എല്ലാം കാണുന്ന നിക്ക്

ഇന്നെൻ്റെ ഓട്ടോറിക്ഷയിൽ കയറിയവരിൽ ഒരാളെ ഞാൻ ജീവിതത്തിൽ ഒരിയ്ക്കലും മറക്കാൻ പോകുന്നില്ല.

എൻ്റെ കൂടെ ചിത്രത്തിലുള്ള Mr. Nick ആണ് അയാൾ. അമേരിക്കക്കാരനാണ്. അവിടെ മിസ്സോറി സ്വദേശി.

നിക്കിന് കാഴ്ചയില്ല.

അയാളുടെ നാട്ടിൽ ഒരു ദ്വിഭാഷിയായാണ് നിക്ക് ജോലി ചെയ്യുന്നത്. ഇംഗ്ലീഷ് – സ്പാനിഷ് – പോർത്തുഗീസ് ഭാഷകൾ അറിയാം.

കൂടുതലും ജയിൽപ്പുള്ളികളാണത്രേ അയാളുടെ സേവനം ഉപയോഗപ്പെടുത്തുന്നത്.

നിക്ക് ഒരു സവിശേഷ വ്യക്തിയാണ്. അമേരിക്കകാരനാണെന്നതോ കാഴ്ചയില്ലെന്നതോ അല്ല അയാളുടെ സവിശേഷത.

മറ്റുള്ളവരെ പ്രചോദിപ്പിക്കാനുള്ള ശേഷിയാണ് അയാളുടെ സവിശേഷത. അയാളുടെ Super Power.

Winter തനിയ്ക്ക് ഇഷ്ടമല്ലെന്ന് നിക്ക് എന്നോട് പറഞ്ഞു. അയാളുടെ winter ഒഴിവുകാലം മുഴുവൻ ഇപ്രാവശ്യം കേരളത്തിൽ ചെലവഴിയ്ക്കും.

ഒറ്റയ്ക്കാണ് നിക്കിൻ്റെ യാത്രകൾ മുഴുവനും.

മറ്റു പല രാജ്യങ്ങളിലും അയാൾ പോയിട്ടുണ്ട്. കാഴ്ചയില്ലാത്ത ഒരാൾ ഇത്രയും നാടുകളിൽ എന്താണ് കണ്ടതെന്ന് ഞാൻ അയാളോട് ചോദിയ്ക്കാൻ പാടില്ലല്ലോ.

ഏതെങ്കിലും മാർഗ്ഗങ്ങളിലൂടെ അയാൾ ഓരോ നാടിനെയും തൊട്ടറിയുന്നുണ്ടായിരിയ്ക്കും.

കാഴ്ചയില്ലെന്ന് വിലപിച്ച് തൻ്റെ ചലനങ്ങളെ പരിമിതപ്പെടുത്താതെ ഉലകം ചുറ്റുന്ന നിക്ക് തീർച്ചയായും ചെല്ലുന്നേടത്തെല്ലാം പലരേയും പ്രചോദിപ്പിയ്ക്കുന്നുണ്ടായിരിയ്ക്കും.

എൻ്റെ UBER ഓട്ടോറിക്ഷ വരുന്നുണ്ടെന്ന് അയാൾക്ക് പറഞ്ഞു കൊടുത്ത് ഓട്ടോയിൽ കയറാൻ നിക്കിനെ സഹായിച്ചത് ഒരു ബംഗാളിയാണ്. നിക്കിൻ്റെ താമസസ്ഥലമെത്തിയപ്പോൾ ഓട്ടോറിക്ഷയിൽ നിന്നും ഇറങ്ങുന്നതിന് മുൻപ് ഒരു selfie എടുക്കാം എന്ന് അയാളോട് പറഞ്ഞപ്പോൾ, “നിങ്ങൾ വിചാരിക്കുന്നത്ര ഭംഗിയൊന്നും ആ selfie-യ്ക്ക് ഉണ്ടാകില്ല, കേട്ടോ!” എന്ന് തമാശയായി പറഞ്ഞ് നിക്ക് pose ചെയ്തു.

Lift വരെ കൂടെ വരാം എന്ന എൻ്റെ സഹായ വാഗ്ദാനം നിക്ക് സന്തോഷത്തോടെ സ്വീകരിച്ചു.

യാത്രകൾക്കിടയിൽ എതെങ്കിലും പരിമിതികൾ എപ്പോഴെങ്കിലും അനുഭവപ്പെട്ടിട്ടുണ്ടോ എന്ന് ഞാൻ നിക്കിനോട് ചോദിച്ചു.

“ചെല്ലുന്നേടത്തെല്ലാം നിങ്ങളെപ്പോലുള്ള നല്ല മനുഷ്യരുള്ളപ്പോൾ ഞാൻ എന്ത് പരിമിതികൾ അറിയാനാണ്!”, എന്ന് ചിരിച്ചുകൊണ്ട് അയാൾ മറുപടി പറഞ്ഞു.

സന്തോഷത്താൽ നെഞ്ചിൽ നിറഞ്ഞ ഭാരം എൻ്റെ കണ്ണുകൾ നിറച്ചത് കാണാൻ നിക്കിന് കാഴ്ചയില്ലാത്തതിൽ ഞാൻ ഒരു മാത്ര സന്തോഷിച്ചു.

മെൽവിൻ പോൾ താഞ്ചൻ