🌹കുമിളകൾ🌹

“എന്തൊക്കെപ്പറഞ്ഞാലും ഗിരീ, മോള് ഗിരിയെ പപ്പാന്ന് വിളിച്ച് അംഗീകരിക്കാതെ എനിക്ക് ഗിരിയെ ഉൾക്കൊള്ളാനാവില്ല ഗിരീ, അത് ഗിരിയേ ഇഷ്ടമില്ലാഞ്ഞിട്ടല്ല, ഒരുപാട് ഇഷ്ടാണ്, അവൾക്കിപ്പോ നാലു വയസ്സായി. അവൾ എന്ന് ഗിരിയെ പപ്പാന്ന് വിളിക്കുന്നോ, അന്ന് നമ്മൾ ഒന്നാവും പോരേ. “

”മതി, അല്ലേലും നിൻ്റെ വാശിയാണല്ലോ എപ്പോഴും ജയിച്ചിട്ടുള്ളത്. “

“ഇതിൽ ജയവും തോൽവിയും ഇല്ല ഗിരി, എനിക്കെല്ലാം എൻ്റെ മോളാണ്, അവളാണെൻ്റെ ലോകം, അവളെ കഴിഞ്ഞേ ഈ ഭൂമിയിൽ എനിക്കാരുമുള്ളൂ, എന്തുമുള്ളൂ. അതാണ്. വീട്ടുകാരെ വെറുപ്പിച്ച് ഒരുത്തൻ്റെ കൂടെ ഇറങ്ങിപ്പോയതാ, ഏത് നേരത്താണോ എനിക്കാ ദുർബുദ്ധി തോന്നിയത്. ഇങ്ങനെ ടോക്സിക്കായ ഒരു മനുഷ്യൻ, പോരാത്തതിന് സംശയ രോഗവും. ഫ്ലാറ്റിൽന്ന് ഇറങ്ങിയാൽ ഗെയിറ്റിൽ നിൽക്കുന്ന സെക്യൂരിറ്റി ചേട്ടനെ വരെ സംശയമാണ്. അതുകാരണം ഞാൻ ഫ്ലാറ്റിനു പുറത്തുപോകാതെ രണ്ടു വർഷത്തോളം ജീവിച്ചു. മോളും ഞാനും ഫ്ലാറ്റിനുള്ളിൽ ഇരുപത്തിനാലു മണിക്കൂറും പുറംലോകം കാണാതെ ജീവിക്കായിരുന്നു രണ്ടു വർഷം. പിന്നെ തീരെ പിടിച്ചു നിൽക്കാൻ കഴിയില്ലാന്ന് തോന്നിയപ്പോഴാണ് അങ്ങേരോട് ഗുഡ് ബൈ പറഞ്ഞിറങ്ങിയത്. ഇപ്പോ ഒരു വർഷായി ഡൈവോഴ്സ് ആയിട്ട്, ഇപ്പോ ജീവിതത്തിൽ എന്ത് സമാധാനം ഉണ്ടെന്നറിയോ? ഞങ്ങൾക്ക് രണ്ടു പേർക്കും ഫ്ലാറ്റിൽ നിന്ന് ഡാൻസ് കളിക്കാം, പാട്ടു പാടാം, ഉറക്കെ ചിരിക്കാം, തോന്നുമ്പോ സിനിമക്ക് പോകാം, പാർക്കിലും ബീച്ചിലും പോവാം. ഒരുപാട് സ്വാതന്ത്ര്യമുണ്ട്. “

” ഒക്കെ ശരിയാ ഇതിനിടയ്ക്ക് നിനക്ക് എന്നെ വേണ്ടേ?”

” നിന്നെ വേണ്ടാന്ന് ഞാൻ പറഞ്ഞോ ഗിരീ? നീയാണിപ്പോ എൻ്റെ ലോകം യഥാർത്ഥ പ്രണയമെന്താണെന്നും അതിൻ്റെ ലഹരിയെന്താണെന്നും
ഞാനിപ്പോഴാണറിയുന്നത്. “

“കുറച്ചു മുന്നേ മോളാണ് നിൻ്റെ ലോകമെന്നു പറഞ്ഞതോ?”

