ഒരു വൈകുന്നേരം

ഇന്ന് ഒരു കല്യാണം ഉണ്ടായിരുന്നു. അതു കഴിഞ്ഞ് വന്ന് ഒരു നല്ല ഉറക്കവും കഴിഞ്ഞു എണീറ്റ് വന്നപ്പോ ചുറ്റുപാടും മൊത്തത്തിൽ ഒന്നു നോക്കി. ഇന്ന് ഉച്ചയ്ക്ക് കണ്ടതിനേക്കാൾ മാറിയിരിക്കുന്നു പ്രകൃതി. ഉച്ചയ്ക്ക് കല്യാണ വീട്ടിൽ ഇരിക്കുന്നത് ഞാൻ ഓർത്തു. സഹിക്കാൻ പറ്റാത്ത ചൂട് ആയിരുന്നു. ഇപ്പൊ നോക്കുമ്പോ ആകെ മൊത്തത്തിൽ മാറിട്ടുണ്ട്.

ഞാൻ മുറ്റത്തേക്കിറങ്ങി. കാർമേഘങ്ങൾ ഉരുണ്ട് മൂടി കിടക്കുന്നുണ്ട്. ഒരു വലിയ മഴ പെയ്യാനുള്ള എല്ലാ അവസ്ഥകളിലും കാണാൻ പറ്റുന്നുണ്ട്. മഴ വരുന്നത് കണ്ടിട്ടാവണം പക്ഷികളെല്ലാം തിടുക്കത്തിൽ കൂടണയുന്നുണ്ട്. വീടിലെ കോഴികളെല്ലാം കോഴിക്കൂടിൻ്റെ മുകളിൽ കേറി ഇരിപ്പായിട്ടുണ്ട്. ആടുകൾ ആണെങ്കിൽ മഴയെ തടുക്കാനെന്നവണ്ണം കൊമ്പ് കൂർപ്പിച്ച് ഇരിക്കുന്നതും കാണാം. പുതുതായി പ്രസവിച്ച തള്ളയാട് ചാടിക്കളിക്കുന്ന തൻ്റെ ആട്ടിൻകുട്ടികളെ എങ്ങനെയെങ്കിലും കൂട്ടിലേക്ക് ആക്കാനുള്ള ശ്രമത്തിലാണ്.

ഞാൻ അവരുടെ ഓട്ടവും ചാട്ടവും കണ്ട് കുറച്ച് നേരം ഇങ്ങനെ ഇരുന്നു. അപ്പോഴാണ് ഒന്ന് രണ്ട് മൂന്ന് അങ്ങനെ മുഖത്തേക്ക് മഴ തുള്ളികൾ ഇറ്റിറ്റു വീഴാൻ തുടങ്ങിയത് പഴുത്തിരിക്കുന്ന നിലത്തേക്ക് അവയെ ശമിപ്പിക്കാനെന്ന വണ്ണം അവ പെയ്യാൻ തുടങ്ങി ആട്ടിൻകുട്ടികളെ പിന്നെ നോക്കിയപ്പോ കണ്ടില്ല. അമ്മ പിടിച്ച് കൂട്ടിലാക്കിട്ടിണ്ടാവും. പക്ഷെ പ്രതീക്ഷിച്ചത്ര വലിയ പേമാരി ഒന്നും ഉണ്ടായില്ല. ഞാൻ അടുക്കളകോലയിൽ വന്നിരുന്നു. ഇവടെ നിന്ന് നോക്കിയ തറവാട് കാണാം. അച്ഛമ്മ അവിടെ മഴ കണ്ട് ഇരിക്കുന്നുണ്ട്.

അമ്മ ഒരു കട്ടൻ ചായ കൊണ്ട് തന്നു അതും കുടിച്ച് വാതിലിനോട് ചാരി അങ്ങനെ ഇരുന്നു

ചെറുതായി കാറ്റ് വീശുന്നുണ്ട് മഴയുടെ ശബ്ദം ഇരട്ടിക്കാൻ തുടങ്ങി.