😘വൈറൽ വീഡിയോ🌹

 എടാ, എനിക്ക് വീട്ടുകാര് വേറെ കല്യാണം നോക്കുന്നുണ്ട്ട്ടോ”

“അയിന്”

“അയിന് ന്നോ, അപ്പോ നിനക്കെന്നെ കെട്ടണ്ടേ, നമ്മക്ക് കല്യാണം കഴിച്ച് ഒന്നിച്ച് ജീവിക്കണ്ടേ?”

” ങ്ഹാ അതൊക്കെ വേണം”

“എന്നിട്ടാണോ നീയിപ്പോ, ഇങ്ങനെ പറയുന്നെ? എന്തൊക്കെയായിരുന്നു, ഒന്നിച്ച് ജീവിക്കണം, വീട് നിറയെ എന്നെപ്പോലെയുള്ള കുട്ടികൾ വേണം
ഒന്നിച്ച് ഭക്ഷണം കഴിക്കണം, വാരിത്തരണം, ഒരു കുഞ്ഞു വീട് വേണം, ഇപ്പോ കാര്യത്തോടടുക്കുമ്പോ ഒന്നും വേണ്ടാല്ലേ? അല്ലേലും എല്ലാ ആണുങ്ങളും ഇങ്ങനെ തന്നെയാ, ചതിയമ്മാര്”

അത്രയും പറഞ്ഞവൾ അവൻ്റെയരുകിൽ നിന്നും മാറിയിരുന്നു. പാർക്കിലെ ഒഴിഞ്ഞ കോണിലെ സിമൻ്റു ബഞ്ചിലിരുന്നു സംസാരിക്കുകയായിരുന്നവർ. 

“എടീ പോത്തേ, സോറി പോത്ത് ആണാണല്ലോ, എരുമേ”

“എരുമ നിൻ്റെ കുത്തമ്മ”, അവളവൻ്റെ മോന്തക്കിട്ടൊരു കുത്തു കൊടുത്തു. 

” ഞാൻ പറയട്ടേ, എന്നിട്ട് നീ ദേഷ്യപ്പെട്”

” ങ്ഹാ പറയ്, 

“എടീ എനിക്ക് ജോലിയായില്ലാന്ന് നിനക്കറിയാവുന്ന കാര്യമല്ലേ, രണ്ടു വർഷം കൂടെ കഴിഞ്ഞിട്ട് പോരേ, അതുവരെ നീ വീട്ടിൽ എന്തേലും പറഞ്ഞ് വരുന്ന കല്യാണമെല്ലാം മുടക്ക്. “

“ഒന്നും നടക്കൂല മോനെ. കോഴ്സ് കഴിയട്ടെ ന്ന് പറഞ്ഞ് പിടിച്ചു നിന്നതാ ഇതുവരെ, ഇപ്പോ അതു കഴിഞ്ഞു ഇനി രക്ഷയില്ല. “

” ഇനിപ്പോ എന്ത് ചെയ്യും, ബ്രേക്കപ്പാവേണ്ടി വര്വോ?”

“ബ്രേക്കപ്പായാൽ നിന്നെ ഞാൻ കഷായം തന്ന് കൊല്ലും, പറഞ്ഞേക്കാം”

‘ശ്ശെടാ ഇതിപ്പോ മരണമുറപ്പായല്ലോ, എന്നാ നമുക്ക് ഒന്നിച്ച് മരിക്കാം” 

” മരിക്കാന്നൊന്നും ഞാനില്ല. എനിക്ക് ജീവിക്കണം. അതും നിൻ്റെ കൂടെത്തന്നെ, അതിന്നൊരു വഴിയുണ്ട്. നമ്മള് ഒരോട്ടോയിൽ കേറുന്നു. ഒരു വീഡിയോ എടുക്കുന്നു.” 