“ങ്ഹാ, അത് മറ്റൊരു ലോകം” ഹരിത ചിരിച്ചു കൊണ്ടു പറഞ്ഞു. 

“എടീ, നിനക്കറിയാലോ ചെറുപ്പത്തിലേ എൻ്റെ അച്ഛനും അമ്മയും മരിച്ചു പോയതാ. പിന്നെ ചെറിയച്ഛൻമാരുടെ വീട്ടിലും മാമൻമാരുടെ വീട്ടിലുമായിട്ടാ ഞാൻ ജീവിച്ചത്. കുത്തുവാക്കുകളും ശാപങ്ങളുമെല്ലാം കേട്ടു കേട്ടാണ് ഞാൻ വളർന്നത്. പഠിക്കാൻ മിടുക്കനായത് കൊണ്ട് പെട്ടെന്ന് തന്നെ ജോലി കിട്ടി. ജോലിയായപ്പോൾ തന്നെ ഞാൻ അവിടം വിട്ടു ഇവിടെ ഫ്ലാറ്റെടുത്ത് താമസം തുടങ്ങി. നീ പറഞ്ഞ സ്വാതന്ത്ര്യമൊക്കെ ഞാനും ഇപ്പോഴാഅനുഭവിക്കുന്നത് കുറ്റപ്പെടുത്താനോ, ശപിക്കാനോ കുടുംബക്കാരാരുമില്ല. പിന്നെ ഒറ്റയ്ക്കാണല്ലോന്നുള്ള സങ്കടമായിരുന്നു ഇത്രയും കാലം, നിന്നെ കിട്ടിയതോടെ ആ സങ്കടവും തീർന്നു. ഇപ്പോ ഞാൻ ഹാപ്പിയാണ്. നീ പറഞ്ഞപോലെ നീയും മോളും അതാണിപ്പോ എൻ്റെ ലോകം., നിങ്ങളില്ലാതെ എനിക്ക് വയ്യടീ, അതെന്താ നീ മനസ്സിലാക്കാത്തേ?”

“എനിക്ക് മനസ്സിലാവുന്നുണ്ട് ഗിരീ, ദേ ഇപ്പഴും മോള് നിൻ്റെ മടിയിലല്ലേ ഉള്ളത്. ശരിക്കും നിൻ്റെ മോള് തന്നെയാ അവള്. ഞാനങ്ങനെയാ കരുതിയിരിക്കുന്നേ, അവളുടെ പപ്പ നീ തന്നെയാണ്. പക്ഷേ അവളിപ്പോഴും നിന്നെ വിളിക്കുന്നത്, മാമൻന്നോ, അങ്കിൾ ന്നോ ആണ്. അവള് വലുതാവുമ്പോൾ അവൾക്ക് മനസ്സിലാവില്ലേ, അവളുടെ പപ്പ നീയല്ലാന്ന്. അതുകൊണ്ട് അവൾ നിന്നെ എപ്പോ പപ്പാന്ന് വിളിക്കുന്നുവോ അപ്പോ നമ്മക്ക് ഒന്നിച്ച് ജീവിക്കാം”

‘എങ്കിൽ ഇടയ്ക്കിടക്ക് നമ്മൾക്ക് തമ്മിൽ കാണണം, യാത്രകൾ പോകണം. അപ്പോഴേ എനിക്ക് മോളോട് കൂടുതൽ അടുക്കാൻ പറ്റൂ. “

“ശരി, അതു ഞാൻ സമ്മതിച്ചിരിക്കുന്നു. കാരണം നീയില്ലാതെ എനിക്കും പറ്റില്ലെടാ”

” എന്നാ നമ്മൾക്കിപ്പോ പോവാം ഇരുട്ടാവുന്നു. രാവിലെ ഓഫീസിൽ കാണാം” 

