സ്നേഹ’വിഹിതം’

നഗരം തിരക്കുകളിലേക്ക് ഉണർന്നു വരുന്നതേ ഉള്ളൂ. ഫോണിൽ മെസേജ് വന്നെന്ന് കാണിക്കുന്ന വെളിച്ചം മിന്നി മറഞ്ഞതും നിഖിൽ ചെരിഞ്ഞു കൈയെത്തി മൊബൈൽ എടുത്തു. രാഗിണിയുടെ മെസേജ് ആയിരിക്കും എന്ന് ഉറപ്പാണ്. കുറച്ചു മാസങ്ങളായി അവളുടെ മെസേജാണ് തന്നെ ഉണർത്തുന്നത്. തിരക്കുള്ള ഓഫീസ് സമയത്തിന് മുൻപും പിൻപും ഉള്ള ചെറിയ സമയത്തെ ആ ചാറ്റ് മെസേജുകളിലാണ് തന്റെ ജീവൻ തങ്ങി നിൽക്കുന്നത് എന്ന് തോന്നാറുണ്ട് നിഖിലിന്. നീലിമയോട് എന്തെങ്കിലും പറയാൻ പോയാൽ ഒന്നും രണ്ടും പറഞ്ഞു അടിയുണ്ടാക്കാം എന്നല്ലാതെ രാഗിണിയോട് സംസാരിക്കുമ്പോൾ കിട്ടുന്ന സമാധാനം കിട്ടാറില്ല. ഒരുപക്ഷെ കാമുകിയും ഭാര്യയും എന്ന വ്യത്യാസം ആയിരിക്കും. പക്ഷേ രാഗിണിയെ കാമുകി എന്നൊന്നും വിളിക്കാൻ പറ്റില്ല. ഒരു സുഹൃത്ത് അല്ലെങ്കിൽ സുഹൃത്തിനേക്കാൾ മുകളിൽ ഉള്ള ഒരുവൾ. അവളും ഒന്ന് വിട്ടു പറയാറില്ല ഈ ബന്ധത്തിന്റെ നിർവചനം എന്താണെന്ന്. ആലോചന കാട് കയറും മുൻപേ നിഖിൽ ആ മെസേജ് തുറന്നു വായന തുടങ്ങി.

“ഉണർന്നില്ലേ? എന്തൊക്കെ സ്വപ്നം കണ്ടു ഇന്നലെ? ഇന്നെന്താ പരിപാടി?”

രാഗിണിയുടെ നനുത്ത ശബ്ദം വോയിസ് മെസ്സേജിലൂടെ ഒഴുകി വന്നു.

“ദേ എഴുന്നേറ്റു. ഇന്നലെ സ്വപ്നം ഒന്നും കണ്ടില്ല. ഇന്ന് ജോലിക്ക് പോണം. നല്ല തിരക്കുള്ള ദിവസമാണ്. അവിടെ എന്തുണ്ട് വിശേഷം?”

നിഖിൽ എപ്പോഴും ടൈപ്പ് ചെയ്താണ് മറുപടി കൊടുക്കാറുള്ളത്.

“ഞാൻ ചോദിച്ച വാക്കിന്റെ അർത്ഥം ഊഹിച്ചോ? സമയം കഴിയാറായി. നാളെയാണ് അവസാന ദിവസം.”

അടുത്ത വോയിസ് നോട്ട് എത്തിക്കഴിഞ്ഞു.

തുടക്കം മുതൽ ഇങ്ങനെ ഓരോ വാക്ക് ഇട്ടു തന്നു അർത്ഥം ഊഹിപ്പിക്കുന്ന കളിയുണ്ട് രാഗിണിക്ക്. ചിലത് നിഖിൽ ശരിയാക്കും. ചിലത് തെറ്റും.

“ഈ AI കാലത്ത് ഇങ്ങനെ കടുത്ത പരീക്ഷണം എനിക്ക് തരുന്നത് എന്തിനാണ് രാഗിണി? Google ചെയ്യാൻ പാടില്ല. ഡിക്ഷണറി നോക്കാൻ പാടില്ല. ആരോടും ചോദിക്കാനും പാടില്ല. ഊഹിച്ചു കണ്ടുപിടിക്കണം ത്രേ!”

പരിഭവം മറച്ചു വയ്ക്കാതെ നിഖിൽ മറുപടി ടൈപ്പ് ചെയ്തു.

“അതാണല്ലോ അതിന്റെ രസം… അപ്പോൾ ഇന്ന് കൂടിയുള്ളൂ സമയം. നാളെ രാവിലെ ഉത്തരം പറയണം. തെറ്റിയാൽ പിന്നെ ഞാൻ അപ്രത്യക്ഷയാകും. പിന്നെ എന്നെ കണ്ടുപിടിക്കാൻ പോലും പറ്റില്ല.”

അവളുടെ സ്വരത്തിൽ ഇതുവരെ ഇല്ലാത്ത ഒരു കടുപ്പം നിറഞ്ഞ പോലെ തോന്നി.

