🌹അലാവുദ്ദീനും അൽഭൂതവും🌹

അങ്ങനെ അലാവുദ്ദീന് അത്ഭുത വിളക്ക് കിട്ടീട്ട് വർഷങ്ങൾ കഴിഞ്ഞു.
അലാവുദ്ദീൻ്റെ എല്ലാ കാര്യങ്ങളും ഭൂതം നടത്തിക്കൊടുത്തു.

ഓന് സുന്ദരിയായ ഭാര്യയുണ്ടായി, കാറായി, വീടായി, ടൗണിൽ അപ്പാർട്ടുമെൻ്റുകളും ജീവിക്കാൻ ഇഷ്ടം പോലെ സ്വത്തുവകകളുമായി. ഓനൊന്നു മൂളുമ്പോൾ തന്നെ ഭൂതം ഓടി വന്ന് ചോദിക്കും. 

”ആലംബനാ, എന്താണ് ഹുസൂർ”

“ഒന്നൂല്ല, ഭൂതമേ, ഞാനൊന്നു മൂളിയതാ, സ്വസ്ഥമായി ഒന്നു മൂളാനും പറ്റില്ലേ?” 

”അതല്ല ഹുസൂർ, അങ്ങ് എന്നെ മോചിപ്പിച്ച ശേഷം അങ്ങയുടെ ഏതാഗ്രഹവും നിറവേറ്റാൻ ഞാൻ സദാ ജാഗ്രതയോടെ ഇരിക്കാണല്ലോ, അപ്പോ എൻ്റെ ശ്രദ്ധമുഴുവൻ അങ്ങയിലാണ്. അതുകൊണ്ടാണ്.”

”എൻ്റെ ഭൂതമേ, കാലം മാറി, ആദ്യം നിൻ്റെയീ ഹുസൂർ എന്നുള്ള വിളി നിർത്ത്. എന്നിട്ട് സാർ എന്നോ ബോസെന്നോ വിളിക്ക്. “

”ശരി, ഹുസൂർ ബോസ്”

“ദേ പിന്നേം ഹുസൂർന്ന്, ഇതിപ്പോ അരി പ്രാഞ്ചിയെന്നുള്ള പേര് മാറ്റാൻ സ്വർണ്ണക്കട നടത്തിയിട്ട്, “മ്മളെ സ്വർണ്ണക്കട നടത്തുന്ന അരിപ്രാഞ്ചി” എന്നു കേൾക്കേണ്ടി വന്നപോലെ പോലെയായല്ലോ”

” സോറി ബോസ്, ഇനി ഞാൻ ബോസ് എന്നു വിളിച്ചോളാം”

“എന്നാ പോയി, കാറു കഴുകി വെയ്ക്ക് എനിക്ക് ലാബിൽ പോണം, ബ്ലഡ് ഒന്ന് ടെസ്റ്റ് ചെയ്യണം, വല്ലാത്ത ക്ഷീണം തോന്നുന്നു.”

“ഏത് കാറാണ് ബോസ്, ബെൻസോ, ഓഡിയോ?”

” ഇന്ന് ബെൻസ് തന്നെ ആയിക്കോട്ടെ
ഞാൻ പോയി റെഡ്യായിട്ട് വരാം. “

അലാവുദ്ദീൻ റെഡിയായിട്ട് വരുമ്പോഴേയ്ക്കും മുറ്റത്ത് ബെൻസ് കാറ് കഴുകി വൃത്തിയായി വെച്ചിട്ടുണ്ടായിരുന്നു. അലാവുദ്ദീൻ ബെൻസിൽ കയറിയിരിക്കുമ്പോഴേയ്ക്കും ഭൂതം ഡോർ തുറന്ന് ബായ്ക്ക് സീറ്റിൽ കയറിയിരുന്നു കഴിഞ്ഞിരുന്നു.
അതു കണ്ടപ്പോൾ അലാവുദ്ദീൻ ചോദിച്ചു. 

“ബ്ലഡ്, ടെസ്റ്റ് ചെയ്യേണ്ടത് എനിക്കല്ലേ. നീയെന്തിനാ വരുന്നത്?”

” ബോസ് എവിടെപ്പോയാലും ഞാനും വരും. ബോസ് എന്നെ രക്ഷിച്ച ആളല്ലേ,
ഇനിയിപ്പോ, ബോസിന് ലാബിൽ എന്തേലും ആവശ്യം വന്നാലോ?”