” ശരിയെടാ, ഞാൻ യൂബർ ന് പൊയ്ക്കോളാം”
അവൾ ഫോണെടുത്ത് യൂബർ ന് ബുക്ക് ചെയ്തു. അഞ്ചു മിനിറ്റിനുള്ളിൽ യൂബർ കൂൾബാറിനു മുന്നിലെത്തിയായി അറിഞ്ഞപ്പോൾ ഹരിത മോളെയും കൂട്ടി പുറത്തേയ്ക്ക് നടന്നു. ചന്ദനമോളെ ഹരിതയുടെ കയ്യിലേക്ക് കൊടുക്കുമ്പോൾ ഗിരി മോളുടെ കവിളിൽ ഉമ്മകൾ കൊണ്ടു മൂടി. 

ഹരിതയോടൊപ്പം നടന്ന് ചന്ദനമോൾ ഉറക്കെ വിളിച്ചു പറഞ്ഞു. 

“അങ്കിളേ റ്റാറ്റാ” 
പുറകെയൊരു ഫ്ലൈയിംഗ്കിസ്സും…

കുഞ്ഞിന് റ്റാറ്റാ കൊടുത്തു കൊണ്ട് ഗിരി കൂൾബാറിൽ തന്നെയിരുന്നു. എന്നിട്ടവൻ മനസ്സിൽ പറഞ്ഞു. 

‘പൊന്നുമോളേ നീയൊന്ന് എന്നെ പപ്പാന്ന് വിളിക്ക്, ഞാനും ഒന്ന് ജീവിച്ചോട്ടെ. ഒറ്റയ്ക്കായി മടുത്ത് മോളെ, നിൻ്റെ മമ്മിയെ എനിക്കത്രയും ഇഷ്ടാണ്. ‘

പാർക്കിലെ ബഞ്ചിൽ ഒറ്റയ്ക്കിരുന്ന് ബബിൾസ് സ്റ്റിക്കിലെ പതയിൽ ഊതിയപ്പോൾ ഉയർന്നു പൊങ്ങിയ കുമിളകൾക്കിടയിലെ വലിയ കുമിളയെ ബബിൾ സ്റ്റിക്കുകൊണ്ട് കുത്തിപ്പൊട്ടിച്ച് അതിൽ ക്രൂരമായ ആനന്ദം കണ്ടെത്തുകയായിരുന്നു ഞാൻ. അങ്ങനെയിപ്പോൾ കുഞ്ഞു കുമിളകൾക്കിടയിൽ ഒരുത്തൻ മാത്രം അങ്ങനെ വലിയ ആളാവണ്ട, വലിയ കുമിളയിൽ സൂക്ഷിച്ച് നോക്കിയാൽ ഭൂമിയുടെ ഗ്ലോബ് പോലെ തോന്നും. എല്ലാ രാജ്യങ്ങളും അടയാളപ്പെടുത്തിയ ഒരു വലിയ ഗ്ലോബ്, ആ ഗ്ലോബിലെ ഏതോ മൂലയ്ക്ക് ആരുമില്ലാതെ ഒറ്റയ്ക്കിരുന്ന് ബബിൾസ് പറപ്പിക്കുന്ന ഞാൻ, ആകെയൊരു കൂട്ടുകാരനുള്ളത് ഈ വലിയ നഗരത്തിലെ ഏതോ ഒരു കൂൾബാറിൽ അവൻ്റെ കാമുകിയോടൊത്ത് സല്ലപിക്കാൻ പോയിരിക്കുന്നു. അവൻ്റെ യോഗം അല്ലാതെന്ത് പറയാൻ.
ങ്ങ്ഹാ, അവനങ്ങനെയെങ്കിലും സന്തോഷിച്ചോട്ടെ. പാവം അവൻ ചെറുപ്പത്തിലേ അനാഥനായവനാണ്. ഇപ്പോൾ ഒരു കൂട്ടുകിട്ടിയപ്പോൾ അവന് സ്വർഗ്ഗം കിട്ടിയ പോലെയാണ്.
അവൻ സന്തോഷിക്കട്ടെ. 

