🌹ദാവീദിൻ്റെചോപ്പി🌹

“ഇന്നലെ കണ്ടില്ലാലോ, എവിടായിരുന്നു”

“ഇന്നലെ ഞാൻ ജോലിക്കു പോയില്ലായിരുന്നു അതാ. “

” ഹോ, എന്ത് പറ്റി ഇന്നലെ പോവാഞ്ഞത്?”

“വീട്ടിൽ കുറച്ച് പ്രശ്നങ്ങൾ, അതാ”

” ഹസ്ബൻറുമായിട്ടാണോ?”

” ഹേയ്, ഞാനിതിന് വിവാഹം കഴിച്ചിട്ടില്ലല്ലോ”

തിരക്കൊഴിഞ്ഞ കെ എസ് ആർടിസി ബസ്സിലെ രണ്ടു പേർക്കിരിക്കാവുന്ന സീറ്റിൽ അവളുടെ അടുത്തിരുന്നു കൊണ്ടവനൊന്നു ദീർഘ നിശ്വാസം വിട്ടു. 

അവൻ്റെ ദീർഘ നിശ്വാസം കേട്ടുകൊണ്ടവൾ ചോദിച്ചു. 

“അതെന്താ വീട്ടിലെ പ്രശ്നങ്ങൾ കാരണമാണെന്ന് പറഞ്ഞപ്പോൾ ഹസ്ബൻ്റുമായിട്ടാണോന്ന് ചോദിച്ചത് എന്നെക്കണ്ടാൽ കല്യാണം കഴിച്ചതാണെന്ന് തോന്നുമോ?”

“അതിപ്പോ ഇയാളെ കണ്ടാലെന്നല്ല. കല്യാണം കഴിഞ്ഞ ഇപ്പോഴത്തെ പെൺകുട്ടികളെ കണ്ടാൽ കല്യാണം കഴിഞ്ഞതാണെന്നു നമുക്ക് മനസ്സിലാവുകയേയില്ല. “

“അതെന്താ കഴുത്തിൽ താലി കാണില്ലേ?”

“താലിയാണോ അതോ വെറും ലോക്കറ്റാണോന്ന് ശ്രദ്ധിച്ചു നോക്കിയാലേ മനസ്സിലാവൂ. വിവാഹം കഴിഞ്ഞവരാണെങ്കിലും ഇപ്പോൾ ചെറിയ നൂലു പോലുള്ള മാലയാ അധികം പേരും ഉപയോഗിക്കുന്നത്, പിന്നെ കഴിഞ്ഞ ഒരു രണ്ടുമൂന്നുവർഷം മുന്നെ വരെ നെറ്റിയിൽ ചെറിയൊരു സിന്ദൂരം തൊട്ടത് കാണാമായിരുന്നു. പിന്നീടത് ചെറുതായി, ചെറുതായി വന്ന് ഇപ്പോ പലരും സിന്ദൂരം തൊടാറുപോലുമില്ല, അതും ഔട്ടോഫ് ഫാഷനായി. പിന്നെ, ഡ്രസ്സാണെങ്കിൽ എല്ലാരും മോഡേൺ ഡ്രസ്സാ ഇടുന്നത് പലരും മിഡിയും ടോപ്പും, ഒക്കെയായി. 

പക്ഷേ പണ്ടങ്ങനെയല്ല. നമ്മുടെയൊക്കെ അമ്മമാർ, സാരിയായിരുന്നു അവരുടെ വേഷം. പിന്നെ താലിമാല അഞ്ചു പവനെങ്കിലുമുണ്ടായിരുന്നു. നെറ്റിയിൽ നിന്ന് തലയുടെ പുറകു വശം വരെ പഞ്ചായത്ത് റോഡു വെട്ടിയമാതിരി മുടി പകുത്തിട്ട്, അതിൽ ഒരു ഡപ്പി സിന്ദൂരം വാരിപ്പൊത്തിയിട്ടുണ്ടാവും. അതുകണ്ടാൽത്തന്നെ നമുക്കറിയാലോ കല്യാണം കഴിഞ്ഞതാണെന്ന്, അതിന് പ്രത്യേകിച്ചവർ കല്യാണം കഴിഞ്ഞതാണെന്ന് നമ്മളോട് പറയുകയൊന്നും വേണ്ട. അങ്ങ് ചന്ദ്രനിൽ നിന്നു നോക്കിയാൽ പോലും മനസ്സിലാവും ഇവരുടെ കല്യാണം കഴിഞ്ഞതാണല്ലോന്ന്. “

അവൻ പറഞ്ഞു നിർത്തിയതും ബസ്സാണെന്നോ ചുറ്റും യാത്രക്കാരുണ്ടെന്നോ ഓർക്കാതെ അവളൊന്നു പൊട്ടിച്ചിരിച്ചു. പെട്ടെന്ന് വായ പൊത്തിക്കൊണ്ടു പറഞ്ഞു. 

“യ്യോ ബസ്സാണല്ലോ”ന്നു പറഞ്ഞ് ചുറ്റും നോക്കി. 

അടുത്ത സീറ്റിലെ പലരും അവളുടെ ചിരി കണ്ട് അവളെ നോക്കുന്നതു കണ്ടവൾ ചിരി നിർത്തി കഴുത്തിലെ ഷോൾ കൊണ്ടു മുഖം തുടച്ചു. 

എന്നിട്ടും അവളെന്തോ ഓർമ്മയിൽ ചിരിച്ചു കൊണ്ടിരുന്നു, പിന്നീടവനോടു പറഞ്ഞു. 

“പെണ്ണുങ്ങളെ നല്ല നിരീക്ഷണമാണല്ലോ, വായ് നോട്ടം തന്നെ പണി, ല്ലേ?”

“അയ്യോ അതൊന്നുമല്ല. എനിക്ക് കമ്പ്യൂട്ടർ സർവീസാണ് ജോലി. എന്നും പലസ്ഥലത്തേയ്ക്കും യാത്ര ചെയ്യാനുണ്ടാവും അപ്പോ യാത്രക്കാരിലെ പലരെയും വാച്ചുചെയ്യും. അങ്ങനെ ഓരോരുത്തരെയും കാണുമ്പോളുള്ള അവസ്ഥയാണ് ഞാൻ പറഞ്ഞത്. 

“ആഹാ, നല്ല ജോലിയാണല്ലോ? എന്താ ഇയാൾടെ പേര്?”

“ൻ്റെ പേര് ഇച്ചിരെ പുരാതനമായ പേരാണ്”

“എന്താണാവോ ഇത്ര പുരാതനമായ പേര്?”

“പറയാം, ദാവീദ് ന്നാ”

“റെയർ പേരാണല്ലോ, ദാവീദ് നല്ല പേരാണെങ്കിലും ഒരു പാട് പേർക്കില്ലാത്ത പേരാണ്”

“ശരിയാണ്, ബൈബിളിലെ ഉശിരുള്ള ഒരാണിൻ്റെ പേരാണ്, ഇസ്രായേലിലെ ശൗൽ രാജാവിൻ്റെ അംഗരക്ഷകൻ, ഗോലിയാത്ത് എന്ന ഭീകരനെ കവണ കൊണ്ടു വധിച്ചവൻ, ധൈര്യശാലി, എന്നിങ്ങനെയൊക്കയാണ് പഴയ ദാവീദ്”

“ഓഹോ, അപ്പോ ഈ ദാവീദോ?”

“ഈ ദാവീദ് ജീവിക്കാൻ വേണ്ടി കവണയുപേക്ഷിച്ച് കമ്പ്യൂട്ടറുമായി നടക്കുന്നു, രണ്ടിലും ‘ക’  ഉണ്ട്. അതാണൊരാശ്വാസം, അവനൊന്നു പുഞ്ചിരിച്ചു. 

അവൻ്റെ ചിരി കണ്ട് അവൾക്കു ചിരി വന്നു. അവളുടെ ചിരികണ്ട് അവൻ ചോദിച്ചു. 

“എന്താണാവോ ഭവതിയുടെ പേര്?”

