പ്രസവാനന്തര ശുശ്രൂഷ Part 2

4. പ്രസവിച്ച് കിടക്കുന്ന സ്ത്രീകളുടെ അരികിലേയ്ക്ക് അവരുടെ വീട്ടുകാരും ഭർത്താവിന്റെ വീട്ടുകാരും പിന്തുണയ്ക്കായി വന്നു പുതിയ കുടുംബത്തിന്റെ സ്വകാര്യത തകർക്കൽ…

വളരെ വിഷമം പിടിച്ചൊരു കാര്യമാണ് കാഴ്ചക്കാരുടെ തള്ളൽ. നിർബന്ധമായും നിർത്തലാക്കേണ്ട ഒന്നാണിത്.കുഞ്ഞിന് അണുബാധ, അമ്മയുടെ സ്വകാര്യത നഷ്ടമാകൽ, പാൽകൊടുക്കുവാനുള്ള ബുദ്ധിമുട്ട്, ആശുപത്രികാർക്കുണ്ടാവുന്ന ബുദ്ധിമുട്ടുകൾ ഇങ്ങനെ നിരവധി കാര്യങ്ങൾ ഇതിനോട് ചേർന്നുണ്ട്.
യഥാർത്ഥത്തിൽ പുതിയ അമ്മയ്ക്കും അച്ഛനും കുഞ്ഞിനും അവരുടെ സ്വകാര്യതയിൽ ആദ്യ ദിവസങ്ങൾ ചിലവിടുവാൻ വഴിയൊരുക്കുക. ഇനി അതല്ല, സഹായത്തിന് ആള് വേണമെങ്കിൽ ഏറ്റവും കുറച്ച് ഒന്നോ രണ്ടോ ആളുകൾ പ്രസവിച്ചുകിടക്കുന്ന സ്ത്രീയുടെ താല്പര്യം അനുസരിച്ച് അവരോടൊപ്പം നിൽക്കുക. ഓർക്കുക അതിനപ്പുറം ആ മുറിയിലേക്കെത്തുന്ന ഓരോരുത്തരും പുതിയ കുടുംബത്തിന്റെ സ്വകാര്യതയിലേക്ക് എത്തിനോക്കുന്നവരാണ് എന്ന്. വിശ്രമം, ഉറക്കം, കുഞ്ഞുമായുള്ള ബന്ധം സ്ഥാപിക്കൽ എന്നിവയാണ് ആദ്യ ദിനങ്ങളിൽ ഏറ്റവും ആവശ്യം.

5. പ്രസവരക്ഷ കഴിഞ്ഞ സ്ത്രീകളുടെ തടിച്ചുരുണ്ട ശരീരം കൃത്യമായ രക്ഷ കിട്ടി എന്നതിന്റെ അടയാളമാണ്…

മാറിക്കൊണ്ടിരിക്കുന്ന മറ്റൊരു അബദ്ധധാരണയാണിത്. പ്രസവരക്ഷയുടെ ഉദ്ദേശം തടിവയ്പിക്കുക എന്നതല്ല മറിച്ച് മാനസികമായും ശാരീരികമായും സ്ത്രീക്ക് ഊർജ്ജം നൽകുക എന്നതാണ്. അനാവശ്യമായി തടിവയ്പിക്കുന്നത് പിന്നീട് ആരോഗ്യപ്രശ്നങ്ങൾക്ക് കാരണമാവും. മാത്രമല്ല ആകാരവടിവൊക്കെ കാത്തുസൂക്ഷിക്കുവാൻ ആഗ്രഹിക്കുന്ന സ്ത്രീകൾക്ക് നിരാശയ്ക്ക് പോലും ഈ വക നിർബന്ധങ്ങൾ കാരണമായേക്കാം. തടിവയ്ക്കാനുള്ള ഭക്ഷണമല്ല അമ്മയുടെയും കുഞ്ഞിന്റെയും ആരോഗ്യത്തിന് ആവശ്യമായ ആഹാരമാണ് പ്രസവശേഷം സ്ത്രീകൾ കഴിക്കേണ്ടത്.

6. പ്രസവത്തിനുശേഷം തൊണ്ണൂറു ദിവസത്തേയ്ക്ക് സ്ത്രീകൾ പുറത്തിറങ്ങാൻ പാടില്ല…

പണ്ട് വളരെ നിർബന്ധത്തോടെ പറഞ്ഞിരുന്ന ഈ കാര്യവും നമ്മൾ സൂക്ഷ്മതയോടെ ശ്രദ്ധിക്കേണ്ടിയിരിക്കുന്നു. അന്നത്തെ സാമൂഹ്യ സാംസ്കാരിക ചുറ്റുപാടുകളിൽ അതിനെ ശരിവയ്ക്കുന്ന ഒട്ടേറെ കാരണങ്ങൾ ഉണ്ടായിരുന്നു. എന്നാലിന്ന് കാലം മാറി. ഗതാഗത സൗകര്യങ്ങൾ പോലും വ്യത്യാസപ്പെട്ടു. അമ്മയുടെ വിശ്രമവും കുഞ്ഞിന്റെ അണുബാധ തടയലുമാണ് മുകളിൽ പറഞ്ഞ നിയന്ത്രണത്തിന്റെ അടിസ്ഥാനം. ഇതു രണ്ടും മാറിയ സാഹചര്യത്തിൽ നമുക്ക് നിയന്ത്രിക്കാൻ പറ്റുന്നവയുമാണ്. അതുകൊണ്ടുതന്നെ അനാവശ്യമായ കാലത്തിന് ചേരാത്ത നിയന്ത്രണങ്ങൾ അടിച്ചേൽപിച്ച് പുതിയ മാതാപിതാക്കളുടെ സന്തോഷം തല്ലിക്കെടുത്തേണ്ടതില്ല.

ഇത്തരം കുറച്ച് കാലങ്ങൾ ശ്രദ്ധിച്ചാൽ ഒരു കുഞ്ഞിനെ സന്തോഷത്തോടെയും സമാധാനത്തോടെയും സ്വീകരിക്കുവാൻ നമുക്ക് സാധിക്കും.ഒരു സ്ത്രീ പ്രസവിക്കുമ്പോൾ ഒരു കുഞ്ഞു മാത്രമല്ല ഒരു അച്ഛനും അമ്മയും കൂടി ജന്മമെടുക്കുന്നു. കുഞ്ഞിന്റെ ബാലാരിഷ്ടതകൾ മാറ്റി അതിനെ വളർത്തുന്നതിൽ കാണിക്കുന്ന ഉത്സാഹം പുതിയ മാതാപിതാക്കൾക്ക് അവരുടെ മാതാവും പിതാവുമായുള്ള ബാലരിഷ്ടതകൾ കൂടി മാറ്റുവാൻ അവസരം കൊടുക്കുന്നതിൽ കൂടി സമൂഹം കാണിക്കേണ്ടിയിരിക്കുന്നു.

മിലു സൂസൻ തോമസ്
സൈക്കോളജിസ്റ്റ്,
മദർ ഹോസ്പിറ്റൽ, തൃശ്ശൂർ