വീണ്ടും ബബിൾ സ്റ്റിക്കിൽ പതനിറച്ച് ഊതി വിട്ടപ്പോൾ എല്ലാ കുമിളകൾക്കും ഒരേ വലുപ്പമായിരുന്നു. അതിൽ ഏറ്റവും വലുതിനെ ലക്ഷ്യം വെച്ച് ബബിൾ സ്റ്റിക്ക് ഉയർത്തുമ്പോഴാണ് ഫോൺ റിംഗ് ചെയ്യുന്നത് കേട്ടത്. നോക്കുമ്പോൾ ഗിരിയാണ്. 

“എന്താടാ, നീ പോയിട്ട് എത്ര നേരമായി, അല്ലേലും അവളെ കണ്ടാൽപ്പിന്നെ നിനക്ക് എന്നെ ഓർമ്മയുണ്ടാവില്ലോ?”

” ഞാൻ പോരുമ്പോൾ നിനക്ക് ബബിൾ സ്റ്റിക്ക് വാങ്ങിത്തന്നിട്ടല്ലേടാ പോന്നത്, നിനക്കത് കുത്തിപ്പൊട്ടിച്ച് പാർക്കിലു വരുന്ന പെണ്ണുങ്ങളുടെ വായിൽ നോക്കിയിരുന്നാപ്പോരോ?”

” ഓ, അതു രണ്ടും മുറയ്ക്ക് നടക്കുന്നുണ്ട്, എന്തായി നീ ഇങ്ങോട്ട് വരുന്നുണ്ടോ?”

” ദാ വന്നോണ്ടിരിക്കാ, എത്താനായി.” 

“ശരി ശരി വേഗം വാ”

ഫോൺ വെച്ച് കഴിഞ്ഞ് ആകാശത്തേയ്ക്ക് നോക്കുമ്പോൾ എന്നിൽ നിന്നും രക്ഷപ്പെട്ട കുമിളകൾ എനിക്കു ചുറ്റും നൃത്തം വെയ്ക്കുന്നുണ്ടായിരുന്നു. അതിലുള്ള വലിയ കുമിളയെ ലക്ഷ്യമാക്കി ഞാൻ ബബിൾ സ്റ്റിക്കുമായിചാടിക്കൊണ്ടിരുന്നു. എൻ്റെ ക്രൂരതയിൽ നിന്നും രക്ഷനേടിയ ഒരു വലിയ കുമിള എന്നെ നോക്കി കളിയാക്കിച്ചിരിച്ചു കൊണ്ട് പാർക്കിലെ കാറ്റാടി മരത്തിനിടയിലൂടെ പറന്നകന്നു. 

വീണ്ടും പതയിലൂടെ ഊതാൻ നോക്കുമ്പോഴാണ് ഗിരി എൻ്റെ മുമ്പിൽ പ്രത്യക്ഷപ്പെട്ടത്. വന്നപാടെ എന്നോടവൻ പറഞ്ഞു. 

“എടാ എനിക്ക് നിന്നോട് സീരിയസായി സംസാക്കാനുണ്ട്.”

“ഉം പറഞ്ഞോ, ഞാൻ കേൾക്കുന്നുണ്ട്. “

“എടാ, അവളില്ലാതെ എനിക്കും ഞാനില്ലാതെ അവൾക്കും പറ്റില്ലെടാ”

” എന്നാപ്പിന്നെ നിങ്ങൾക്ക് ഒന്നിച്ച് ജീവിച്ചൂടെ?”

” അവൾക്ക് സമ്മതമാണ്. പക്ഷേ അവളുടെ മോള് എന്നെ പപ്പാന്ന് വിളിക്കണം. “

” അതിന് മോള് നിന്നെ അങ്കിൾ എന്നല്ലേ വിളിക്കുന്നത്?” 