” ഒളിച്ചോടുകയാണെന്നും പറഞ്ഞോ, എന്നിട്ട് അതു കണ്ടിട്ട് വേണം നിൻ്റെ ആങ്ങളമാരെന്നെ തേടിപ്പിടിച്ച് പഞ്ഞിക്കിടാൻ”

“അതൊന്നുമില്ല. അവര് നമ്മളെ തിരിഞ്ഞു പോലും നോക്കില്ല. “

“എന്നാ പറ”

“വീഡിയോ എടുത്ത് ഞാൻ പറയും.
ഇതെൻ്റെ കുഞ്ഞമ്മയുടെ മോനാ, ഞങ്ങള് ചെറുപ്പത്തിലേ ഒന്നിച്ച് കളിച്ച് വളർന്നതാ, ഞങ്ങൾക്ക് പിരിയാൻ പറ്റില്ല. അതുകൊണ്ട് ഒന്നിച്ച് ജീവിക്കാൻ തീരുമാനിച്ചൂന്ന്.” 

” അയ്യേ, കുഞ്ഞമ്മയുടെ മോനെന്ന് പറയണോ, മാമൻ്റെ മോനാന്ന് പറഞ്ഞാപ്പോരെ”

“കുഞ്ഞമ്മയുടെ എന്ന് പറയണം എന്നാലെ വീഡിയോയ്ക്ക് റീച്ച് കിട്ടൂ, മാമൻ്റെ മോൻ എന്ന് പറഞ്ഞാൽ അതിലൊരു ത്രില്ലില്ല. “

”ങ്ഹാ, എന്നിട്ട്”

“എന്നിട്ട് ഞാൻ സംസാരിക്കുന്നതിനിടയിൽ എന്നെ പൊന്നേ, ചക്കരേ ന്ന് വിളിക്കണം, ഇടക്ക് ഒരോ ഉമ്മയും തന്നോ. ഇതെല്ലാം കണ്ട് നാട്ടാര് തെറിയും വിളിച്ച് വീഡിയോ വൈറലാക്കിക്കോളും. അപ്പോ നമ്മക്ക് എഫ് ബീ ന്നും, യൂടൂബിൽ നിന്നുമൊക്കെ വരുമാനം കിട്ടിക്കോളും അത് പോരെ നമ്മക്ക് ജീവിക്കാൻ”

“ഈ വീഡിയോയുടെ വൈറൽ തരംഗം കഴിഞ്ഞാലോ?”

“നമ്മളടുത്ത വീഡിയോ ഇടും, നമ്മുടെ ആദ്യ രാത്രി, പിന്നീട് ഗർഭം, പിന്നെ പ്രസവം, ചോറുണ്, ഇടയ്ക്ക് വീട്ടിലുള്ള വഴക്ക്, നീ രാത്രി ഒരു മണി കഴിഞ്ഞ് എൻ്റെ വാതിലിൽ മുട്ടി. ഞാൻ നിന്നെ ഷൗട്ട് ചെയ്തു. പിന്നെ നമ്മള് കുഴിമന്തി തിന്നിട്ടില്ല. ചട്ടിച്ചോറ് തിന്നിട്ടില്ല എന്നൊക്കെ പറയണം ഇത്രയൊക്കെ മതി. മലയാളികൾ നല്ല സ്നേഹമുള്ളോരാ എല്ലാം അവര് വൈറലാക്കിത്തരും. രണ്ടുവർഷാവുമ്പോ നിനക്ക് ജോലി കിട്ടുമല്ലോ, അതുവരെ നമുക്ക് ലാവിഷായി ജീവിക്കാൻ ഇതു മതി. ഇനിയഥവാ ജോലി കിട്ടിയില്ലെങ്കിലും നമുക്ക് വീഡിയോ ഇട്ടോണ്ടിരിക്കാം”

“അമ്പടി ജിഞ്ചിന്നാക്കടീ നീ കൊള്ളാലോ, ന്നാ ബാ പൂവാം”

അനന്തരം ഒന്നിച്ചൊരു ജീവിതത്തിനായി ഓട്ടോയിലേയ്ക്കവർ ഓടിക്കയറി.

✍️ ഷിജിത് പേരാമ്പ്ര