“എൻ്റെ പേര് സോഫിയ, എല്ലാരും ചോപ്പീന്ന് വിളിക്കും. വീട്ടിൽ എൻ്റെ അനിയൻ കുഞ്ഞിലേ വിളിച്ച് തുടങ്ങിയതാ അങ്ങനെ. പിന്നെ എല്ലാരും അങ്ങനെ തന്നെ വിളിച്ച് തുടങ്ങി, ചോപ്പീന്ന്. ഇപ്പോ രേഖകളിൽ മാത്രമേ ഉള്ളൂ സോഫീന്ന്, ബാക്കിയെല്ലാർക്കും ഞാൻ ചോപ്പി”

‘ഹ ഹ ഹ, നല്ല പേര് ചോപ്പി”, അവൻ വായപൊത്തി ചിരിച്ചു കൊണ്ടു പറഞ്ഞു. 

‘ദേ എൻ്റെ പേര് വിളിച്ച് കളിയാക്കിയാലുണ്ടല്ലോ, അവൾ കുസൃതിയോടെ അവൻ്റെ കാലിന് കയ്യിലെ മൊബൈലുകൊണ്ട് ഒന്ന് കുത്തി. 

‘ ഹോ, നല്ല വേദന, അവിടെ തടവിക്കൊണ്ടവൻ പറഞ്ഞു. പിന്നീടവളോട് ചോദിച്ചു. എന്താ ജോലി ചോപ്പിക്ക്, 

“ഇവിടെ ഒരു പ്രൈവറ്റ് ആശുപത്രിയിൽ റേഡിയോളജിസ്റ്റാ, ഇന്ന് ഡേ ഡ്യൂട്ടിയായിരുന്നു അതാ ഇപ്പോ പോരാൻ പറ്റിയേ, ഇനി ഈ മാസം പതിനഞ്ചു വരെ ഡേ ഡ്യൂട്ടിയാ, 

” അപ്പോ ഇതേ സമയം ഇതേ ബസ്സിലുണ്ടാവുമെന്ന് സാരം, 

” ഉം, തന്നെ, തന്നെ, അവൾ ചിരിച്ചു. 

“അപ്പോ ഇനി കുറച്ചു ദിവസം ഇതേ ടൈമിൽ കാണാംല്ലേ, 

” അയ്യട, ഒരു കാണലുകാരൻ, ഞാൻ വരത്തൊന്നുമില്ല ഈ ടൈമിൽ ഞാൻഎന്റെ വേറെ ബസ്സിന് പോവും നോക്കിക്കോ, സംസാരിച്ചു സമയം പോയതറിഞ്ഞില്ല. എനിക്കിറങ്ങാൻ സമയമായി. അടുത്ത സ്റ്റോപ്പിൽ ഞാനിറങ്ങും, 

“ഓ, ആയ്ക്കോട്ടെ ഞാൻ നാട്ടിലേയ്ക്കാ, ഞാൻ രണ്ടുമൂന്നു ദിവസായി തന്നെ കാണുന്നു. കണ്ടപ്പോൾ മുതൽ എന്തോ ഒരിഷ്ടം, ഏതോ മുൻ ജൻമത്തിൽ കണ്ട പോലെ, 

“ഹോ, ഓവറാക്കണ്ട, നേരത്തെ പറഞ്ഞില്ലേ, ചന്ദ്രനിൽ നിന്നു നോക്കിയാൽ പോലും കല്യാണം കഴിഞ്ഞതാണെന്നു മനസ്സിലാവുംന്ന്. അവരോട് പറഞ്ഞാ മതി കേട്ടോ ഇമ്മാരി പൈങ്കിളി, ഇപ്പോഴത്തെ ന്യൂജൻസിനോടിത് പറഞ്ഞിട്ട് ഒരു കാര്യോമില്ല.” അവൾ ചിരിച്ചു കൊണ്ട് പറഞ്ഞു. “ഞാനിറങ്ങുന്നു സ്റ്റോപ്പെത്തി. “

‘നാളെ കാണോ, 

” വീണ്ടും കാണാൻ വധിക്കപ്പെട്ടവരാണെങ്കിൽ, 

ബസ്സ് നിന്നതും, അത്രയും പറഞ്ഞ് അവളിറങ്ങി നടന്നു. 

ബസ്സിറങ്ങിയവൾ റോഡു സൈഡിലൂടെ മെല്ലെ നടന്നു പോവുന്നതവൻ നോക്കി നിന്നു, 

തുടർന്നുള്ള യാത്രക്കിടയിൽ അവൻ അവളെപ്പറ്റിത്തന്നെ ഓർത്തു കൊണ്ടിരുന്നു. ‘

കാണാൻ അതിസുന്ദരിയാണ്, വയസ്സ് മുപ്പതിനോടടുത്തു കാണും, കണ്ണിലൊരു ശോകഭാവം ഉണ്ട്. ചിലപ്പോൾ ഡൈവോഴ്സായതായിരിക്കുമോ, കല്യാണം കഴിഞ്ഞില്ലാന്ന് ചിലപ്പോൾ വെറുതേ പറഞ്ഞതാവും, യാദൃച്ഛികമായാണ് രണ്ടുമൂന്നു ദിവസം മുന്നെ അവളെ ഇതേ ബസ്സ് യാത്രയിൽ കണ്ടുമുട്ടിയത്, എന്തോ ഓരകർഷണം അപ്പോഴേ തോന്നിയിരുന്നു. സംസാരിക്കാൻ സാധിച്ചതിന്നാണ്, നല്ല സംസാരം, വർഷങ്ങൾക്ക് മുമ്പേ പരിചിതരാണെന്ന ഭാവത്തിലുള്ള സംസാരം, ആ ഒരു ഫീലിംങ്ങോടെത്തന്നെയാണ് ഞാനും സംസാരിച്ചത്, അവളുടെ  വാക്കുകൾ സത്യമാവുകയാണെങ്കിൽ, അവൾ പറഞ്ഞത് അവൻ വീണ്ടുമോർത്തു നോക്കി. “വീണ്ടും കാണാൻ വിധിക്കപ്പെട്ടവരാണെങ്കിൽ ” ചിലപ്പോൾ ഇനിയും കാണുമായിരിക്കും. 

പിറ്റേന്ന് അവൻ ടൗണിലൂടെ റോഡ് ക്രോസ് ചെയ്യുമ്പോഴാണ് പെട്ടെന്നൊരു ബൈക്ക് വന്ന് അവനെ തട്ടിമറിച്ചിട്ടത് ഓവുചാലിനിട്ട  സ്ലാബിൽ കാലിടിച്ചവൻ തെറിച്ചു വീണു. ആളുകൾ ഓടികൂടി അവനെയെടുത്ത് ഓട്ടോയിൽ കയറ്റി ആശുപത്രിയിലെത്തിച്ചു. 

പരിശോധിച്ച ഡോക്ടർ അവനോട് പറഞ്ഞു. എക്സറേ, എടുക്കണം കാൽപ്പത്തിയ്ക്ക് മുകളിലായി പൊട്ടലുണ്ടെന്ന് തോന്നുന്നു. ഒറ്റക്കാലിൽ ചാടിച്ചാടിയും കൂടെ വന്നവരുടെ തോളിൽ തുങ്ങിയും അവൻ എക്സറേ റൂമിനടുത്തെത്തി. ഡോക്ടറുടെ കുറിപ്പ് കൗണ്ടറിൽ കാണിച്ചപ്പോൾ അവർ അകത്തേയ്ക്ക് ചെല്ലാൻ അനുവാദം കൊടുത്തു. അവൻ ഡോർ തള്ളിത്തുറന്ന് അകത്ത് കയറിയപ്പോൾ അവളുണ്ട് അവിടെയിരുന്ന് ടേബിളിൽ തലവെച്ച്  ഉറക്കം തൂങ്ങുന്നു.
അവൻ അടുത്തു ചെന്ന് വിളിച്ചു. 

“ഏയ് ചോപ്പീ,
ചോപ്പീന്നുള്ള വിളി കേട്ടതും അവൾ ഞെട്ടിയുണർന്നു. 

” ങ്ഹേ, ആരാ, അവനെ കണ്ടതും അവളുടെ കണ്ണുകൾ വിടർന്നു

“ഇതാരാ വീരശൂര പരാക്രമി ദാവീദ് രാജാവോ, 

” അതെ പരാക്രമി വീണ് കാല് ഒടിഞ്ഞ് ഒന്ന് വേഗം എക്സറെ എടുക്ക്. 

