ഒറ്റക്കായൊരുവൾ

ഒരു സ്ത്രീയെ ഒറ്റക്ക് ആകുന്നതിനു മുൻപ്, പെങ്ങളായും സുഹൃത്തായും, അനിയത്തിയായും മകളായും,ഇത്തയായും ചേച്ചിയായും എല്ലാം കണ്ട കണ്ണുകൾക്ക്, ഒറ്റക്ക് ആയെന്ന് അറിഞ്ഞ സമയം മുതൽ അവരോട് കാമം തോന്നി തുടങ്ങുന്നത് എന്ത് കൊണ്ടായിരിക്കും.

നിങ്ങൾ, അവരട് അങ്ങിനെ സംസാരിക്കുമ്പോൾ അവരുടെ മാനസികാവസ്ഥ അറിയാൻ ശ്രമിച്ചിട്ടുണ്ടോ. അവർക്ക് നിങ്ങളോട് വെറുപ്പോ ദേഷ്യമോ അല്ല തോന്നുക. മറിച്ച് സങ്കടമോ, സ്വയം പുച്ഛമോ ആയിരിക്കും. ഇങ്ങനെ ഒരാളെ ആണല്ലോ ഞാൻ സ്നേഹിച്ചിരുന്നത് എന്ന പുച്ഛം.

അവർ ഒറ്റക്ക് ആണെന്ന് അറിയുന്ന സമയം മുതൽ, പലരും അവരോട് ആ രീതിയിൽ പെരുമാറുന്നുണ്ടാകും. പക്ഷെ, അവരോടൊക്കെ വെറുപ്പോ ദേഷ്യമോ ഒക്കെയാണ് തോന്നുന്നതെങ്കിലും, അവരോട് അത്രമേൽ അടുത്ത നിങ്ങളോട് അമ്പരപ്പോ, സങ്കടമോ, അല്ലെങ്കിൽ സ്വയം പുച്ഛമോ ആയിരിക്കും തോന്നുക.

കാരണം, ഒറ്റക്ക് ആകുമ്പോൾ നിങ്ങളെ പോലുള്ളവർ കൂടെയുണ്ടാകും എന്ന ധൈര്യം അവർക്ക് ഉണ്ടാകും. അങ്ങനെ പ്രതീക്ഷയോടെ ഇരുന്നവരിൽ നിന്ന് ഇങ്ങനെ ഒരു നീക്കം ഉണ്ടാകുമ്പോൾ അവർ അമ്പരന്ന് പോകും.

പിന്നീട് അവരുടെ ജീവിതത്തിൽ അവർ ആരെയും വിശ്വസിക്കാതെയാകും. കാണുന്നവരെയെല്ലാം സംശയത്തോടെ മാത്രമായിരിക്കും കാണുക. ആരിലും അവർ വിശ്വാസം കണ്ടെത്താതെയാകും. ചുറ്റിലും അവിശ്വാസത്തിന്റെ, സ്നഹിമില്ലായ്മയുടെ, സംശയത്തിന്റെ കള്ളിമുൾ ചെടികൾ നടാൻ തുടങ്ങും. പോകെ പോകെ ആരിലേക്കും അവർക്ക് അടുക്കാനോ, ആർക്കും അവരിലേക്ക് അടുക്കാനോ കഴിയാതെയാകും. പുറമെ, ദേഷ്യത്തിന്റെ, തന്റേടത്തിന്റെ മുഖംമൂടി അണിയും.അപ്പോൾ നിങ്ങളവർക്ക് പുതിയൊരു പേര് കൂടി പതിച്ചു നൽകും. അഹങ്കാരി.

ഒറ്റപ്പെടലിന്റെ അവസാനം, മനസ്സ് മരവിച്ചവർ, സ്നേഹമില്ലായ്മയിൽ, എങ്ങനെയൊക്കെയോ ജീവിച്ചു മരിക്കും. അന്നേരം ആwദരാജ്ഞലികളും അനുശോചനങ്ങളും അർപ്പിക്കുന്ന തിരക്കിൽ ആയിരിക്കും നിങ്ങൾ.

അവരെ അങ്ങനെയാക്കിയ നിങ്ങളോ, മാന്യരായി അപ്പോഴും സന്തോഷത്തിൽ ജീവിക്കും.

ഒറ്റക്കായൊരുവളെ ഉപയോഗിക്കാതെ, കഴിയുന്ന പോലെ കൂടെ നിൽക്കാൻ ശ്രമിക്കുക…

മുറു കൊടുങ്ങല്ലൂർ