🌹അവനും, അവളും🌹

“ചേച്ചീ, ഓയ് ഇവിടാരുമില്ലേ?”

കോളിംഗ് ബെൽ അടിച്ചിട്ടും, ആരും ഇറങ്ങി വരാതായപ്പോൾ അവൾ ഉറക്കെ വിളിച്ചു ചോദിച്ചു. വീടിൻ്റെ വാതിൽ തുറക്കാതായപ്പോളവൾ വീടും പരിസരവും ഒന്നു നോക്കി. മുറ്റം നിറയെ അഴകൾ കെട്ടി തുണി വിരിച്ചിട്ടിരിക്കുന്നു വീടിൻ്റെ പുറകു വശത്തുനിന്നും അലക്കുന്ന സ്വരം കേൾക്കാനുമുണ്ട്. അലക്കുന്ന ശബ്ദത്തിൽ താൻ വിളിച്ചത് അവർ കേട്ടു കാണില്ല. അവൾ വീണ്ടും കോളിംഗ് ബെൽ അടിച്ച ശേഷം ഉറക്കെ വിളിച്ചു ചോദിച്ചു.

“ഓയ്, ചേച്ചീ,ചേട്ടാ ഇവിടാരുമില്ലേ?”

അവൾ അൽപ്പനേരം കാത്തു നിന്നിട്ടും ആരും പുറത്തിറങ്ങി വരാതായപ്പോൾ അവൾ മുറ്റത്ത് വെച്ച വലിയ ബാഗ് എടുത്ത് തോളിൽ തൂക്കി. പിന്നീട് ചെറിയ ബാഗ് കയ്യിലെടുത്ത് മുറ്റത്തുനിന്നും വഴിയിലേയ്ക്കിറങ്ങി.

പെട്ടന്നാണ് വരാന്തയിൽ നിന്നും
”ഏയ് , ആരാ എന്തു വേണം എന്ന ചോദ്യം കേട്ടവൾ തിരിഞ്ഞു നോക്കിയത്.

സിറ്റൗട്ടിൽ തല തോർത്തിക്കൊണ്ട് ഒരു യുവാവ് നിൽക്കുന്നതവൾ കണ്ടു. ബർമുഡയും ടീഷർട്ടുമാണ് വേഷം, അവനെ കണ്ടപ്പോൾ അവൾ തിരിച്ച് മുറ്റത്തേയ്ക്കു തന്നെ കയറിക്കൊണ്ടു പറഞ്ഞു.

“അതേയ് ചേട്ടാ, ഞാൻ കുറേ നേരമായി വിളിക്കുന്നു. വീട്ടിലാളില്ലാന്ന് കരുതി ഞാൻ പോവാൻ നോക്കാരുന്നു.

” വിളിച്ചത് കേട്ടില്ല ഞാൻ കുളിക്കായിരുന്നു. അതാ”

“ഇവിടെ സ്ത്രീകളാരുമില്ലേ?”

” ഉണ്ടല്ലോ, അമ്മ അലക്കാണ്, ദേ കണ്ടില്ലേ മുറ്റം നിറയെ തുണികൾ വിരിച്ചിട്ടത്. ഇത്ര നേരം മഴയല്ലാരുന്നോ. മഴയൊന്ന് തോർന്നപ്പോ അമ്മ വേഗം അലക്കാനിറങ്ങിയതാ, അതൊക്കെപ്പോട്ടെ, ഇയാൾ എന്തിനാവന്നേ?”