“അതേ, അതാ പ്രശ്നം. മോള് എന്നെ അവളുടെ പപ്പയായി അംഗീകരിക്കണം.”

“അത് വല്യ പ്രശ്നമാണല്ലോടാ, ചെറിയ കുഞ്ഞല്ലേ അത് അങ്കിൾ ന്നേ വിളിക്കൂ.. “

അതും പറഞ്ഞ് ഞാൻ വീണ്ടും ബബിൾസ് പറപ്പിച്ചു കൊണ്ടിരുന്നു. 

അതുകണ്ടപ്പോൾ അവന് ദേഷ്യം വന്ന് അവൻ എൻ്റെ കയ്യിലെ ബബിൾ സ്റ്റിക്ക് തട്ടിക്കളഞ്ഞു കൊണ്ട് പറഞ്ഞു.

“നിന്നെ ബബിൾസ് പതകൊണ്ട് ഉണ്ടാക്കിയതാണോടാ, ഏത് നേരം നോക്കിയാലും ഇതും ഊതിക്കൊണ്ടിരുന്നോളും. മനുഷ്യനിവിടെ നെഞ്ചു പൊട്ടിയിരിക്കുമ്പോഴാണ് അവൻ്റെ ഒടുക്കത്തെ കുമിള പറപ്പിക്കല്.”

അവനത് തട്ടിക്കളഞ്ഞപ്പോൾ എനിക്ക് സങ്കടം വന്ന് കണ്ണു നിറഞ്ഞു, നിറഞ്ഞു വന്ന കണ്ണുകൾ അവൻ കാണാതെ തുടച്ചു കൊണ്ട് ഞാനവനോട് പറഞ്ഞു. 

“എടാ, നിനക്കത് വെറും കുമിളകളാണ് പക്ഷേ എനിക്കത് എൻ്റെ ബന്ധുക്കളാണ്”

” ബന്ധുക്കളോ, നിനക്ക് വട്ടായോ?”

“അതേടാ, എൻ്റെ ബന്ധുക്കൾ.
ഞാനെപ്പോഴും കുത്തിപ്പൊട്ടിക്കുന്ന ആ വലിയ കുമിളയില്ലേ, അതാണെൻ്റെ വലിയച്ഛൻ. എൻ്റെ തറവാട്ടിലെ ഏറ്റവും ക്രൂരനായ കഥാപാത്രം. അച്ഛൻ മരിച്ചപ്പോൾ അമ്മയേയും എന്നെയും വീട്ടിൽ നിന്നിറക്കിവിട്ട ദുഷ്ടൻ. അതാണ് ഞാനാ വലിയ കുമിളയെ ആദ്യം കുത്തിപ്പൊട്ടിക്കുന്നത്. പിന്നീടുള്ള ഓരോ ചെറിയ കുമിളകളും തറവാട്ടിലെ ഓരോരുത്തരുമാണ്. അവരാണ് എനിക്കു ചുറ്റും നൃത്തം വെയ്ക്കുന്നത്. കുമിളകൾ എനിക്കു ചുറ്റും പറക്കുമ്പോൾ ഞാൻ എൻ്റെ ബന്ധുകൾക്കിടയിലാണ്. ഒറ്റപ്പെടലിൻ്റെ വേദന എന്നേക്കാൾ നന്നായി നിനക്കറിയാവുന്നതല്ലേ, നിനക്കിപ്പോൾ അവളെ കിട്ടിയത് കൊണ്ട് നിനക്ക് മിണ്ടാനും പറയാനും സന്തോഷിക്കാനും ആളുണ്ട്. എനിക്കോ, എനിക്കീ കുമിളകൾ മാത്രമേയുള്ളു സ്വന്തമായിട്ട്. 

