കാലമിനിയും ഉരുളും, വിഷു വരും…

ശ്രീകൃഷ്ണൻ നരകാസുരനെ കൊന്ന ദിവസമാണ് വിഷു എന്നാണ് ഒരു വിശ്വാസം. തിന്മയുടെ മേൽ നന്മയുടെ വിജയമായി ആ ദിവസത്തെ ആഘോഷിക്കുന്നു. മേടമാസം ഒന്നാം തീയതി, ഐശ്വര്യപൂർണമായ കണി ഒരുക്കി പുലർച്ചെ അത് കണ്ടു മലയാള പുതുവർഷം തുടങ്ങുക എന്നത് മലയാളി ആചാരങ്ങളുടെ ഭാഗമായി മാറി. രാത്രിയും പകലും തുല്യമായിരിക്കുന്ന ദിവസമാണ് വിഷു. കാലം മാറിയപ്പോൾ വിഷുവിനും മാറ്റം വന്നിട്ടുണ്ട്. ആദ്യം പഴയകാലത്തേക്ക് ഒന്ന് പോയി വരാം.

അന്നത്തെ വിഷുക്കണി:

വിഷുവിന്റെ തലേദിവസം വീടെല്ലാം വൃത്തിയാക്കി രാത്രിയോടെ വിഷുക്കണി ഒരുക്കും. കുട്ടികളെല്ലാം ഉറങ്ങിയ ശേഷം മുതിർന്നവരാണ് കണി ഒരുക്കുന്നത്. അരി,നെല്ല്, കോടി മുണ്ട്, സ്വർണാഭരണം, പണം, കണ്ണാടി, കണിവെള്ളരി, കണിക്കൊന്ന, വെറ്റില, അടയ്ക്ക, മാമ്പഴം, ചക്ക, വാഴപ്പഴം, നിലവിളക്ക്, തേങ്ങ, ശ്രീകൃഷ്ണ വിഗ്രഹം തുടങ്ങിയവയാണ് പ്രധാന കണി വിഭവങ്ങൾ.

ചിത്രത്തിന് കടപ്പാട്: അനു മുരളി (കൂട്ടക്ഷരങ്ങൾ ബ്ലോഗർ)

ഇന്നത്തെ വിഷുക്കണി:

ഇന്ന് പറമ്പിൽ വിളഞ്ഞ കണിവെള്ളരിയോ കൊന്നയോ ഇല്ല. ഭൂരിപക്ഷം വസ്തുക്കളും മാർക്കറ്റിൽ നിന്ന് വാങ്ങിയാണ് ഇന്ന് കണി വയ്ക്കുന്നത്. ആർട്ടിഫിഷ്യൽ കൊന്നപ്പൂവ് ആമസോണിൽ വാങ്ങാൻ കിട്ടും എന്നതിൽ എത്തി നിൽക്കുന്നു ഇന്നത്തെ വിഷു.

അന്നത്തെ വിഷുക്കൈനീട്ടം:

പണ്ടത്തെ കുട്ടികളുടെ പ്രധാന പോക്കറ്റ് മണി പ്രതീക്ഷയാണ് ഇത്. മുതിർന്നവർ നൽകുന്ന കൈനീട്ടം പലപ്പോഴും നാണയങ്ങൾ ആയിരിക്കും. അവയെല്ലാം ചേർത്ത് വച്ച് അടുത്ത ഉത്സവത്തിന് കളിപ്പാട്ടങ്ങൾ വാങ്ങാൻ കാത്തിരിക്കും കുട്ടികൾ. ഗൃഹനാഥൻ നൽകുന്ന ഈ കൈനീട്ടം വർഷം മുഴുവൻ സമൃദ്ധി കൊണ്ട് വരുമെന്നാണ് വിശ്വാസം.

ഇന്നത്തെ വിഷുക്കൈനീട്ടം:

എല്ലാവരും ഡിജിറ്റൽ മണി ഉപയോഗിക്കുന്ന ഈ കാലത്ത് കൈനീട്ടവും ഗൂഗിൾ പേ ആയി സ്വീകരിക്കാം. നാണയങ്ങൾ ഒന്നും ഇന്നത്തെ കുട്ടികൾ സ്വീകരിക്കില്ല. വൻ തുകകൾ കൈനീട്ടമായി ചെലവാകുമെന്ന് ഉറപ്പ്. കുട്ടികൾ QR കോഡ് ഉള്ള കാർഡുമായി കൈനീട്ടം വാങ്ങാൻ ഓടിനടക്കുന്നതും ഇനിയുള്ള വിഷുവിന് കാണാനാവും.

