പേടിയോടും കൂട്ടുകൂടാം – ഹാലോവീൻ

‘ഭയം’ ഒരു സുഖമുള്ള ഏർപ്പാടല്ല, എന്നാൽ അതിനെയങ്ങു സ്നേഹിച്ചു മെരുക്കിയാലോ എന്നാണ് ‘Halloween’ തിയ്യറി. ഒക്ടോബർ 31 നു വൈകുന്നേരം Halloween Eve ആഘോഷിക്കുന്നു.

ഭൂതം, പ്രേത്രം, പിശാച്, യക്ഷി, കുട്ടിപ്രേതം, അസ്ഥികൂടങ്ങൾ ‘ഇജ്ജാതി ടീമ്സ് ‘, കഠാര വലിച്ചൂരിയും ചോര ഇററിച്ചും മിന്നി കത്തിയും ആളെ പേടിപ്പിക്കാൻ വീട്ടിൽ വരുന്ന ദിവസം, അതാണ്‌ Halloween.

ഹലോവീൻ ചരിത്രം :
ഇൻഡോ -യൂറോപ്യൻ വിഭാഗമായ celtic വിഭാഗം, അവരുടെ വിളവെടുപ്പ് ഉൽസവമായി കരുതുന്നു. ‘Pagan culture’ ന്റെ തുടർച്ചയായിരുന്നു ഈ ആഘോഷം. അയർലണ്ടിൽ തുടങ്ങി സ്കോട്ടീഷ്, ഇംഗ്ലീഷ് രാജ്യങ്ങളിൽ പതിനാറാം നൂറ്റാണ്ട് മുതൽ ഈ ആഘോഷമുണ്ട്‌. പത്തൊമ്പതാം നൂറ്റാണ്ടിൽ കുടിയേറ്റകാരിലൂടെ അത് അമേരിക്കയിലും കാനഡയിലുമെത്തി. ഇപ്പോൾ ലോകമെമ്പാടും വ്യാപകമായി.

ശിശിരത്തിൽ ഇലകൾ നിറം മാറി പ്രകൃതി സുന്ദരിയായി അണിങ്ങൊരുങ്ങി, അടുത്ത മഞ്ഞുകാലത്തിനു തയ്യാറെടുക്കും മുൻപ് ഒരാഘോഷം, പ്രത്യേകിച്ചും കുട്ടികൾ ഇത്രയേറെ ആസ്വദിക്കുന്ന ഒരു വൈകുന്നേരം വേറെയില്ല.

മരിച്ച ആത്മാക്കളുടെ ദിനമായ നവംബർ ഒന്നിന്റെ വിജിൽ (vigil ) ആയും പറയപ്പെടുന്നു. മരിച്ചവർ അന്ന് തിരിച്ചു പ്രിയപ്പെട്ടവരെ കാണാൻ എത്തും എന്നൊരു (അന്ധ)വിശ്വാസവും ഉണ്ട്‌. സന്ധ്യക്ക്‌ തീക്കൂട്ടിയും (bonfire ), മത്തങ്ങ വിളക്കുകൾ തൂക്കിയും ‘hallows ‘ (മരിച്ചവരെയും, saints നേയും) സ്വാഗതം ചെയ്യുന്നു. ക്രിസ്ത്യൻ വിശ്വാസത്തിലെ മരിച്ചവരുടെ ദിനത്തിന്റെ (നവംബർ ഒന്ന്) തലേദിവസമാണിത്.

മനുഷ്യർക്ക് ഉപദ്രവം ചെയ്യുന്ന സാത്താനേയും ഭൂതങ്ങളേയും ദുഷ്ടയക്ഷികളേയും അവരുടെ വേഷം കെട്ടി മുഖംമൂടിയും വെച്ചു കളിയാക്കാൻ ഒരു ദിവസം കൂടിയാണിത്. ആകെ ചമ്മി നാശമാകുമ്പോൾ അവരൊന്നും വന്നു കുഞ്ഞുങ്ങളെ ഉപദ്രവിക്കില്ല എന്ന കുട്ടിക്കഥകൾ ഈ ജെൻ z പിള്ളേർ വിശ്വസിക്കുമോ, എന്തോ?

