ഈ അവധിക്ക് ഞാൻ അങ്ങോട്ട് വരുവാ

നവംബർ 18 സമയം 4.55

 സുമ ഫോൺ എടുത്ത് നോക്കി, ആൻഡ്രൂസിൻ്റെ വോയ്സ് ആണ്.

“ലീവ് ഇന്ന് അലോട്ട് ആയി… ഡിസംബർ 5 തൊട്ട്… ക്രിസ്മസ് കഴിഞ്ഞ് പോന്നാ മതി. പിന്നെ അവനോട് പ്രത്യേകം പറയണം, പപ്പ വരുന്നതിന് വല്യ പബ്ലിസിറ്റി ഒന്നും കൊടുക്കണ്ടാന്ന്. നിൻ്റെ വീട്ടിലും അപ്പനോട് മാത്രം പറഞ്ഞാ മതി. പെങ്ങന്മാരു രണ്ട് പേരോടും ഞാൻ വിളിച്ച് പറഞ്ഞോളാം”

നവംബർ 27 സമയം 3.30

 “ആൻഡ്രൂസ് സർ, ഗാഡി ആ ഗയ… ചലിയെ ഹൈപ്പർ മാർക്കറ്റ് ചലേംഗേ”

 ഒരാഴ്ചയെ ഉള്ളൂ, ലിസ്റ്റ് ഉണ്ടാക്കിയിട്ടുണ്ട്. കുറച്ച് സാധനങ്ങൾ ഇവിടുന്ന് വാങ്ങാം. കുപ്പി ഒക്കെ എയർപോർട്ടിൽ ഇറക്കാം. കൊച്ചിനും അവൾക്കുമുള്ള പർച്ചേസ് നടത്താം. ബാക്കി ഇനി നാട്ടിൽ പോയിട്ടാകാം.

“ഗാഡി രോകോ, വോ അപ്‌നാ സുജിത് ഹേ ന”

“ജി സാബ്” ജൂനിയർ ആയ സുജിത്തിനെ കണ്ടപ്പോൾ ഡ്രൈവർ വണ്ടിയൊതുക്കി.

“സുജിത്തെ നീ എങ്ങോട്ടാ, മാർക്കറ്റിലേക്ക് ആണേൽ കേറിക്കോ”

“താങ്ക് യൂ സർ, നമ്മുടെ സൈറ്റിലെ രഞ്ജനും ഉണ്ട്, അവൻ 2 വർഷം കൂടിയിട്ട് നാട്ടിൽ പോവാണ്, അവനും പോന്നോട്ടെ അല്ലെ സർ”

“ഡാ നിനക്ക് അറിയാല്ലോ ഈ വണ്ടിയിൽ പണിക്കാരെ കൊണ്ട് പോയിന്നു അറിഞ്ഞാലുള്ള പുകില്… നീ അവനോട് പറ അങ്ങോട്ട് കൊണ്ട് പോകാം, തിരികെ ടാക്സി എടുത്ത് വരാൻ” ആൻഡ്രൂസ് നീരസം പ്രകടമാക്കി.

മാളിലെത്തി ഭക്ഷണവും കഴിച്ച് ലിസ്റ്റ് പ്രകാരമുള്ള സാധനങ്ങളുമായി ബില്ലിംഗ് കൗണ്ടറിലെത്തിയപ്പോൾ അവിടെ സുജിത്തും രഞ്ജനും ക്യുവിലുണ്ട്. 3 ട്രോളി നിറയെ സാധനങ്ങൾ കണ്ട ആൻഡ്രൂസ് ചോദിച്ചു

“ഡാ നീ മാൾ മുഴുവൻ വാങ്ങിയോ”

“ഞാൻ അല്ല സർ, ഇവനാണ്.. ഭാഷ അറിയാത്തൊണ്ട് ഞാൻ കൂടെ വന്നെന്നേ ഉള്ളൂ” രഞ്ജനെ ചൂണ്ടി സുജിത് പറഞ്ഞു

രഞ്ജൻ കൈ കൂപ്പി കൊണ്ട് ” സർ, മേരെ പരിവാർ സെ പെഹല ആദ്മി ഹേ ജോ യഹാ ആയ ഹേ, ഇസ് ലിയെ പൂരാ പരിവാർ ഇന്തേസാർ കർ രഹ ഹേ” (ഗൾഫിൽ വന്ന എൻ്റെ കുടുംബത്തിലെ ആദ്യത്തെ ആളാണ് ഞാൻ. അത് കൊണ്ട് തിരിച്ച് ചെല്ലുന്നത് കാത്ത് അവർ പ്രതീക്ഷയോടെ ഇരിക്കുവാണ്)

“ഫിർ ഭി യെ കുച്ച് സ്യാദാ ഹി ഹൊ ഗയ… ബച്ചോ കോ ഇത്നാ ക്യൂ ദേ രഹേ ഹൊ” ആൻഡ്രൂസ് ന് സഹിക്കാതെ കണ്ണ് തള്ളി

“സിറഫ് മേരാ ബച്ചാ നഹി, ഘർ കെ സഭി ബചോ കേ ലിയേ സമാൻ ലിയെ ഹേ… വേസേ ഭീ ബച്ചാ സപ്നാ ഖുൽക്കെ ദേഖ്നാ ചാഹിയെ… മാ ബാപ് കേ സാലറി കേ ഹിസാബ് സേ നഹി” (കുട്ടികളുടെ സ്വപ്നങ്ങൾക്ക് സീമകൾ നിർണയിക്കാൻ അവരുടെ മാതാപിതാക്കളുടെ വരുമാനം ഒരിക്കലും തടസ്സമാകരുത് )

ബില്ല് അടച്ചതും ആൻഡ്രൂസ് സുജിത്തിനോട് രഞ്ജൻ്റെ സാധനങ്ങൾ നമ്മുടെ വണ്ടിയിലേക്ക് വെക്കാൻ പറഞ്ഞു. തിരികെ ലേബർ ക്യാമ്പിൽ എത്തി സാധനങ്ങൾ ഇറക്കുന്ന വഴി ആൻഡ്രൂസ് സർ ഫോണിൽ സംസാരിക്കുന്നത് സുജിത് കേട്ടു

“നിനക്ക് എന്തൊക്കെയാ വേണ്ടേ എന്ന് പറഞ്ഞാ മതി, ഒപ്പം ഫ്രണ്ട്സ് നോടും ചോദിക്ക്, അവർക്കുള്ളത് പപ്പയ്ക്ക് വാട്സാപ്പിൽ അയച്ചാ മതി… അമ്മ കുളിച്ച് ഇറങ്ങിയിട്ട് പെട്ടെന്ന് വിളിക്കാൻ പറ… 5നൂ നൈറ്റ് ഫ്ലൈറ്റ് ലാൻഡ് ആവും…7 മണിയോടെ ഇറങ്ങാൻ മാമനോട് പറയണം…നമ്മുടെ വണ്ടി എടുക്കണ്ട…ഇന്നോവ ബുക്ക് ചെയ്യാൻ പറയണം…ലഗ്ഗേജ് അധികം ഉണ്ടാകും”