ആത്മാവ് നഷ്ടപ്പെട്ടവർ

ചിലർ,

കാണെക്കാണെ കാണാതാകുന്നവർ

വിറകടുപ്പിൻ്റെ പുകയിലമർന്നു പോയവർ

ചായയുടെ ഗന്ധത്തിലലിഞ്ഞില്ലാതായവർ

നാലു ചുവരുകൾക്കുള്ളിൽ ഞെരിഞ്ഞമർന്നു പോയവർ

തിളക്കം നഷ്ടപ്പെട്ട താലിചരടുകളുടെ കാണാക്കുരുക്കിൽ പെട്ടവർ

ശബ്ദം നഷ്ടപ്പെട്ടവർ 

അസ്ഥിത്വം നഷ്ടപ്പെട്ടവർ

അവരെ ആരോ പറിച്ചു നട്ടതാണ്

ഒരു മണ്ണിൽ നിന്ന് മറ്റൊരു മണ്ണിലേക്ക്

അന്നു മുതൽ അവർ വേരുകൾ നീട്ടി നീട്ടി തൊടാൻ ശ്രമിക്കുന്നുണ്ട് 

സ്വന്തം മണ്ണിനെ….

സ്വന്തം ആത്മാവിനെ….

അവർ, 

അദൃശ്യമായ ചങ്ങലകളുടെ കുരുക്കിൽപെട്ടവർ

ആത്മാവ് നഷ്ടപ്പെട്ടവർ !