“യ്യോ, എന്നാ പറ്റീതാ, നല്ല വേദനയാണെന്ന് തോന്നുന്നല്ലോ. അവൻ്റെ മുഖഭാവം ശ്രദ്ധിച്ചു കൊണ്ടവൾ പറഞ്ഞു. ‘

‘ കാല് നിലത്ത് കുത്താൻ പറ്റുന്നില്ല. 

“ശരി. സോക്സ് ഊരി മാറ്റി, പാൻ്റ് മുട്ടിൻമേലേയ്ക്ക് കയറ്റി വെയ്ക്ക്, എന്നിട്ട് ദാ. ഇവിടെ വന്ന് ഇങ്ങനെ നിൽക്ക്. നിൽക്കേണ്ട പൊസിഷൻ കാണിച്ചു കൊടുത്തുകൊണ്ടവൾ പറഞ്ഞു. 

അവൻ അവൾ പറഞ്ഞപോലെ ചെയ്തു. അൽപ്പ സമയത്തിനകം എക്സറേ ഫിലിമുമായി വന്നവൾ പറഞ്ഞു
“പേടിക്കാനൊന്നുമില്ല, എല്ലിന് ചതവുണ്ട്,
ഒരു മൂന്നാഴ്ചയെങ്കിലും റെസ്റ്റ് വേണ്ടി വരും. 

“യ്യോ മൂന്നാഴ്ചയോ, 

“എന്തേ പറ്റില്ലേ, 

“വർക്കുണ്ടാവും അതാ, 

” വർക്ക് കാലുകൊണ്ടല്ലല്ലോ കൈ കൊണ്ടല്ലേ, ഏതേലും കൂട്ടുകാരൻ്റെ ബൈക്കേൽ കേറിപ്പോയി ചെയ്താ മതി. 

“ആഹാ അത് നല്ല ഐഡിയ ആണല്ലോ താങ്ക്സ് ട്ടോ, 

‘ഉം. വരവുവെച്ചു. വേഗം പോയി ഡോക്ടറെക്കാണിക്ക്, പിന്നേയ്, പ്ലാസ്റ്ററിടേണ്ടിവരും കേട്ടോ, 

” അതെയോ, ശ്ശൊ. 

“എന്താണൊരു ശ്ശോ, 

” വൈകീട്ട് നിന്നെ കാണാൻ പറ്റില്ലാലോന്ന്, അവൻ ചിരിച്ചു കൊണ്ട് പറഞ്ഞു. 

‘അയ്യടാ, ഒരു ലോല ഹൃദയൻ ദാവീദ് രാജാവ്,
അവൾ ചിരിച്ചു കൊണ്ടു പറഞ്ഞു. 

“ശരി ഞാൻ ഡോക്ടെറെ കാണട്ടെ,
അവൻ ഒറ്റക്കാലിൽ ചാടിച്ചാടി വാതിൽക്കലേയ്ക്ക് നടന്നു. ഡോർ തുറക്കാനാവുമ്പോഴേയ്ക്കും അവൾ വിളിച്ചു. 

“ഹേയ്, രാജാവേ, 

” എന്താണ് മഹാറാണി”, അവൻ അതേ ഈണത്തിൽ തിരിച്ചു ചോദിച്ചു. 

അതു കേട്ടപ്പോളവൾ ചിരിച്ചുകൊണ്ടു ചോദിച്ചു., 

‘രാജാവിൻ്റെ ഫോൺ നമ്പർ തന്നാലും, 

“ങേഹേ, വിടർന്ന മിഴികളോടെയവൻ നമ്പർ പറഞ്ഞു കൊടുത്തു കൊണ്ടു ചോദിച്ചു.
‘വിളിക്കോ ?

” നോക്കട്ടെ ‘ചിലപ്പോൾ, ഇന്ന് ഞാൻ തിരിച്ച് പോവുമ്പോ, രാജാവിനെ പറ്റിയോർക്കും അവസാനം വിളിക്കണമെന്നാണ് എൻ്റെ മനസ്സു പറയുന്നതെങ്കിൽ വിളിക്കും അത്രന്നെ, എന്നു കരുതി പ്രതീക്ഷിക്കണ്ട ചിലപ്പോൾ വിളിക്കില്ല. ‘

‘ഓ, എന്നെ വിളിക്കാൻ തോന്നാത്ത നിൻ്റെ ഫോൺ വീണ് ഡിസ്പ്ലേ പൊട്ടിപ്പോട്ടെ. 

“ദുഷ്ടാ പ്രാകിക്കൊണ്ടാണോ പോണത്, വെറുതെയല്ല കാലിന് പരിക്കു പറ്റിയത്,
അവനതിനു മറുപടി പറയും മുമ്പേയവൾ വാതില് വലിച്ചടച്ചു. 

ദാവീദ്, ഡോക്ടറെക്കണ്ട് കാലിന് പ്ലാസ്റ്ററിട്ട് വീട്ടിലേയ്ക്ക് പോയി. വീട്ടിലെത്തി പപ്പയോടും മമ്മിയോടും അപകടത്തെപ്പറ്റിപ്പറഞ്ഞു. പിന്നെ യാദൃച്ഛികമെന്നോണം ചോപ്പിയെ കണ്ടുമുട്ടിയ കഥയും പറഞ്ഞു. 

‘നിനക്കവളെ ഇഷ്ടമായോടാ,
അവൻ്റെ മമ്മി ചോദിച്ചു. 

“അങ്ങനെ ചോദിച്ചാൽ, ഇക്കണ്ട കാലമത്രയും ഞാനിങ്ങനെയൊരു പെണ്ണിനെയാണ് കാത്തിരുന്നെതെന്ന് തോന്നുന്നുണ്ട്., 

“എന്നാ വൈകിക്കണ്ട, നിനക്കിപ്പോത്തന്നെ മുപ്പത് വയസ്സായി, ഇനീം വർഷങ്ങൾ പോയാൽ പിന്നെ പെണ്ണ് കിട്ടാതാവും, പറഞ്ഞേക്കാം, 

“അതിപ്പോ നമ്മള്, നസ്രാണികൾ മുപ്പത്തഞ്ചിലും മുപ്പത്തെട്ടിലുമൊക്കെയല്ലേ പെണ്ണുകെട്ടാറ് പിന്നെന്താ

” അതൊക്കെ പണ്ട് മോനേ. ഇപ്പോ മുപ്പതിന് മുന്നേ കെട്ടിയില്ലേൽ മോൻ നിത്യ ബ്രഹ്മചാരിയായിപ്പോവും, 

” ഉം, നമുക്ക് നോക്കാം, അവളെൻ്റെ നമ്പർ വാങ്ങിട്ടുണ്ട്, വിളിക്കോന്ന് നോക്കട്ടെ എന്നിട്ട് പറയാം, 

അവൻ സോഫയിലിരുന്ന് കസേരയിൽ കാലുകയറ്റി വെച്ച് ടിവി കാണുമ്പോഴും അവൻ്റെ ശ്രദ്ധ മുഴുവൻ ഫോണിലേയ്ക്കായിരുന്നു. അന്നാണെങ്കിൽ പതിവിൽ കൂടുതൽ കോളുകളും വന്നു കൊണ്ടിരുന്നു. കമ്പ്യൂട്ടർ, ലാപ്ടോപ്പ്, സോഫ്റ്റ്‌വേർ സർവ്വീസ് ജോലിയായത് കൊണ്ട് ഒറ്റ ഫോൺ നമ്പർ പോലും സേവ്ഡ് നമ്പർ ആയിരുന്നില്ല. അതുകൊണ്ടുതന്നെ ഓരോ നമ്പർ കാണുമ്പോഴുമവൻ പ്രതീക്ഷയോടെയാണ് കോൾ അറ്റൻഡു ചെയ്തത്, വന്ന നമ്പറുകളൊക്കെയും കസ്റ്റമേഴ്സിൻ്റെ നമ്പറായത് കൊണ്ടുതന്നെ അവന് ദേഷ്യം വരുന്നുണ്ടായിരുന്നു. അവൻ്റെ വെപ്രാളം കണ്ടുകൊണ്ട്, അവൻ്റെ മമ്മി ചിരിച്ചു കൊണ്ടു പറഞ്ഞു. 