“ചേട്ടാ, എൻ്റെ ട്രെയിനിംഗിൻ്റ ഭാഗമായി കുറച്ച് പ്രൊഡക്റ്റുകൾ വിൽക്കാൻ വേണ്ടി വന്നതാണ്, ഇത് വിറ്റാൽ ഞങ്ങൾക്ക് മാർക്കും കിട്ടും പിന്നെ പഠിക്കാനായി കുറച്ച് സ്റ്റൈഫൻ്റ് കിട്ടും, അപ്പോ പഠിത്തവും ജോലിയും ആകും”

” ഓ അറിയാം ഇതുപോലെ പലരും വരാറുണ്ടിവിടെ. പണ്ടിതു പോലെ ഒരു കുട്ടിയിവിടെ വന്നതാ, വന്നിട്ട് ‘ദേ ഈ മുറ്റത്തവൾ തല കറങ്ങി വീണു. പെട്ടെന്ന് ഞാനവളെ കോരിയെടുത്ത് ഉമ്മറത്ത് കിടത്തി, അവൾക്കപ്പോൾ കുട്ടിക്കൂറാ പൗഡറിൻ്റെ മണമായിരുന്നു. അമ്മയവളുടെ മുഖത്ത് വെള്ളം തളിച്ചപ്പോളവൾ കണ്ണു തുറന്നു. അമ്മ അവളോട് വീടെവിടെയാണെന്നും മറ്റും ചോദിച്ചു. ആദ്യമൊന്നുമവൾ ഒന്നും പറയാൻ കൂട്ടായില്ല . പിന്നെ അമ്മ നിർബന്ധിച്ചപ്പോൾ അവൾ ഓരോന്ന് പറഞ്ഞു.”

“എന്താ പറഞ്ഞേ”

” അവളുടെ വീട് കോട്ടയത്താണെന്നും, വീട്ടിൽ സുഖമില്ലാത്ത അമ്മയും രണ്ടാനച്ഛനും അനിയത്തിയും ഉണ്ടെന്നും അച്ഛൻ മരിച്ചതാണെന്നും കഷ്ടപ്പാടാണെന്നുമൊക്കെപ്പറഞ്ഞു.  അവള് പൈസയില്ലാത്തോണ്ട് രാവിലെമുതൽ ഒന്നും കഴിച്ചില്ലായിരുന്നു അതാ തല കറങ്ങി വീണത്.”

“ശ്ശൊ എന്നിട്ട്?”

“അമ്മ പെട്ടെന്ന് തന്നെ പൊടിയരിയിട്ട് കഞ്ഞി വെച്ചു കൊടുത്തു. അതും കുടിച്ച് ക്ഷീണം മാറിയിട്ടാ പോയത്. ഞങ്ങളന്ന് കുറച്ച് സാധനവും വാങ്ങി, ഒരഞ്ഞൂറ് രൂപ അമ്മ അവൾക്ക് കൊടുക്കേം ചെയ്തു.”

“പിന്നെ അവൾ ഈ വഴി വന്നിട്ടില്ലേ?”

“ഇടയ്ക്കൊക്കെ വരുമായിരുന്നു. വരുമ്പോഴൊക്കെ ഇവിടുന്നു ഭക്ഷണം കഴിച്ചിട്ടേ പോവൂ. അങ്ങനെ വന്നു വന്ന്, അവളും ഞാനും തമ്മില് ഇഷ്ടത്തിലായി.”
അതു പറഞ്ഞപ്പോൾ അവൻ്റെ മുഖത്ത് ചെറിയൊരു നാണം ദൃശ്യമായി.

” ശ്ശെടാ എന്നിട്ട്?” അവൾ ചിരിച്ചു കൊണ്ട് ചോദിച്ചു.

“എന്നിട്ടെന്താ, ഞങ്ങള് കല്യാണം കഴിക്കാൻ തീരുമാനിച്ചു. രണ്ടു വീട്ടുകാരും കൂടെ എല്ലാം പറഞ്ഞുറപ്പിച്ച് കല്യാണം തീരുമാനിച്ചു. കല്യാണം ഇവിടുത്തെ അമ്പലത്തിൽ വെച്ചായിരുന്നു. ഞങ്ങള് രാവിലെ മുതൽ അമ്പലത്തിൽ കാത്തിരുന്നു. മുഹൂർത്ത സമയമായിട്ടും അവരാരും വന്നില്ല.”

