മലയാള മനോരമ ചാനലിലെ ജനപ്രിയ ആക്ഷേപഹാസ്യ സീരിയലായ മറിമായത്തിലെ നടീ നടൻമാരെ ഒന്നായി കോർത്തിണക്കി വൈപ്പിൻ കരയുടെ പശ്ചാത്തലത്തിൽ അണിയിച്ചൊരുക്കിയ ഒരു കുഞ്ഞ് മനോഹര സിനിമ അതാണ് പഞ്ചായത്ത് ജെട്ടി !
ഗോശ്രീ പാലം വരുന്നതിന് മുൻപ് എറണാകുളം കായലിന് ചുറ്റുമുളള ദ്വീപുകളയായിരുന്നു മുളവ് കാട്, പൊന്നാരിമംഗലം, മാലിപ്പുറം ഞാറക്കൽ, പനമ്പുകാട്, എളങ്കുന്നപ്പുഴ എന്നിവ ! പണ്ട് കോതാട് നിന്ന് ബോട്ടിൽ എറണാകുളം നഗരത്തിലേക്ക് വരുമ്പോൾ മുളവുകാട് ആശുപത്രി ജെട്ടി, പഞ്ചായത്ത് ജെട്ടി അങ്ങനെ അഞ്ച് ജെട്ടികൾ കഴിഞ്ഞാണ് പൊന്നാരിമംഗലം വരിക ഈ സിനിമക്ക് പേര് വന്നത് അങ്ങനെയാവണം !
സിനിമയെക്കുറിച്ച് :
ഗ്രാമീണ പശ്ചാത്തലത്തിൽ അണിയിച്ചൊരുക്കിയ ഒത്തിരി നർമ മൂഹൂർത്തങ്ങളുള്ള ഒരു മനോഹര ചിത്രം, മറിമായത്തിലെ അഭിനേതാക്കൾ എന്നതിലുപരി ഒരോരുത്തരും തങ്ങളുടെ വേഷം ഭംഗിയായി ചെയ്തിട്ടുണ്ട്. ചിത്രത്തിലെ നായകനായ സലീം ഹസൻ തന്നെയാണ് മണികണ്ഠൻ പട്ടാമ്പിക്കൊപ്പം തിരക്കഥയും സംവിധാനവും ഒരുക്കിയിരിക്കുന്നത്. മറിമായത്തിലെ പ്യാരി ജാതൻ എന്ന കഥാപാത്രത്തിന് ടെലിവിഷൻ അവാർഡിൽ പ്രത്യേക പരാമർശം ലഭിച്ചത് എന്ന സംശയം ബാക്കിയുണ്ടങ്കിൽ സലീമിന്റെ ഈ സിനിമയിലെ നായക വേഷം മാറ്റി തരും .
മണികണ്ഠൻ പട്ടാമ്പിയുടെ കഴിവുകൾ മലയാള സിനിമ വേണ്ട രീതിയിൽ ഉപയോഗിക്കുന്നുണ്ടോ എന്ന് സംശയമുണ്ട്. അത് പോലെ തന്നെ കോമഡി ചെയ്യാൻ മാത്രമല്ല മലയാള സിനിമയിലെ സീരിയസായ കഥാപാത്രങ്ങളും തന്റെ കയ്യിൽ ഭദ്രമാണന്ന് ഉറപ്പിക്കുന്നുണ്ട് സലീം ഹസൻ .
തിരക്കഥയെക്കുറിച്ച് പറഞ്ഞാൽ നിത്യജീവിതത്തിൽ നമ്മളെവിടെയെക്കൊയോ കാണുന്ന കഥാപാത്രങ്ങൾ, അവരുടെ പെരുമാറ്റങ്ങൾ, സംഭാഷണങ്ങൾ എല്ലാം വിശകലനം ചെയ്ത് ഒരുക്കിയ തിരക്കഥ👍
വൈപ്പിൻ കരക്കും എളങ്കുന്നപ്പുഴ പരിസര പ്രദേശങ്ങൾക്കും ഇത്രയും ഭംഗിയുണ്ടായിരുന്നോ എന്ന് തോന്നിപോകുന്ന കൃഷ് കൈമളിന്റെ ഛായാഗ്രഹണം .
രൻജിൻ രാജ് ഒരുക്കിയ സംഗീതം നന്നായിട്ടുണ്ടങ്കിലും ശ്യാം ശശിധരന്റെ എഡിറ്റിങ്ങിൽ ഇത്തിരി കൂടി ശ്രദ്ധിക്കാനുണ്ടായിരുന്നു എന്ന് തോന്നിയിരുന്നു. (അഭിപ്രായം തികച്ചും വ്യക്തിപരം )
വിനോദ് കോവൂർ, റിയാസ്, നിയാസ് ബക്കർ , രചന നാരയണൻ കുട്ടി,അനില ശ്രീകുമാർ തുടങ്ങി ഒട്ടേറെ താരങ്ങൾ അണിനിരക്കുന്ന ഇതിലെ വ്യത്യസ്തതയാർന്ന പ്രകടനം മണി ഷൊർണൂരിന്റെ മദ്യപാനി തന്നെ !
ഏച്ചുകെട്ടലോ മാസ് പ്രകടനങ്ങളോ ഇല്ലാതെ സാധാരണക്കാരുടെ ജീവിത പശ്ചാത്തലത്തിൽ വൃത്തിയായി അണിയിച്ചൊരുക്കിയ ഒരു കുഞ്ഞു സിനിമ ! ശുദ്ധ ബോംബ് പടങ്ങൾ എല്ലാ വർഷവും സെഞ്ചുറി തികക്കുന്ന മലയാള സിനിമക്ക് ഇത്തരം ചിത്രങ്ങൾ ആശ്വാസമാണ്. നല്ല സിനിമയെ സ്നേഹിക്കുന്നവർക്കും സിനിമയെടുക്കാൻ ആഗ്രഹിക്കുന്നവർക്കും പ്രചോദനമാണ് . ഇത് വിജയിപ്പിക്കേണ്ടത് നല്ല സിനിമയെ സ്നേഹിക്കുന്ന ഒരോരുത്തരുടെയും ഉത്തരവാദിത്വമാണ്.
നന്ദി സലിം ഹസൻ – മണികണ്ഠൻ പട്ടാമ്പി &
സപ്ത് തരംഗ് ക്രിയേഷൻസ്💕
NB: പ്രിയ സുനിൽ ഞാറക്കൽ Sunil Njarakkal Sunil Njarakkal നിങ്ങളൊരു എഴുത്തുകാരൻ എന്നതിലുപരി ഒരു അഭിനേതാവുകൂടിയാണന്ന് മറന്നു പോകുന്നു. ചുമ്മാ വീട്ടിലിരിക്കാതെ മലയാള സിനിമയിലേക്ക് “അടിച്ച് കേറി വാ…” സിനിമക്ക് നിങ്ങളെ ആവശ്യമുണ്ട്💞
