കരുണയുടെ സമ്മാനം

പല വർണ്ണങ്ങളിൽ ബലൂണുകൾ… പറന്നു പോകാതിരിക്കാൻ അതിന്റെ നൂലുകൾ അവളുടെ ആ കുഞ്ഞു കൈത്തണ്ടയിൽ ചുറ്റിയിട്ടുണ്ട്. പിറകിലായി അവളുടെ അമ്മ ഒരു കൊച്ചു കുഞ്ഞിനേയും തോളിലിട്ട് അവൾക്ക് അകമ്പടിയെന്നോണം കൂടെ നടക്കുന്നുണ്ട്. അവൾ പ്രതീക്ഷയോടെ എതിരെ വരുന്ന ഓരോ കുഞ്ഞു മുഖത്തേക്കും നോക്കുന്നുണ്ട്.

അവൾക്കിന്ന് ആ ബലൂൻ മുഴുവൻ വിറ്റു പോകണമായിരുന്നു…

നാളെ അവളുടെ അനിയത്തികുട്ടിയുടെ ഒന്നാം പിറന്നാളാണ്.

അവൾക്കായി ഒരു കുഞ്ഞുടുപ്പ് വാങ്ങണം.

ഉടുപ്പ് അവൾ കണ്ടു വെച്ചിട്ടുണ്ട് ബസ് സ്റ്റാൻഡിലെ ആ വഴിയോര കച്ചവടക്കാരനിൽ അതുണ്ട്..

കഴിഞ്ഞ രണ്ടു മൂന്ന് ദിവസമായി അവൾ ആ കച്ചവടക്കാരന്റെ അടുത്ത് പോകും അതിന്റെ വില അന്വേഷിക്കും, തൊട്ട് നോക്കി അതിന്റെ ഭംഗി ആസ്വദിക്കും. അവളുടെ സങ്കൽപ്പങ്ങളിൽ അത് അണിഞ്ഞ കുഞ്ഞു അനിയത്തിയുടെ ചിത്രം വിരിയും..

അവളും ആ വഴിയോര കച്ചവടക്കാരനും സൗഹൃദത്തിൽ ആയിരിക്കുന്നു. അവൾ അയാളുടെ അടുത്തെത്തി ആ ഉടുപ്പ് കാണുന്നില്ലല്ലോ.. അതെവിടെ അവൾ ആംഗ്യത്തിൽ ചോദിച്ചു.

കച്ചവടക്കാരൻ ഒന്ന് ചിരിക്കുക മാത്രം ചെയ്തു. അവളുടെ അമ്മയും അനിയത്തിയും കുറച്ചു മാറി ഏതോ വിദൂരതയിലേക്ക് നോക്കി ഇരിക്കുന്നു.

അവൾ തല താഴ്ത്തി സങ്കടത്തിന്റെ ഒരല കണ്ണിൽ ഓളം വെട്ടി.

സ്റ്റാൻഡിൽ ബസുകളും ആളുകളും വന്നു പോയി കൊണ്ടിരുന്നു. ഒരു ചക്രം പോലെ അതിങ്ങനെ കറങ്ങി കൊണ്ടിരിക്കുന്നു. ദിക്കുകളിൽ നിന്നും ദിക്കുകളിലേക്ക്. ആകെ ബഹളം ആണ് കച്ചവടക്കാരുടെയും ലോഡിങ് തൊഴിലാളികളുടെയും യാത്രക്കാരെ ബസുകളിലേക്ക് വിളിച്ചു കേറ്റുന്നതിന്റെയും.. അതിനിടയിലാണ് ഒരു കുഞ്ഞിന്റെ കരച്ചിൽ ഉയർന്നു കേൾക്കുന്നത്.

നിർത്താതെ കരയുകയാണ് അവൻ.

തന്റെ അനിയത്തിയുടെ അതേ പ്രായം. കരച്ചിലിന് ശക്തി കൂടുകയാണ്. അവന്റെ അമ്മ അവനെ ആശ്വസിപ്പിക്കാൻ ശ്രമിക്കുന്നുണ്ട്. പക്ഷെ കുഞ്ഞ് കരച്ചിൽ നിർത്തുന്നില്ല.

അവൾ മെല്ലെ അവർക്കരികിലേക്ക് നടന്നു.

ഒരു ബലൂൺ അവൾ ആ കുഞ്ഞിന്റെ കയ്യിൽ കൊടുത്തു. എന്തോ അവൻ പതിയെ കരച്ചിൽ നിർത്തി

അവളെ നോക്കി പുഞ്ചിരിച്ചു.

അവൾ തിരിഞ്ഞു നടന്നു.

പൈസ പോലും വാങ്ങാതെ..

കുഞ്ഞിന്റെ അമ്മ ‘ഹേയ് നിൽക്കൂ” എന്നൊക്കെ വിളിച്ചു പറയുന്നുണ്ട്. അവൾ തിരിഞ്ഞു നോക്കാതെ നടന്നു.

അവളുടെ അമ്മയുടെയും അനിയത്തിയുടെയും അരികിൽ ചെന്നിരുന്നു.

എല്ലാം കണ്ടു കൊണ്ടിരുന്ന ആ തുണി കച്ചവടക്കാരൻ പുഞ്ചിരിച്ചു.

അയാൾ മെല്ലെ അവരുടെ അരികിലേക്ക് ചെന്നു.

കയ്യിലിരുന്ന പൊതി അവൾക്ക് സമ്മാനിച്ചു.

അവൾ ചെയ്തത് പോലെ അയാളും തിരിഞ്ഞു നടന്നു.

അവൾ ആ പൊതി അഴിച്ചു.

താൻ വാങ്ങാൻ കൊതിച്ച കുഞ്ഞുടുപ്പ്. അവൾ ആഹ്ലാദത്തോടെ അമ്മയെ കെട്ടിപിടിച്ചു ഒരുമ്മ വെച്ചു.

ആ ഒരുമ്മ അമ്മ ആ കൊച്ചു കുഞ്ഞിലേക്കും പകർന്നു.

*ഫൈസി മന്ദലംകുന്ന്*