“ഓഹ് പിന്നെ! ഞാനൊരു കണക്കുപ്പിള്ള ആണെന്നത് സത്യം തന്നെ. എന്നാലും രാഗിണിയെ ട്രാക്ക് ചെയ്തു കണ്ടുപിടിക്കാനുള്ള കൂട്ടുകാരൊക്കെ എന്റെ കയ്യിലുണ്ട്. ഞാനത് ചെയ്യാത്തത് ഈ അജ്ഞാത ബന്ധം എനിക്ക് ത്രില്ലിംഗ് ആയത് കൊണ്ടാണ്. ഉത്തരം ഞാൻ നാളെ രാവിലെ പറയും. നമുക്ക് നോക്കാം.”

വെല്ലുവിളി പോലെ തന്നെ ആയിരുന്നു ആ മെസ്സേജ്. കൂടെ രണ്ട് കിടിലൻ ലവ് ഇമോജിയും അയച്ചു. മെസേജ് സീൻ എന്ന് കാണിച്ചതും അവൾ ഓഫ്‌ലൈൻ ആയതും ഒരുമിച്ചായിരുന്നു.

പെട്ടെന്ന് റെഡി ആയി ഓഫീസിലേക്ക് പാഞ്ഞു. ഓഡിറ്റിംഗ് സമയമാണ്. നേരത്തെ പോകണം. ഒരു അക്കൗണ്ടന്റിനെ സംബന്ധിച്ച് കാഠിന്യമേറിയ ദിവസങ്ങൾ. നീലിമ അപ്പുറത്തെ റൂമിൽ ഉറങ്ങുന്നുണ്ട്. നിഖിലിന് രാത്രി ഇരുന്ന് അക്കൗണ്ട്സ് നോക്കാൻ ഉണ്ടാകും. അപ്പോൾ നീലിമ ഉറക്കം മോളുടെ റൂമിലേക്ക് മാറ്റി. അവളോട് ഒന്ന് മിണ്ടാൻ പോലും നിഖിലിന് സമയം കിട്ടാറില്ല. കിട്ടിയാലും ഓരോ തർക്കം ആവും ബാക്കി. അവൾക്ക് ഈയിടെയായി എന്തൊക്കെയോ മാറ്റമുണ്ട്. ആവശ്യത്തിന് അല്ലാതെ അധികം സംസാരം പോലും ഇല്ല, എപ്പോഴും ഫോണിൽ നോക്കി ഇരിക്കുന്നത് കാണാം. മോൾ ഈ വർഷം ഹൈസ്‌കൂൾ ആണ്. 9 മണി ആകുമ്പോൾ അവളും സ്‌കൂളിലേക്ക് പോകും. നിഖിൽ സാധാരണ 9.30 ന് ഇറങ്ങും. നീലിമ അങ്ങനെ പുറത്തൊന്നും പോകാറില്ല.

ഉച്ച ഭക്ഷണസമയത്താണ് ആ വാക്കിനെക്കുറിച്ച് ഓർത്തത്. എന്താവും അർത്ഥം? ഇനി അവൾ പ്രൊപ്പോസ് ചെയ്യാൻ നോക്കുവാണോ? അപ്പോൾ പ്രണയം എന്നാവുമോ അർത്ഥം? അതോ ഇഷ്ടം എന്നാണോ? നീലിമയെ ഉപേക്ഷിച്ചു രാഗിണിയിലേക്ക് പോകുക ഒട്ടും എളുപ്പമല്ല. ഒന്നാമത് നീലിമ അതിന് സമ്മതിക്കില്ല. രണ്ടാമത് മോളെ ഓർക്കുമ്പോൾ ഡിവോഴ്സ് ഒക്കെ അവൾക്ക് വലിയ ട്രോമ ആവും. എന്നാലും രാഗിണിയോടൊപ്പം ഒരു ജീവിതം താൻ ആഗ്രഹിക്കുന്നുണ്ട്. ഓരോന്ന് ഓർത്തിരുന്ന് സമയം പോയി. വീണ്ടും കണക്കുകളുടെ ലോകത്തേക്ക്. ഇനി 6 മണിക്കാണ് ഓഫീസിൽ നിന്ന് ഇറങ്ങാൻ പറ്റുക.

രാത്രി വൈകിയിരുന്നും ആലോചിച്ചു. എന്താവും രാഗിണി പറഞ്ഞ വാക്കിന്റെ അർത്ഥം? എന്തായാലും രാവിലെ അറിയാം. ഉത്തരം തെറ്റിയാലും അവളെ കൈവിടാൻ വയ്യ. ഉറക്കം പതുക്കെ വന്നു ചിന്തകളെ മൂടി.