അയർലണ്ടിലെ ഒരു രീതിയായിരുന്നു വീടുകളിൽ, ചെറിയ രീതിയിൽ പാട്ടും നൃത്തവും അവതരിപ്പിച്ചു മധുരപലഹാരങ്ങൾ പ്രതിഫലമായി വാങ്ങുക എന്നത്. അത് പോലെ ‘trick or treat ‘, ചോദിച്ചു ചെറിയ സഞ്ചികളുമായി അന്ന് വൈകുന്നേരമെത്തുന്ന കുട്ടികൾക്ക് കാൻഡി (മധുരം) നൽകിയവരെ സന്തോഷിപ്പിച്ചു വിടും. മിക്കവർക്കും ഒരു ചെറിയ സഞ്ചി നിറയാനുള്ളത്ര മിഠായികൾ ലഭിക്കും.

മുറ്റം പാവകൾ കൊണ്ടും മത്തങ്ങ വെച്ചും അലങ്കരിക്കും. അവിടെയും ചെന്നായും വേട്ടനായും കരടിയും ഭീതി പരത്തി ചിലപ്പോൾ സ്ഥലം പിടിക്കും. നാട്ടിൽ ഓണപൂക്കളങ്ങൾ ഒരുക്കുന്ന പോലെ വീടിന്റെ മുന്നിലുള്ള പുൽത്തകിടികൾ ഒരു വേറിട്ട കാഴ്ചയായി മാറും. ഒരു മാസം മുൻപ് തന്നെ കടകളിലെ അലമാരകൾ ഈ ഡെക്കറേഷൻ സാധനങ്ങൾ കൈയേറി തുടങ്ങുന്നു.

Pumpkin carving, കുട്ടികളും മുതിർന്നവരും ഒരു പോലെ ആവേശത്തോടെ ആസ്വദിക്കുന്നു. പലയിടത്തും ഇതൊരു മത്സരമായി നടത്തുന്നു. കണ്ണുകളും വായും മത്തങ്ങയിൽ കൊത്തിയെടുത്ത് ഒരു ചിരിക്കുട്ടനായി മത്തങ്ങയെ മാറ്റും. വീട്ടുമുറ്റത്തും കടകളിലും ജോലിസ്ഥലത്തും ‘അലങ്കാര ഹലോവീൻ കാഴ്ചകൾ’ മൊത്തത്തിൽ ഒരുത്സവപ്രതീതി ഉണർത്തും.

മരിച്ചുപോയവരിൽ കുഞ്ഞുങ്ങളേയും ഈ ദിവസം മറക്കുന്നില്ല. പലതരം അലങ്കരിച്ച പാവകളും ഇതിനിടയിൽ സ്ഥലം പിടിക്കുന്നു. സ്വർണ്ണനിറമുള്ള മുടിക്ക് പകരം കച്ചിയും, ചോളച്ചരടും കോർത്തു മെടഞ്ഞു വെക്കും. നീല കണ്ണുള്ള കുട്ടി പ്രേതങ്ങൾ വളരെ സൗമ്യരാണ് എന്ന് മാത്രം.

പേടിപ്പിക്കുന്ന ചിത്രങ്ങളും കഥകളും കാണുക, പറയുക, ഉച്ചത്തിൽ അലറി വിളിച്ചും ഒളിയിടങ്ങളിൽ നിന്നും പെട്ടെന്ന് അലറി ഇറങ്ങിയും പേടിപ്പിക്കുക ഇതൊക്കെ ഈ അവസരത്തിൽ വിനോദമായെടുക്കും. വെള്ളയും കറുപ്പും ചോരചുവപ്പും നിറങ്ങളിൽ കുളിച്ച ഒരു പ്രേതലോകം സൃഷ്ടിച്ചുള്ള ആഘോഷം ലോകത്തിൽ ഇതു മാത്രമാണ്. സെമിത്തേരിയും അടയാളഫലകങ്ങളും എവിടെയും ഒരുക്കിവെക്കും. ഇതാണല്ലോ ഈ കക്ഷികളുടെ വിഹാരരംഗം.

