🌹എ ഐ കാലൻ🌹

‘ൻ്റെ, സുക്കറണ്ണാ ഇങ്ങള് എഐ.ൽക്കൂടെ എന്ത് ചോദിച്ചാലും “മ്മളെ വിരൽത്തുമ്പിൽ തരുംന്ന് പറഞ്ഞിട്ട്, നമ്മക്കൊന്നും കിട്ടുന്നില്ലാലോ, ങ്ള് ഒരു മാതിരി ഇരട്ടത്താപ്പ് കാണിക്കരുത് ട്ടോ
ങ്ള് ചെലോൽക്ക് വാരിക്കോരി കൊടുക്കുന്നുണ്ടല്ലോ, നമ്മക്ക് മാത്രം തരൂല…

അല്ല അയിന് ഇങ്ങളെ പറഞ്ഞിട്ടും കാര്യം ല്ല , നമ്മളെ വിദ്യാഭ്യാസക്കൂടുതല് കൊണ്ട് നമ്മള് ടൈപ്പ് ചെയ്യുന്നത് ഇങ്ങക്ക് മനസ്സിലാവായിട്ടായിരിക്കും ല്ലേ,

ഇന്നലെ ഞാൻ പോസ്റ്റ് ചെയ്ത കാലൻ്റെ കഥയിലേയ്ക്ക് കാലൻ്റെ എംഐ ഫോട്ടോയ്ക്ക് ഞാൻ വാട്സപ്പിൻ്റെ എ ഐ ല്, കുറേ പ്രാവശ്യം ടൈപ്പ് ചെയ്ത് ചോയ്ച്ച്…

മലയാളത്തിൽ കാലൻ ചോദിച്ചപ്പോ കാലൻ കോഴീടെ പിക് തന്നു. ഇനീപ്പോ മലയാളം ഇങ്ങക്ക് അറിഞ്ഞൂടായിട്ടാന്ന് കരുതി ഞാൻ ഇംഗ്ലീഷിൽ കാലൻ ന്ന് ടൈപ്പ് ചെയ്തിട്ടു..
അപ്പോ എനിക്ക് കാലകേയൻ്റെ ഫോട്ടോ അയച്ച് തന്നു.

ഞാൻ ബാഹുബലീൻ്റെ കഥയല്ല എഴുതിയത് കാലൻ്റെയാ.. അപ്പോ കാലൻ്റെ ഫോട്ടോ തരണ്ടേ മ്മ്ക്ക്..

കാലനെ മൂപ്പർക്ക് പരിചയം കാണില്ലാലോ! മൂപ്പര് സായിപ്പായത് കൊണ്ട് ഓര്ക്കവിടെ ഡ്രാക്കുളയും ഡെവിളുമൊക്കയല്ലേ? അങ്ങനെ വിചാരിച്ച് ഡെവിൾന്ന് ടൈപ്പ് ചെയ്തിട്ടപ്പോൾ, അതാ വരുന്നു പ്രേതത്തിൻ്റെ ഫോട്ടോ. അതോ എച്ച്ഡി ദൃശ്യ മികവോടെ വിത്ത് കോമ്പല്ലും ഇറ്റിവീഴുന്ന ചോരയും, “ഹൗ പേടിച്ചിട്ടിപ്പോ വാട്സപ്പ് തുറക്കാൻ മേല”

ഇനി എന്തേലും പണ്ടാറടങ്ങട്ടെ എന്ന് വിചാരിച്ച് “യമൻ ‘ ടൈപ്പ് ചെയ്തിട്ടു.

അതാ വരുന്നു യമൻ പ്രസിഡൻ്റും നിമിഷ പ്രിയേം. ഓൾടെ വധശിക്ഷ തീരുമാനമാവാത്തോണ്ട് കാലൻ ആ വിവരം അറിഞ്ഞിട്ടു കൂടെയില്ല. അപ്പോഴാണ് യമൻ പ്രസിഡൻ്റിൻ്റെ ഫോട്ടോ…

എനിക്കാണേൽ കാലൻ്റെ ഫോട്ടോ കിട്ടിയേ തീരു. അങ്ങനെ ഞാൻ വേറെ ഒരാളോട് ചോദിച്ച് ഇംഗ്ലീഷിൽ കാലന് എന്താ പറയാന്ന്… അപ്പോ ഓര് പറഞ്ഞ്, യമരാജ് ന്ന് ഇംഗ്ലീഷിൽ ടൈപ്പ് ചെയ്തിട്ടാ മതീന്ന്.
ഞാനപ്പോത്തന്നെ യമരാജ് ന്ന് ടൈപ്പ് ചെയ്ത് അയച്ചു. നോക്കുമ്പോളതാ നല്ല സുന്ദരൻ കാലൻ്റെ ഫോട്ടോ അയച്ച് തരുന്നു.

കാലനെ കണ്ടാൽ നല്ല ഭംഗിയുണ്ട്, കണ്ടാൽ മാവേലിയാണെന്ന് തോന്നും. ഓണമൊക്കെയല്ലേ വരാമ്പോണത് അപ്പോ ഓഫറ് തന്നതാണെന്ന് തോന്നണ്.
ഇത് തലയിൽ കിരീടമില്ല, കൊമ്പില്ല, നല്ല ഐശ്വര്യമുള്ള ഒരു കാലൻ…

“ഹമ്മച്ചീ, എൻ്റെ കാലനങ്ങനല്ലാന്ന് ഈ മറുതായെ ആരേലും ഒന്ന് പറഞ്ഞ് മനസ്സിലാക്കോ?

ഞാൻ പിന്നേം ട്രൈ ചെയ്തപ്പോ വീണ്ടും കാലൻ വന്ന്, പക്ഷേ പിന്നെ വന്നതിൽ കാലൻ മാത്രമേള്ളൂ പോത്തില്ല, ഇനിപ്പോ പോത്തിന് ഇംഗ്ലീഷിൽ എന്താ പറയാന്നറിയാതെ ഞാൻ യമരാജ് വിത്ത് പോത്ത് എന്ന് ഇംഗ്ലീഷിൽ ടൈപ്പ് ചെയ്ത് വിട്ടിട്ടുണ്ട്.

എ ഐ  ൻ്റെ സെർവർ അടിച്ചു പോയോ എന്തോ, ഇതുവരെ മറുപടിയൊന്നും വന്നിട്ടില്ല സൂർത്തുക്കളേ…

” ബൈക്കിൻമേലിരിക്കുന്ന തുമ്പീൻ്റെ ഫോട്ടോ ചോയ്ച്ചാൽ, റോക്കറ്റ് വിടുന്ന
തുമ്പേൻ്റെ ഫോട്ടോ തരുന്ന ഒലക്കമ്മലെ ഒരു എഐ… ”

✍️ ഷിജിത് പേരാമ്പ്ര