ഒരു സ്ത്രീ എന്ന നിലയിൽ എന്റെ ജീവിതം.

ഒരു സ്ത്രീ എന്ന നിലയിൽ ഏറ്റവും അഭിമാനത്തോടുകൂടി ജീവിക്കുന്നവളാണ് ഞാൻ. പലപ്പോഴും ജീവിതം കൈവിട്ടു പോകുമെന്ന നിലയിൽ നിന്ന് എന്റെ ആഗ്രഹങ്ങളെ എത്തിപ്പിടിക്കാൻ ഇന്ന് ഞാൻ പ്രാപ്തയാണ്..

കോളേജിന്റെ വരാന്തകളിൽ നിന്ന് വിവാഹ ജീവിതത്തിന്റെ അകത്തളങ്ങളിലേക്ക് ഒരാളുടെ കൈപിടിച്ചു കയറുമ്പോൾ, ഭാര്യ, കുടുംബിനി എന്ന ആ ഒരു ലോകത്തെക്കുറിച്ച് പ്രത്യേകിച്ച് കാഴ്ചപ്പാടുകൾ ഒന്നും ഉണ്ടായിരുന്നില്ല..

ഇതിലെല്ലാം ഉപരി സ്വന്തം കാലിൽ നിൽക്കുകയെന്നുള്ള ആ ഒരു സ്വപ്നത്തെക്കുറിച്ച് ഒന്ന് ചിന്തിക്കുക പോലും ചെയ്തിരുന്നില്ല.. ജീവിതം അതിന്റെ നേർ രേഖയിൽ എത്തിയപ്പോൾ എന്തൊക്കെയോ കൈയിൽനിന്ന് നഷ്ടപ്പെടുന്നതായി തോന്നാൻ തുടങ്ങി. എന്തിനും ഏതിനും ഒരാളെ ആശ്രയിക്കേണ്ടി വരുന്ന ആ ഒരു സമയം. കുറച്ച് പൈസ വേണമെന്ന് ചോദിക്കേണ്ട മടിയോർത്ത് ഓരോ ആഗ്രഹങ്ങളും മനസ്സിൽ തന്നെ കുഴിച്ചുമൂടി.

വീടിന്റെ നാല് ചുമരുക്കൾക്കുള്ളിൽ മാറാല കെട്ടിക്കിടന്നിരുന്ന എന്റെ ആഗ്രഹങ്ങൾക്ക് ജീവൻ കൊടുക്കണമെങ്കിൽ കയ്യിൽ സ്വന്തമായി ഒരു വരുമാനം വേണമെന്നുള്ളത് ഒരു അത്യാവശ്യമായി മാറി..

അപ്പോൾ മാത്രമാണ് കയ്യിലുണ്ടായിരുന്ന സർട്ടിഫിക്കറ്റുകളുടെ വില ഞാൻ മനസ്സിലാക്കിയത്. പ്രത്യേകിച്ച് ആരുടെയും അനുവാദം ചോദിക്കാൻ നിൽക്കാതെ, ചെയ്യുന്നത് തെറ്റല്ലയെ ന്ന ഉറച്ച ബോധ്യം ഉള്ളതുകൊണ്ട് ജോലിക്കായി അപേക്ഷകൾ നൽകി.

വലിയ കാത്തിരിപ്പിന്റെ ആവശ്യമില്ലാതെ തന്നെ, ആഗ്രഹിച്ചതുപോലെ അധ്യാപികയാകാൻ എനിക്ക് കഴിഞ്ഞു. ആത്മാർത്ഥമായ പരിശ്രമം ഒന്നുകൊണ്ട് തന്നെ അധ്യാപനത്തിന്റെ ഓരോ ചുവടുകൾ എനിക്ക് പെട്ടെന്ന് തന്നെ കയറാൻ കഴിഞ്ഞു. ഒപ്പം തന്നെ എന്റെ ആഗ്രഹങ്ങളിലേക്കും..