അന്നത്തെ വിഷു സദ്യ:

പറമ്പിൽ നിന്ന് മുറിച്ച വാഴയിലയിൽ തുമ്പപ്പൂ ചോറ് വിളമ്പി കറികളും പായസവും പപ്പടവുമായി നിലത്തിരുന്ന് കഴിച്ചിരുന്നതാണ് അന്നത്തെ സദ്യ. ശർക്കര ഉപ്പേരിയും കായ വറുത്തതും വീട്ടിൽ ഉണ്ടാക്കിയ ആ കാലം. ഉണ്ണിയപ്പവും നെയ്യപ്പവും ചൂടോടെ കഴിച്ചു വായും പൊള്ളി നടന്ന ഓർമ്മകൾ. പായസം ഇളക്കി ഇളക്കി കൈ വേദനിച്ചവരുടെ വിഷുക്കാലം.

ഇന്നത്തെ വിഷുസദ്യ:

സ്വിഗിയുള്ളപ്പോൾ സദ്യ ഒക്കെ ഓൺലൈനിൽ വരുന്ന ഇന്നത്തെ വിഷുക്കാലം വളരെ വ്യത്യസ്തമാണ്. ബേക്കറികളിൽ നിന്ന് പലഹാരങ്ങളും നമ്മുടെ കൈയിലെത്തും. പേപ്പർ വാഴയിലയിൽ ഡൈനിങ്ങ് ടേബിളിൽ വിളമ്പുന്നവയാണ് ഇന്നത്തെ വിഷുസദ്യ.

വിഷു സ്പെഷ്യൽ വിഭവങ്ങൾ:

വിഷുക്കട്ടയും വിഷുക്കഞ്ഞിയും വിഷുത്തോരനും ഇനിയെത്ര കാലം കൂടി ബാക്കിയാകും എന്നറിയില്ല. ഈ പുതിയ കാലത്ത് വിഷു തീമിൽ കണിയും സദ്യയും ഒക്കെ കേക്കുകളായി നിറയുന്നുണ്ട്. പായസം കേക്ക് ഒക്കെ വിഷുക്കാലത്ത് ട്രെൻഡിങ് ഡെസേർട്ട് ആണ്. ഉരുളിയിൽ പായസം നിറച്ചു വച്ച പോലെയുള്ള കേക്ക് പോലും ലഭ്യമാണ്. ഹോം ബേക്കേഴ്‌സ്‌ കൂടുന്നത് അനുസരിച്ച് ഇതിൽ കൂടുതൽ പരീക്ഷണങ്ങളും ഇനി വരുന്ന വിഷുവിന് കാണാൻ പറ്റും. ഉണ്ണിയപ്പം ഫലൂദയിലും പഴം സാലഡിലും കയറിപ്പറ്റിയിട്ടുണ്ട്.

വിഷുക്കോടി: തനത് കസവ് സാരികൾ ഒക്കെ ഫീൽഡ് ഔട്ട് ആയ പോലെയാണ്. ഹാൻഡ് പെയിന്റ് ചെയ്തത്, കലംകാരി പാച്ച് വർക്ക് ചെയ്തത്,കണിക്കൊന്നപ്പൂക്കൾ എംബ്രോയിഡറി ചെയ്തത് എന്നിങ്ങനെ വിഷുക്കോടിക്കും മാറ്റം വന്നിട്ടുണ്ട്. കുട്ടികൾ പരമ്പരാഗത പട്ടുപ്പാവാട ഉപേക്ഷിച്ച് ദാവണികളിലേക്കും സ്കർട്ട് -ക്രോപ് ടോപ് മാതൃകകളിലേക്കും മാറിക്കഴിഞ്ഞു. പുരുഷന്മാരുടെ വിഷുക്കോടി നോർത്ത് ഇന്ത്യൻ കുർത്തയും ആയിക്കഴിഞ്ഞു. കസവ് മുണ്ടുകൾ കളർ മുണ്ടിന് വഴി മാറിയതും കാണാം.

കാലം ഇനിയും ഉരുളും..വിഷു വരും..അന്ന് എന്താവും വിഷുവിന്റെ കോലമെന്ന് ആർക്കറിയാം?

©പവിത്ര ഉണ്ണി

ചിത്രങ്ങൾ : google images, Amazon, Southloom…