ഭയത്തിന്റെ സന്ദേശവാഹകരായി വവ്വാലും ചിലന്തിയും മാറാലയും പ്രാണികളും(ബഗ്സ്)  ഈ spooky അലങ്കാരത്തിൽ പറന്നു നിൽക്കും. കയറുകൾ കൂട്ടിക്കെട്ടി ചിലന്തിവലകളുടെ രൂപത്തിലാക്കി മുററങ്ങളിൽ വിരിച്ചിടും. വവ്വാലുകൾ പറക്കാത്ത അപസർപ്പക കഥകളില്ലല്ലോ. മൊത്തത്തിൽ ഒരു ‘കോട്ടയം പുഷ്പനാഥുസ്റ്റൈൽ’ സെറ്റപ്പാണ്.

ഹലോവീൻ costume വാങ്ങാൻ കുട്ടികൾ കടകൾ കയറിയിറങ്ങും. കീശ കാലിയാക്കുന്ന പരിപാടിയാണെന്ന് മാതാപിതാക്കൾ പരിതപിക്കുമെങ്കിലും പുത്തൻ തലമുറ തങ്ങളുടെ അവകാശങ്ങൾ നേടിയെടുത്തിരിക്കും. ഹാലോവീൻ ഉടുപ്പുകളിൽ എന്തെല്ലാം പുതുമ കൊണ്ടുവരാം എന്നു ഗവേഷണം നടത്തി, കോസ്റ്റ്യൂം മോടിപിടിപ്പിക്കുന്ന വിരുതന്മാരുമുണ്ട്. സ്കൂളിലെ ഹാലോവീൻ ആഘോഷങ്ങളിൽ ഇത്തരക്കാർ തിളങ്ങി നിൽക്കും.

ഈ സീസണിൽ, ഉഷാറാകുന്ന മത്തൻ കച്ചവടത്തിന് ഫാമുകളിൽ ധാരാളം വിളയിച്ചിടും. ആഘോഷപ്പിറ്റേന്ന് ഇതിൽ ചില മത്തങ്ങകൾക്ക് മധുരമുള്ള pumpkin pie ആകാനുള്ള സൗഭാഗ്യം ലഭിക്കും. ആ ഭാഗ്യം കിട്ടാത്തവർ ഓർഗാനിക്ക് വേസ്റ്റ് മത്തനാകും. എന്താ ചെയ്യാ, അതിന്റെ തലവര അങ്ങനെയായി !

ക്രിസ്തുമസ്സിന് നക്ഷത്രം സിംബൽ ആകുന്ന പോലെയാണ് ഹലോവീനു മത്തങ്ങ. എവിടേയും ഇളം ഓറഞ്ചു നിറത്തിലുള്ള മുഖരൂപം കൊത്തിയ മത്തങ്ങകൾ നിരന്നു നിൽക്കുന്ന കാഴ്ച ഹലോവീൻ ഫീലുണ്ടാക്കും. ചുരുക്കത്തിൽ മത്തങ്ങയാണ് സീസണിലെ ‘താരം’. ഇതിൽ വിളക്ക് (ലൈറ്റ്) തെളിയിച്ചു വീടിന് മുന്നിൽ തൂക്കിയിടും. വെളിച്ചം കത്തിക്കുന്ന വീടുകളിൽ മാത്രമെ കുട്ടികൾ വാതിലിൽ മുട്ടുകയുള്ളൂ. ആഘോഷത്തിൽ താൽപര്യമില്ലാത്തവരെ പിള്ളേർസെറ്റ് ശല്യപ്പെടുത്താതെ കടന്നുപോകും.

ചെറിയ തുണി സഞ്ചികളുമായി ഹാലോവീൻ ഉടുപ്പിട്ട് മേക്കപ്പുമായി സന്ധ്യ മുതൽ പാതിരാത്രി വരെ നിരത്തുകളിൽ കുട്ടിക്കൂട്ടങ്ങൾ നടന്നുനീങ്ങും. Trick or treat ചോദിച്ചെത്തുന്ന കുട്ടികൾക്ക് കൈ നിറയെ ചോക്ക്‌ലേറ്റ് കൊടുത്തു സന്തോഷിപ്പിച്ചു വിട്ടു ഹാലോവീൻ ആഘോഷം കൊഴുപ്പിക്കാൻ സൗഹൃദ മനോഭാവമുള്ള ഇവിടത്തെ ജനത ശ്രമിക്കാറുണ്ട്.

‘Happy Halloween’

#Halloween.