🌹പെൺമക്കൾ🌹

പെങ്കുട്യോൾടെ അച്ഛനമ്മമാരോട് ഒരു ചോദ്യം.

എനിക്കറിയാൻ മേലാഞ്ഞിട്ട് ചോദിക്കാണ്. 

“നിങ്ങള് പെൺമക്കളെ വളർത്തുന്നത്, അവര് കണ്ടവൻമാരുടെ അടി കൊണ്ട് ചാവാനാണോ അതോ, അവര് അവരുടെ കൂടെ സ്വസ്ഥതയും സമാധാനവുമില്ലാതെ ജീവിച്ച്, അവസാനം ആത്മഹത്യ ചെയ്തോട്ടേന്ന് കരുതിയിട്ടാണോ? മക്കളെ വളർത്താൻ ഇത്ര പാടാണെങ്കിൽ എന്തിനേ കുട്ടികളെ ഉണ്ടാക്കുന്നത്?

കെട്യോനും കെട്ട്യോൾക്കും കൂടെ അന്ന് കാലിൻ്റെടയ്ക്ക് കയ്യും തിരുകി വെച്ച് തിരിഞ്ഞ് കിടന്നാപ്പോരായിരുന്നോ, എന്നാൽ എത്ര അന്തസ്സുണ്ട്. പിന്നെ നിങ്ങൾക്ക് വികാരശമനം തീരാഞ്ഞിട്ടാണേൽ മക്കളുണ്ടാവാതിരിക്കാൻ മറ്റെന്തെല്ലാം മാർഗ്ഗങ്ങളുണ്ട്. 

ഇത് കൊമ്പത്തെ ബന്ധവും തേടിപ്പോയിട്ട് ആ പാവങ്ങളെ കൊലക്ക് കൊടുക്കണോ? ആ കുട്ടികൾ എത്ര മാത്രം ശാരീരികമായിട്ടും മാനസികമായിട്ടും അനുഭവിച്ചിട്ടായിരിക്കും, അവസാനം ഒരു കഷ്ണം കയറിലോ, ഒരു തുള്ളി വിഷത്തിലോ അഭയം പ്രാപിച്ചിട്ടുണ്ടാവുക.

അപ്പോ നിങ്ങൾക്ക് പറയാം, ഒരു വിവാഹബന്ധം വരുമ്പോൾ പുറമേ കാണുന്ന ചിരിയല്ലേ നമ്മൾ അറിയുന്നുള്ളൂ, ഇവൻ്റെയൊക്കെ സ്വഭാവവും കിടപ്പറയിലെ വൈകൃതങ്ങളും നമ്മൾക്ക് മനസ്സിലാവുന്നില്ലാലോന്ന്…

“ശരിയാണ്, അതു നമ്മൾക്ക് മനസ്സിലാവില്ല. പുറമേ സുന്ദരനും വല്യ കൊമ്പത്തെ ജോലിക്കാരും കുടുംബക്കാരും ആയിരിക്കും. പക്ഷേ പറഞ്ഞിട്ടെന്താ കാര്യം വായിൽ നിന്ന് വീഴുന്നത് കേട്ടാൽ നാഗച്ചേച്ചി വരെ അന്ധാളിച്ച് പോവും. അമ്മാതിരി തെറിയായിരിക്കും. ഇതൊക്കെ ഒരിക്കലെങ്കിലും മകൾ നിങ്ങളോട് വന്നിട്ട് പറഞ്ഞിട്ടുണ്ടാവില്ലേ, അച്ഛനോട് പറഞ്ഞില്ലെങ്കിലും അമ്മയോട്പറഞ്ഞിട്ടുണ്ടാവുമല്ലോ? അപ്പോ നിങ്ങളവൾക്ക് ചേതമില്ലാത്ത ഒരു ഉപദേശം കൊടുക്കും. 