“അയ്യോ അതെന്തുപറ്റി?”

“കല്യാണത്തലേന്ന്. അവളുടെ രണ്ടാനച്ഛൻ അവളെ നശിപ്പിച്ചു. അതിൻ്റെ വിഷമത്തിൽ അവൾ ആത്മഹത്യ ചെയ്തു കളഞ്ഞു. ഇതൊക്കെ പിന്നീടാണ് ഞങ്ങളറിഞ്ഞത്. എനിക്കും അമ്മയ്ക്കും അത് വല്ലാതെ ഷോക്കായിപ്പോയി. അമ്മക്ക് അവളെ അത്രക്കും ഇഷ്ടമായിരുന്നു. ആ സംഭവത്തോടെ അമ്മക്ക് ചെറിയ മാനസിക പ്രശ്നം വന്നു. എന്നാലും വല്യ കുഴപ്പമൊന്നുമില്ല.”

”ശ്ശൊ വല്ലാത്ത കഷ്ടമായിപ്പോയല്ലോ”

” ഇപ്പോ മൂന്നാലു വർഷമായി സംഭവം നടന്നിട്ട് . പിന്നെ തന്നെപ്പോലെ തന്നെയായിരുന്നു അവളും. നിങ്ങള് തമ്മിൽ നല്ല സാമ്യമുണ്ട് നോക്കിക്കേ, അവൻ ഹാളിലെ ചുമരിൽ തൂക്കിയ വലിയ ഫോട്ടോയിലേക്ക് വിരൽ ചൂണ്ടിക്കൊണ്ടു പറഞ്ഞു.”

അവൾ മുറ്റത്തു നിന്നും അകത്തേയ്ക്ക് നോക്കി, ഹാളിൽ വലിയൊരു ഫ്ലക്സ് തൂക്കിയിട്ടിരിക്കുന്നു. അതിൽ വധൂവരൻമാർക്ക് ആശംസയർപ്പിച്ചതിനു മുകളിലായി എഴുതിയ പേരവൾ വായിച്ചു.
യദുകൃഷ്ണൻ വെഡ്സ് നിമ്യമോഹൻ,
ഫ്ലക്സിലെ പെൺകുട്ടിയ്ക്ക് തൻ്റെ മുഖവുമായി നല്ല സാമ്യമുണ്ടന്നവൾക്ക് തോന്നി.

ഹാളിലേയ്ക്ക് എത്തി നോക്കുന്ന തൻ്റെ മുഖത്തേയ്ക്ക് അവൻ്റെ ചുണ്ടുകൾ കൊണ്ടുവരുന്നതായും, തൻ്റെ കയ്യിലവൻ കയറിപ്പിടിച്ചതായും തോന്നിയപ്പോൾ അവൾ അവനെത്തള്ളി മാറ്റി.
“ഛേ, എന്തായിത് എന്ത് തോന്ന്യാസമാ താനീക്കാണിച്ചേ” എന്നും പറഞ്ഞു കൊണ്ടവൾ പെട്ടെന്ന് ബാഗുമെടുത്ത് പുറത്തേയ്ക്കോടി. അവൾ വലിയ ബാഗുകളുമെടുത്ത് പേടിയോടെ തിരിഞ്ഞു നോക്കിക്കൊണ്ട് വേഗം കുന്നിറങ്ങി റോഡിൽച്ചെന്ന് ആദ്യം കണ്ട വീട്ടിലേയ്ക്ക് ഓടിക്കയറി, അവൾ കിതച്ചുകൊണ്ട് കോളിംഗ് ബെല്ല് അടിച്ചു കൊണ്ടിരുന്നു. ബെൽ ശബ്ദം കേട്ട് പുറത്തിറങ്ങി വന്ന സ്ത്രീയോടവൾ കിതച്ചുകൊണ്ട് ചോദിച്ചു.