“ഏയ്, നീയെന്താടാ ഇങ്ങനെ, നിനക്ക് വിഷമമായോ, സാരമില്ല, നിനക്ക് ഞാനില്ലേ, അതൊക്കെപ്പോട്ടെ നീയിപ്പോ എൻ്റെ കാര്യത്തിന് ഒരു വഴി പറ.
എനിക്ക് അവളുടെ കൂടെ ജീവിക്കണം. അതിന് എന്തേലും ഒരു മാർഗ്ഗം നീ പറഞ്ഞുതാ”

” നീ അവളുടെ കൂടെപ്പോയാൽ എനിക്ക് പിന്നെ ആരുമില്ലാതാവും. എന്നാലും വേണ്ടില്ല, നിനക്ക് ഒരു കൂട്ടാവുമല്ലോ. നീയാണെന്നു കരുതി ഒരു കുമിളയെ കൂടെ ഞാൻ കുത്തിപ്പൊട്ടിച്ചോളാം.
ഒരു വഴിയുണ്ട്. നീ അവളോട് ലിവിംഗ് ടുഗദറിന് സമ്മതമാണോന്ന് ചോദിക്കണം. “

“എന്നിട്ട്?”

“സമ്മതമാണെങ്കിൽ നിങ്ങൾ ഒന്നിച്ച് ജീവിക്കണം അപ്പോ മോള് നിന്നോട് കൂടുതൽ അടുക്കും കുറച്ചു ദിവസം കഴിയുമ്പോൾ മോൾ നിന്നെ പപ്പാന്ന് വിളിക്കും.” 

“അവൾക്ക് സമ്മതമായിരിക്കും. പക്ഷേ അവളെയൊന്ന് ചേർത്തുപിടിക്കാന്നോ അവളെയൊന്നു തൊടാനോ അവൾ സമ്മതിക്കുമെന്ന് തോന്നുന്നില്ല. “

” സാരമില്ല അതിന് വഴിയുണ്ട്,
നീയൊരു ബബിൾ സ്റ്റിക്ക് വാങ്ങിത്താ, ഞാനൊന്നാലോചിക്കട്ടെ. “

ഗിരി എഴുന്നേറ്റ് പോയി ഒരു ബബിൾ സ്റ്റിക്കും വാങ്ങി വന്നു. ഞാനതുമായി പാർക്കിലെ മറ്റൊരു ബെഞ്ചിൽ പോയിരുന്ന് ആവോളം കുമിളകളെ പറപ്പിച്ചു കൊണ്ടിരുന്നു. അതിലുള്ള എല്ലാ കുമിളകൾക്കു ഗിരിയുടെ മുഖമായിരുന്നു. ആകെയുള്ള കൂട്ടുകാരനും നഷ്ടപ്പെടാൻ പോവുന്നു. അവൻ അവളുടെ കൂടെപ്പോയാൽ പിന്നെ ഞാൻ വീണ്ടും ഒറ്റയ്ക്കാവും, എന്നാലും സാരമില്ല. അവനെങ്കിലും സന്തോഷിക്കട്ടെ. ഞാൻ തിരിച്ച് ഗിരിയുടെ അടുത്തേയ്ക്ക് ചെന്ന് അവനോട് പറഞ്ഞു. 

“എടാ, ആ കുഞ്ഞിൻ്റെ പേരെന്താ?”

” ചന്ദന”

” നീയെന്താ മോളെ വിളിക്കാറ്?”

” തക്കുടു മോളേ ന്ന്”

“കുഞ്ഞിന് നിന്നോടെങ്ങെനെയാ?”

“വല്യ ഇഷ്ടാണ്.”

“ശരി, എന്നാ ഞാൻ പറയുന്ന പോലെ ചെയ്യണം.”
പിന്നീട് ഞാനവനോട് ചെയ്യേണ്ട കാര്യങ്ങൾ പറഞ്ഞു കൊടുത്തു. അവൻ സന്തോഷത്തോടെ പറഞ്ഞു. 

