ജീവിതം: ഒരു കണക്കെടുപ്പ്.

വർഷങ്ങൾ പോയതറിയാതെ വീണ്ടുമീ

ജീവിതവർഷക്കണക്കു ഞാൻ നോക്കവേ,

“തുള്ളിയ്ക്കൊരു കുടം” പോലെ തുടർച്ചയായ്

തള്ളിവരുന്നിതാ “ഓർമ്മ വർഷം”, സഖേ!

നിത്യം നടത്തുന്ന ജീവിതയുദ്ധത്തിൽ

സത്യം പഠിച്ചു ഞാൻ, കൊടുത്തതു താൻ കിട്ടും !

മായൂരപിഞ്ചരം മാറി വീശുന്നൊരീ ലോകം

മയക്കും കലർപ്പു വർണ്ണങ്ങളാൽ!

തെറ്റോ ശരിയോ, തിരിച്ചറിയാതെ ഞാൻ

തെറ്റിൽ ശരിയും തിരിച്ചും കണ്ടസ്വസ്ഥൻ !

താളം, ശ്രുതി ചേരും ജീവനസംഗീതം,

താളവട്ടം തീർക്കും ശ്രുതിഭംഗമെന്നിയേ !

പഞ്ചവാദ്യം പോലെ, താളധ്വനി പോലെ,

സഞ്ചിത ശബ്ദമൌനങ്ങളാഘോഷം !

വർഷങ്ങൾ പോയ്, വേനൽ മാറീ, വൃഷ്ട്ടിയായ്

കഷ്ടങ്ങൾ പോയ്, ഇഷ്ട വർഷമായ് ജീവിതം !

ജീവിതമാം നദീനീരൊഴുക്കിൽ നിന്നു ഞാൻ പിടിച്ചുവച്ചതോ – തിളക്കം, ഇറ്റാർദ്രത !

– ഡോ പരമേശ്വരൻ കെ.