അനുഗ്രഹത്തിന്റെ പുണ്യകവാടങ്ങള് തുറന്ന റമദാന് നമ്മോട് വിടപറഞ്ഞു. ഈദുല്ഫിത്വർ ആഗതമായി. ഇസ്ലാം വിശ്വാസികളുടെ വസന്തോത്സവമായ റമദാന് അവരുടെ ജീവിത ചിട്ടകളില് മാറ്റം വരുത്തിയിരിക്കുന്നു.
പൂര്വ്വ ചക്രവാളത്തില് പ്രഭാതത്തിന്റെ വെള്ളിരേഖ പ്രത്യക്ഷപ്പെടുന്നത് വിളിച്ചറിയിക്കുന്ന വിളി (ബാങ്ക്) യെത്തി കഴിഞ്ഞാല് അന്നപാനാദികളില്ല, ശാരീരിക ബന്ധങ്ങളില്ല, തെറ്റായ വാക്കും പ്രവര്ത്തിയുമില്ല, തികഞ്ഞ ശ്രദ്ധയാണെല്ലാറ്റിലും, പൂര്ണ്ണ സൂക്ഷ്മതയാണെങ്ങും. കണ്ണും കാതും ഹൃദയവുമെല്ലാം പൂര്ണ്ണ നിയന്ത്രിതം. വാക്കും നോക്കും പോക്കുമൊക്കെ സൃഷ്ടാവിന്റെ ആജ്ഞകള്ക്ക് വിധേയമാക്കി, പാപമോചനത്തിനായുള്ള കഴിഞ്ഞ ഒരു മാസം പ്രവാചകസന്ദേശങ്ങള് പാലിച്ച് കഠിന വ്രതം ചെയ്യാനുള്ള ശ്രമമായിരുന്നു വിശ്വാസികൾ.
വര്ഷത്തിലൊരു മാസത്തിലെ വ്രതാനുഷ്ഠനങ്ങള് മനുഷ്യന്റെ ഇന്ദ്രിയങ്ങളെ സ്വാധീനിക്കുകയും അല്ലാഹുവിന്റെ സാന്നിദ്ധ്യത്തെ സദാ ഓര്മ്മിപ്പിക്കുകയും ചെയ്യുന്നു. ഉപവാസമെന്നാല് ഭക്ഷണം ഉപേക്ഷിക്കല് മാത്രമല്ല. പരിപൂര്ണ്ണമായ ഇന്ദ്രിയ സമന്വയവുമാണ്. നാവ്, കാത്, കണ്ണ്, ശരീരം, മനസ്സ് എന്നിവയെ നിയന്ത്രിച്ചുകൊണ്ട് അല്ലാഹുവിനുള്ള സമര്പ്പണം. ചിന്തയും വികാരങ്ങളും നിയന്ത്രിച്ച്, ഖുറാന് പാരായണം ചെയ്ത്, ഉംറ നിര്വ്വഹിച്ച്, ദാനധര്മ്മങ്ങള് നടത്തി, ഇസ്ലാം വിശ്വാസ സമൂഹം പാപപരിഹാരത്തിനായി പള്ളികളില് ദിനരാത്രങ്ങള് ചെലവഴിക്കുകയും ചെയ്യുന്ന കാഴ്ച്ചയായിരുന്നു എങ്ങും കണ്ടത്.
ലോകത്തിലെ എല്ല മതങ്ങളും അവയുടെ ആചാരങ്ങളും മനുഷ്യനെ നയിക്കുന്നത് പരമ കാരുണ്യവാനായ ദൈവത്തിലേക്കാണ്. ദൈവത്തിന്റെ നന്മയുടെ അംശങ്ങള് ഉള്ക്കൊണ്ട് അത് ജീവിതത്തില് പകര്ത്തി അവനവനും കുടുംബത്തിനും സമൂഹത്തിന്നും ഈ ലോകത്തിന്നും തന്നെ നന്മ പകരുവാന് ശ്രമിക്കുകയാണ് ഈ വ്രത കാലത്ത് വിശ്വാസികള് ചെയ്തത്.
റമദാന് വ്രതാനുഷ്ഠാനത്തിലൂടെ മനുഷ്യന് നേടിയെടുക്കുന്ന നന്മകള്ക്കെല്ലാം നാം കടപ്പെട്ടിരിക്കുന്നത് സര്വ്വശക്തനായ അള്ളാഹുവിനോടാണ്. പരമ കാരുണ്യവാനയ ദൈവം അവന്റെ ദാസന്മാരായ മനുഷ്യന് ജീവിക്കാനുള്ള എല്ലാ സാഹചര്യങ്ങളും ഈ ഭൂലോകത്തില് ഒരുക്കിയിട്ടുണ്ട്. അവയെ കണ്ടെത്തി നന്മയുടേയും ധര്മ്മത്തിന്റെയും പാത ഉപയോഗിക്കുകയാണ് മനുഷ്യന് ചെയ്യേണ്ടത്. ഇത് ഓര്ത്തുകൊണ്ടായിരിക്കണം ചെറിയ പെരുന്നാള് ആഘോഷിക്കേണ്ടത്.
ആഘോഷങ്ങള് സമൂഹത്തിന്റെ ചരിത്രപരവും പ്രകൃതിപരവുമായ ആവശ്യമാണെന്നും ആ ആവശ്യത്തെ ഇസ്ലാം മാനിക്കുന്നുവെന്നും വിവിധ ഹദീസുകളില് നിന്ന് വ്യക്തമാണ്. പെരുന്നാള് സുദിനം അനുവദിനീയമായ രീതിയില് ആഘോഷിക്കാന് വേണ്ടിയാണ് അന്നത്തെ ദിനത്തില് വ്രതാചരണം നിഷിദ്ധമായി പ്രഖ്യാപിച്ചത്.
പെരുന്നാള് സുദിനത്തില് പ്രാധാന്യമേറിയ സദ്കര്മ്മമാണ് തക്ബീര് ചൊല്ലല്. പെരുന്നാള് ദിനത്തിലെ തക്ബീര് ഘോഷത്തെപറ്റി വിശുദ്ധ ഖുര്ആനില് നിര്ദ്ദേശമുണ്ട്. ശവ്വാല് മാസപ്പിറവി ദൃശ്യമായാല് പിന്നെ പെരുന്നാളാഷോഘത്തില് നിന്നു വിരമിക്കുന്നത് വരെ തക്ബീര് ചൊല്ലല് മുസ്ലിംകള്ക്കു ബാധ്യതയാണ്.
‘ഈദുല്ഫിത്വറില് തക്ബീര് മുഴക്കേണ്ട സമയം, പെരുന്നാള് രാവിന്റെ ആരംഭം കുറിക്കുന്ന സൂര്യാസ്തമയം മുതല് ഇമാം പെരുന്നാള് നിസ്കാരത്തില് പ്രവേശിക്കുന്നത് വരെയാണ്. വീടുകള്, പള്ളികള്, നടവഴികള്, അങ്ങാടികള് തുടങ്ങി എവിടെ വെച്ചും തക്ബീര് ചൊല്ലാം.
അല്ലാഹു അക്ബര്, അല്ലാഹു അക്ബര്, അല്ലാഹു അക്ബര്; ലാഹിലാഹ ഇല്ലല്ലാഹു അല്ലാഹു അക്ബര്… നാനാഭാഗത്ത് നിന്ന് തക്ബീര് ധ്വനികള് മുഴങ്ങുകയായി…. ഏവർക്കും ഈദുല്ഫിത്വർ ആശംസകൾ നേരുന്നു.
