അതെ..! വയസാവുകയാണ്

പ്രായമേറുകയാണ്..!

പ്രതീക്ഷകൾ വേരറ്റ് പോകുന്നു!

എടുക്കാത്ത ഓരോ ഫോൺവിളികൾക്കുമപ്പുറം
ആപത്ചിന്തകൾ ഉള്ളിൽ നിഴലിക്കുന്നു!

മഴയ്ക്കിപ്പോ കുളിരല്ല!

വിറയലും ജലദോഷവും..

ചൂട് കാപ്പി കുടിക്കാനല്ലപ്പോൾ തോന്നാ
പുതച്ച് മൂടി ഉറങ്ങാനാണിഷ്ടം!

തണുപ്പ് ബാധിച്ച സിരകളിൽ വാതത്തിന്റെ
കയ്യൊപ്പുകൾ!

ചെറു ചൂടിൽ പോലും ദേഹം തളരുന്നു!
ദുർമേദസ്സ് ബാധിച്ച ശരീരം
ഇഷ്ടത്തിനൊത്ത് വഴങ്ങുന്നില്ല!

ഉപ്പൂറ്റി മുതൽ നെറുക വരെ പ്രണയത്തിന്റെ
ജ്വരാഗ്നി ബാധിച്ചവൾക്ക്
ഇന്ന് അതേ ഇടങ്ങളിൽ,
സന്ധികളിൽ, പേശികളിൽ..
ത്വക്കിലും മാംസത്തിലും
കൂരമ്പുകൾ തുളഞ്ഞിറങ്ങുമ്പോലെ
വേദന!

ഓർമകളെ മറവി കൊണ്ട് പോകുന്നു.

എത്തിയേടത്ത് നിന്നും
നിന്നിടത്ത് ഏങ്ങി വലിഞ്ഞും
വലിയുന്നിടത്ത് നിദ്ര പ്രാപിച്ചും
ഓരോരോ ഓർമകൾ പകുതിക്ക് വച്ച്
പടിയിറങ്ങി പോകുന്നുണ്ട്!

ശബ്ദങ്ങൾ അസഹനീയമെന്ന് കേൾവി
അലറി കരയുമ്പോൾ
ഒച്ചയുയർത്തി സംസാരിക്കാൻ തൊണ്ട
പ്രലോഭിപ്പിക്കുന്നു!

കവിതകളിലിപ്പോ പഴയ ഇമ്പവും കമ്പവുമില്ല!

നിറങ്ങളെ സ്നേഹിക്കുമ്പോഴും അക്ഷരങ്ങൾ കണ്മുന്നിൽ
വ്യക്തമല്ലാതെ തെളിയുന്നു!

കണ്ണട തുരുത്തിലേക്ക് കണ്ണുകളുടെ
തെളിച്ചം മറയുന്നു!

കാലുകൾ തെറ്റി വീണ് പാഠങ്ങൾ പഠിക്കുമ്പോൾ
ചെറിയ പോറലുകൾ നെറ്റിയിൽ ചിത്രം സൃഷ്ടിക്കുന്നു!

പ്രണയിക്കാൻ ഒരു മനുഷ്യനെ തേടുമ്പോഴും
ബാഗിലെ അറയിൽ ഇന്നത്തേക്കുള്ള
വണ്ടിക്കൂലി തിരയാൻ
വിരലുകൾ തുടിക്കുന്നു!

പണമാണ് പ്രണയത്തേക്കാൾ വലുതെന്ന്
തിരിച്ചറിഞ്ഞവൾ കണ്ണാടി നോക്കുമ്പോൾ
അതിൽ ജരാനരകൾ ബാധിച്ച ഒരുവളുടെ
പ്രതിബിംബം ‘ വേഗമാകട്ടെ ‘ എന്ന് പിറു പിറുക്കുന്നു!

കിടക്കയിൽ ചുളിവ് വീഴാതെ കിടക്കാൻ
ശ്രദ്ധിക്കുന്നവൾ
കഴുകിയിട്ട തലയിണ ഉറകളിൽ സുഗന്ധമുണ്ടോ എന്ന് മണക്കുന്നവൾ

കുഴമ്പും മൂത്രവും തൈലവും മണക്കുന്ന കിടക്കയോർത്ത്
നെടുവീർപ്പിടുന്നു!

ചുളിഞ്ഞു പോകുന്ന വിരൽപ്പുറങ്ങളിൽ
വളരാതെ കുരുടിയ നഖച്ചുറ്റിൽ
കറുത്ത കരിമ്പനുകൾ തെളിയുന്നത്
വേദനയോടെ ഓർക്കുന്നു!

ഉറക്കം ഞെട്ടി ഉണരുമ്പോൾ
നിലയ്ക്കാത്ത ഹൃദയം മിടിക്കുമ്പോൾ
ആശ്വസിച്ച്,
അടുത്ത് കിടക്കുന്നവരെ മെല്ലെ തലോടി
” എന്റെ കുഞ്ഞ്..എന്റെ കുടുംബം..”
എന്ന് കണ്ണീർ പൊഴിക്കുന്നു!

എത്താൻ കൊതിച്ചിട്ടും എങ്ങും എത്താതെ പോയ വിരഹദുഃഖ കുപ്പായം അഴിച്ചു
വച്ചവൾ
ജീവിത കലണ്ടറിൽ അക്കങ്ങൾ തിരയുന്നത്
ആയുസ്സിന്റെ കണക്കെടുപ്പിനാണ്!

ജീവിച്ചിരിക്കുന്നത് എത്ര ഭാഗ്യമെന്ന് കരുതുമ്പോഴും
കൂടെയുള്ളവർ ഇനിയും എപ്പോഴും കൂടെയുണ്ടാകണേ
എന്ന് മനമറിഞ്ഞു പ്രാർത്ഥിക്കുമ്പോൾ
തലച്ചോറിൽ ലാവയൊഴുകും പോലെ
വിങ്ങൽ!

നിരത്തുകൾ വിജനമാകുന്നു!
സായാഹ്നം തേടിയെത്തുന്നു..

അതെ..
എനിക്കും വയസാവുകയാണ്..🥺

🍁 അഞ്ജുരഞ്ജിമ🍁