🌹അവരുടെ ശരി🌹

ഏറ്റുമാനൂരിലെ അമ്മയുടെയും മക്കളുടെയും ആത്മഹത്യാ വാർത്ത കണ്ണുനീരോടെയും നൊമ്പരത്തോടെയുമല്ലാതെ നമുക്ക് ഓർക്കാൻ കഴിയില്ല. കാരണം ആ അമ്മ മക്കളെയും കൊണ്ട് ഒരു പാട് കഷ്ടപ്പെട്ടിട്ടുണ്ട്. ഒരു ജോലിക്കായി ഒരു പാട് സ്ഥലത്ത് അന്വേഷിച്ചിട്ടുണ്ട്. ജോലി കൊടുക്കാൻ താത്പര്യമുള്ള സ്ഥലത്തും ചിലരുടെ ഇടപെടൽ കാരണം അവർക്ക് ജോലി നിഷേധിക്കപ്പെട്ടു. 

ചിലരുടെ കമൻ്റുകൾ കണ്ടു, അവർക്ക് നെഴ്സ് ജോലി തന്നെ വേണോ, അവർക്ക് റോഡ് പണിക്ക് പോയ്ക്കൂടെ, തൊഴിലുറപ്പിന് പൊയ്ക്കൂടെ എന്നാലും മക്കളെ വളർത്തിക്കൂടെന്നൊക്കെ.

പ്രിയസഹോദരങ്ങളേ, അവർക്കറിയാവുന്ന ജോലി നെഴ്സ് ജോലിയാണ്. അവർക്കതിൽ നിന്നു കിട്ടുന്ന സന്തോഷവും സമാധാനവും സംതൃപ്തിയും മറ്റൊരു ജോലി ചെയ്താലും കിട്ടില്ല. ഒരു ജോലി എന്നത് സന്തോഷത്തോടെയും ആത്മസമർപ്പണത്തോടെയും ചെയ്യേണ്ടുന്ന ഒന്നല്ലേ? അതിപ്പോ കൂലിപ്പണിയായാലും നെഴ്സ് ജോലിയായാലും വക്കീലായാലും ഡോക്ടറായാലും എല്ലാരും അങ്ങനെ തന്നെയാണ്, അവരവര് ചെയ്യുന്ന ജോലിയിലാണവര് സന്തോഷം കണ്ടെത്തുന്നത്. ചില സന്ദർഭങ്ങളിൽ ചെയ്തു കൊണ്ടിരിക്കുന്ന ജോലിയിൽ നിന്നു മാറി മറ്റൊരു ജോലി ചെയ്യേണ്ടി വരുന്ന അവസ്ഥ പലർക്കുമുണ്ടാവാറുണ്ട്. പക്ഷേ ആ ജോലി ചെയ്യുമ്പോഴും നമ്മുടെ മനസ്സ് ആദ്യം ചെയ്തു കൊണ്ടിരുന്ന ജോലിയിൽ തന്നെയായിരിക്കും. നിവൃത്തികേടുകൊണ്ട് ഈ ജോലി ചെയ്യുന്നു എന്നേയുണ്ടാവൂ. 

ഷൈനിയുടെ ഭർത്താവ് പോലീസ് സ്റ്റേഷനിലിരുന്നു പൊട്ടിക്കരഞ്ഞു, മനസ്താപത്തോടെ സംസാരിച്ചു. അങ്ങനെ ചെയ്യരുതായിരുന്നു, ചെയ്തു പോയി, അബദ്ധം പറ്റിപ്പോയി എന്നൊക്കെപ്പറഞ്ഞ് കരഞ്ഞു എന്നൊക്കെ മാധ്യമങ്ങളിൽ കണ്ടു. 