” ചേച്ചീ,ചേച്ചി ഇവിടുത്തെ പോലീസ്റ്റേഷൻ എവിടാ?”

“പോലീസ് സ്റ്റേഷനോ, എന്നാ പറ്റി മോളേ വല്ലതും കളഞ്ഞ് പോയോ”

” ഒന്നും പോയില്ല. ഞാൻ ട്രെയ്നിംഗ് ൻ്റെ ഭാഗമായി പ്രൊഡക്റ്റ് വിൽക്കാൻ വന്നതാ, അപ്പോ മേലെയുള്ള വീട്ടിൽ ചെന്നപ്പോ അവിടൊരു പയ്യനെക്കണ്ടു. അവൻ എന്നെ കേറിപ്പിടിച്ചു. പിന്നെ ഉമ്മ വെക്കാൻ നോക്കി.”

“മേലെയുള്ള ഏത് വീട്ടില്,

“തൊട്ടുമേലെയുള്ള വീട്ടില്, മുറ്റത്തെ അഴ നിറയെ തുണി വിരിച്ചിട്ടുണ്ട്.

അവർ മുറ്റത്തേയ്ക്കിറങ്ങി വന്നു കൊണ്ട് മേലെ വീട്ടിലേയ്ക്ക് കൈ ചൂണ്ടിക്കൊണ്ടു ചോദിച്ചു.

“ആ വീട്ടിലാണോ?”

” അതെ, ആ വീടു തന്നെ.”

” ആ വീട്ടിലെ പയ്യനാണോ നിന്നെ കേറിപ്പിടിച്ചത്?”

“അതെ. ആ വീട്ടിനകത്തെ ഫ്ലെക്സിൽ അവൻ്റെ ഫോട്ടോയുണ്ട്, യദുകൃഷ്ണൻ ന്നാ പേര്.”

അതു കേട്ടപ്പോൾ അവരൊന്നു പൊട്ടിച്ചിരിച്ചു. എന്നിട്ട് പറഞ്ഞു.

“നീയെന്നതാ കൊച്ചേയീപ്പറയുന്നത്. അവിടുത്തെ ചെക്കൻ ആത്മഹത്യ ചെയ്തിട്ട്, മൂന്നുവർഷായി. അതിൻ്റെ കല്യാണത്തിൻ്റെയന്ന് അവൻ കെട്ടാൻ പോകുന്ന പെണ്ണ് ആത്മഹത്യ ചെയ്തതായിരുന്നു. അതറിഞ്ഞപ്പോൾ അവൻ കല്യാണ വേഷത്തോടെ വന്ന് കുളിമുറിയിൽ കേറി കതകടച്ചു , കൈ ഞരമ്പ് മുറിച്ചാ ആത്മഹത്യ ചെയ്തത്.
അതു നേരിട്ട് കണ്ടപ്പോൾ അവന്റമ്മയ്ക്ക് മാനസിക നില തെറ്റി. അവർക്ക് വട്ടുമായി, അവനന്ന് മരിക്കുമ്പോൾ അവൻ്റെ കല്യാണ ഡ്രസ്സ് മുഴുവൻ ചോരയായിരുന്നു. അതുകണ്ട് വട്ടായിപ്പോയ അവൻ്റെ അമ്മയ്ക്കിപ്പോൾ അവൻ്റെ ഡ്രസ്സുമുഴുവൻ അലക്കി ഉണക്കി വെയ്ക്കലാ പണി. എന്നിട്ടവർ പറയും
‘ചെക്കന് ഒരു ശ്രദ്ധയുമില്ല. ഡ്രസ്സ് മുഴുവൻ ചോരയാന്ന്’

