പുതുവർഷം, പുതുസ്വപ്‌നങ്ങൾ

മഞ്ഞിന്റെ കുളിരും വൃശ്ചിക കാറ്റും സുന്ദരമാക്കിയ ക്രിസ്തുമസ് കാലം വഴിമാറുന്നത് പുത്തൻ പ്രതീക്ഷകളുമായെത്തുന്ന പുതുവർഷപുലരിയിലേക്കാണ്. ഓരോ പുതുവർഷവും ലോകമെങ്ങും ഉത്സാഹത്തിമിർപ്പോടെയാണ് തുടങ്ങുന്നത്. കാലാവസ്ഥ പോലും നവവർഷത്തെയെതിരേല്ക്കാൻ ഒരുങ്ങി നിൽക്കുന്ന പോലെ തോന്നും. തണുപ്പുള്ള രാത്രികൾ, മഞ്ഞിന്റെ മുഖപടമണിഞ്ഞ തെളിഞ്ഞ പ്രഭാതങ്ങൾ, നേരിയ കാറ്റ്, അങ്ങനെ ശരീരവും മനസും കുളിരുന്ന ദിനങ്ങൾ.

പുതുവർഷത്തിനായി വലിയ പദ്ധതികളൊന്നും ഉണ്ടാക്കുന്ന പതിവുകളില്ല. എങ്കിലും ശുഭപ്രതീക്ഷകളോടും പ്രാർത്ഥനകളോടുമാണ് ഓരോ വർഷവും തുടങ്ങുന്നത്. ഈ വർഷം കൂടെയുണ്ടായിരുന്ന പ്രിയപ്പെട്ടവരെല്ലാം വരുന്ന വർഷവും കൂടെയുണ്ടാകണമെന്ന തീവ്രമായ ആഗ്രഹം പ്രാർത്ഥനയായി മാറാറുണ്ട്. പുതുവർഷത്തെ സന്തോഷത്തോടെ വരവേൽക്കാൻ ഒരുങ്ങുമ്പോൾ ദുഃഖങ്ങളും ദുരിതങ്ങളുമായി നവവർഷത്തെ ആരവമൊഴിഞ്ഞ മനസ്സോടെ കാത്തിരിക്കുന്നവരെ കുറിച്ച് ഓർത്തുപോകാറുണ്ട്.

ഇക്കൊല്ലം നേടിയെടുക്കാൻ വലിയ ആഗ്രഹമുള്ള ഒരു കാര്യമാണ് സ്വന്തമായി കാർ ഓടിച്ചു തുടങ്ങുക എന്നത്. ലൈസൻസ് എടുത്തിട്ട് വർഷങ്ങൾ ആയെങ്കിലും വണ്ടിയെടുത്തു റോഡിൽ ഇറങ്ങാനുള്ള ധൈര്യം വരുന്നില്ല. ഡ്രൈവിംഗ് നൽകുന്ന സ്വയംപര്യാപ്തത എന്നും മോഹിപ്പിച്ചിട്ടുണ്ട്. ആഗ്രഹം പോലെ എല്ലായിടത്തും പോകാനും ഒരാവശ്യം വരുമ്പോൾ ആരെയും ആശ്രയിക്കാതെ വണ്ടിയെടുക്കാനും കഴിയുന്നത് വലിയൊരു സ്വപ്നമാണ്.

ഓരോ വർഷവും വായിക്കണം എന്നാഗ്രഹിക്കുന്ന ഒരു പാട് പുസ്തകങ്ങൾ ഉണ്ട്. ഒരു നീണ്ട ലിസ്റ്റ് ഈ വർഷവുമുണ്ട്. വാങ്ങിക്കൂട്ടിയ പുസ്തകങ്ങൾ എന്നെ കാത്തിരിക്കുമ്പോൾ ഇനി പുതിയത് വാങ്ങുന്നത് കുറക്കണമെന്ന് ഓരോ വർഷവും തീർച്ചപ്പെടുത്താറുണ്ട്. എങ്കിലും പുസ്തകമേളകളും സാഹിത്യോത്സവങ്ങളും ആ പ്രതിജ്ഞ പലപ്പോഴും തെറ്റിക്കാറുണ്ട്. മന്ദഗതിയിലായ എഴുത്തിനെയും ഒന്ന് പുനരുജ്ജീവിപ്പിക്കണം.

സ്വഭാവത്തിലും മാറ്റങ്ങൾ വരുത്തണമെന്ന് വിചാരിക്കാറുണ്ട്. പുതുവർഷമെത്തുമ്പോൾ ഇനിയുള്ള ദിവസങ്ങൾ കൂടുതൽ സംയമനത്തോടെ പെരുമാറണമെന്ന്  വിചാരിക്കാറുണ്ട്.അനാവശ്യമായി സമാധാനക്കേടുകൾ ക്ഷണിച്ചു വരുത്തില്ല എന്നുറപ്പിയ്ക്കും.ആരോഗ്യ കാര്യങ്ങളിൽ കൂടുതൽ ശ്രദ്ധ കൊടുക്കാനും സമയം ഫലപ്രദമായി വിനിയോഗിക്കാനും എല്ലാ വർഷവും തീരുമാനമെടുക്കാറുണ്ട്. അതെല്ലാം ഈ വർഷവും പുതുക്കിയിട്ടുണ്ട്.

അങ്ങനെ ഓരോ വർഷവും പുതുക്കുന്ന തീരുമാനങ്ങളുമായി ഈ വർഷവും കടന്നുവന്നു. എന്തൊക്കെ നടപ്പിലാവുമെന്ന് കാത്തിരുന്നു കാണണം.

#എന്റെ രചന.. ഈ വർഷമെങ്കിലും