അതൊക്കെ പോലീസ് കസ്റ്റഡിയിലും ജയിലിലിരിക്കുമ്പോഴും തോന്നുന്ന മാനസികാവസ്ഥയാണ്, അല്ലാതെ ചെയ്തു പോയ തെറ്റുകളെ കുറിച്ചുള്ള കുറ്റബോധം കൊണ്ടൊന്നുമല്ല. പോലീസ് കസ്റ്റഡിയിൽ നിസ്സായകരായിപ്പോവുന്ന അവസ്ഥ കൊണ്ടാണ്. ഒന്നു മൂത്രമൊഴിക്കണമെങ്കിലോ, ഒരു തുള്ളി വെള്ളം കുടിക്കണമെങ്കിലോ, ഇരുന്ന സ്ഥലത്തു നിന്ന് ഒന്നെഴുന്നേൽക്കണമെങ്കിൽ പോലും
പോലീസിൻ്റെ അനുമതി വേണം. ആ ഒരു അവസ്ഥ വരുമ്പോൾ ചെയ്തതെല്ലാം തെറ്റായിരുന്നു എന്നൊക്കെ തോന്നും.. ഇവന് ജാമ്യം കിട്ടി നോക്കട്ടെ അപ്പോഴറിയാം തനി സ്വരൂപം പുറത്ത് വരുന്നത്. ഇറങ്ങി വന്നാൽ ആദ്യം ചെയ്യുന്നത് ഏതേലും ബാറിൽ പോയി കുടിച്ച് അർമാദിക്കുകയായിരിക്കും. പിന്നീട് മരിച്ചു പോയ അമ്മയെയും മക്കളെയും തെറിവിളിക്കുന്നത് കേൾക്കാം, അവര് കാരണം ഇത്രയും ദിവസം ജയിലിൽ കിടന്നതിന്. കുറച്ചു മാസങ്ങൾ കഴിയുമ്പോൾ ഒരു വിവാഹം കഴിക്കാൻ ശ്രമവും നടത്തിയേക്കാം. 

വെഞ്ഞാറമൂട് കൂട്ടക്കൊലയിലെ പ്രതിക്ക് ചോറു കൊടുത്തപ്പോൾ അതിൽ “മീൻകറിയില്ലേ സാറേ” ന്ന് ചോദിച്ചിരുന്നു പോലും.

സ്നേഹിച്ചു പോയി എന്ന കുറ്റത്തിന് മരണപ്പെടേണ്ടി വന്ന ആ പെൺകുട്ടിയുടെ മാതാപിതാക്കളുടെ അവസ്ഥ ഒന്നാലോചിച്ചു നോക്കൂ. ഇവനും ഇവൻ്റെ വീട്ടുകാരും ധാരാളിച്ച് ചെലവാക്കി ധൂർത്തടിച്ച് ജീവിച്ചതിന് ആ പാവം പെൺകുട്ടി എന്ത് പിഴച്ചു? പത്തൊൻപതു വയസ്സേ ആ മോൾക്കുണ്ടായിരുന്നുള്ളൂ.

ശരിക്കു പറഞ്ഞാൽ കൊലപാതകവും ജയിൽ ജീവിതവുമൊക്കെ, ഇവരിത് ആഘോഷിക്കുകയാണ്. 

ഇതിനേക്കാൾ വലിയ മാനസിക ആഘാതമേറ്റ ഒരാളുണ്ട്, അയാളെപ്പറ്റി ആരും ചിന്തിക്കുകയോ പറയുകയോ ചെയ്തിട്ടില്ല. ഒരു മാധ്യമങ്ങളും അയാളുടെ ഇപ്പോഴത്തെ അവസ്ഥയെപ്പറ്റി റിപ്പോർട്ടും ചെയ്തിട്ടില്ല. 

