പെടലി 2025

ഞാനൊന്ന് വീണു. ഇന്നലെ ബാത്‌റൂമിലെ സോപ്പ് കുമിളയും എണ്ണയും സാറ്റ് കളിക്കുന്നതിനിടയിൽ അറിയാതെയാ വഴി പോയതാ. കാല് വഴുക്കി സ്ലോ മോഷനിൽ തല തറയിലടിച്ചു വീഴുന്നത് സിനിമയിലെന്ന പോലെ തോന്നിച്ചു. വാസ്തുവിലൊന്നും എനിക്ക് തീരെ വിശ്വാസം ഇല്ലാത്തതാ. ഇന്നലെത്തോടെ അതൊക്കെ മാറി. തെക്കോട്ടു തല വെച്ചു കിടക്കരുതെന്ന് വെറുതെയല്ല അവർ പറയുന്നത്. തെക്കോട്ടു തലയിടിച്ചു വീണപ്പോളല്ലേ മനസ്സിലായത്, തെക്കോട്ടു തല വെച്ചാൽ ഭൂഗോളം ഇരട്ടി സ്പീഡിൽ കറങ്ങും നമുക്ക് ചുറ്റും. ഏതായാലും നല്ല സുഖം.

ഒന്ന് വീണപ്പോ തലയോട്ടിക്കുള്ളിലെ വെന്തചോറിൽ (തലചോറെന്നും പറയാം)നിന്നും കുറച്ചു സാധനങ്ങൾ പുറത്തേക്ക് തെറിച്ചു പോയി. ആദ്യം നിറകുടം തുളുമ്പി നിന്ന അഹങ്കാരം. മുഴുവൻ പോയിട്ടില്ല. കുറച്ചേ പോയുള്ളൂ. പിന്നെ തിടുക്കം. എപ്പോളും ഫോർത് ഗിയറിൽ ഓടി കൊണ്ടിരുന്ന മാരുതി 800 ഇപ്പൊ ഫസ്റ്റ് ഗിയറിൽ നിന്ന് കേറുന്നില്ല. മൊത്തത്തിൽ ഒരു മന്ദത. മാരുതിയെന്ന് പറയാൻ കാരണം എൻപത്തഞ്ചിൽ ജനിച്ച 90s kid ആയ ഞാനന്ത കാലത്ത് ഇതൊക്കെയേ നിരത്തിൽ കണ്ടിട്ടുള്ളൂ. പിന്നെ ambassador വേണ്ടന്ന് വെച്ചു. വലിയ സൈസില്ലാത്ത ഒരു കാർ. അത്രെയേ ഉദ്ദേശിച്ചുള്ളൂ.

അപ്പൊ പറഞ്ഞു വന്നത് ഒന്ന് വീണു. അതും ഞാറാഴ്ച. വീഴ്ചയുടെ ആഘാതത്തിൽ തലയുടെ നട്ടും ബോൾട്ടും പോയോന്ന് സ്കാൻ ചെയ്തു നോക്കാൻ തിങ്കളാഴ്ച വരെ കാത്ത് നിന്നു. അല്ല കിടന്നു. വീണപ്പോ മുതൽ കിടപ്പാ. രാത്രി കിടക്കാൻ നേരം മോൻ ചോദിക്കാ അമ്മക്ക് എങ്ങനെയാ 24 മണിക്കൂറും ഇങ്ങനെ ഉറങ്ങാൻ പറ്റണത്? അവനറിയോ എന്റെ ടെൻഷൻ? തലയിൽ എന്തൊക്കെ ബാക്കിയുണ്ടെന്നാലോചിച്ചു ക്ഷീണിച്ചു ഉറങ്ങണതാണെന്ന്.

ഇന്ന് രാവിലെ എണീറ്റപ്പൊ മുതൽ പെടലി വേദന. ഡോക്ടറെ കണ്ടു. തല സ്കാൻ ചെയ്തു. ബ്ലീഡിങ് ക്ലോട് തുടങ്ങിയ ഒന്നുമില്ലെന്നും വീഴ്ചയിൽ പെടലി ഉളുക്കി എന്നുമാണ് ഇപ്പോൾ ഇറങ്ങിയ മെഡിക്കൽ ബുള്ളറ്റിനിൽ പറയുന്നത്.

2025 ഏതായാലും കലക്കി. ഇനി ഒന്നും വേണ്ടാട്ടോ. ഇതിനോടകം മോന്റെ കാലിലെ കുഞ്ഞു മുഴ ഓപ്പറേഷൻ ചെയ്തതും എന്റെ തല സ്കാനും എല്ലാം കൊണ്ടും ട്രൗസർ കീറി. വെൽക്കം 2025.

ഗുണപാഠം : നടക്കുമ്പോളും ഓടുമ്പോളും കുളിക്കുമ്പോളും വീഴാതെ നോക്കുക. അഥവാ വീണാൽ തലയിടിച്ചു വീഴാതെ നോക്കുക. ഇനി ഇതൊന്നും പറ്റിയില്ലെങ്കിലും ഞാറാഴ്ച വീഴാതെ നോക്കുക.

ഷിജു