” ഇന്നത്തെ ചെലവ് എൻ്റെ വക. അവൻ എന്നെയും കൂട്ടി നേരെ മന്തിക്കടയിലേയ്ക്ക് കയറി. “

പിറ്റേന്നത്തെ ഞായറാഴ്ച ഗിരിയും ഹരിതയും മോളും ഞങ്ങളുടെ ഫ്ലാറ്റിലേയ്ക്ക് താമസം മാറി, ഞാൻ എൻ്റെ സ്ഥാവര ജംഗമ വസ്തുക്കളുമായി ഹരിതയുടെ ഫ്ലാറ്റിലേയ്ക്കും പോയി. 

പിന്നീടുള്ള ഒരാഴ്ചയോളം അവർ ഒന്നിച്ചു താമസിച്ചിട്ടും മോൾ ഒരിക്കൽ പോലും ഗിരിയെ പപ്പാ എന്നു വിളിച്ചിരുന്നില്ല. അതുകൊണ്ടുതന്നെ ഹരിതയെ ഒന്നു തൊടാൻ പോലും അവൾ അവനെ അനുവദിച്ചിരുന്നില്ല. 

പിറ്റേ ദിവസം അവൻ എന്നെ വിളിച്ചു പറഞ്ഞു

“എടാ, മോള് ഇതുവരെ എന്നെ പപ്പാന്ന് വിളിച്ചിട്ടില്ല. അതുകൊണ്ട് ഹരിത എന്നെയൊന്ന് തൊടാൻ പോലും അനുവദിച്ചില്ല. “

” സാരമില്ലെടാ, ഞാൻ പറഞ്ഞപോലെ നീ ചെയ്തായിരുന്നോ?”

” ഇല്ലെടാ, കുഞ്ഞ് എന്നെ അല്ലാതെ തന്നെ പപ്പാ ന്ന് വിളിച്ചോളുമെന്നാ ഞാൻ കരുതിയെ. അതുകൊണ്ട് നീ പറഞ്ഞപോലെ ഞാൻ ചെയ്തില്ല.”

” എന്നാ ഇന്ന് നീ നേരത്തേ ഓഫീസിൽ നിന്നുമിറങ്ങ്. എന്നിട്ട് കെ ജി യിൽ പോയി മോളെ വിളിച്ച് ഫ്ലാറ്റിലേയ്ക്ക് പോ, എന്നിട്ട് ഞാൻ പറഞ്ഞപോലെ ചെയ്യ്. “

” ശരിയെടാ, എന്നാ അതേ ഇനിയിപ്പോ രക്ഷയുള്ളൂ.”

ഗിരി ഹരിതയുടെ കാബിനിൽ ചെന്ന് ഇന്ന് ഒരു മീറ്റിംഗ് ഉണ്ടെന്നും അതു കഴിഞ്ഞ് മോളെയും കുട്ടി ഫ്ലാറ്റിലേക്കു പോകുമെന്നുമറിയിച്ച് നേരത്തേ തന്നെ ഓഫീസിൽ നിന്നുമിറങ്ങി. പിന്നീട് മോളെയും കൂട്ടി ഫ്ലാറ്റിലേയ്ക്ക് മടങ്ങി. 

ഫ്ലാറ്റിൽ ചെന്നശേഷം അവൻ ചന്ദന മോളോട് ചോദിച്ചു

” തക്കുടുമോളേ”

“എന്താ അങ്കിളേ”

” തക്കുടു മോളുടെ പേരെന്താ?”

“ചന്ദന ഹരിത”

“ആഹാ നല്ല പേരാണല്ലോ”

” അങ്കിളിൻ്റെ പേരെന്താണെന്ന് മോൾക്കറിയാമോ?”

” കിറി എന്നല്ലേ, മമ്മി വിളിക്കുന്നേ ഞാൻ കേട്ടിട്ടുണ്ട്. “

“കിറിയല്ല, ഗിരി, അത് മമ്മിയെന്നെ സ്നേഹത്തോടെ വിളിക്കുന്നതാ, അങ്കിള് മോളെ സ്നേഹത്തോടെ എന്താ വിളിക്കാറ്”

‘തക്കുടു മോളേ ന്ന്”

“അതുപോലെ മമ്മിയെന്നെ ഗിരീന്ന് വിളിക്കും. “

” അപ്പോ ശരിക്കും അങ്കിളിൻ്റെ പേരെന്താ?”