എനിക്ക് കിട്ടുന്ന എന്റെ ശമ്പളം എന്റെ ആഗ്രഹങ്ങൾക്കു വേണ്ടി മാത്രം ഉപയോഗിക്കുമെന്ന ഒരു കുഞ്ഞു വാശിയും എന്റെ കയ്യിൽ ഉണ്ടായിരുന്നു. ഇന്ന് ഞാൻ എന്റെ ഓരോ ആഗ്രഹങ്ങളും കയ്യെത്തിപ്പിടിച്ചു.

എന്റെ ആഗ്രഹങ്ങളിൽ ഏറ്റവും വലുതായിരുന്നു, വർഷങ്ങൾക്കു മുമ്പ് അഴിച്ചു വെച്ച ചിലങ്ക വീണ്ടും ഒന്ന് കാലിൽ അണിയണമെന്നുള്ളത്. ആഗ്രഹ സഫലീകരണത്തിന്റെ ഭാഗമായി ഒരു ഡാൻസ് ക്ലാസിൽ ചെന്ന് ചേരുകയും ചിട്ടയായ പഠനത്തിനുശേഷം അരങ്ങേറുകയും ചെയ്തു..

അരങ്ങേറ്റത്തിന്റെ ഫോട്ടോസും വീഡിയോസും കണ്ടതിനു ശേഷം കൂടെ പഠിച്ചവരും സുഹൃത്തുക്കളും ബന്ധുക്കളും,  ഇഷ്ടവും സന്തോഷവും നീ ഞങ്ങൾക്ക് അഭിമാനവുമാണെന്ന് പറഞ്ഞു കേട്ടപ്പോൾ, അതുവരെ ജീവിതത്തിൽ ഉണ്ടായ കൈപ്പേറിയ അനുഭവങ്ങൾ ഒരു മധുര പ്രതികാരം എന്ന പോലെയായി മാറിയെനിക്ക്‌.

എവിടെയൊക്കെയോ വെച്ച് എന്നെ താഴ്ത്തിക്കെട്ടിയവർ പോലും ആ ഗണത്തിൽ ഉണ്ടായിരുന്നുവെന്ന് കണ്ടപ്പോൾ, ഉള്ളിന്റെയുള്ളിൽ ഒന്ന് ആനന്ദിക്കാൻ ഞാൻ മറന്നില്ല..

“ഞാനൊരു സ്ത്രീയാണ് എനിക്ക് ഒന്നിനും കഴിവില്ല” എന്നുള്ള ധാരണകളെ ഒന്നു മാറ്റി വെച്ചാൽ എന്തിനും കഴിവുള്ളവൾ എന്ന ആ ലേബൽ പെട്ടെന്ന് തന്നെ നമുക്ക് സ്വന്തമാക്കാം.

ഏതൊരു ആഗ്രഹത്തെയും അതിയായി മോഹിച്ചാൽ നമ്മുടെ കൈപ്പിടിയിൽ ഒതുങ്ങും എന്ന് തന്നെയാണല്ലോ നമ്മൾ കേട്ടിരിക്കുന്നത്. നമ്മുടെ ആഗ്രഹങ്ങൾക്കൊപ്പം എത്താൻ നമ്മൾ തന്നെയാണ് ശ്രമിക്കേണ്ടത്.

അതിനായി നമ്മുടെ മുന്നിൽ അടഞ്ഞു കിടക്കുന്ന ആ വാതിലുകളെ മെല്ലെ തുറക്കണം. മെല്ലെ മെല്ലെ സ്വാതന്ത്ര്യത്തിന്റെ പടവുകളിലേക്ക് കയറുമ്പോൾ അധിക്ഷേപിക്കാൻ ഒരായിരം ആളുകൾ ഉണ്ടെങ്കിലും അതിനൊന്നിനും വില കൊടുക്കാതെ ചിരിച്ചു മുഖത്തോടെ തള്ളിക്കളയണം.

നമ്മൾ ഒരു നിലയിൽ എത്തുമ്പോൾ, ഈ അധിക്ഷേപിച്ചവർ തന്നെ വന്ന് നമ്മളോട് പറയും..

“നീയാണ് പെണ്ണ് “

March 8
വനിതാദിനം..