“കരയിൽ പിടിച്ചിട്ട മീൻ കളിക്കുന്ന പോലെ നീയിങ്ങനെ വെപ്രാളപ്പെടാതെടാ, അവൾക്ക് നിന്നെ ഇഷ്ടമുണ്ടെങ്കിൽ അവള് നിന്നെ എപ്പഴായാലും  വിളിച്ചോളും, 

“എന്നാലും, ഞാൻ കാല് വയ്യാതെ വീട്ടിലേക്ക് പോന്നതല്ലേ, അതവൾക്കും അറിയാവുന്നതല്ലേ, അപ്പോ ഒന്നു വിളിച്ചന്വേഷിച്ചൂടെ, 

” അതിന് നിങ്ങള് തമ്മിൽ പ്രേമമൊന്നുമല്ലാലോ, ജസ്റ്റ് ഒന്നോരണ്ടോ പ്രാവശ്യം കണ്ട രണ്ടു പരിചയക്കാര്, അത്ര തന്നെ, 

“എന്നാലും, 

“ഒരെന്നാലുമില്ല, മോനിപ്പോ ടി വി കണ്ടു കൊണ്ടിരിക്ക്, 

മമ്മിയുടെ സംസാരം കേട്ടപ്പോളവൻ മിണ്ടാതിരുന്നു ടി വി കണ്ടു. എങ്കിലും ശ്രദ്ധ മുഴുവൻ ഫോണിലേയ്ക്കായിരുന്നു. 

വൈകീട്ട് അഞ്ചുമണികഴിഞ്ഞപ്പോളവൻ്റെ ഫോണിലേയ്ക്ക് ഒരു കോളു വന്നു

‘ഹലോ, ഒരു കമ്പ്യൂട്ടർ സർവ്വീസ് ചെയ്യാനുണ്ടായിരുന്നു. 

“എവിടാ സ്ഥലം, ഞാൻ ചെറിയൊരു അപകടം പറ്റി വീട്ടിൽ റസ്റ്റിലാ, നിങ്ങള് നാളെയൊരു വണ്ടി അറേഞ്ചു ചെയ്തു തരിയൊണെങ്കിൽ ഞാൻ വന്ന് ശരിയാക്കിത്തരാം എന്തായാലും സ്ഥലം പറഞ്ഞോളു. ഞാൻ എഴുതി വെയ്ക്കാം, 

” എഴുതിയ്ക്കോ, മോഡേൺ ഹോസ്പിറ്റലിലെ എക്സറേ യൂണിറ്റിൽ, 

അതുകേട്ടതും അവൻ പറഞ്ഞു. 

“എടീ, ചോപ്പി,
അങ്ങേത്തലയ്ക്കൽ നിന്നും അവളുടെ പൊട്ടിച്ചിരിയവൻ കേട്ടു. 

‘ഇത്ര നേരമായിട്ടും ഒന്നു വിളിക്കാൻ തോന്നിയില്ലല്ലോ ദുഷ്ടി, നിനക്ക്, 

“ൻ്റെ രാജാവേ, ദാവീദേ, അവിടെ മുഴുവൻ കാമറാ കണ്ണുകളാ, അഞ്ചു മണിക്ക് ശേഷം ഡ്യൂട്ടി കഴിയാതെ ഫോൺ തൊടാൻ പറ്റില്ല. അഞ്ചുകഴിഞ്ഞപ്പോൾത്തന്നെ ആദ്യം വിളിച്ചത് രാജാവിനെയാ നോക്ക്, 

” ഉം, ഞാൻ ക്ഷമിച്ചിരിക്കുന്നു. ഇപ്പോ എവിടാ, 

” നമ്മുടെ ബസ്സിൽ, ഇരിക്കുന്നു. ഇപ്പോ ബസ്സ് വിടും,
പിന്നീടവൾ ഇറങ്ങുന്നതുവരെയും അവരുതമ്മിൽ സംസാരിച്ചുകൊണ്ടിരുന്നു.
അവൾക്കിറങ്ങേണ്ട സമയമായപ്പോഴേക്കുമവൾ പറഞ്ഞു. 

” എനിക്കിറങ്ങാറായി, വീട്ടിലെത്തിയിട്ട് രാത്രി വിളിക്കാം, റോഡിലൂടെ ഫോണിൽ സംസാരിച്ചോണ്ട് പോയാൽ ശരിയാവില്ല എല്ലാരും ശ്രദ്ധിച്ചോണ്ടിരിക്കും. 

“ഉം, ശരി, ശരി, അവൻ ഫോൺ കട്ടു ചെയ്തു. 

രാത്രിയാവുന്നതും കാത്തവൻ ക്ഷമയോടെ കാത്തിരുന്നു, പുറത്തേയ്ക്ക് നോക്കിയപ്പോൾ ഏഴുമണിയാവാറായിട്ടും ഇരുട്ടു വീഴാതായപ്പോൾ അവൻ തന്നോടുതന്നെ പറഞ്ഞു. 

” ഇന്ന് സൂര്യന് അസ്തമിക്കുകയും വേണ്ടേ, 

അതുകേട്ട മമ്മി പറഞ്ഞു.
‘ഇല്ലെടാ, നിന്നെ കഷ്ടപ്പെടുത്താൻ വേണ്ടി നേരം വെളുക്കുന്നതുവരെ ഉദിച്ചിരിക്കും, 

” എങ്ങനേലും അസ്തമിച്ചു കിട്ടട്ടേന്ന് വിചാരിക്കുമ്പോഴാ, മമ്മിയുടെയൊരു ഉദിപ്പിക്കല്, 

” അസ്തമിച്ചിട്ടിപ്പോ എന്താ പരിപാടി, 

“ഹോ, ഒന്നുമില്ല ൻ്റെ മമ്മി, ഇത്തിരി സമാധാനം താ, 

“ഓ ഒരുത്തി ഒന്നു ഫോൺ വിളിക്കാൻ തുടങ്ങിയേള്ളൂ അപ്പോഴേയ്ക്കും ഞാൻ നിനക്ക് സമാധാനക്കേടായി, ല്ലേ, 

“ശ്ശൊ എൻ്റെ മമ്മീ, ഞാനൊന്നും പറഞ്ഞില്ല. അവൻ, അവർക്ക് നേരെ കൈകൂപ്പിക്കൊണ്ടു പറഞ്ഞു. 

രാത്രി പത്തുമണിയായിട്ടും അവൾ വിളിക്കാതായപ്പോൾ, അവളെയൊന്ന് തിരിച്ചു വിളിച്ചെങ്കിലോന്നവനോർത്തു. പക്ഷേ ഫോൺ ആരുടെ കയ്യിലാണെന്നറിയാതെ താൻ വിളിച്ചാൽ കുഴപ്പമാവോന്നു ചിന്തിച്ച് അവൻ അവളുടെ കോളിനായിക്കാത്തിരുന്നു. 

പെട്ടെന്നായിരുന്നു അവൻ്റെ ഫോൺ റിംങ് ചെയ്യാൻ തുടങ്ങിയത്. ചോപ്പി’
യെന്ന് ഡിസ്പ്ലേയിൽ കണ്ടതും അവൻ പെട്ടെന്ന് കോൾ അറ്റൻഡ് ചെയ്തു കൊണ്ടു ചോദിച്ചു., 

“ഹോ എത്ര സമയായി കാത്തിരിക്കണു. എന്തേ ഇത്ര നേരായിട്ട് വിളിക്കാഞ്ഞേ, 

“ഓഹോ, വിരഹാർത്തനായ കാമുകനെപ്പോലെയുണ്ടല്ലോ ചോദ്യം., 

അതുകേട്ടതും ജാള്യതയോടെയവൻ പറഞ്ഞു. 

” ഹേയ്, അങ്ങനൊന്നുമില്ല. ചുമ്മാ ചോദിച്ചതാ,
‘, ഉം, ഉം, അവളൊന്നു മൂളി. 

