കൂടോത്ര ദുർമന്തവാദ കഥകളിൽ അധികം പ്രചാരത്തിൽ ഇല്ലാത്ത “കൈവിഷം” എന്ന പ്രയോഗത്തെപ്പറ്റി കൂടുതൽ സിനിമകളും ഇല്ലെന്ന് തോന്നുന്നു.
അവധിക്കാലം ചിലവഴിക്കാൻ കുടുംബസമേതം തങ്ങളുടെ ഫാം ഹൗസിലേക്ക് യാത്രതിരിച്ച ചാർട്ടേഡ് അക്കൗണ്ടന്റായ ഋഷി കബീറും, ജ്യോതിയും, മക്കളായ ജാൻവിയും, ധ്രുവും ഒരു ധാബയിൽ ഭക്ഷണം കഴിക്കാൻ കയറുന്നു.
ചില്ലറയും ഗൂഗിൾ പേയും ഇല്ലാത്തത് കൊണ്ട് പ്രാതലിനൊപ്പം ചായ കിട്ടാതെ വിഷമിച്ച കബീറിന് “വൻരാജ്” എന്നൊരു അപരിചിതൻ ചായ വാങ്ങി നൽകുന്നു.
തുടർന്ന് ആ കുടുംബം വൻരാജുമായി പരിചയപ്പെടുകയും ഹ്രസ്വനേരത്തെ സംഭാഷണങ്ങളിൽ ഏർപ്പെടുകയും ചെയ്യുന്നതിനിടെ വൻരാജ് മറ്റുള്ളവരുടെ ശ്രദ്ധയിൽ പെടാതെ ജാൻവിക്ക് ഒരു ലഡു നൽകുന്നു. അത് കഴിക്കുന്നതോടെ അവളിൽ എന്തൊക്കെയോ ശാരീരിക മാനസിക മാറ്റങ്ങൾ സംഭവിക്കുകയും നിമിഷങ്ങൾക്കകം അവളുടെ മനസ്സിന്റെ നിയന്ത്രണം വൻരാജ് ഏറ്റെടുക്കുകയും ചെയ്യുന്നു.
നല്ല കുറെ thrilling & Adrenaline rush ഒക്കെയുള്ള ഒരു Above average മാത്രമാണ് “വശ്” എന്ന ഗുജറാത്തി സിനിമയുടെ റീമേക്ക് ആയ ശൈത്താൻ.
അജയ് ദേവഗണിനേക്കാളും മാധവനേക്കാളും, വിധേയത്വവും നിസ്സഹായതയും ഉന്മാദവും ഭ്രാന്തമായ പെരുമാറ്റങ്ങളുമെല്ലാം മാറിമറിയുന്ന ജാൻകി ബോഡിവാലയുടെ അഭിനയം തകർത്തു. ജ്യോതി ആയി ജ്യോതികയാണ് അഭിനയിച്ചിരിക്കുന്നത്.
തുടർന്ന് കബീറിന്റെ കുടുംബത്തെ പിന്തുടർന്ന് ഫാം ഹൗസിൽ എത്തുന്ന വൻരാജ് അവിടെവെച്ച് തന്റെ അടിമയായ ജാൻവിയെക്കൊണ്ട് അതി ഭീകരവും, അപകടകരമാം വിധത്തിലും പലതും ചെയ്യിക്കുന്നു.
അയാളുടെ ലക്ഷ്യമെന്തെന്നോ മകൾക്ക് സംഭവിക്കുന്നത് എന്തെന്നോ അറിയാതെ മകളെ എങ്ങിനെ അയാളുടെ നിയന്ത്രണത്തിൽ നിന്ന് മോചിപ്പിക്കാനാവും എന്നറിയാതെ ഭയത്തിലും ആശയക്കുഴപ്പത്തിലുമാവുന്ന കബീറിനോടും ജ്യോതിയോടും അയാൾ തന്റെ പൈശാചികമായ ലക്ഷ്യം വെളിപ്പെടുത്തുന്നു.
ദുർമന്ത്രവാദിയിൽ നിന്ന് എന്ത് പകരം നൽകിയും ജാൻവിയെ രക്ഷിക്കാനായുള്ള കബീറിന്റെ കുടുംബത്തിന്റെ പോരാട്ടം അവിടെ ആരംഭിക്കുകയാണ്.
പ്രേതമോ ദുരാത്മാക്കളോ അതീന്ദ്രിയ ശക്തികളുടെ അമിത പ്രഭാവമോ ഇല്ലാതെ ഒരു “മിസ്റ്ററി ത്രില്ലർ” എന്ന ഗണത്തിൽ പെടുത്താവുന്ന സിനിമ.
കാടിനകത്തുള്ള ശൈത്താന്റെ കൂറ്റൻ കോട്ടയും ആഭിചാര കർമ്മങ്ങളും ഒക്കെ ചിത്രീകരിച്ചിരിക്കുന്നത് വളരെയധികം നിരുത്തരവാദിത്വപരമായാണ് എന്ന് തോന്നി. ക്ലൈമാക്സിലെ ചില ക്ലീഷെകളായ രംഗങ്ങളും തല്ലിപ്പൊളി bgm ഉം, കഥാപാത്രത്തിന്റെ മാസിലേക്ക് ഉയരാത്ത മാധവന്റെ പ്രകടനവും മാറ്റി നിർത്തിയാൽ, കുടുംബസമേതം കാണാവുന്ന, അന്ധവിശ്വാസവും സൈക്കോളജിയും ഒത്ത് ചേർന്നൊരു കോമ്പോ ഫീൽ നൽകുന്ന നല്ലൊരു എന്റർടെയ്നർ ആണ് ശൈത്താൻ.
വേണമെങ്കിൽ കാണാം.
അജിത് വള്ളോലി
