2026-ലെ എന്റെ ഏറ്റവും വലിയ സ്വപ്നം!

എന്റെ കഥകൾ പുസ്തകമാവുന്നു; 2026-ലെ എന്റെ ഏറ്റവും വലിയ സ്വപ്നം!

പുതുവർഷം വരുമ്പോൾ എല്ലാവരും ഡയറിയിൽ ഓരോന്ന് കുറിച്ചു വെക്കാറുണ്ടല്ലോ. എനിക്കും കുറച്ച് കാര്യങ്ങൾ എഴുതാനുണ്ട്. പക്ഷെ ഇത്തവണ അതൊരു ലിസ്റ്റ് മാത്രമല്ല, വർഷങ്ങളായി ഞാൻ മനസ്സിൽ കൊണ്ടുനടക്കുന്ന ഒരു സ്വപ്നമാണ്. 2026-ൽ എങ്കിലും എന്റെ എഴുത്തുകൾ വെറുമൊരു നോട്ട്ബുക്കിൽ ഒതുക്കാതെ ഒരു ‘കഥാസമാഹാരം’ ആയി പുറത്തിറക്കണം എന്ന് ഞാൻ ഉറപ്പിച്ചു കഴിഞ്ഞു. 

​സത്യം പറഞ്ഞാൽ, ഈ എഴുത്ത് പണ്ടേ കൂടെയുള്ളതാണ്. ബസ്സിലിരിക്കുമ്പോൾ കാണുന്ന അപരിചിതരായ ആളുകൾ, മഴ നനഞ്ഞു നിൽക്കുന്ന തെരുവുകൾ, അല്ലെങ്കിൽ വെറുതെ ഇരിക്കുമ്പോൾ മനസ്സിലേക്ക് ഓടി വരുന്ന വിചിത്രമായ ചിന്തകൾ… ഇതിനെയൊക്കെ കഥകളാക്കി മാറ്റാൻ എനിക്ക് വലിയ ഇഷ്ടമാണ്. പക്ഷേ, പലപ്പോഴും എഴുതി ഓൺലൈൻ മീഡിയയിൽ പ്രസിദ്ധീകരിക്കും, സ്വന്തം പേരിൽ പ്രസിദ്ധീകരിക്കാൻ മടിയുള്ളതുകൊണ്ട് വെറെ ഒരു പേരിൽ ആയിരുന്നു എന്ന് മാത്രം.. “ഇതൊക്കെ ആര് വായിക്കാനാണ്?” എന്നൊരു തോന്നൽ വന്ന് എല്ലാം ഇടക്കുവച്ചു നിർത്തി. അങ്ങനെ പാതിവഴിയിൽ മുറിഞ്ഞുപോയ എത്രയോ കഥകൾ എന്റെ ഫോണിലും പഴയ പുസ്തകങ്ങളിലും കിടക്കുന്നുണ്ട്!​എന്നാൽ ഇനി അത് പാടില്ല എന്ന് ഞാൻ തീരുമാനിച്ചു. 

എന്റെ ഈ കഥാപാത്രങ്ങൾക്ക് ഒക്കെ ജീവൻ നൽകി, അവരെ നിങ്ങളിലേക്ക് എത്തിക്കാൻ പോവുകയാണ്. ​ ഇങ്ങനെയൊരു തീരുമാനം എടുക്കാനൊരു കാരണമുണ്ട് നമ്മൾ ഈ ഭൂമിയിൽ വന്നു പോകുമ്പോൾ എന്തെങ്കിലും ഒന്ന് ഇവിടെ ബാക്കിവെച്ച് പോകണ്ടേ? എനിക്ക് നൽകാൻ കഴിയുന്ന ഏറ്റവും നല്ല സമ്മാനങ്ങളിലൊന്ന് എന്റെ അക്ഷരങ്ങളാണ്. ഓരോ കഥയും എന്റെ ജീവിതത്തിന്റെയോ നിരീക്ഷണങ്ങളുടെയോ ഓരോ ഭാഗമാണ്. അത് മറ്റൊരാൾ വായിക്കുമ്പോൾ അവർക്ക് എന്നോട് ഒരു ആത്മബന്ധം തോന്നിയാൽ, അതാണ് ഒരു എഴുത്തുകാരന്റെ ഏറ്റവും വലിയ വിജയം. ​ പറയുമ്പോൾ എളുപ്പമാണെങ്കിലും സംഗതി അല്പം കടുപ്പമാണ്. എങ്കിലും ഈ വർഷം ഞാൻ ചില കാര്യങ്ങൾ മനസ്സിനെ പഠിപ്പിക്കുകയാണ്. അതിൽ ആദ്യം ​മടി മാറ്റിവെക്കലാണ്. വൈകുന്നേരം ജോലി കഴിഞ്ഞ് വരുമ്പോൾ ക്ഷീണമാണെങ്കിലും, ഒരു അരമണിക്കൂർ എഴുത്തിനായി മാത്രം മാറ്റിവെക്കും. ​ രണ്ടാമതായി വായന ശീലം ഒന്നുടെ ഉഷാറാക്കണം. നല്ല കഥകൾ വായിച്ചാലേ നമുക്ക് നല്ല രീതിയിൽ എഴുതാൻ പറ്റൂ. അതുകൊണ്ട് ഇഷ്ടപ്പെട്ട എഴുത്തുകാരുടെ പുസ്തകങ്ങൾ ഇനിയും ഒരുപാട് വായിക്കാനുണ്ട്. ​അവസാനമായി മാറ്റുന്നത് തിരുത്തി എഴുതാനുള്ള മടി ആണ്. ആദ്യത്തെ തവണ എഴുതുന്നത് അത്ര പോരെന്നു തോന്നും. അത് പിന്നെയും പിന്നെയും തിരുത്തി മിനുക്കിയെടുക്കാൻ നല്ല ക്ഷമ വേണം. ഇത്തവണ അത് കാണിക്കാൻ തന്നെ തീരുമാനിച്ചു. ​

ഒരു പുസ്തകം കയ്യിലെടുക്കുമ്പോൾ കിട്ടുന്ന ആ ഒരു സന്തോഷമുണ്ടല്ലോ, അത് പറഞ്ഞറിയിക്കാൻ പറ്റില്ല. 2026-ന്റെ അവസാനമാകുമ്പോൾ എന്റെ പേര് അച്ചടിച്ച ആ ഒരു കഥാസമാഹാരം എന്റെ കയ്യിലുണ്ടാകണം. എന്റെ വാക്കുകൾ വായനക്കാർ നെഞ്ചേറ്റണം. ​

ഇതൊരു ചെറിയ തുടക്കമാണ്. വലിയൊരു യാത്രയുടെ ആദ്യത്തെ ചുവടുവെപ്പ്. നിങ്ങളുടെ പ്രാർത്ഥനയും സ്നേഹവും എപ്പോഴും കൂടെയുണ്ടാകുമെന്ന് ഞാൻ വിശ്വസിക്കുന്നു. എന്റെ കഥകളിലെ മനുഷ്യരെ നിങ്ങൾക്കും ഇഷ്ടമാകുമെന്ന് ഞാൻ കരുതുന്നു. ​നമുക്ക് നോക്കാം… 2026 അക്ഷരങ്ങളുടേതാവട്ടെ!

#എന്റെരചന #കൂട്ടക്ഷരങ്ങൾ #2026