” എൻ്റെ ഭൂതമേ, ലാബിൽ നിന്നെക്കൊണ്ട് എന്താവശ്യമാണ്. മൂത്രം പരിശോധിക്കാൻ മൂത്രമെടുക്കാൻ പോവുമ്പോൾ ബോട്ടില് പിടിച്ച് തരാനോ”

“വേണേൽ അതും ചെയ്യാം ബോസ്”

” നീ സഹായിച്ച്, സഹായിച്ച് എന്നെയൊന്ന് മുള്ളാൻ പോലും സമ്മയ്ക്കൂലേടേ”

” അതല്ല ബോസ്, എനിക്ക് എപ്പോഴും നിങ്ങളെ സഹായിച്ചേ പറ്റൂ, അതുകൊണ്ടാണ് “

“നിന്നെക്കൊണ്ട് ഒരു സൊയ്ര്യോം ഇല്ലാലോ ഭൂതമേ, എന്നാ മിണ്ടാതെ അവിടിരുന്നോ”

അലാവുദ്ദീൻ ലാബിലേക്ക് പോയി ടെസ്റ്റുകളെല്ലാം നടത്തി, ടെസ്റ്റ് റിസൽട്ട് നോക്കിയ ലാബിലെ പെണ്ണ് അലാവുദ്ദീനോട് പറഞ്ഞു. 

” നിങ്ങൾക്ക് ഷുഗറും കൊളസ്ട്രോളും ബിപിയും, എന്നു വേണ്ട സകലതും കൂടുതലാ, എസ് ജി പി ടിയൊക്കെ കൂടി ഹൈ ലെവലായായി, കരളിൻ്റെ തൊണ്ണൂറു ശതമാനത്തോളം ഡാമേജായിരിക്കാണ്, ക്രിയാറ്റിൻ്റെ കാര്യമൊക്കെ വളരെ അബദ്ധത്തിലാണ്. കിഡ്നി ഇന്നോ നാളെയോ ചാവും എന്ന സ്ഥിതിയിലാണിപ്പോ ഉള്ളത്. “

അത് കേട്ടപ്പോൾ അലാവുദ്ദീൻ നെഞ്ചത്തടിച്ചു കൊണ്ട് പറഞ്ഞു. 

“ഹെൻ്റെ, ബദരീങ്ങളെ, ഞമ്മള് മയ്യത്താവാനായോ?”

” ഇങ്ങനെ പോയാൽ ഉടനെ മയ്യത്താവും, ഇക്കായ്ക്ക് എന്താണ് ജോലി. “

“എനിക്ക് ഒരു ജോലിയുമില്ല മോളേ, തിന്ന്വാ ഒറങ്ങാ, തിന്ന്വാ ഒറങ്ങാ ഇതുതന്നെയാ ജോലി, ഒരു പണീം ചെയ്യണ്ട”

“അത് തന്നെയാ കൊഴപ്പം, മേലനങ്ങി പണി ചെയ്യണം അല്ലേൽ ഇതുപോലെ അസുഖം വരും. “

“അയിന് എന്നെ എന്തേലും പണിയെടുക്കാൻ ആ ഹമ്ക്ക് സമ്മയ്ക്കണ്ടേ?”

” ആര്, ങ്ളെ ബീവിയോ?”

“ബീവിയല്ല. ആ ഭൂതം”

“ങ്ഹേ, ഭൂതമോ, അതെന്ത് സംഭവം?”

” അത് ഒരു സംഭവമാണ് മോളേ,
ഒരിക്കൽ ഞാൻ കടപ്പുറത്തൂടെ തെണ്ടിത്തിരിഞ്ഞ് നടക്കുമ്പോ എനിക്കൊരു വിളക്ക് കിട്ടി, ഞാനത് സ്വർണ്ണമാണോന്നറിയാൻ ഉരച്ച് നോക്കി. അപ്പോ അതിൻ്റെ മൂടി തുറന്ന് പോയി അതിൽ നിന്നും ഒരു ഭൂതം ഇറങ്ങി വന്നു. “

“ങ്ഹാ എന്നിട്ട്?” 

പിന്നീടുള്ള കഥകൾ മുഴുവൻ അലാവുദ്ദീൻ ആ പെണ്ണിനോട് പറഞ്ഞു കൊണ്ടിരുന്നു.
“ഇപ്പോ ഞാൻ കുളിക്കാൻ കേറിയാൽ കുനിഞ്ഞ് ഒരു കപ്പ് വെള്ളമെടുക്കാൻ നോക്കുമ്പോഴേയ്ക്കും ഭൂതം വന്ന് വെള്ളമെടുത്ത് എൻ്റെ ദേഹത്ത് ഒഴിച്ചു കഴിഞ്ഞിട്ടുണ്ടാവും, അതോണ്ട് ഒരു പണീം ചെയ്യാൻ ഭൂതം സമ്മയ്ക്കില്ല. അതാ പ്രശ്നം. അങ്ങനെ ഒരു പണീം ചെയ്യാതെയാ ഞാനിങ്ങനെ തടിച്ചതും ഷുഗറും ബിപിയും എല്ലാം കൂടിയതും. “

” ശ്ശെടാ ഇത് വല്യ പ്രശ്നമാണല്ലോ, എന്നാപ്പിന്നെ ഭൂതത്തിനെ പറഞ്ഞു വിട്ടൂടെ?”

