🌹ജാക്കിച്ചാൻ🌹

യാത്രക്കാരായ സ്ത്രീകൾ എത്രമാത്രം കഷ്ടത സഹിച്ചാണ് യാത്ര ചെയ്യുന്നുണ്ടാവുക. കഴിഞ്ഞ ദിവസം എനിക്കുണ്ടായ ഒരനുഭവം ഓർത്തപ്പോഴാണ് ഞാനതിനെപ്പറ്റി ചിന്തിച്ചത്. 

പലപ്പോഴും ബസ്സിൽ നിന്നും ഓരോ ഞരമ്പൻമാര്, സ്ത്രീകളെ തോണ്ടിയതും പിടിച്ചതും നോക്കിയതുമൊക്കെ വീഡിയോ സഹിതം അവർ പോസ്റ്റുമ്പോൾ ഞാനത് വല്യ കാര്യമാക്കിയിരുന്നില്ല. സോഷ്യൽ മീഡിയയിൽ ശ്രദ്ധ നേടാൻ അവരുടെ ഓരോ പ്രഹസന പോസ്റ്റായിട്ടേ ഞാനതിനെ കണ്ടിരുന്നുള്ളൂ. പക്ഷേ ഇന്നലെ എനിക്കുണ്ടായ ഒരനുഭവം വെച്ചു നോക്കുമ്പോൾ സ്ത്രീകളൊക്കെ എത്ര മാത്രം അനുഭവിക്കുന്നുണ്ടാവും. 

കഴിഞ്ഞ ദിവസം ഉച്ചക്ക് ഞാൻ വടകരയ്ക്കുള്ള ട്രയിനിൽ കയറി. കയറുന്നതിന് മുമ്പായി ബിരിയാണി തിന്നിട്ടാണ് കയറിയത്. 

“അതെന്താ ബിരിയാണി തിന്നിട്ട് ആരും ട്രയിനിൽ കയറലില്ലേ”ന്ന് നിങ്ങള് ചിന്തിക്കുന്നുണ്ടാവും. പക്ഷേ അതല്ല കാര്യം. 

ബിരിയാണി തിന്നാൽ എനിക്ക് അപ്പോ ഉറക്കം വരും, ശരിക്കും മയങ്ങിപ്പോവും. അതുകൊണ്ട് ആവുന്നതും ഞാൻ ബിരിയാണി കഴിക്കാറില്ല. പക്ഷേ അന്ന് ട്രയിൻ വരാൻ സമയമായത് കൊണ്ടും ഹോട്ടലിൽ ചോറില്ലാത്തത് കൊണ്ടും ബിരിയാണി കഴിക്കേണ്ടിവന്നു. 

അങ്ങനെ ഓടിച്ചെന്ന് ട്രയിനിൽ കേറി, നാലാളിരിക്കുന്ന സീറ്റിൽ അഡ്ജസ്റ്റ് ചെയ്ത് അഞ്ചാമനായി ഞാനും ഇരുന്നു. 

സീറ്റിനറ്റത്ത് താഴെപ്പോവോ ഇല്ലയോ എന്ന മട്ടിലാണ് ഇരുത്തം. കാരണം ഇടയ്ക്ക് രണ്ട് തടിമാടൻമാര് ഇരിക്കുന്നുണ്ട്. അതോണ്ട് ഞാൻ പാതി സീറ്റിലും പാതി വായുവിലുമായി ഇരിക്കുകയാണ്. എനിക്കാണേൽ ഉറക്കം വന്നിട്ട് കണ്ണടഞ്ഞ് പോവുന്ന അവസ്ഥ. 

എന്തായാലും ഞാൻ സീറ്റിൽ ചാരിയിരുന്നതേ എനിക്കോർമ്മയുള്ളു ഞാൻ നല്ല മയക്കത്തിലായി. പക്ഷേ എൻ്റെ തോളിൽ ഒരാള് ചാരി നിൽക്കുന്നത് കൊണ്ട് എനിക്ക് ഉറക്കം ശരിയാവുന്നില്ല. എന്തോ ഒരു അസ്വസ്ഥത. കുറച്ചു കഴിഞ്ഞപ്പോൾ ചാരി നിൽക്കുന്ന ആള് അയാളുടെ അരഭാഗം എൻ്റെ തോളത്ത് അമർത്തുന്നതറിഞ്ഞ് ഞാൻ വേഗം തലയ്ക്ക് കൈയ്യും കൊടുത്ത് കുനിഞ്ഞിരുന്നു. അപ്പോൾ അയാൾ മുന്നോട്ട് നീങ്ങി നിന്ന് വീണ്ടും അരഭാഗം എൻ്റെ കക്ഷത്ത് വെച്ച് അമർത്തുന്നതായി എനിക്ക് തോന്നി. എനിക്കാണേൽ നല്ല മയക്കവും വരുന്നുണ്ട്. പിന്നെ എൻ്റെ തോന്നലാവും എന്നു കരുതി ഞാൻ വീണ്ടും സീറ്റിലേയ്ക്ക് ചാരി.

