ഓണനിലാവ്

ആവണി മാസം പിറന്നു, ഉള്ളിൽ
ഓണ നിലാവ് തെളിഞ്ഞു
പൂവിളി ഉയരുകയായി, എങ്ങും
പൂമണം പൊങ്ങിപ്പരന്നു

ഒരു നവ വധു പോലെ എൻെറ
കൈരളി പൂ ചൂടി നിന്നു
മാനവർ ഒരുപോലെ വാണ
നാളുകൾ ഓർമ്മയിൽ വന്നു

മാവേലി നാടിൻെറ നന്മ, കാതിൽ
ഓണപ്പാട്ടായ് നിറഞ്ഞു
മാനവസ്നേഹം വിടർത്തും
ഓണം മലയാള മണ്ണിലണഞ്ഞു

അത്തം കൺ തുറന്നപ്പോൾ, എങ്ങും
തുമ്പപ്പൂ ചുണ്ടിൽ വിരിഞ്ഞു
പൂവേ പൊലി പൂവേ പാടി
നമ്മൾ പൂക്കളിറുത്തു നടന്നു

പൂമ്പാറ്റ പോലെയലഞ്ഞു, നമ്മൾ
പൂക്കളം മുറ്റത്ത് തീർത്തു
ഊഞ്ഞാലിലാടിക്കളിച്ചൂ, കുട്ടികൾ
ഓണക്കളിയിൽ മുഴുകി

പുളിയില കരമുണ്ടു ചുറ്റി, മങ്കമാർ
കൈകൊട്ടി കളിയാടി എങ്ങും
വള്ളം കളിപ്പാട്ടുയർന്നൂ, ചുണ്ടൻ
വള്ളങ്ങൾ തുഴയാൻ നിരന്നൂ

തിരുവോണം തിരുമുറ്റത്തെത്തും മുമ്പേ
ഉത്രാടപ്പാച്ചിൽ തുടങ്ങി
സദ്യയും കോടിയും വേണം, പിന്നെ
ചേലൊത്ത പൂക്കളം വേണം

പൊന്നിൻ കിരീടവും ചൂടി, കയ്യിൽ
ഓലക്കുടയും എടുത്ത്
മാവേലി മന്നൻ വരുമ്പോൾ
എങ്ങും ആർപ്പു വിളികളുയർന്നൂ

കുടുംബങ്ങൾ ഓന്നായിച്ചേർന്നൂ, നമ്മൾ
നാക്കിലയിൽ സദ്യയുണ്ടൂ
പായസ മധുരം നുണഞ്ഞൂ, ചുണ്ടിൽ
പൂ പുഞ്ചിരികൾ വിടർന്നൂ

ഇനിവരും നാളുകളെല്ലാം, ഓണം
പൂവിടർത്തീടട്ടേ ഉള്ളിൽ
എന്നൊരുപ്രാർത്ഥനയോടെ, നമ്മൾ
ഓണനിലാവിലലിഞ്ഞൂ….

✍️ ഷീജിത്ത്- പിണറായി