” മോളേ, നമ്മള് പെണ്ണുങ്ങളല്ലേ ക്ഷമിക്കേണ്ടത്. ഭൂമിയോളം ക്ഷമിക്കണം സഹിക്കണം അവിടെ പിടിച്ച് നിൽക്കണം. കാരണം കെട്ടിച്ചു വിട്ട പെൺമക്കൾ വീട്ടിൽ വന്നു നിന്നാൽ അത് നമ്മുടെ കുടുംബത്തിന് മാനക്കേടാ, നാട്ടാരും കുടുംബക്കാരും എന്ത് പറയും. നീയൊന്നാലോചിച്ച് നോക്ക്. പിന്നെ നിൻ്റെ കുഞ്ഞുങ്ങൾക്ക് അച്ഛൻ വേണ്ടേ, 

പാവം അതുങ്ങള് ഇത് കേൾക്കുമ്പോ കുടുംബത്തിൻ്റെ അന്തസ്സ്, കപ്പല് കേറി ഷാർജക്ക് പോവണ്ടാന്ന് കരുതി വീണ്ടും ഇതുപോലുള്ള നരാധമൻമാരുടെ കൂടെ വീണ്ടും പോവും.

അറുപത് കഴിഞ്ഞ വസന്തങ്ങളോട് ഒരു കാര്യം പറയട്ടേ.

“നിങ്ങൾക്ക്, പട്ടുസാരിയുടെ ഞൊറി പിടിച്ചിട്ടു കൊണ്ട് നിങ്ങളുടെ പൊങ്ങച്ചം കാണിക്കാനും അഹങ്കാരം പറയാനും നിങ്ങളുടെ മകള് വല്യ കുടുംബത്തിലാണ് വല്യ ജോലിക്കാരനാണ് കെട്ടിയത് എന്നു പറയാനും, വേണ്ടി അവരുടെ ജീവിതം കൊലയ്ക്ക് കൊടുക്കരുത്. 

നിങ്ങളുടെ ആൺമക്കൾക്ക് ഒരു സ്വഭാവമുണ്ട്, കെട്ടിച്ചു വിട്ട പെങ്ങൾ വീട്ടിൽ വന്നു നിന്നാൽ അവരുടെ സ്വാതന്ത്ര്യം നഷ്ടപ്പെടുമെന്നോ, കിടക്കാനുള്ള കട്ടില് അവളും കുഞ്ഞും കൈവശപ്പെടുത്തുമെന്നോ ഒക്കെയുള്ള ഒരു പേടി. ആ ചിന്താഗതി ആദ്യം മാറ്റണം. കെട്ടിച്ചു വിട്ടാലും അവരുടെ വിവാഹ ജീവിതം ശരിയല്ലാന്ന് തോന്നുകയാണെങ്കിൽ അവളെപ്പോയി വിളിച്ചോണ്ട് വരണം. 

എന്നിട്ട് നിങ്ങളുടെ കൂട്ടുകാരന് കെട്ടിച്ച് കൊടുക്ക്. അവൻ പൊന്നുപോലെ നോക്കിക്കോളും അവളെ, ചിലപ്പോ അവൻ കൂലിപ്പണിക്കാരനായിരിക്കും പക്ഷേ അവൻ്റെയുള്ളിൽ കടലോളം സ്നേഹമുണ്ടാവും. പിന്നെ നിങ്ങളുടെ വീടിനടുത്ത് തന്നെയാവുമ്പോൾ അവളെ എപ്പോഴും കാണുകയെങ്കിലും ചെയ്യാലോ..

സാമ്പത്തിക ബുദ്ധിമുട്ടുവരുമ്പോ നിങ്ങൾ ഒന്നു സഹായിച്ചാ മതി, അവര് സന്തോഷത്തോടെ കഴിയുന്നത് നിങ്ങൾക്ക് കാണാം. ചിലപ്പോൾ നിങ്ങളോട് ഒരു പരിഭവവും പറയാതെ അവർ പുതിയ ജീവിതം നിങ്ങൾക്ക് ജീവിച്ചു കാണിച്ചുതരും.. 