ഓടിച്ചു കൊണ്ടിരിക്കുന്ന ട്രയിനിൻ്റെ മുമ്പിലേയ്ക്ക് പെട്ടെന്ന് കയറി വരുന്ന മൂന്നു പേര്, അദ്ദേഹം ഹോൺ മുഴക്കിയിട്ടും ഒരിഞ്ചുപോലും മാറാതെ അവർ കെട്ടിപ്പിടിച്ച് പാളത്തിൽ നിൽക്കുകയായിരുന്നു. അവരെക്കണ്ട് പെട്ടെന്ന് ബ്രേക്ക് സിസ്റ്റം പ്രവർത്തിപ്പിച്ചാൽ ട്രയിനിലുള്ള ആയിരക്കണക്കിന് ജീവനുകൾ അപകടത്തിലാവുമെന്ന തിരിച്ചറിവിൽ അദ്ദേഹത്തിന്, ഇവരുടെ ദേഹത്തുകൂടെ ട്രയിൻ കയറ്റിയിറക്കുകയല്ലാതെ വേറെ മാർഗ്ഗമില്ലാലോ.  അങ്ങനെ ചെയ്യുമ്പോൾ അദ്ദേഹത്തിൻ്റെ മാനസിക നില എന്തായിരിക്കും. അബദ്ധത്തിൽ ട്രയിനിനു മുമ്പിലേക്ക് വീണിട്ടോ, അല്ലെങ്കിൽ ട്രാക്ക് മുറിച്ചു കടക്കാനുള്ള ചിലരുടെ വെപ്രാളത്തിലോ, അതുമല്ലെങ്കിൽ രാത്രിയിൽ ചിലരുടെ ആത്മഹത്യാശ്രമം കൊണ്ടോ, ചിലപ്പോൾ മറ്റു വഴികളില്ലാതെ ചിലരെ കൊല്ലേണ്ടി വന്നിട്ടുണ്ടാവും. 

പക്ഷേ ഇത്, നിസ്സഹായതയോടെ അവരുടെ  മൂന്നു പേരുടേയും ദേഹത്തു കൂടെ ട്രയിൻ കയറിയിറങ്ങിപ്പോവുന്നത് അദ്ദേഹം എങ്ങനെ സഹിച്ചു കാണും.
ചിലപ്പോൾ അവർക്ക് അതിനുള്ള ട്രയിനിംഗും കൗൺസിലിംഗുമൊക്കെ ജോലിയുടെ ഭാഗമായി കിട്ടുന്നുണ്ടാവും. എന്നാലും മാലാഖക്കുഞ്ഞുങ്ങളെപ്പോലെ രണ്ടു കുട്ടികൾ, അവരെ ചേർത്തുപിടിച്ച് ജീവിതം തന്നെ വെറുത്തുപോയ ഒരമ്മ. ജീവിക്കാനായി ഒരു പാടാഗ്രഹിച്ച് ഒരു പാടു വാതിലുകളിൽ മുട്ടി, എല്ലായിടത്തും തോറ്റുപോയ ഒരമ്മ, അവരുടെ ഭർത്താവിൻ്റെ അച്ഛനു വേണ്ടിയെടുത്ത ലോണു പോലും അവരുടെ തലയിലേയ്ക്ക് വെച്ചു കൊടുത്ത നീതിമാനായ ഭർത്താവ്. ലോണെടുത്ത പൈസ തിരിച്ചടയ്ക്കാനാവാതെ നെട്ടോടമോടേണ്ടി വന്ന ആ അമ്മ പിന്നെ എന്തു ചെയ്യും. തൻ്റെ രണ്ടു പെൺമക്കളെ ഭൂമിയിൽ ഉപേക്ഷിച്ചു പോയാൽ ഭർത്താവിൻ്റെ ചേട്ടെനെന്ന കഴുകൻ ആ കുഞ്ഞുങ്ങളെ കൊത്തിപ്പറിയ്ക്കുമെന്ന് അവർക്ക് നന്നായറിയാം.
അവരുടെ ചിന്താഗതിയിൽ അവരുടെ തീരുമാനമായിരുന്നു ശരി, 

പിന്നെ ക്രിസ്തുമതത്തിൽ വിവാഹമോചനം പാപമായി കണക്കാക്കുന്നു. പിന്നെ ആ നരാധമൻ അവർക്ക് വിവാഹമോചനം കൊടുക്കില്ലാന്നും പറഞ്ഞു. ഇങ്ങനെയൊരവസ്ഥയിൽ അവർ എന്തു ചെയ്യണമായിരുന്നു. ഇപ്പോൾ ചിലപ്പോൾ പലരും പറയും. അവരുടെ കടം ഞാൻ തീർത്തേനെ, അവരെ ഞാൻ കെട്ടിയേനെ എന്നൊക്കെ. പക്ഷേ ഇനിയും ജീവിതം വെച്ചൊരു പരീക്ഷണത്തിന് ആ സാധു സ്ത്രീയുടെ മനസ്സ് അനുവദിക്കുന്നുണ്ടാവുമായിരുന്നില്ല. അത്രയ്ക്കും അവര് അനുഭവിച്ചു കാണുമെന്ന് അവരുടെ അയൽക്കാരുടെ സംസാരത്തിൽ നിന്നും നമുക്ക് മനസ്സിലാക്കാം, 

