തിരുവോണം

ചിങ്ങമാസത്തിലെ തിരുവോണ നാളിനായ്
കാത്തിരിപ്പാണെൻെറ മലനാട്
നല്ലൊരു നാളിൻെറ ഓർമ്മയുമായെൻെറ
മാവേലി അണയുന്ന തിരുനാള്

വർണ്ണപ്പട്ടുടയാട ചുറ്റി നീ ഒരുങ്ങുന്നു
കൈരളീ, കൈകൊട്ടി കളിക്കായി
അത്തം മുതൽ പത്ത് ദിവസങ്ങൾ പൂക്കളാൽ
ഒരുക്കുന്നു മലയാള തിരുമുറ്റം

മലയാള മണ്ണിൻെറ മനമാകെ ഉണരുന്നൂ
തുമ്പപ്പൂ ചിരിതൂകി പൊന്നോണം
പൊന്നിൻ കതിർക്കുല കൊയ്യുവാൻ പോരു നീ
പച്ചപ്പനന്തത്തേ മടിയാതെ

പൂവിളി ഉയരുന്നു പൂക്കൂട നിറയുന്നു
പൂക്കളം തീർക്കുവാൻ ഓടിവായോ
ഉഞ്ഞാലു കെട്ടണം, ഊഴമിട്ടാടണം
ആടിക്കളിച്ചിടാം പൂക്കളെ പോൽ

ഉത്രാടപ്പാച്ചിലും കഴിഞ്ഞിങ്ങു വന്നിട്ട്
കൈകൊട്ടി കളിയങ്ങു തുടങ്ങേണം
ഉത്രാട പൂനിലാ രാത്രിയും കഴിഞ്ഞെന്നാൽ
വരവേൽക്കാം മാവേലി വരവായി

പൂക്കളം തീർക്കണം ആർപ്പു വിളിക്കണം
ആരവമുയരട്ടേ മലനാട്ടിൽ
പൊന്നോണ പാട്ടുകൾ ഈണത്തിൽ ചൊല്ലു നീ
മലയാള നാടിൻെറ കളിതത്തേ

സദ്യയുമൊരുക്കണം നാക്കില മുറിക്കണം
ഇലയിട്ടിട്ടുണ്ണുവാൻ വന്നാട്ടേ
മധുരമാം പായസം ഉണ്ണുമ്പോൾ നിറയട്ടേ
മലയാള മനമാകെ തിരുവോണം

✍️ ഷീജിത്ത്- പിണറായി