പക്ഷേ അങ്ങനെയൊരാളെ സ്വീകരിക്കാനുള്ള മനസ്സ് പല പെൺകുട്ടികൾക്കും ഉണ്ടാവാറില്ല. അവരും ചിന്തിക്കുന്നത് ഭർത്താവ് വല്യ നിലയും വിലയും ഉള്ളവരായിരിക്കണമെന്നാണ്. എങ്കിലേ കൂട്ടുകാരികളും മറ്റും ചോദിക്കുമ്പോൾ ഭർത്താവ് വല്യ ആളാണെന്ന് അവരുടെ മുമ്പിൽ പ്രഹസനം കാണിക്കാൻ ഇവർക്ക് കഴിയൂ, അതുകൊണ്ടുതന്നെയാണ് ഇവരുടെ പ്രശ്നങ്ങളൊന്നും ആരോടും തുറന്നു പറയാതെ ആത്മഹത്യ ചെയ്യുന്നത്. 

ചിലർ ആത്മഹത്യ ചെയ്യുന്നത് മക്കളെയും കൊലപ്പെടുത്തിയ ശേഷമാണ്, അവർ ചെയ്യുന്ന പ്രവർത്തി കണ്ടാൽ തോന്നും കാലന് ഓഫർ കൊടുക്കാനാണെന്ന്. അവരുടെ മരണത്തിന് ഓഫറായി ഒരു കുഞ്ഞിൻ്റെ മരണം കൂടെ അഡീഷനലായി ഫ്രീ കൊടുക്കാണ് കാലന്.

ചതിക്കാത്ത ചന്തു എന്ന സിനിമയിൽ വസുമതി ആത്മഹത്യ ചെയ്യാൻ തുടങ്ങുന്നു. കയറിൽ കുരുക്കിട്ട് തല കുരുക്കി തൂങ്ങാൻ നോക്കുമ്പോഴാണ് പോസ്റ്റുമാൻ കത്തുമായി വരുന്നത്. പെട്ടെന്ന് കത്തു വായിച്ച വസുമതിക്ക് മരിക്കാതിരിക്കാൻ ഒരു കച്ചിത്തുരുമ്പു കിട്ടുന്നു. ആ ഒരു നിമിഷം കഴിഞ്ഞിരുന്നെങ്കിൽ വസുമതി മരിച്ചേനെ…

അതുപോലെ ജീവിക്കാൻ വേണ്ടി ഒന്നു നിങ്ങൾക്കും ശ്രമിച്ചൂടെ, ഒന്നുമില്ലേൽ എഫ്ബിയിൽ ഒരു ഫേക്ക് ഐഡി ഉണ്ടാക്കിയിട്ട് കുറേപ്പേരെ ഫ്രണ്ട്സാക്ക്.. കുറേപ്പേരോട് ചാറ്റ് ചെയ്ത് സംസാരിക്ക്. അതിൽ നിങ്ങൾക്ക് പറ്റിയ ഒരാൾ നിങ്ങൾക്ക് വേണ്ടി ഈ ഭൂമിയിൽ എവിടേലും കാത്തിരുപ്പുണ്ടാവും. 