“അങ്കിളിൻ്റെ പേരാണ് പപ്പൻ ന്ന്,
ഞാൻ ചന്ദനേന്ന് വിളിക്കുമ്പോൾ മോൾക്ക് എന്നെ പപ്പാന്ന് പേര് വിളിക്കാം
മനസ്സിലായോ ചന്ദനേ”

“ഓക്കെ പപ്പാ”
അവൾ നീട്ടിവിളിച്ചു. 

ഗിരി പിന്നെയും പിന്നെയും ചന്ദനേന്ന് വിളിച്ചപ്പോഴൊക്കെ മോൾ പപ്പാന്ന് തന്നെ വിളിച്ചു കൊണ്ടിരുന്നു.
വൈകീട്ട് ഹരിത ഫ്ലാറ്റിലേയ്ക്ക് വരുമ്പോൾ കാണുന്നത്. പപ്പാന്നും വിളിച്ച് ഗിരിയുടെ പുറകെ ഓടിക്കളിക്കുന്ന ചന്ദനമോളെയാണ്. 

അവൾ ഗിരിയുടെ പുറകെ ഓടിക്കൊണ്ടു പറയുന്നു. 

” റിമോട്ട് താ പപ്പാ, ന്ന്, പിന്നെ കരടിക്കുട്ടൻ പാവയുമെടുത്ത് ഗിരിയുടെ പുറകെ ഓടുന്നു. ഗിരി റിമോട്ട് ഉയർത്തിപ്പിടിച്ചു കൊണ്ട് ഫ്ലാറ്റിലെ ഓരോ മുറികളിലൂടെ ഓടിക്കൊണ്ടിരിക്കുന്നു.
ഗിരി ചന്ദനേന്ന് വിളിക്കുമ്പോഴെല്ലാം കുഞ്ഞ് പപ്പായെന്ന് ഉറക്കെ വിളിക്കുന്നു.
ഫ്ലാറ്റിൽ പപ്പായെന്ന സ്വരം ഉറക്കെ മുഴങ്ങിക്കേട്ടുകൊണ്ടിരുന്നു.
ഹരിതവേഗം ബാത്റൂമിലേയ്ക്ക് കയറി എന്നിട്ട് സന്തോഷം കൊണ്ട് വിങ്ങിപ്പൊട്ടിക്കരഞ്ഞു കൊണ്ടിരുന്നു. 

രാത്രി ഹരിത, ഗിരിയുടെ മാറിൽ തല വെച്ച് കിടക്കുമ്പോൾ ഗിരി ഫോണെടുത്ത് എനിക്ക് ഒരു മെസേജ് അയച്ചു. 

“താങ്ക്സ് എടാ, നിന്നോട് എത്ര നന്ദി പറഞ്ഞാലും മതിയാവില്ല. “

ഞാനവന് മറുപടിയായി വാട്സപ്പിൽ ഒരു ജിഫ് അയച്ചു, ഒരു കുട്ടി ബബിൾസ് സ്റ്റിക്കിൽ ഊതി കുമിളകൾ പറത്തിവിടുന്ന ജിഫ്..

പിന്നീട് ഞാൻ ബബിൾ സ്റ്റിക്കുമെടുത്ത് ഫ്ലാറ്റിൻ്റെ ബാൽക്കണിയിൽ പോയി കുമിളകൾ ഊതി പറത്തി വിട്ടുകൊണ്ടിരുന്നു. പറന്നു പൊങ്ങിയ കുമിളകൾക്കെല്ലാം ഹരിതയുടെയും കുഞ്ഞിൻ്റെയും മുഖമായിരുന്നു. ഞാനവയെല്ലാം ദേഷ്യത്തോടെ കുത്തിപ്പൊട്ടിച്ചു കൊണ്ടിരുന്നു.

✍️ ഷിജിത് പേരാമ്പ്ര