ഇത്രയൊക്കെ സഹിച്ച് ജീവിച്ച അവർ ഏതേലും ഒരാളുടെ കൂടെ ഇറങ്ങിപ്പോയിരുന്നെങ്കിൽ, ഇപ്പോൾ അവരുടെ അവസ്ഥയിൽ പരിതപിക്കുന്ന, മാപ്രകളും സോഷ്യൽ മീഡിയാ ആങ്ങളമാരും, ചേട്ടൻമാരും ആൻ്റിമാരും അമ്മായിമാരും അങ്കിൾമാരുമെല്ലാം ആ അമ്മയെ ലോകത്തിലെ ഏറ്റവും വല്യ തെറ്റുകാരിയായി കണ്ടേനെ, 

ചിലരൊക്കെ മരിക്കാനുള്ള പേടി കൊണ്ടും ജീവിക്കാനുള്ള ആഗ്രഹം കൊണ്ടുമാവാം പുതിയൊരു ജീവിതത്തിലേക്ക് ചാടിപ്പോവുന്നത്. അങ്ങനെയുള്ളവരെ തെറിവിളിച്ചു ശീലിച്ചു പോയവരാണ് നമ്മളൊക്കെ. അവരുടെ വീട്ടിലെ അനുഭവം അവർക്കേ അറിയൂ, അത് ഭർത്താവിൽ നിന്നും മാത്രമാവണമെന്നില്ല, ഭർതൃമാതാവിൽ നിന്നും സഹോദരിമാരിൽ നിന്നും ഭർതൃ സഹോദരൻമാരിൽ നിന്നും ഒക്കെ മോശം അനുഭവം നേരിടേണ്ടി വരുന്ന സ്ത്രീകൾ ഇപ്പോഴും നമുക്കിടയിലുണ്ട്. അവർ ഭർത്താവിനോട് പരാതി പറഞ്ഞാൽ “ആദ്യം നിൻ്റെ സ്വഭാവം നന്നാക്ക്, നിൻ്റെ സ്വഭാവം മോശമായത് കൊണ്ടാണ് നിന്നോട് അവർ അങ്ങനെ പെരുമാറുന്നത്” എന്നേ ഭർത്താക്കൻമാർ പറയൂ, 

സ്വന്തം വീട്ടുകാരോട് ഈ കാര്യം പറഞ്ഞാൽ, “കല്യാണം കഴിഞ്ഞാൽ ഇങ്ങനെയൊക്കെയാ, സഹിച്ചും ക്ഷമിച്ചും നിൽക്കേണ്ടത് നമ്മൾ സ്ത്രീകള് തന്നെയാണെന്ന് ഒരുപദേശം ഫ്രീയായിട്ട് കിട്ടും. വീട്ടുകാരു പോലും സപ്പോർട്ട് ചെയ്യാതാവുമ്പോൾ എന്തു ചെയ്യും?

പിഴച്ചുപോയ സമൂഹത്തിനു മുമ്പിലേയ്ക്ക് തൻ്റെ പെൺമക്കെളെ വലിച്ചെറിഞ്ഞു കൊടുക്കാതെ തൻ്റെ കൂടെ കൂട്ടിയ ആ അമ്മയ്ക്കും സ്വർഗ്ഗത്തിലേക്ക് പോയ ആ മാലാഖക്കുഞ്ഞുങ്ങൾക്കും, നിറഞ്ഞൊഴുകുന്ന കണ്ണീരോടെ ആദരാഞ്ജലികൾ.
🌹🌹🌹🌹🙏🙏🙏🙏

✍️ ഷിജിത് പേരാമ്പ്ര

Disclaimer: The viewpoints and opinions expressed in this post are those of the author. They do not necessarily reflect the views of Koottaksharangal.com. Any omissions or errors are the author’s and Koottaksharangal does not assume any liability or responsibility for them.