ഒരാളോട് കുറേക്കാലം ചാറ്റ് ചെയ്യുമ്പോൾ തന്നെ നിങ്ങൾക്ക് അയാളെപ്പറ്റി ഏകദേശം മനസ്സിലാക്കാൻ പറ്റും. ചിലരെ പരിചയപ്പെടുമ്പോൾ അവർ, മോശം വീഡിയോ, പോസ്റ്റുകൾ ഒക്കെ അയച്ച് തരുമായിരിക്കും അവരെ ബ്ലോക്ക് ഇട്ടാൽ തീരുന്ന പ്രശ്നമേ ഉണ്ടാവൂ. നിങ്ങള് ശ്രമിച്ചാൽ നിങ്ങൾക്ക് തന്നെ ഒരാളെ കണ്ടെത്താനാവും. ഒന്നും വേണ്ട നിങ്ങളുടെ പഠനകാലത്ത് നിങ്ങളോട് അടുപ്പം കാണിച്ച ഒരാളെങ്കിലും നിങ്ങളുടെ ജീവിതത്തിൽ ഉണ്ടാവില്ലേ.. നിങ്ങളയാളെ നിഷ്കരുണം തട്ടിയെറിഞ്ഞിട്ടാവും മറ്റൊരു ജിവിതം തിരഞ്ഞെടുത്തത്. അയാളെ കണ്ടെത്തിയാലും നിങ്ങൾക്ക് എല്ലാം തുറന്നു പറയാനും, ചിലപ്പോൾ നിങ്ങൾക്കൊരു ജീവിതവും കിട്ടിയേക്കാം. 

കുടുംബത്തിൻ്റെ മാനവും നോക്കിയിരുന്നാൽ നഷ്ടപ്പെടാൻ നിങ്ങൾക്ക് മാത്രമേ ഉള്ളൂ. നാൽപ്പത്തിയൊന്ന് ചടങ്ങ് കഴിയുന്നതോടെ, നിങ്ങളീപ്പേടിക്കുന്ന കുടുംബക്കാർ നിങ്ങളെ മറക്കും. പിന്നെ നിങ്ങളില്ലാത്തത് കൊണ്ട്, നിങ്ങളുടെ സഹോദരനും സഹോദരിയും വീതം വെയ്ക്കുമ്പോൾ കിട്ടിയേക്കാവുന്ന ലാഭത്തിനെപ്പറ്റി ചിന്തിച്ചു കൊണ്ടിരിക്കും

നിങ്ങൾ മരിക്കുമ്പോൾ മറ്റുള്ളവരുടെ ജീവിതത്തിൽ ഇത്രയേ സംഭവിക്കൂ, 

നിങ്ങൾ മരിച്ചു കഴിഞ്ഞിട്ട് പിന്നീട്, നിങ്ങളുടെ അമ്മ, ‘അയ്യോ, എൻ്റെ കുഞ്ഞിനെ കൊന്നതാണേ, അവളോട് ഭർത്താവിൻ്റെ അച്ഛൻ്റെ കൂടെയും കിടക്കാൻ പറഞ്ഞിട്ടുണ്ടേ, അവൻ എൻ്റെ മോളെ കസേര കൊണ്ട് തല്ലിയേ, അവളുടെ തുണിയില്ലാത്ത ഫോട്ടോ അവൻ എടുത്തേ’ന്ന് പറഞ്ഞ് കരഞ്ഞിട്ടെന്ത് കാര്യം. ഓൺലൈൻ മാധ്യമക്കാർക്ക് പൊടിപ്പും തൊങ്ങലും വെച്ച് വാർത്തയുണ്ടാക്കാൻ മാത്രമായി നിങ്ങളെന്തിന് മരിക്കണം. നിങ്ങളുടെ മരണം കൊണ്ട് ആകെ ലാഭം കിട്ടുന്നത് അവർക്ക് മാത്രമാണ്.

അമ്മമാരോട്, 

നിങ്ങളുടെ മകൾക്ക് ഭർതൃവീട്ടിൽ പറ്റുന്നില്ല എന്നു കണ്ടാൽ എന്തുകൊണ്ടാണ് നിങ്ങളവരെ സ്വന്തം വീട്ടിലേയ്ക്ക് വിളിച്ചു കൊണ്ടുവരാത്തത്. അവർക്ക് മൂന്നുനേരം ഭക്ഷണം കൊടുക്കേണ്ടിവരും എന്നു കരുതിയിട്ടാണോ? അങ്ങനെയെങ്കിൽ മകളുടെ കുഞ്ഞിനെ നിങ്ങൾ നോക്കണം. എന്നിട്ട് മകളോട് എന്തേലും ജോലിക്ക് പോകണം എന്നു പറയണം. മകൾക്ക് വിദ്യാഭ്യാസം കുറവാണെങ്കിൽ വല്ല ഫോട്ടോസ്റ്റാറ്റ് കടയിലെങ്കിലും ജോലി കിട്ടാതിരിക്കില്ല. വീട്ടുജോലി അറിയുന്നവരാണെങ്കിൽ ഒന്നോ രണ്ടോ വീട്ടിൽ പാർട്ട് ടൈം ആയി ജോലിക്ക് പോയാലും സുഖമായി ഒരു കുടുംബത്തിന് ജീവിച്ച് പോവാം.