പിന്നീടവർ വാതോരാതെ സംസാരിച്ച കൊണ്ടേയിരുന്നു. എപ്പോഴാണ് സംസാരം നിർത്തിയത് എന്നു പോലും നോക്കാതെ ഇനിയും എന്തൊക്കെയോ പറയാൻ ബാക്കി വെച്ച് രണ്ടു പേരും ഉറക്കച്ചടവോടെ കിടന്നുറങ്ങി. 

നേരം വെളുത്തതും അവൻ ആദ്യം നോക്കിയത് അവളുടെ മെസേജ് ഉണ്ടോന്നാ, അവളുടെ ഗുഡ് മോണിംഗ് മെസേജ് കണ്ടതും അവന് സന്തോഷമായി, അവനും തിരിച്ചു വിഷ് ചെയ്തു. പിന്നീട് അവളുടെ കോൾ അവനു വന്നത് എട്ടുമണിക്കു ശേഷമാണ്. കോൾ അറ്റൻഡായതും അവൾ ചോദിച്ചു. 

‘ദാവീദ് രാജാവ്, ഫോൺ താഴെവെയ്ക്കാതെ നോക്കിയിരിക്കായിരുന്നോ. 

‘ഉം, കയ്യിൽ തന്നെ ഉണ്ടായിരുന്നു. ഞാൻ പറഞ്ഞില്ലേ, നമ്മളറിയാത്ത ഏതോ അദൃശ്യ നൂലുകളാൽ ചുറ്റപ്പെട്ടവരാണ് നമ്മളെന്ന്  മുൻജന്മത്തിലാണോ എന്തോ, 

” രാജാവിന് പൈങ്കിളി ഭാവം
ചേരൂലകേട്ടോ, 

” പൈങ്കിളിയൊന്നുമല്ല. ഞാൻ കാര്യം പറഞ്ഞതാ, ഇല്ലെങ്കിൽ താനെന്താ എന്നോട് മിണ്ടാൻ കാരണം. 

“അത് രാജാവ് പറഞ്ഞപോലെയൊക്കെ തന്നെയാണെന്നു തോന്നുന്നു. തൻ്റെ സംസാരം കേൾക്കുമ്പോഴൊരു സന്തോഷമൊക്കെയുണ്ട്. കളത്തരത്തിൻ്റെ കലർപ്പില്ലാത്ത സംസാരം, അതുകൊണ്ട് വീണ്ടും, വീണ്ടും സംസാരിക്കാൻ തോന്നണ്, 

” എൻ്റെയും സ്ഥിതി അതു തന്നെ, 

അവൾ ഹോസ്പിറ്റലിലെത്തുംവരെ അവരുടെ സംസാരം നീണ്ടുപോയി. 

മൂന്നാഴ്ചയോളമുള്ള അവൻ്റെ വിശ്രമവേളകൾക്കൊണ്ട് അവരുടെ ബന്ധം വളരെയേറെ ദൃഢമായിത്തീർന്നു. പക്ഷേ പരസ്പരം ഇഷ്ടമാണെന്ന് രണ്ടു പേരും തുറന്നു പറഞ്ഞില്ല. പ്രണയമാണോ സൗഹൃദമാണോന്ന് വിവേചിച്ചറിയാത്ത ബന്ധമായിരുന്നു അവരു തമ്മിൽ. 

അവനു സുഖമായി ജോലിക്ക് പോകാനായപ്പോൾ അവൻ കമ്പനിയിലറിയിച്ചതിനെ തുടർന്ന്, അവന് കമ്പനിയിൽ നിന്നും ഒരു ലൊക്കേഷൻമാപ്പും ഫോൺ നമ്പറും,, വാട്ട്സപ്പിൽ മെസേജു വന്നു. ആ അഡ്രസ്സിലുള്ള വീട്ടിലെ കമ്പ്യൂട്ടറിലെ സോഫ്റ്റവെയർ കംപ്ലയിൻറ് ആണ് അതു നോക്കാനായിട്ടായിരുന്നു മെസേജ് വന്നത്. 

അവനാ നമ്പറിൽ വിളിച്ചന്വേഷിച്ച ശേഷം അവിടേയ്ക്ക് യാത്രയായി, ബസിലിരുന്നു കൊണ്ട് ലൊക്കേഷൻ നോക്കുമ്പോളവൻ ചിന്തിച്ചു. അവളിറങ്ങിയ സ്റ്റോപ്പാണിത്, അവനവിടെയിറങ്ങി അവളെയുമോർത്തു കൊണ്ട് മെല്ലെ മാപ്പും നോക്കി നടന്നുതുടങ്ങി. 

അൽപ്പദൂരം നടന്നപ്പോൾ മാപ്പിൽ ലൊക്കേഷൻ കാണിച്ച വീടിനു മുമ്പിൽ അവനെത്തി. ആ വീടിൻ്റെ മുറ്റം നിറയെ പൂച്ചെടികൾ കൊണ്ട് അലംകൃതമായിരുന്നു. ഗെയിറ്റിൻ്റെ മതിലു മുതൽ വീടിൻ്റെ സിറ്റൗട്ടും പാരപ്പെറ്റും എല്ലാ സ്ഥലത്തും പലകളറിലുള്ള പനിനീർ പൂവുകളും ചെമ്പരത്തികളും കൊണ്ട് നിറഞ്ഞിരിക്കുന്നതവൻ കണ്ടു. 

ഉമ്മറത്തേയ്ക്ക് കയറി കോളിംഗ് ബെല്ലടിച്ചപ്പോൾ ഗൃഹനാഥനിറങ്ങി വന്ന് ആരാണെന്നന്വേഷിച്ചു. 

“കമ്പ്യൂട്ടർ സർവ്വീസിന് വന്നതാണ്, 

“ഓ, അതു ശരി, മുകളിലെ നിലയിലാണ്,
മോൻ്റെ റൂമിലാണ്, അവൻ മുകളിലുണ്ട്, അയാളവനെ മുകളിലേയ്ക്ക് കൂട്ടിക്കൊണ്ടുപോയി, 

അവർ ചെന്നു കതകിനു മുട്ടിയപ്പോൾ പതിനഞ്ചുവയസ്സോളം പ്രായമുള്ള ഒരു പയ്യൻ വന്നു വാതിൽ തുറന്നു. 

അവനെ കണ്ടു ചിരിച്ചുകൊണ്ട് ദാവീദു ചോദിച്ചു. 

“എവിടെ കമ്പ്യൂട്ടർ, എന്താ പറ്റിയത്. 

‘ ദേ. അവർ കമ്പ്യുട്ടറിലേയ്ക്ക് ചൂണ്ടിക്കൊണ്ടു പറഞ്ഞു.
“അതിൽ ‘ഉബണ്ടു കിട്ടുന്നില്ല. പിന്നെ സിപിയു വിൻ്റെ ഓഫ്, ഓൺ ബട്ടൻ വർക്കു ചെയ്യുന്നില്ല. 

“ഓ ശരി നോക്കട്ടെ, അവനാദ്യം അതിൻ്റെ ബട്ടൺ ശരിയാക്കി പിന്നീട് സിസ്റ്റം ചെക്കു ചെയ്തിട്ടു പറഞ്ഞു. 

” ഉബണ്ടു അൺഇൻസ്റ്റാൾ ആയിപ്പോയതാ, എന്തേലും പിടിച്ച് ഞെക്കിക്കാണും, 

” ഉം, അവനെപ്പോഴും ഇതിൽ കളിയാ, എന്തേലും പിടിച്ച് ഞെക്കിക്കാണും, അവൻ്റെ പപ്പ പറഞ്ഞു. 

‘സോഫ്റ്റ് വെയർ ചെയ്യണം, അരമണിക്കൂറ് എടുക്കും. 

” ഉം, ചെയ്തോ, 

ദാവീദ്, സിസ്റ്റത്തിൽ ഉബണ്ടു ഇൻസ്റ്റാൾ ചെയ്തുകൊണ്ടിരിക്കുന്നതിനിടയിൽ മുറിയാകമാനമൊന്നു നോക്കി.
ചുമരിൽ തൂക്കിയിട്ട ഫോട്ടോ കണ്ട് അവനൊന്നു ഞെട്ടി. 

