ഒരു കുഞ്ഞ് സ്വപ്നം

നീലമേഘങ്ങൾ വിരുന്നെത്തുന്ന

സ്വർണനിറത്തിലെ മണ്ണുള്ള

കുന്നടിവാരത്ത്

ഒരു കുഞ്ഞ് വീട് വയ്ക്കണം.

ഒറ്റമുറിയും ആ മുറിക്കുള്ളിൽ പരമ്പ്

കൊണ്ട് തിരിച്ച കുഞ്ഞൊരു അടുക്കളയും മാത്രം!

ആവശ്യത്തിന് മാത്രം പാത്രങ്ങളും സൗകര്യങ്ങളും..

മുറ്റത്തെ ഒരാൾ പൊക്കം വലിപ്പമുള്ള കുഞ്ഞ് കിണറ്റിലെ

ശുദ്ധമായ

തണുത്ത വെള്ളം നിറച്ച മൺകുടം..

വീട്ടുമുറ്റത്ത് കൃഷിചെയ്ത പച്ചക്കറികളും…!

നീളൻ വരാന്തയിൽ ഒരു ചാരുകസേര.

നമ്മുടെ സ്നേഹം പോലെ തിമിർത്ത് പെയ്യുന്നത് കണ്ടോണ്ട്…

ചൂടുള്ള കട്ടനും കുടിച്ച് കസേരയിൽ നീയും വരാന്തയിൽ നിന്ന് മുറ്റത്തേക്ക് കാല് നീട്ടി മഴ കൊള്ളുന്ന ഞാനും….!

മുറ്റത്ത് നമ്മൾ മത്സരിച്ചു നട്ട പൂച്ചെടികളും

പച്ചക്കറികളും മഴ നനഞ്ഞു സന്തോഷിക്കട്ടെ..

ചോരാത്ത മേൽക്കൂരയിൽ തകൃതിയായി പെയ്തു താളമിടുന്ന ശബ്ദം എന്ത് മനോഹരമായാണ് നമ്മളെ തമ്മിലൊന്ന് ചേർക്കുന്നത്.!!

പുതുമഴയുടെ ഗന്ധം നുകർന്ന്

കുറേ സ്വപ്നങ്ങൾ കാണണം..

വർത്താനം പറയണം..

മണ്ണിന്റെ മണമുള്ള..പവിഴമല്ലി പൂക്കൾ കൊഴിഞ്ഞ് കിടക്കുന്ന നീണ്ട മുറ്റത്തിന്റെ കോണിൽ കുട വിരിച്ചു നിൽക്കുന്ന തണൽ മരത്തിന്റെ ചില്ലയിലൊരു ഊഞ്ഞാൽ കെട്ടണം!

നക്ഷത്രങ്ങൾ പെറ്റ് പെരുകുന്നൊരു രാത്രിയിൽ നിലാവിനെ നോക്കി

ഞാൻ ഊഞ്ഞാലിലാടുമ്പോൾ ഇളംകാറ്റ്

തഴുകുന്ന മുടിയിഴകൾ ചെവിക്ക് പിന്നാലെ ഒതുക്കി വച്ച് നീ എന്റെ നെറുകയിൽ കുഞ്ഞൊരു ഉമ്മ വയ്ക്കണം!!

നനവിറങ്ങി പോയി വെയിൽ കൊണ്ടുണങ്ങിയ

നിലത്തിരുന്ന് ഒരുമിച്ച് ഭക്ഷണം കഴിച്ച്..

അങ്ങോട്ടുമിങ്ങോട്ടും വാരി കൊടുത്ത്

അത്രമേൽ സുഖമുള്ള ആ നിമിഷങ്ങൾ ആസ്വദിക്കണം.

നിലാവ് മറയും മുന്നേ മിറ്റത്തെ കയറ്റു കട്ടിലിൽ സ്വപ്നങ്ങൾ കണ്ട് മതിവരുവോളം

കെട്ടിപ്പിടിച്ചുറങ്ങണം…!

നമ്മുടെ സ്നേഹം കണ്ട് ചെടികളും പൂക്കളും മരങ്ങളും കാറ്റും ശലഭങ്ങളും കുസൃതികൾ പറയട്ടെ..

നമുക്ക് കാവൽ നിൽക്കട്ടെ!!