രാവിലത്തെ അലാം പോലെ മെസ്സേജ് നോട്ടിഫിക്കേഷൻ വന്നു. നിഖിൽ പെട്ടെന്ന് തന്നെ മൊബൈൽ കൈയിലെടുത്തു. രാഗിണി തന്നെയാണ്. പക്ഷെ ഇത്തവണ കുറച്ചു സ്ക്രീൻ ഷോട്സ് ആണ്. അത് അത്… നിഖിലിന്റെ കയ്യിലിരുന്ന മൊബൈൽ വഴുതി ബെഡിൽ വീണു. ശ്വാസം മുട്ടുന്നത് പോലെ…ഒന്ന് കൂടി ആ സ്ക്രീൻഷോട്സിലേക്ക് നോക്കി. അവിടെ ഇണക്കുരുവികളെപ്പോലെ മുട്ടി ഇരുന്നു സെൽഫി എടുക്കുന്നവരിലെ സ്ത്രീ… അത്… നീലിമയാണ്. ആരാണ് അവൻ? ഈ ഫോട്ടോ എങ്ങനെ രാഗിണിയുടെ കയ്യിൽ വന്നു. ആരാണ് രാഗിണി?

“ഞാൻ ചോദിച്ച വാക്ക് Amor, അതിന്റെ അർത്ഥം രഹസ്യ ബന്ധം എന്നാണ്, ലളിതമായി പറഞ്ഞാൽ അവിഹിതം. നീലിമ കൊണ്ട് പോയത് എന്റെ സ്നേഹവിഹിതമാണ്. എന്റെ ഭർത്താവ് നീലിമയ്ക്ക് കൊടുത്തതും എന്റെ സ്നേഹവിഹിതമാണ്. അതറിഞ്ഞ നിമിഷം മുതൽ നീലിമ ആരാണെന്നുള്ള തിരച്ചിൽ ആയിരുന്നു. വളരെ ബുദ്ധിമുട്ടി ഞാൻ നിങ്ങളിലേക്ക് എത്തി. എന്തിനായിരുന്നു ഈ കളളക്കളി എന്ന് ചോദിച്ചാൽ, എന്റെ കയ്യിൽ നിന്ന് മോഷ്ടിക്കപ്പെട്ട സ്നേഹവിഹിതം എനിക്ക് തിരിച്ചുവേണമായിരുന്നു. നീലിമയുടെ സ്നേഹവിഹിതം ഇപ്പോൾ ഞാനും പങ്കിടുന്നു. ശരിയല്ലേ നിഖിൽ? നിങ്ങളെന്നെ കാമുകി ആയല്ലേ കണ്ടിരുന്നത്? കണക്ക് ടാലി ആയില്ലേ കണക്കുപ്പിള്ളേ?”

കേൾക്കുന്നത് വിശ്വസിക്കാനാവാതെ എന്ത്‌ മറുപടി ടൈപ്പ് ചെയ്യണം എന്നറിയാതെ നിഖിൽ കട്ടിലിൽ തളർന്ന് ഇരുന്നു. നീലിമയുടെ അവിഹിതത്തിൽ രോഷം തോന്നണോ അതോ അവളുടെ കാമുകന്റെ ഭാര്യയെ താൻ സ്നേഹിച്ചതിൽ ലജ്ജിക്കണോ എന്നറിയാതെ…

“സ്നേഹവിഹിതങ്ങളുടെ കണക്കുകൾ അങ്ങനെയാണ് നിഖിൽ. ഒരിടത്ത് നിന്ന് നമ്മൾ മോഷ്ടിക്കുന്നത് മറ്റൊരിടത്ത് നമുക്ക് നഷ്ടമാകും. അതൊന്ന് നീലിമയ്ക്ക് പറഞ്ഞു കൊടുക്കൂ. അവൾ പറഞ്ഞു അതെന്റെ ഭർത്താവും അറിയട്ടെ. ഇതെന്റെ ഒരു ചെറിയ പ്രതികാരം എന്ന് വിചാരിച്ചാൽ മതി. പല വള്ളത്തിൽ കാല് വയ്ക്കുന്നവർക്ക് അതേ നാണയത്തിൽ ഒരു തിരിച്ചടി. അപ്പോൾ ഇനി ഈ പ്രൊഫൈൽ ഉണ്ടാവില്ല. രാഗിണിയും… എന്റെ ശരിക്കുള്ള പേര് അറിയണം എങ്കിൽ നീലിമയോട് ചോദിച്ചാൽ മതി. അങ്ങനെ അവർ മാത്രം ബുദ്ധിശാലികൾ ആയി നമ്മളെ പറ്റിച്ചു പ്രേമിക്കേണ്ട. അപ്പോൾ അൽ വിദാ ടു മൈ അമോർ”

രാഗിണി എന്ന പ്രൊഫൈൽ നിലവിൽ ഇല്ല എന്നുള്ള മെസ്സേജ് തെളിഞ്ഞു വന്നു. ഇനിയെന്ത് ചെയ്യണം എന്നറിയാതെ നിഖിൽ ആ മുറിയിൽ ബാക്കിയായി. അടുക്കളയിൽ നിന്ന് പ്രഷർ കുക്കർ വിസിൽ അടിച്ചു. നീലിമ ഉണർന്നിരിക്കുന്നു…ഇന്ന് ഈ കണക്കുകൾ പൂർത്തിയാക്കണം. നിഖിൽ തീരുമാനിച്ചുറച്ചിരുന്നു…

© പവിത്ര ഉണ്ണി