തൻ്റെ മുന്നിൽ നിൽക്കുന്ന പയ്യനും ചോപ്പിയും ചേർന്നുനിൽക്കുന്ന ഫോട്ടോ, പയ്യൻ്റെ ബെർത്ത്ഡേയ്ക്ക് എടുത്തതാണെന്നു തോന്നുന്നു. അവൻ ഫോട്ടോ നോക്കുന്നത് കണ്ട് പയ്യൻ പറഞ്ഞു. 

“ഞാനും ചേച്ചിയുമാ, 

” ഉം മനസ്സിലായി.
കൂടുതലൊന്നും പറയാതെയവൻ കമ്പ്യൂട്ടർ ശരിയാക്കി, സർവ്വീസ് ചാർജും വാങ്ങി അവിടുന്നിറങ്ങി നടന്നു. ‘പോകുന്ന വഴിയിൽ അവൻ സോഫിയെ വിളിക്കണമെന്നോർത്തെങ്കിലും അവളുടെ വീട്ടിൽ പോയത് പറയണ്ടാന്നു തീരുമാനിച്ചു. അവളുള്ളപ്പോൾ അവിടെ ചെന്ന് അവൾക്കൊരു സർപ്രൈസ് കൊടുക്കാമെന്നവൻ ചിന്തിച്ചു. 

അന്നു രാത്രി ഫോൺ ചെയ്തപ്പോൾ അവനവളോട് ചോദിച്ചു. 

” സൺഡേ എന്താ പരിപാടി. 

“ഒൻപത് മണി വരെ പള്ളിയുറക്കം, അത് കഴിഞ്ഞ് പള്ളിപ്പുട്ടും പള്ളി ബീഫ് കറിയും കൂട്ടി പള്ളിതട്ടൽ, പത്ത് മണിക്ക് ശേഷം പള്ളി നീരാട്ട്, അതുകഴിഞ്ഞ് എല്ലാരും കൂടെ ചിലപ്പോ പള്ളി സിനിമക്ക് പോവും, 

അവളുടെ സംസാരം കേട്ടവൻ ചിരിച്ചു കൊണ്ടിരുന്നു. 

” ആട്ടെ അവിടെന്താ പരിപാടി, 

‘ രാവിലെ പള്ളീൽ പോവും, പിന്നെ ഫ്രണ്ട്സിൻ്റെ ഫോൺ കോൾ വരുന്നതിനനുസരിച്ച് പരിപാടി മാറിയും മറിഞ്ഞുമിരിക്കും., 

അവരുടെ സംസാരം ലോക കാര്യങ്ങളും കഴിഞ്ഞ് സൗരയൂഥത്തിലേയ്ക്ക് കടക്കുമ്പോഴേയ്ക്കും കോഴി കൂവാറായിരുന്നു. 

ആ ആഴ്ചയിലെ, ഞായറാഴ്ച രാവിലെ ഒൻപത് മണികഴിഞ്ഞപ്പോൾ അവളുടെ മമ്മി വന്ന് കതകിന് തട്ടിക്കൊണ്ടിരുന്നു

“എണീറ്റ് പല്ലു തേച്ച് കാപ്പി കുടിക്കടീന്നുള്ള ശബ്ദം കേടാണവൾ ഉണർന്നത്, 

“ദാ, വരുന്നു, മമ്മീന്നും, പറഞ്ഞവൾ തിരിഞ്ഞു കിടന്നതലല്ലാതെ അവളെഴുന്നേറ്റില്ല. 

ഫോൺ ബെല്ലടിച്ചപ്പോൾ അവൾ കണ്ണുതുറന്നു നോക്കി, ദാവീദാണ്

‘എന്താ രാജാവേ ഉറങ്ങാനും സമ്മതിക്കത്തില്ലേ, 

“ഇനീം ഉണർന്നില്ലേ, 

” ഉണർന്നു പക്ഷേ എണീറ്റില്ല കിടക്കുവാ, 

‘ഉം ശരി, ശരി, പള്ളി നീരാട്ട് കഴിഞ്ഞ് വിളിക്ക്, അവൻ ഫോൺ വെച്ചു. 

കോളിംഗ് ബെൽ അടിക്കുന്ന ശബ്ദം കേട്ടാണ് മമ്മി അവളോട് വിളിച്ചു പറഞ്ഞത്. 

” കോളിംഗ് ബെല്ലടിക്കുന്നുണ്ട് ആരാന്നു പോയി നോക്കിക്കേ, ചിലപ്പോൾ പപ്പയാവും, കറിയടുപ്പത്താ കരിഞ്ഞ് പോവും, 

അവൾ മനസ്സില്ലാ മനസ്സോടെ എഴുന്നേറ്റ് വാതിൽക്കലേയ്ക്ക് നടന്നു. 

“ഉറക്കച്ചടവോടെ വാതിൽ തുറന്നതും മുമ്പിൽ നിൽക്കുന്ന ദാവീദിനെക്കണ്ടതും അവൾ വേഗം തൻ്റെ ദേഹത്തേയ്ക്ക് തന്നെ നോക്കി, രാത്രി ഉറങ്ങുമ്പോഴിട്ട ഇറുകിപ്പിടിച്ച ടീഷർട്ടും ബർമുഡയുംകണ്ട് അവൾക്ക് തന്നെ നാണം വന്നു. 

“അയ്യേ, അമ്മച്ചീ ദേ, ദാവീദ് രാജാവെന്നു പറഞ്ഞു കൊണ്ടവൾ അകത്തേയ്ക്കോടി, 

അവളുടെ ഓട്ടം കണ്ട് ദാവീദും കൂടെയുള്ളവരും ചിരിച്ചു. 

അവളുടെ ഉച്ചത്തിലുള്ള അമ്മച്ചീ വിളികേട്ട് അവളുടെ മമ്മി ഉറക്കെ ചോദിച്ചു

“ദാവീദ് രാജാവോ, ഗോലിയാത്തുണ്ടോടീന്നും ചോദിച്ചു കൊണ്ട് ഹാളിലേയ്ക്ക് വന്നു. ആഗതരെക്കണ്ട് അവരൊന്നു ഞെട്ടി, 

“ആരാ, അവർ അന്ധാളിപ്പോടെ ചോദിച്ചു.
അവരുടെ ചോദ്യം കേട്ട് ദാവീദിൻ്റെ പപ്പ പറഞ്ഞു. ‘

‘ഞാൻ കുഞ്ഞുമോൻ, ഇതൻ്റെ മോൻ ദാവീദ്, ഇതവൻ്റെ അളിയൻ സിജോ, ഇതവൻ്റെ കൂടുകാരൻ ദീപു. 

“ഇവിടെ ആരെക്കാണാനാ, പുള്ളി ഇവിടില്ലല്ലോ, പള്ളീപ്പോയിട്ട് വന്നില്ല. ‘

“ഞങ്ങള് സോഫി മോളെ കാണാൻ വന്നതാ, 

‘സോഫിയെ അറിയോ, 

ദാവീദിനെ നോക്കിക്കൊണ്ട് കുഞ്ഞുമോൻ പറഞ്ഞു. 

“ദാവീദിന്, സോഫിയെ അറിയാം അപ്പോ നേരിട്ട് വന്ന് ചോദിക്കാമെന്നു കരുതി. 

എന്താണ് കാര്യമെന്നറിയാതെ അവർ വേഗം പറഞ്ഞു. 

“ഞാൻ പുള്ളിക്കാരനെ വിളിക്കട്ടെ നിങ്ങളിരിക്ക്, 

അവർ വേഗം സോഫിയയുടെ പപ്പയെ വിളിച്ച് പെട്ടെന്ന് വീട്ടിൽ വരണമെന്നറിയിച്ചു. 

ദാവീദും കൂടെയുള്ളവരും ഓരോ ഗ്ലാസ് നാരങ്ങാവെള്ളം കുടിക്കുമ്പോഴേയ്ക്കും അവളുടെ പപ്പ അയാളുടെ ബൈക്കിൽ പെട്ടെന്ന് അവിടെ എത്തിച്ചേർന്നിരുന്നു. 

അകത്തേയ്ക്ക് കയറിക്കൊണ്ട് പപ്പ ചോദിച്ചു. 