അതും പറഞ്ഞ് അലക്കി മടക്കി വെച്ച ഡ്രസ്സ് പിന്നേം അലക്കും. അവർക്ക് അതിനുതന്നെയേ എപ്പഴും നേരമുള്ളൂ, ആ വീട്ടിലെ പയ്യനാണോ നിന്നെക്കേറിപ്പിടിച്ചു എന്നു പറഞ്ഞ് കേസുകൊടുക്കാൻ പോണത്. പിന്നെ പലരും പറയുന്നത് കേട്ടിട്ടുണ്ട് ആ വീട്ടിലിപ്പോഴും ആ പയ്യൻ്റെ സാന്നിദ്ധ്യമുണ്ടെന്ന്. പിന്നീട് പലരും അവനെ അവിടെ വെച്ച് കണ്ടിട്ടുണ്ട് പോലും”

അവർ പറഞ്ഞതു കേട്ടപ്പോൾ അവൾ ഞെട്ടിത്തരിച്ചിരുന്നു പോയി. എന്നിട്ടവൾ മെല്ലെ ഉമ്മറത്തേയ്ക്കിരുന്നശേഷം കിതച്ചുകൊണ്ട് പരവേശത്തോടെ ചോദിച്ചു.
“എനിക്ക് കുടിക്കാനിത്തിരി വെള്ളം തരുമോ?”

അവളുടെ പരവേശം കണ്ടപ്പോളവർ വെള്ളമെടുക്കാനായി അകത്തേയ്ക്ക് കയറിപ്പോയി.

അൽപ്പസമയത്തിനുള്ളിൽ ഒരു കുപ്പിയിൽ വെള്ളവുമായി അവർ അകത്തു നിന്നും ഇറങ്ങിവന്നു. അവരോട് വെള്ളം വാങ്ങി വെപ്രാളത്തോടെ കുടിക്കുമ്പോൾ, അവൻ കയറിപ്പിടിച്ച കയ്യിൽ നിന്നും കുട്ടിക്കൂറാ പൗഡറിൻ്റെ മണം വരുന്നതായി അവൾക്കു തോന്നി. കുപ്പിയിലെ വെള്ളം പാതിയോളം കുടിച്ചു കഴിഞ്ഞ ശേഷമവൾ തൻ്റെ കൈ മണത്തുനോക്കി. തൻ്റെ കൈക്ക് കുട്ടിക്കൂറാ പൗഡറിൻ്റെ മണമാണെന്നറിഞ്ഞപ്പോൾ , അവൾ ഭീതിയോടെ ചുറ്റും നോക്കി.

അവളുടെ നോട്ടം കണ്ടുകൊണ്ട് ആ വീട്ടിലെ ചേച്ചി അവളോട് ചോദിച്ചു,

” എന്താ മോളേ, എന്താ നീ നോക്കുന്നേ, കുപ്പിവെള്ളത്തിന് വല്ല രുചി വ്യത്യാസമോ, മറ്റോ ഉണ്ടോ?”

“അതല്ല ചേച്ചീ, ഞാൻ വെള്ളം കുടിക്കാൻ നോക്കുമ്പോൾ എൻ്റെ കൈക്കൊരു കുട്ടിക്കൂറാ പൗഡറിൻ്റെ മണം അതെവിടുന്നാന്ന് നോക്കായിരുന്നു.”

വെള്ളത്തിൻ്റെ കുപ്പി അവർക്ക് തിരിച്ചു കൊടുത്ത ശേഷം അവളുടെ വലിയ ബാഗുകൾ തോളിലേറ്റി റോഡിലേക്കിറങ്ങി നടന്നു. അവൾ റോഡിലേയ്ക്കിറങ്ങുമ്പോൾ വീശിയടിച്ച കാറ്റിന് കുട്ടിക്കൂറാ പൗഡറിൻ്റെ സുഗന്ധമാണെന്നവൾ തിരിച്ചറിഞ്ഞു, അവൾ ഇടയ്ക്കിടെ തിരിഞ്ഞു നോക്കിക്കൊണ്ട് ഭീതിയോടെ വേഗത്തിൽ ടൗണിലേയ്ക്ക് നടന്നു.

✍️ ഷിജിത് പേരാമ്പ്ര