ആരായിരുന്നു ഞാൻ!

ആൾക്കൂട്ട വിചാരണയിലൂടെ “നമ്മൾ” തല്ലിക്കൊന്ന മധുവിനെ ഓർമ്മയില്ലേ?

ആ മധു “നമുക്ക് ” ആരായിരുന്നു ?

എന്നോട് മധു ചോദിക്കുകയാണ് ..

“നിനക്ക് ഞാൻ ആരായിരുന്നു കൂട്ടുകാരാ ” എന്ന് ?

കാനേഷുമാരിയിലോ, അഗ്രസന്ധാനിയിൽ പോലുമോ പേരേതുമില്ലാത്ത അങ്ങനെ ചില നായാടികൾ ..

ആരായിരുന്നു ഞാൻ

– അജിത്

ആരായിരുന്നു ഞാൻ

ആവർത്തനങ്ങളാൽ

ആദ്യന്തമില്ലാത്തൊരപ്രസക്തൻ ..

ഭരണഗേഹങ്ങളിൽ

മരണചക്രങ്ങളിൽ

വരിതെറ്റി നിൽക്കുന്ന ശരണാഗതൻ ..

ആരായിരുന്നു ഞാൻ

ആവർത്തനങ്ങളാൽ

ആദ്യന്തമില്ലാത്തൊരപ്രസക്തൻ ..

നീരും വിയർപ്പുമെൻ ശ്വാസനിശ്വാസവും

ജീവനെത്തന്നെയും തീറു വാങ്ങി ..

എന്റെയീ മണ്ണും എന്റെയീ കാറ്റും

എന്റെയീ മണവും അതിർത്തി കെട്ടീ ..

ഞാൻ കൊണ്ട മഴയും ഞാനേറ്റ വെയിലും

ഞങ്ങളെത്തന്നെയും വേർപെടുത്തീ ..

വേർപാട് നോവല്ല, വേരറ്റൊടുങ്ങലെ

ന്നോരോ ദിനവും നിജപ്പെടുത്തീ ..

ആരായിരുന്നു ഞാൻ

പേരറ്റു പോയൊരാ

താരാപഥത്തിന്റെ കൂട്ടുകാരൻ ..

കാനേഷുമാരിയിൽ

അഗ്രസന്ധാനിയിൽ

പേരേതുമില്ലാത്ത നായാടികൾ ..

ആരായിരുന്നു ഞാൻ

ആരായിരുന്നു ഞാൻ .

ആരായിരുന്നു ഞാൻ കൂട്ടുകാരാ

ഇരുശ്വാസമിടനാഴി ജീവിതപാനത്തി

ലൊരുമാത്രയിളവേൽക്കുമാ നിമിയിൽ

ചങ്കിലെ താളവും, ഊരിയ കൂരമ്പിൻ

തുമ്പിലെ ചോരയും, കണ്ണിലെ സ്വപ്നവും,

ഒരു ചാൺ വയറിൻ കൊടും വിശപ്പും,

തൊട്ടറിയുകിൽ ചൊല്ലുക കൂട്ടുകാരാ

ആരായിരുന്നു ഞാൻ …

ആരായിരുന്നു ഞാൻ …

ആരായിരുന്നു ഞാൻ കൂട്ടുകാരാ ..