പ്രണയവർണ്ണങ്ങൾ

ഫെബ്രുവരിയിലെ ആ തണുപ്പുള്ള പ്രഭാതത്തിൽ, കാമ്പസിലെ ഗുൽമോഹർ മരച്ചുവട്ടിൽ ഇരിക്കുമ്പോഴാണ് ആര്യൻ തന്റെ ഡയറിയിൽ ആ എട്ട് ദിവസങ്ങളെ കുറിച്ച് കുറിച്ചത്. മീരയോടുള്ള തന്റെ പ്രണയം വെറുമൊരു വാക്കിലൊതുക്കാൻ അവന് കഴിയുമായിരുന്നില്ല. അതുകൊണ്ട് തന്നെ ഈ വാലന്റൈൻസ് വാരം അവൾക്കായി മാറ്റി വെക്കാൻ അവൻ തീരുമാനിച്ചു.

ഫെബ്രുവരി ഏഴാം തിയതി രാവിലെ മഞ്ഞ് വീണുകിടക്കുന്ന പാതയിലൂടെ നടന്ന് അവൻ മീരയുടെ അടുത്തെത്തി. കയ്യിൽ കരുതിയ ചുവന്ന റോസാപ്പൂവ് അവൾക്ക് നേരെ നീട്ടുമ്പോൾ അവന്റെ കൈകൾ വിറയ്ക്കുന്നുണ്ടായിരുന്നു. “ഇതൊരു തുടക്കം മാത്രമാണ് മീര,” അവൻ മന്ത്രിച്ചു. ആ പൂവിനേക്കാൾ ചുവപ്പായിരുന്നു അപ്പോൾ അവളുടെ കവിളുകൾക്ക്.

പിറ്റേന്ന് പ്രൊപ്പോസ് ഡേയുടെ അന്ന്, ആകാശത്ത് നക്ഷത്രങ്ങൾ തെളിഞ്ഞു തുടങ്ങിയ സന്ധ്യാനേരത്ത് അവൻ ചോദിച്ചു, “നമുക്ക് ഇനിയുള്ള യാത്ര ഒന്നിച്ചാക്കിയാലോ?” തന്റെ ഹൃദയം പറിച്ച് അവൾക്ക് നൽകുന്ന ലാഘവത്തോടെയായിരുന്നു ആ ചോദ്യം. മറുപടിയായി അവൾ അവന്റെ കൈകളിൽ അമർത്തിപ്പിടിച്ചു. ആ മൗനം സമ്മതമായിരുന്നു.

അവരുടെ അടുത്ത രണ്ട് ദിവസങ്ങൾ മധുരത്തിന്റെയും കളിചിരികളുടെയും ആയിരുന്നു. പ്രണയത്തിന്റെ മധുരം ചോക്ലേറ്റ് മിഠായികളായി അവർ പങ്കിട്ടു. പത്താം തീയതി, അവൻ അവൾക്ക് വലിയൊരു ടെഡിബിയറിനെ സമ്മാനിച്ചു. “ഞാൻ ഇല്ലാത്തപ്പോൾ ഇത് നിനക്ക് കൂട്ടിരിക്കും,” അവൻ പറഞ്ഞു. അത് കെട്ടിപ്പിടിച്ച് നിൽക്കുമ്പോൾ മീരയുടെ കണ്ണുകളിൽ സന്തോഷം തിരതല്ലി.

വാഗ്ദാനങ്ങളുടെ ദിനമായിരുന്നു അടുത്തത്. നിലാവുള്ള രാത്രിയിൽ കടൽതീരത്ത് ഇരിക്കുമ്പോൾ അവൻ അവളുടെ വിരലുകളിൽ കോർത്തുപിടിച്ചു. “ലോകം എത്ര മാറിയാലും, കാലം എത്ര കടന്നുപോയാലും, മരണം വരെ ഞാൻ നിന്നെ ചേർത്തുപിടിക്കും.” ആ വാഗ്ദാനം വെറുമൊരു വാക്കല്ല, അവന്റെ ജീവിതമായിരുന്നു.

അടുത്ത രണ്ട് ദിനങ്ങളിൽ അവരുടെ യാത്രകൾക്കിടയിൽ, ലോകം മറന്ന് അവൻ അവളെ ആലിംഗനം ചെയ്തു. സങ്കടങ്ങളും സന്തോഷങ്ങളും ആ ചേർത്തുപിടിക്കലിൽ അലിഞ്ഞുപോയി. തൊട്ടടുത്ത ദിവസം, ലോകത്തിലെ ഏറ്റവും മനോഹരമായ ഭാഷയിൽ ഒരു ചുംബനത്തിലൂടെ അവൻ തന്റെ പ്രണയത്തിന് മുദ്ര ചാർത്തി.

ഒടുവിൽ ആ ദിനം വന്നെത്തി. കഴിഞ്ഞ ഏഴ് ദിവസങ്ങളിലെ ഓർമ്മകൾ കോർത്തിണക്കി അവർ പ്രണയത്തിന്റെ പൂർണ്ണതയിൽ എത്തിനിൽക്കുന്നു. ഇന്ന് ആര്യനും മീരയും ആഘോഷിക്കുന്നത് കേവലം ഒരു ദിവസമല്ല, മറിച്ച് തങ്ങൾ കെട്ടിപ്പടുത്ത ഒരു കൊച്ചു പ്രണയ സാമ്രാജ്യമാണ്. റോസാപ്പൂവിന്റെ ഗന്ധത്തിൽ തുടങ്ങി ചുംബനത്തിന്റെ മാധുര്യത്തിലൂടെ കടന്ന് അവർ ആ വലിയ സത്യം തിരിച്ചറിഞ്ഞു, പ്രണയം എന്നത് ഒരു ദിവസമല്ല, ഓരോ ദിവസവും പുതുതായി സംഭവിക്കേണ്ട അത്ഭുതമാണ്…..

-ശുഭം-

#പ്രണയദിനം2026 #കൂട്ടക്ഷരങ്ങൾ