ചേർത്ത് നിർത്തുന്ന ശക്തി

സന്ധ്യ മയങ്ങിത്തുടങ്ങിയിരുന്നു അടുക്കളയിൽ പാത്രം കഴുകുന്ന തിരക്കിനിടയിൽ അവൾ ജനലിലൂടെ പുറത്തേക്ക് നോക്കി. മഴ കലിതുള്ളി പെയ്യുകയാണ്, ആരോടൊക്കെയോ ഉള്ള പക പോലെ.. നേർത്ത മഴയുള്ള ഒരു പകലിലാണ് പ്രതീക്ഷകളോടെ ഹരിയേട്ടന്റെ അമ്മ തന്ന നിലവിളക്കുമായി ഈ വീട്ടിലേക്ക് ഗായത്രി പ്രവേശിച്ചത്. ഭർത്താവ്, മകൾ  എല്ലാം തികഞ്ഞൊരു കുടുംബം.

എന്നാൽ, കാലം മുന്നോട്ട് പോകുന്തോറും ഗായത്രിയ്ക്ക് തോന്നിത്തുടങ്ങി, ബന്ധങ്ങൾ ഒരു നേർത്ത നൂലിഴയാണെന്ന്. സ്നേഹവും വിശ്വാസവും കൊണ്ട് ജീവിതം നെയ്യുമ്പോൾ അത് മനോഹരമായൊരു ചിത്രമായി മാറും. എന്നാൽ, ചിലപ്പോൾ ആ നൂലിഴകൾ നമ്മളെ വരിഞ്ഞുമുറുക്കുന്ന ബന്ധനങ്ങളായി മാറും. ഇന്ന്‌ ഹരിയേട്ടൻ ഒരുപാട് മാറിയിരിക്കുന്നതായി തോന്നിയവൾക്ക്. ജോലിയും തിരക്കുകളും അയാളെ അവളിൽ നിന്നും കൂടുതൽ ദൂരങ്ങളിലേക്ക് കൊണ്ടുപോയതുപോലെ. പഴയ ചിരിയും തമാശകളും പതിയെ ഇല്ലാതായി. അമ്മു നഴ്സിംഗ് പഠനത്തിനായി വിദേശത്തേക്ക് പറന്നു.. ഗായത്രി ശരിക്കും ഒറ്റപ്പെട്ടു. സംസാരമില്ലാത്ത ഭിത്തികളും, കേൾക്കാനാളില്ലാത്ത സ്വന്തം വാക്കുകളും അവളെ വല്ലാതെ വീർപ്പുമുട്ടിച്ചു. അവൾ തരം കിട്ടുമ്പോൾ ഭർത്താവിനോട് പരാതിപ്പെട്ടു. തന്നെ ശ്രദ്ധിക്കുന്നില്ല, സ്നേഹം കുറഞ്ഞു അങ്ങനെ പലതും പറഞ്ഞു കുറ്റപ്പെടുത്തിക്കൊണ്ടേയിരുന്നു. പക്ഷെ, അയാൾ എല്ലാം കേട്ടിരുന്നതേയുള്ളൂ. മെല്ലെ മെല്ലെ അവൾ ഒരു രോഗിയായി മാറി.

ഒരു ദിവസം, അപ്രതീക്ഷിതമായി അവൾ ആശുപത്രി കിടക്കയിലായി. അയാൾ നീണ്ട അവധിയെടുത്തു അവളെ തന്റെ മുഴുവൻ സ്നേഹവും കൊടുത്തു പരിചരിച്ചു. ഹരിയുടെ സാമിപ്യം അവൾക്ക് ആശ്വാസവും ആനന്ദവും നൽകി. ഹരിയേട്ടന്റെ  തിരക്കുകൾ മനസ്സിലാക്കാതെ കുറ്റപ്പെടുത്തിയതിൽ അവളേറെ വിഷമിച്ചു. അതിന് പകരമെന്നപോലെ അയാളുടെ ചുണ്ടുകളിലൊരു മുത്തം കൊടുത്തു. അമ്മയെ കാണാൻ അമ്മു വിദേശത്തുനിന്നും എത്തി.

ആ ദിവസങ്ങളിൽ, ഗായത്രിക്കു മനസ്സിലായി, ബന്ധങ്ങൾ ഒരുപാട് സങ്കീർണ്ണമാണെന്ന്. അത് ചിലപ്പോൾ നമ്മളെ തളർത്തുന്ന ബന്ധനങ്ങളാകാം, ചിലപ്പോൾ താങ്ങും തണലുമാകുന്ന ശക്തിയാകാം. അവളുടെ കൈകളിൽ പതിയെ തലോടികൊണ്ടയാൾ പറഞ്ഞു, “നമ്മൾ തമ്മിലുള്ള ഈ ബന്ധം, അതൊരു ബന്ധനം മാത്രമല്ല… അതൊരു ശക്തിയാണ്. നമ്മളെ ചേർത്ത് നിർത്തുന്ന ശക്തി.”

ആ വാക്കുകൾക്ക് ഉത്തരം നൽകാനെന്നോണം, അവൾ അയാളുടെ നേർക്ക് പതിയെ ചിരിച്ചു. അവരുടെ ബന്ധങ്ങൾ വീണ്ടും പൂത്തുലയുകയായിരുന്നു. അതെ, ചില ബന്ധനങ്ങൾ നമ്മളെ മുന്നോട്ട് നയിക്കാൻ സഹായിക്കും.❤️

#എന്റെരചന – ബന്ധങ്ങൾ ബന്ധനങ്ങൾ