വെറുതെയെന്തിനാണ് കുടുംബമഹിമയും നോക്കി മക്കളെ കാപാലികൻമാരുടെകൂടെ ജീവിക്കാൻ ഉന്തിത്തള്ളിവിടുന്നത്. കാലം എത്രയേറെ പുരോഗമിച്ചു. സ്ത്രീസംരക്ഷണം നമ്മുടെ കൊച്ചു കേരളത്തിൽ വേണ്ടുവോളമുണ്ടുതാനും. മകളുടെ കെട്ടിയോൻ മകളെ തല്ലുന്നുണ്ടെങ്കിൽ അവരുടെ വീട്ടിൽ പോയി മകൻ്റെ അമ്മയുടെ മോന്തക്ക് ഒന്നു പൊട്ടിച്ചിട്ട് മകളെയും കൂട്ടി വീട്ടിലേക്ക് വരാൻ തയ്യാറാവണം. മകളുടെ ഭർത്താവ് കൊല്ലുമെന്നു പറഞ്ഞ് ഭീഷണിപ്പെടുത്തുന്നുണ്ടെങ്കിൽ, സ്റ്റേഷനിൽ, ഒരു ഗാർഹിക പീഡന പരാതി കൊടുത്താപ്പോരെ. എന്നിട്ട് ഡൈവോഴ്സ് പെറ്റീഷൻ കൊടുക്കണം. ഒരു കൊല്ലത്തിനുള്ളിൽ വിവാഹ മോചനവും കിട്ടും. നിങ്ങൾക്കൊക്കെ വേണ്ടിയല്ലേ ഈ നിയമങ്ങൾ ഉണ്ടാക്കി വെച്ചിരിക്കുന്നത്. മരിച്ചുകഴിഞ്ഞ് വിലപിച്ചിട്ടെന്തു കാര്യം. അതെല്ലാം പോസ്റ്റുകളാക്കി ചിലർക്ക് റീച്ചു കൂട്ടാമെന്നല്ലാതെ മറ്റൊന്നുമിവിടെ സംഭവിക്കാൻ പോകുന്നില്ല. 

നിങ്ങളുടെ മകളുടെ ആത്മഹത്യയ്ക്ക് ഉത്തരവാദി, നിങ്ങൾത്തന്നെയാണ്. അതുകൊണ്ട് ഇങ്ങനെയുള്ള വാർത്തകൾ കേൾക്കുമ്പോൾ പ്രത്യേകിച്ച് സങ്കടമൊന്നും തോന്നുന്നുമില്ല. 

“വിസ്മയ മുതലിപ്പോൾ അതുല്യവരെ എത്തി. എന്നാണ് നിങ്ങൾക്കൊക്കെ ബോധം വരിക. “

“കെട്ടിച്ചു വിട്ട മകൾ തിരിച്ചു വീട്ടിലേയ്ക്ക് തിരിച്ചുവരുമ്പോൾ അവർക്ക്, ഒരു പായ വിരിച്ചിടാനുള്ള സ്ഥലം എപ്പോഴും കരുതിവെയ്ക്കുക. “

✍️ ഷിജിത് പേരാമ്പ്ര

Disclaimer: The viewpoints and opinions expressed in this post are those of the author. They do not necessarily reflect the views of Koottaksharangal.com. Any omissions or errors are the author’s and Koottaksharangal does not assume any liability or responsibility for them.