“അതിനത് പോവണ്ടേ, അവനെൻ്റെ ഭൃത്യനാണുപോലും, മരണം വരെ എൻ്റെ കൂടെ ഉണ്ടാവുംന്നാ പറയുന്നേ. “

“ഭൂതത്തിന് മരണമില്ല. പക്ഷേ നിങ്ങള് മരിച്ചു പോവും, അതുകൊണ്ട് ഭൂതത്തിനെ ഒഴിവാക്കുന്നതാ ബുദ്ധി. “

“എങ്ങനെയാ മോളേ, ഭൂതം പോവണ്ടേ ഞാൻ എത്ര പ്രാവശ്യം പറഞ്ഞാ, അത് പോണില്ല. ഭൂതത്തിനെക്കൊണ്ട് ചെയ്യാൻ പറ്റാത്ത ഒരു കാര്യം ചെയ്യിച്ചാലേ പോവുന്നാ പറയണത്.” 

“എന്നാ ഞാനൊരു കാര്യം പറയാം. ഞാൻ പറയുന്ന കാര്യം ഭൂതത്തിനെ കൊണ്ട് ചെയ്യിക്കാൻ പറ്റോന്ന് നോക്ക്”

”എന്നാ പറ മോളേ, ചെവീൽ പറഞ്ഞാ മതി. ഭൂതം ലാബിന് പുറത്തെ ചില്ലിൽക്കൂടെ എന്നെ നോക്കുന്നുണ്ട്. “

അവൾ അലാവുദ്ദീൻ്റെ ചെവിയിലത് സ്വകാര്യമായി പറഞ്ഞു. അതു കേട്ട് അലാവുദ്ദീൻ തലയാട്ടിക്കൊണ്ട് ലാബിലെ ബില്ലും അടച്ച് പുറത്തേയ്ക്ക് നടന്നു. 

അലാവുദ്ദീനും ഭൂതവും വീട്ടിലെത്തി. അലാവുദ്ദീൻ ഭൂതത്തോട് പറഞ്ഞു. 

” ഭൂതമേ, ഒരു പണിയും ചെയ്യാതെ ഇങ്ങനെ ഇരുന്ന് എൻ്റെ ശരീരം മൊത്തം പോയി. ഷുഗറും കൊളസ്ട്രോളും. ബിപിയും എല്ലാം വളരെ കൂടുതലാണ്. “

“അയിന്?”

” അയിന് ഞാൻ മയ്യത്തായിപ്പോവും ന്ന്,
എന്നെ ഒരു പണിയും ചെയ്യാൻ നീ സമ്മയ്ക്കൂലാലോ?”

” അത്, ഞാൻ ബോസിൻ്റെ അടിമയായിപ്പോയല്ലോ, അപ്പോ ബോസിൻ്റെ എല്ലാക്കാര്യവും നടത്തിത്തരാൻ ഞാൻ ബാധ്യസ്ഥനല്ലേ?”

” എന്നാ നീയൊരു കാര്യം ചെയ്യ്. എൻ്റെ നഖമെല്ലാം വെട്ടാനായി, നീയാ നഖം വെട്ടി ഒന്നു കണ്ടുപിടിച്ചു കൊണ്ടു വാ, പുതിയത് വേണ്ടാ, ഇവിടുള്ളത് തപ്പിപ്പിടിച്ച് കൊണ്ടുവന്നാ മതി. “

“ഹെൻ്റെ ഹുസൂർ ഇതൊരു മാതിരി ഒലക്കമ്മലെ പണിയായിപ്പോയി. “

അന്നുമുതൽ അൽഭൂതം നഖം വെട്ടി തപ്പാൻ തുടങ്ങിയതാ. അവസാനം നഖം വെട്ടി കണ്ടെടുക്കാൻ കഴിയാതെ കിട്ടിയ വിലയ്ക്ക് വിളക്കും വിറ്റ് ആ പണവുമായി അറേബ്യയ്ക്ക് നാടുവിട്ടൂന്നാ കരക്കമ്പി, 

✍️ ഷിജിത് പേരാമ്പ്ര