവേ നമ്മള്‍ ‘നാര്‍സിസ്റ്റു’കള്‍ എന്ന് വിളിക്കുന്നത്. പച്ച മലയാളത്തിൽ വേണോങ്കിൽ അഹങ്കാരി ന്ന് വിളിക്കാം. അതിപ്പോൾ 99% മലയാളം മാസ്സ് ഹീറോ കഥാപാത്രങ്ങൾക്കും ഈ രോഗമുണ്ടോ എന്ന് സംശയിക്കേണ്ടി ഇരിക്കുന്നു. എങ്കിലും കുമ്പളങ്ങി നൈറ്റ്സിലെ ഷമ്മിയോ മുകുന്ദൻ ഉണ്ണി അസോസിയേറ്റ്സിലെ മുകുന്ദൻ ഉണ്ണിയോ പ്രത്യക്ഷ ഉദാഹരണങ്ങൾ ആണ്.

പറഞ്ഞു പറഞ്ഞു ഈ ലിസ്റ്റ് തീരുന്നില്ലല്ലോ ഡിങ്കാ! സറോഗസിയും ആർട്ടിഫിഷൽ ഇൻസെമിനേഷനും വിഷയമാക്കിയ ദശരഥം മുതൽ പേസ്‌മേക്കർ ഹാക്ക് ചെയ്യുന്ന സിബിഐ 5 വരെ അങ്ങനെ എന്തൊക്കെ കിടക്കുന്നു ഇനിയും. പുഴുവിൽ കുട്ടൻ ഉപയോഗിക്കുന്ന CPAP മെഷീനും കടന്ന് എബ്രഹാം ഓസ്‌ലെറിൽ അത് ആർട്ടിഫിഷ്യൽ ലാറിനെക്സ് ഡിവൈസ് വരെ ആയില്ലേ? ഇത്രയും മെഡിക്കൽ കാര്യങ്ങൾ ഒക്കെ തിരക്കഥയിൽ ഉൾക്കൊള്ളിക്കുന്ന, മിണ്ടിയാൽ നാല് മെഡിക്കൽ ടെർമിനോളജി ഇംഗ്ലീഷിൽ പറയിപ്പിച്ച് സിനിമയെ വേറെ ലെവലിൽ എത്തിക്കുന്ന ഇൻഡസ്ട്രി മലയാളം മാത്രമേ കാണൂ ഇന്ത്യയിൽ. മലയാളി ഡാ! ഇനി ബാക്കി നിങ്ങൾക്ക് കമെന്റിൽ പറയാം.

©പവിത്ര ഉണ്ണി

ചിത്രങ്ങൾ google ഇമേജസ്