പിന്ന് പോയ വഴി അഥവാ നോ ടെൻഷൻ

പണ്ട് പണ്ട്… എന്നച്ചാ ഒരു 20 വർഷം മുമ്പ്…… എൻറെ ഒരു സീനിയർ ആപ്പീസറൊണ്ട്. ഭയങ്കര ടെൻഷൻ്റെ ആളാ. ഇന്ന് ടെൻഷനടിക്കാൻ ഒന്നുമില്ലല്ലോ എന്നോർത്ത് ടെൻഷൻ അടിക്കുന്നത്രയും സാധുവായ ഒരു മനുഷ്യനാണെടേ അങ്ങേര്…..

അങ്ങനെ ഒരു ദിവസം ഫാക്ടറി കുഴപ്പമൊന്നുമില്ലാതെ സ്മൂത്തായി ഓടുന്നു. രാവിലെ ഒരു 11 മണിയൊക്കെ ആയപ്പോ പുള്ളിക്കാരന് ടെൻഷനടിക്കാൻ ഒന്നുമില്ലല്ലോന്നോർത്തിട്ട് ആകെ ഒരു വിഷമം.
അങ്ങേർക്ക് ഒരു ഇരിക്കപ്പൊറുതിയില്ലെന്നേ…..
രാവിലെ പൊറോട്ടേം ബീഫും കഴിച്ചത് പല്ലിൻ്റെടേൽ കുടുങ്ങിപ്പോയി എന്ന് സങ്കൽപ്പിച്ച് പുള്ളി ഒരു മൊട്ടുസൂചി എടുത്ത് പല്ലിൻ്റെ എടേൽ കുത്താൻ തുടങ്ങി. അങ്ങേർടെ expression കണ്ടാ തോന്നും ലോകത്തിലെ ഏറ്റവും സുഖമുള്ള പരിപാടിയാ അതെന്ന് 😏😏😏

ഒരൊച്ച കേട്ട് നോക്കുമ്പോ ദാണ്ടെടാ നിൽക്കുന്നു ഏതാണ്ടോ പോയ അണ്ണാനെ പോലെ നമ്മടെ സാറ്.🥴🥴 ഏതാണ്ടോ ഒരു സാധനമൊന്നുമല്ല അങ്ങേര് കുത്തികൊണ്ടിരുന്ന മൊട്ടുസൂചിയാ പോയത്. സാധനം വയറ്റിൽ പോയോ താഴെ വല്ലോം പോയോ ഒന്നുമറിയില്ല…
താഴെയൊക്കെ നോക്കീട്ട് സൂചി കാണാനുമില്ല.

ഹാവൂ എന്തൊരാശ്വാസം…
സ്വസ്ഥം…
സുന്ദരം…
ശാന്തം….
ടെൻഷനില്ലല്ലോന്ന വിഷമമങ്ങട് മാറികിട്ടി….😌😌

പിന്നെ തപ്പലായി,
പിടിക്കലായി,
നെലവിളിയായി, പുള്ളിയെ തലകുത്തിപ്പിടിച്ച് കൊടഞ്ഞുനോക്കലായി, വണ്ടി വിളിയായി, ആശുത്രീപ്പോക്കായി, എക്സറേ എടുപ്പായി….

ഫുൾ ജഗപൊക💃💃💃

വണ്ടിയേലോട്ട് കേറാൻ പോകുന്ന സാറ് ഒലക്ക കെട്ടിവച്ച പോലെ സ്ട്രൈറ്റ് ആയിട്ട് കയ്യും തലയും ദേഹവും ഒന്നും അനങ്ങാതെയാ നടന്നു പോകുന്നത്. ടോം and ജെറിയിൽ ടോം പൂച്ച ഇരുമ്പ് വടി വിഴുങ്ങീട്ട് നടക്കുന്നപോലെ…….
അങ്ങേരുടെ ഭാവം കണ്ടാ തോന്നും ഞാൻ ബലമായിട്ട് ആ സൂചി അങ്ങേരെക്കൊണ്ട് തീറ്റിച്ചതാന്ന്😏😏😏

എക്സ്-റേടെ റിസൾട്ട് വന്നപ്പോ ആണ്ടേ സൂചി കാണുന്നില്ല. പിന്നെ Scan ചെയ്തിട്ടും സൂചി അങ്ങേരുടെ ദേഹത്തൊന്നും കാണാനില്ല..

ഇങ്ങേരിതെന്നാ അഗ്നിപർവ്വതം വല്ലോം വയറ്റിലിട്ടൊണ്ടാണോ നടക്കുന്നത് അങ്ങോട്ട് വീഴുന്നതിന് മുൻപേ ഉരുകിപ്പോകാൻ???

കുറച്ചു പഴമൊക്കെ നന്നായി കഴിച്ചോ, സാധനം അകത്തുണ്ടേൽ രാവിലെ പിന്നാമ്പുറം വഴി പൊക്കോളുന്നും പറഞ്ഞ് ഡോക്ടറും കയ്യൊഴിഞ്ഞു.

നോക്കുമ്പോ സാറ് നടക്കുന്നതില് ഒരു പന്തികേട്… ഇതുവരെ ഇല്ലാതിരുന്ന സ്റ്റൈലിൽ എട്ടെ പത്തെ എന്ന രീതിക്ക് ഒരു നടപ്പ്. മൊട്ടുസൂചി വിഴുങ്ങിയാൽ ഇനി ചട്ടു വരുമോ ആവോ??🤔🤔

എന്തുപറ്റിയെന്ന് ചോദിച്ചപ്പോൾ അങ്ങേര് പറയുവാ എന്താന്നറിയില്ല, സൂചീടെ ടെൻഷൻ കഴിഞ്ഞിട്ട് ഇത് നോക്കി അടുത്ത ടെൻഷൻ അടിച്ചാൽ മതിയല്ലോ. അല്ലേല് പിന്നെ ആ സമയത്ത് ടെൻഷൻ അടിക്കാൻ ഒന്നും കിട്ടിയില്ലെങ്കിലോ???

എന്തൊരു തങ്കപ്പെട്ട മനുസനല്ലേ??? സാറിൻ്റെ വിനയം കണ്ട് ഞങ്ങൾ ദൃതംങ്ങപുളകിതരായി വിജ്‌റുംഭിച്ചു നിന്നുപോയി….

അങ്ങനെ പുളകമൊക്കെ മാറി തിരിച്ച് ഫാക്ടറീ വന്നിട്ട് ഷൂ അഴിച്ചപ്പോ ദാണ്ടെ ചിരിച്ചോണ്ടിരിക്കുന്നെടേ ഒരുത്തൻ.🤓🤓
വണ്ടിക്കൂലീം വള്ളക്കൂലിം നോക്കുകൂലിം എല്ലാം കൂടെ ചേർത്ത് ഏകദേശം മൂവായിരം രൂപ മുടക്കീട്ടും കിട്ടാതിരുന്ന പുള്ളീടെ വയറ്റിൽ പോയ അതേ മൊട്ടുസൂചി…

എന്നാലും ആ സൂചി എങ്ങനെ അവിടെത്തി എന്നത് ഇതുവരെ പിടികിട്ടീട്ടില്ല കേട്ടോ. ഇനിയിപ്പോ ഡോട്ടറ് പറഞ്ഞപോലെ സൂചി പിന്നാമ്പുറം വഴി നേരെ താഴോട്ട് പോന്നതാണോ ആവോ🤔🤔… ..