അപ്പോൾ അയാള് വീണ്ടും വന്ന് എൻ്റെ കക്ഷത്ത് എന്തോ കുത്തിത്തിരുകുന്നതായും, അയാളുടെ ‘ജാക്കിച്ചാൻ ടോണീ ജാ ആവുന്നതും പിന്നീടത് ജെറ്റ്ലിയാവുന്നതും ഞാനറിയുന്നുണ്ടായിരുന്നു. പെട്ടെന്ന് ഞാൻ ഞെട്ടി ഉണർന്ന് നോക്കി. നോക്കുമ്പോൾ ഒരു കെളവൻ അയാളുടെ ഉള്ള ശക്തിയിൽ എൻ്റെ കക്ഷത്ത് കുത്സിത പ്രവർത്തി നടത്തിക്കോണ്ടിരിക്കാണ്. 

ഞാൻ വേഗം എൻ്റെ വലതു കൈ പുറകോട്ട് വളച്ച് എൻ്റെ കഴുത്തിൽ വെച്ചു. അപ്പോൾ എൻ്റെ കൈമുട്ട് അയാളുടെ കീഴ്നാഭിക്ക് നേരെ വന്നു. പെട്ടെന്ന് ഉറക്കം ഞെട്ടിയ പോലെ എൻ്റെ കൈമുട്ടുകൊണ്ട് നാഭിക്ക് ഒരു കുത്തു കൊടുത്തു. അയാള് “ഹയ്യോന്ന് വെച്ചത് എന്തിനാന്ന് ആർക്കും മനസ്സിലായില്ല. പക്ഷേ അയാൾക്കും മനസ്സിലായി, എനിക്കും മനസ്സിലായി. എന്നിട്ട് ഞാനയാളോട് ചോദിച്ചു. 

“നിൻ്റെ സൂക്കേട് തീർന്നോന്ന്”

അയാള് എൻ്റെ മുഖത്തോട്ടൊന്ന് നോക്കി വയറും പൊത്തിപ്പിടിച്ച് വേഗം അടുത്ത കമ്പാർട്ട്മെൻ്റിലേക്ക് ഓടി. എന്താ സംഭവിച്ചതെന്ന് ആർക്കും മനസ്സിലായിട്ടില്ല. അയാൾ പോയതോടെ ഞാൻ നന്നായൊന്നു മയങ്ങി. 

സ്ത്രീകളോട് മോശമായി പെരുമാറിയാൽ അവരത് ഫോണിൽ പിടിച്ച് സോഷ്യൽ മീഡിയ വഴി നാറ്റിക്കും എന്ന് അറിയാവുന്നത് കൊണ്ടാണെന്ന് തോന്നുന്നു. ഇവറ്റോളൊക്കെയിപ്പോൾ പുരുഷൻമാർക്കും സ്വൊയ്ര്യം കൊടുക്കാണ്ടായി. 

എൻ്റെയൊക്കെ അനുഭവം ഇതാണെങ്കിൽ യാത്രക്കാരികളായ സ്ത്രീകളുടെ അനുഭവം എത്ര മാത്രം ദുഷ്ക്കരമായിരിക്കും. വെറുതെയല്ല ചില സ്ത്രീകളെങ്കിലും ഇവരെപ്പോലുള്ളവരുടെ വീഡിയോ എടുത്ത് പോസ്റ്റുചെയ്യുന്നത് സഹികെട്ടിട്ടായിരിക്കും. 

✍️ഷിജിത് പേരാമ്പ്ര

Disclaimer: The viewpoints and opinions expressed in this post are those of the author. They do not necessarily reflect the views of Koottaksharangal.com. Any omissions or errors are the author’s and Koottaksharangal does not assume any liability or responsibility for them.