തെറ്റ്

നിഷ്കളങ്കമായ ചിരി കണ്ടപ്പോൾ

കളങ്കം തൊട്ട് തീണ്ടാത്ത സംസാരം കേട്ടപ്പോൾ,

ഞാൻ കരുതി നീയൊരു പാവം ആണെന്ന്.

കാപട്യം അറിയാത്ത പിഞ്ചു പൈതലെന്ന്

കാണുന്നവർക്കൊക്കെ  സ്നേഹം ചൊരിഞ്ഞ്,

ആപത്തുകളിൽ സഹായിയായി

അവരുടെ വേദനകളിൽ പങ്കാളിയായി

മനുഷ്യ സ്നേഹത്തിൻ ഉത്തമ മാതൃകയായി

പരിചയിച്ചവർക്കെല്ലാം നീ പ്രിയങ്കരനായി

വീട്ടിലോ അമ്മ പെങ്ങന്മാർക്ക് അരുമ

തികഞ്ഞ കുടുംബ സ്നേഹി.

പക്ഷേ

അമ്മയെന്നാൽ ജീവനാണെന്നു അറിഞ്ഞപ്പോൾ

തന്നെയും ജീവനായി കരുതി സ്നേഹിക്കുമെന്നു ധരിച്ചത്

എനിക്ക് പറ്റിയ ആദ്യത്തെ തെറ്റ്

പുറമെ കാണിക്കുന്ന പ്രകടനങ്ങൾക്കപ്പുറം

മാറാല കെട്ടിയ ഒരു മനസ്സും ചിന്നി ചിതറിയ

ചിന്തകളും അതിൽ കെട്ടുപിണഞ്ഞ സംശയങ്ങളും

കൂട്ടിനുണ്ടെന്നു അറിയാതെ പോയത് രണ്ടാമത്തെ തെറ്റ്

എൻ്റെ കുറവുകളെ ചൂണ്ടിക്കാണിച്ചു വിലപറയാൻ പഠിപ്പിച്ച

നിൻ്റെ അമ്മയെ സ്നേഹിക്കാൻ കഴിയാതെ പോയത്

മൂന്നാമത്തെ തെറ്റ്

അജ്ഞതയും കൂരിരുട്ടും എന്നപോലെ പരസ്പരം ചുറ്റപ്പെട്ട

അമ്മയും മകനും വാഴുന്നിടത്തിൽ തനിക്ക് ഇടമില്ല എന്ന്

തിരിച്ചറിയാൻ വൈകിയത്

നാലാമത്തെ തെറ്റ്

കേൾക്കാനോ മനസ്സിലാക്കാനോ കഴിവില്ലാത്തവരോട്

എന്നെ വിശദീകരിക്കാൻ പോയത്

അഞ്ചാമത്തെ തെറ്റ്

അഗ്രഹിച്ചയിടം ഇതല്ല എന്നും തനിക്ക്

ഇവിടെ ഇടമില്ല എന്നും അറിഞ്ഞിട്ടും

തിരികെ നടക്കാൻ മടിച്ചത്

ആറാമത്തെ തെറ്റ്

തെറ്റ് മുഴുവൻ എൻ്റെ ഭാഗത്ത് എന്ന് അറിഞ്ഞിട്ടും

തിരുത്താൻ തയ്യാറാകാത്തത്

ഏഴാമത്തെ തെറ്റ്

എൻ്റെ ഏറ്റവും വലിയ തെറ്റ് ..