”എന്താ എല്ലാരും വിശേഷിച്ച്, 

കുഞ്ഞുമോൻ എഴുന്നേറ്റ് അയാളുടെ അടുത്തേയ്ക്ക് ചെന്നു കൊണ്ടു പറഞ്ഞു, 

‘എൻ്റെ മോൻ ദാവീദിന്, നിങ്ങളുടെ മോളെ ഇഷ്ടമാണെന്നെന്നോടു പറഞ്ഞു. അപ്പോ ഞാൻ പറഞ്ഞു എന്നാ നമ്മക്ക് നേരിട്ട് പോയി സംസാരിക്കാം. അവർക്ക് താൽപര്യമില്ലെങ്കിൽ പിന്നെ ആ പെൺകുട്ടിയ്ക്കോ, അവർക്കോ നീയൊരു ബുദ്ധിമുട്ടാവരുതെന്ന്, അതല്ലേ ശരി, അല്ലാതെ കുറേക്കാലം പുറകെ നടന്ന്, ചിലപ്പോ അവളെ വിളിച്ചിറക്കിക്കൊണ്ടുവന്ന് നിങ്ങളേയും കുടുംബക്കാരെയുമെല്ലാം പിണക്കി, അതൊന്നും ശരിയല്ല. അതുകൊണ്ട് ഞാനവനേയും കൂട്ടി നേരെയിങ്ങ് പോന്നു, 

” ഇതാണ് ശരിയായ നടപടി, പക്ഷേ സോഫി മോൾ എന്തു പറഞ്ഞു. ഇന്ന് പെണ്ണുകാണാൻ വരണമെന്ന് അവള് പറഞ്ഞായിരുന്നോ, 

” ഏയ്, അവളറിയുക പോലുമില്ല,
ദാവീദ് ചിരിച്ചു കൊണ്ടു പറഞ്ഞു. 

“ശരി ഞാൻ മോളെ വിളിക്കാം, അവർക്ക് തമ്മിൽ സംസാരിക്കാനുണ്ടാവും. അത്രയും പറഞ്ഞയാൾ അകത്തുപോയി സോഫിയയെ വിളിച്ചു കൊണ്ടവന്നു.
അവളുടെ മുഖം കരഞ്ഞു വീർത്ത പോലെയുണ്ടായിരുന്നു. 

അവളെ കണ്ടപ്പോൾ ചിരിച്ചു കൊണ്ട് കുഞ്ഞുമോൻ പറഞ്ഞു. 

“അവരു തമ്മിൽ എന്ത് സംസാരിക്കാൻ, നേരം വെളുത്ത്  വീണ്ടും നേരം വെളുക്കുന്നതുവരെയും ഇത് തന്നെയല്ലേ അവർക്ക് പണി, അതും പറഞ്ഞയാൾ ഉറക്കെയൊന്നു ചിരിച്ചു. അത് കേട്ടപ്പോൾ കൂടെ വന്നവരും ചിരിച്ചു കൊണ്ടിരുന്നു. 

കരഞ്ഞ മുഖത്തോടെ അടുത്തേയ്ക്ക് വന്ന അവളെക്കണ്ട് ദാവീദ് വല്ലാതായി

ദാവീദിനോടായി അവളുടെ പപ്പ പറഞ്ഞു

“നിങ്ങള് മേലെ ബാൽക്കണിയിലേക്ക് ചെല്ല് അവൾക്കു സംസാരിക്കാനുണ്ട് അത് കേട്ടിട്ട് വാ, 

എന്താ കാര്യമെന്നു മനസ്സിലാവാതെ ദാവീദ് അവൾക്കൊപ്പം മുകളിലേയ്ക്കുള്ള സ്റ്റെപ്പുകൾ കയറിക്കൊണ്ടിരുന്നു

മുകളിലെത്തിയും അവൾ കരഞ്ഞുകൊണ്ടു പറഞ്ഞു. 

“ദാവീദ് ഇങ്ങനെ വരരുതായിരുന്നു. എന്നോടൊരു വാക്കു ചോദിച്ചിട്ടു വന്നാ പോരായിരുന്നോ, ഞാനെപ്പോഴെങ്കിലും പ്രണയമാണെന്ന് പറഞ്ഞിട്ടുണ്ടോ

“അങ്ങനെ പറഞ്ഞിട്ടില്ല പക്ഷേ എനിക്ക് നിന്നെ വേണം, അതാ എല്ലാവരയും കൂട്ടി മാന്യമായി വന്നു പെണ്ണുചോദിക്കാന്നു കരുതിയത്, എന്തേ അത് തെറ്റായിപ്പോയോ, 

“തെറ്റായിപ്പോയി, എന്നോട് ഒരു വാക്ക്… തുടർന്നു പറയാനാവാതെ അവൾ എങ്ങലടിച്ചു കൊണ്ടിരുന്നു. 

എന്തു പറഞ്ഞ് അവളെ സമാധാനിപ്പിക്കണമെന്നറിയാതെ അവൻ ഉഴറി നിന്നു. അവളുടെ കൈപിടിച്ച് തന്നോട് ചേർക്കാൻ ശ്രമിച്ചു കൊണ്ടവൻ ചോദിച്ചു. 

“എന്തിനാ ഇങ്ങനെ കരയണേ അതു പറ, 

അവൻ പിടിച്ച കൈ തട്ടിമാറ്റിക്കൊണ്ടവൾ കരഞ്ഞു കൊണ്ടു പറഞ്ഞു. 

” ഞാൻ, ഞാൻ ട്രാൻസ് ആണ് ദാവീദേ, 

”ങ്ഹേ, എന്ത്, മനസ്സിലാവാത്ത മട്ടിൽ

“ഞാൻ ട്രാൻസ്ജെൻഡറാണെന്ന്, 

അതു കേട്ടതും ഞെട്ടിയവൻ പിന്നോക്കം പോയി, അവൻ പുറകോട്ടുമാറിയപ്പോൾ കൈതട്ടി ബാൽക്കണിയിലെ സിറ്റൗട്ടിൽ വെച്ചിരുന്നൊരു ചെടിച്ചട്ടി തട്ടി താഴെപ്പോയി, അതു വീഴുന്ന ശബ്ദം കേട്ട് താഴെനിന്നും അവളുടെ പപ്പാ വിളിച്ചു ചോദിച്ചു. 

‘എന്താ, എന്താ മോളെ, 

“ഒന്നുല്ല പപ്പാ ഞാനിതാ വരുന്നു. പിന്നീടവൾ ദാവീദിനോടായി പറഞ്ഞു. 

“എനിക്ക്, സ്ത്രീകളുടേതായി ചില അവയവങ്ങളൊന്നുമില്ല ദാവീദേ, പിന്നീടവൾ ദാവീദിൻ്റെ കാൽക്കൽ വീണ് പൊട്ടിക്കരഞ്ഞുകൊണ്ടു പറഞ്ഞു. 

“മാപ്പ്, 

അവളുടെ കൈകൾ തൻ്റെ കാലിൽനിന്നുമടർത്തിക്കൊണ്ടവൻ വേഗത്തിൽ താഴേക്ക് നടന്നു. താഴെയെത്തിയതും അവൻ പപ്പയോടും കൂടെ വന്നവരോടുമായി പറഞ്ഞു. 

” വാ പോകാം, 

“മോനേ, എന്തായിത് ഇവരോടൊന്നും പറയാതെ,, 

” വാ ഇനിയൊന്നും പറയാനില്ല

അവൻ മുറ്റത്തേയ്ക്കിറങ്ങിയ ശേഷം മുകളിലേയ്ക്ക് നോക്കിപ്പോൾ അവൾ മുഖം പൊത്തിവിങ്ങിക്കരയുന്നുണ്ടായിരുന്നു, അവൻ പടികടന്നുപോവുന്നത് നോക്കി അവളുടെ മുഖം പോലെ   മുറ്റത്തൊരു പൂ ചുവന്നു ചുവന്നു നിന്നു. 

അവൻ റോഡിൽച്ചെന്ന് കാറിൽക്കയറിയിരുന്നു. അവൻ്റെ പുറകെ മറ്റുള്ളവരും കയറി, അവൻ പുറകിലിരുന്നു കൊണ്ട് ഒന്നു മുഖം പൊത്തിയൊന്നു കരഞ്ഞു. അവൻ്റെ വിഷമം കണ്ട് മറ്റുള്ളവർ ചോദിച്ചു, 

“നീ കാര്യം പറ എന്താണുണ്ടായത്, 

“അവൾ ട്രാൻസ് ജെൻഡറാണ് പപ്പാ, ഒരു പൂർണ്ണതയുള്ള പെണ്ണാവാൻ അവൾക്കൊരിക്കലും പറ്റില്ല. 

അവൻ പറഞ്ഞത് കേട്ട് അവരെല്ലാം ഞെട്ടിപ്പോയി, പിന്നീട് വീടെത്തുന്നതുവരെ ആരും ഒന്നും സംസാരിച്ചില്ല. 

പോകുന്ന വഴിയിൽ ദാവീദ്, സോഫിയയുടെ വാട്സപ്പ് നോക്കി. അതിലവളുടെ ഡി പി കാണാനില്ലായിരുന്നു., ‘ അവൾ തന്നെ ബ്ലോക്കിട്ടതാണെന്നവന് മനസ്സിലായി, അവൻ അവളുടെ നമ്പറിലേയ്ക്ക് വിളിച്ചു നോക്കി, റിംങ് ചെയ്യാതെ കട്ടാവുന്നതവനറിഞ്ഞു, നമ്പറും ബ്ലോക്കിട്ടതാണെന്നറിഞ്ഞപ്പോൾ അവന് വല്ലാതെ സങ്കടം വന്നു. ‘അവളെ പറഞ്ഞിട്ടു കാര്യമില്ല, ആരായാലും അങ്ങനെയേ ചെയ്യൂ. 

അവൻ സീറ്റിലേക്ക് ചാരിയിരുന്നു കണ്ണുകളടച്ചു, കണ്ണീർത്തുള്ളി കവിളിലൂടൊഴുകിക്കൊണ്ടിരുന്നു. 

വീട്ടിലെത്തിയ ശേഷം അവനാരോടുമൊന്നും സംസാരിച്ചില്ല. ഇരുന്നാൽ ഇരുപ്പുറയ്ക്കാതെയും, കിടന്നാൽ കിടത്തം കൊള്ളാതെയുമവൻ മുറിയിലൂടെ ഭ്രാന്തമായി നടന്നുകൊണ്ടിരുന്നു

അവൻ്റെ അവസ്ഥ കണ്ട് അവൻ്റെ മമ്മി അവൻ്റെ അരുകിലേക്കു വന്നു കൊണ്ടു ചോദിച്ചു.
‘നിനക്കവളെ അത്രയ്ക്കിഷ്ടമായിരുന്നോ, 

‘ആയിരുന്നു മമ്മീ, 

” മറക്കാൻ കഴിയുന്നില്ലേ, 

” മറക്കണമെന്ന് ചിന്തിക്കുമ്പോൾ തന്നെ ഭ്രാന്തു വരുന്ന പോലെയുണ്ട്, 

“നിനക്കവളെ വിവാഹം ചെയ്യണമെന്നുണ്ടോ, എൻ്റെയും പപ്പയുടെയും കാര്യമോ, നാട്ടാരുടെ കാര്യമോ നീ നോക്കണ്ട, നിൻ്റെ മന:സാക്ഷിയ്ക്കനുസരിച്ച് പറയ്. 

“എനിക്കവളെ വേണം മമ്മീ, എന്തിൻ്റെ കാരണം കൊണ്ടായാലും ഉപേക്ഷിക്കാൻ വയ്യ

‘എങ്കിൽ നീ പോയി, ബൈബിൾ എടുത്തോണ്ട് വാ, 

അവൻ പോയി ബൈബിൾ എടുത്തോണ്ടുവന്നു. 

“കണ്ണടച്ച് പിടിച്ച് മാതാവിനെ പ്രാർത്ഥിച്ച് ബൈബിൾ തുറന്ന്, ആദ്യം കാണുന്ന വാക്കുകൾ വായിക്ക്. 

അവൻ മമ്മി പറഞ്ഞപോലെ പ്രാർത്ഥിച്ചുകൊണ്ട് ബൈബിൾ തുറന്ന് വായിച്ചു. 

“ഉത്തമ ഗീതം, എട്ടാം അധ്യായം. ആറാം വാക്യം,
“നിൻ്റെ ഹൃദയത്തിൽ മുദ്രയായും നിൻ്റെ കരങ്ങളിൽ അടയാളമായും എന്നെ പതിക്കുക. പ്രേമം മരണഞ്ഞെപ്പോലെ ശക്തമാണ്, അസൂയ ശവക്കുഴി പോലെ ക്രൂരവുമാണ്. അതിൻ്റെ ജ്വാലകൾ തീജ്വാലകളാണ്, അതിശക്തമായ തീജ്വാല, ജലസഞ്ചയങ്ങൾക്ക് പ്രേമാഗ്നിയെ കെടുത്താനാവില്ല, പ്രവാഹങ്ങൾക്ക് അതിനെ ആഴ്ത്താർ കഴിയുകയില്ല, പ്രേമം വിലയ്ക്കു വാങ്ങാൻ സർവ്വസമ്പത്തും കൊടുത്താലും അത് അപഹാസ്യമാവുകയേ ഉള്ളൂ. അത്രയും വായിച്ചവൻ മമ്മിയെ നോക്കി. 

“അതാണ് സത്യമായ പ്രേമം, ഇപ്പോൾ മനസ്സിലായോ, അതുകൊണ്ട് മോൻ ആ കുട്ടിയെ ജീവിതത്തിലേക്ക് കൂട്ടണം, നിങ്ങൾ ഒരുമിക്കണം, അവൾക്കൊരു കുഞ്ഞിനെ പ്രസവിക്കാൻ കഴിയില്ലന്നേ ഉണ്ടാവു, പക്ഷേ നിന്നെ സ്നേഹിക്കാനുള്ള മനസ്സുണ്ടാവും. നിങ്ങൾക്ക് വളർത്താൻ രണ്ടു കുട്ടികൾ നിൻ്റെ ചേച്ചിക്ക് ഇല്ലേ, അതു മതി, നീയാ കുട്ടിയെ വിളിക്ക്, 

“അവൾ ബ്ലോക്ക് ഇട്ടു മമ്മീ, 

” അവളുടെ നമ്പർ താ, ഞാൻ വിളിക്കാം, 

മമ്മി അപ്പോൾ തന്നെ അവളെ വിളിച്ചു, ദാവീദിൻ്റെ മമ്മിയാണെന്നറിഞ്ഞപ്പോൾ അവൾ പൊട്ടിക്കരഞ്ഞു കൊണ്ടു പറഞ്ഞു. 

“മമ്മീ, മാപ്പ്, അറിഞ്ഞു കൊണ്ടു ഞാനവനെ മോഹിപ്പിച്ചു, 

” സാരമില്ല. മോളെ, ഞങ്ങൾക്ക് മരുമകളായി നീ തന്നെ മതി. അടുത്ത ഞായറാഴ്ച ഞങ്ങള് കുറച്ചു പേര് വരുന്നുണ്ട് വീട്ടിലേയ്ക്ക്, പപ്പയോട് പറഞ്ഞേക്ക്, അവളുടെ കരച്ചിലും ചിരിയും കൂടെ കലർന്ന ശബ്ദം കേട്ടപ്പോൾ അവർ ഫോൺ ദാവീദിൻ്റെ കയ്യിലേക്കു കൊടുത്തിട്ടു പറഞ്ഞു. 

” ഇന്നാടാ, നീയാ കൊച്ചിനോടു സംസാരിക്ക്, 

ഫോൺ കയ്യിൽ കിട്ടിയതും അവൻ ഉറക്കെ വിളിച്ചു. 

” ചോപ്പീ, 

അങ്ങേത്തലയ്ക്കൽ നിന്നും നെഞ്ചു പിളർന്നൊരു പൊട്ടിക്കരച്ചിലവൻ കേട്ടു. 

✍️ഷിജിത് പേരാമ്പ്ര