അന്നൊരു വ്യാഴാഴ്ച, വൈകുന്നേരം 4 മണിക്ക്, അബ്ബാസ്സും ഭാര്യ ആമിനയും ഒന്ന് നടക്കാൻ ഇറങ്ങി. നാളെ വെള്ളിയാഴ്ച, ആമിനയുടെയും അബ്ബാസിന്റെയും പത്താം വിവാഹ വാർഷികം ആണ്. അത്യാവശ്യം സുഹൃത്തുക്കളെയും ബന്ധുക്കളെയും ക്ഷണിച്ചു ഒരു പാർട്ടി തന്നെ നടത്താൻ അബ്ബാസ്സും ആമിനയും തീരുമാനിച്ചിരുന്നു. നടത്തത്തിനിടയിൽ നാളത്തെ വെഡ്ഡിംഗ് ആനിവേഴ്സറിയെ കുറിച്ചാണ് ആമിന സംസാരിച്ചു കൊണ്ടിരുന്നത്.
ക്ഷണിച്ചു എത്തിയവരുടെ ഇടയിൽ നിന്ന് ഇക്കയോടൊപ്പം ഒരു ഫോട്ടോ എടുക്കണം. എന്നിട്ട് സ്റ്റാറ്റസ് വെക്കണം. എന്റെ ജീവന്റെ പാതി കൂടെ കൂടിയിട്ട് 10 വർഷം ആകുന്നു. എന്നൊരു ക്യാപ്ഷനും വേണം.
വാട്സാപ്പ് സ്റ്റാറ്റസ് മാത്രം പോരാ fb, യിലും ഇൻസ്റ്റാഗ്രാമിലും ഒക്കെ ഷെയർ ചെയ്യണം.. ലോകം കാണട്ടെ നമ്മുടെ സ്നേഹം. ആമിന പറഞ്ഞു കൊണ്ടിരുന്നു. അബ്ബാസ് എല്ലാം കേട്ടു കൊണ്ടിരുന്നു.
ആമിന സോഷ്യൽ മീഡിയകളിൽ സജീവമാണ്. അബ്ബാസിനു അത്തരം കാര്യങ്ങളിൽ ഒന്നും താല്പര്യം ഇല്ല. ഒരാഴ്ച മുമ്പാണ് ഫാദർ ഡേ കഴിഞ്ഞത്. അന്ന് fb, യിൽ പോസ്റ്റാൻ ഒരു വീഡിയോ എടുക്കണം എന്ന് ആമിന പറഞ്ഞു. മൂന്ന് മക്കളെയും ഉൾപ്പെടുത്തി, ‘എന്റെ ഉപ്പ കൊണ്ട വെയിലാണ്, ഞാൻ കൊള്ളും തണല്, എന്റെ ഉപ്പ കൊണ്ട മഴയാണ് ഞാൻ കൊള്ളും കുളിര്’ എന്ന ഗാനം ഷൂട്ട് ചെയ്തു.
ഒരു തവണ വീഡിയോ എടുത്തപ്പോൾ ആമിനക്ക് അങ്ങട് തൃപ്തി ആയില്ല. ഇളയ മോൾ പൊക്കം കുറവായത് കൊണ്ട് ക്യാമറയിൽ ശരിക്ക് പതിഞ്ഞില്ലത്രേ.
ദേ മനുഷ്യാ ഒന്നിങ്ങട് വന്നേ. ആമിന വിളിച്ചപ്പോൾ അടുക്കളയിൽ ചപ്പാത്തി ചുടുന്ന അബ്ബാസ് ഹാളിൽ എത്തി. ഹാളിൽ, മക്കളുടെ ഷൂട്ടിംഗ് നടക്കുകയാണ്.
നിങ്ങൾ ഒന്ന് അവിടെ നിലത്തു കിടന്നേ. ഭാര്യ പറഞ്ഞപ്പോൾ കാര്യം മനസ്സിലാകാതെ അബ്ബാസ് നിലത്തു കിടന്നു. ഇളയ മകൾ അബ്ബാസിന്റെ പുറത്ത് കയറി നിന്നു. ഇപ്പോൾ മൂന്ന് മക്കളും ഒരേ പൊക്കം ആയി.
എന്റെ ഉപ്പ കൊണ്ട വെയിലാണ് ഞാൻ കൊള്ളും തണല് എന്ന ഗാനം ഷൂട്ട് കഴിയുമ്പോഴേക്കും അബ്ബാസിനു നടുവിന് നല്ല വേദന തുടങ്ങിയിരുന്നു.
എന്റെ മോള് ചവിട്ടിയ ചവിട്ടാണ്, ഞാൻ അനുഭവിക്കും നടു വേദന, എന്ന് ഡോക്ടറുടെ അടുത്ത് പോയി പാട്ട് പാടേണ്ട അവസ്ഥയായിരുന്നു പിറ്റേന്ന് അബ്ബാസിന്.
പടച്ചോനെ നാളെ വെഡ്ഡിംഗ് ആനിവേഴ്സറിക്ക് എന്തൊക്കെ വീഡിയോ ആയിരിക്കും ലെവള് പ്ലാൻ ചെയ്തിട്ടുണ്ടാകുക. എന്റെ നടു വീണ്ടും ഒടിയുമോ. നടത്തത്തിനിടയിൽ അബ്ബാസ് അതൊക്കെയായിരുന്നു ഓർത്തത്.
അബ്ബാസും, ആമിനയും നടത്തം തുടർന്നു. അപ്പോഴാണ് ഒരു കള്ള് കുടിയൻ, കുടിച്ചു ആടി ആടി അവരുടെ മുന്നിലൂടെ നടന്നു പോയത്. കള്ള് കുടിയന്റെ മുഖം കണ്ടതും ആമിന അബ്ബാസിനെ തോണ്ടി കൊണ്ട് പറഞ്ഞു. ഇക്കാ അയാൾ പണ്ട് എന്നെ പെണ്ണ് കാണാൻ വന്നതാണ്. എന്റെ ഭാഗ്യത്തിന് അന്ന് ആ വിവാഹം നടന്നില്ല. അല്ലെങ്കിൽ ഞാൻ കഷ്ടപ്പെട്ടു പോയേനെ.
അതുവരെ മിണ്ടാതിരുന്ന അബ്ബാസ്, ആ കള്ള് കുടിയനെ നോക്കി കൊണ്ട് പറഞ്ഞു. ‘ഹോ ഭാഗ്യവാൻ. ഒരു വലിയ ദുരന്തത്തിൽ നിന്ന് രക്ഷപെട്ടതിന്റെ ആഘോഷം ഇതുവരെ നിറുത്തിയിട്ടില്ല. ഇപ്പോഴും കുടിച്ചു ആഘോഷിക്കുകയാണ്. കണ്ടിട്ട് എനിക്ക് അസൂയ മൂത്ത് സഹിക്കണില്ല. ‘
പെട്ടെന്ന് മനസ്സിൽ ഉള്ളതെല്ലാം അബ്ബാസിനോട് പറഞ്ഞു പോയി. പിന്നീട് അവിടെ എന്താണ് നടന്നത് എന്ന് അറിയില്ല. പിറ്റേന്ന് വിവാഹ വാർഷികത്തിൽ പങ്കെടുക്കാൻ വന്നവർ, തലക്കും കൈക്കും പരിക്ക് പറ്റി ബാൻഡെജിൽ പൊതിഞ്ഞ ശരീരവുമായി നിൽക്കുന്ന അബ്ബാസിനെയാണ് കണ്ടത്. നടക്കാൻ പോയപ്പോൾ പാർക്കിൽ വീണു, എന്നാണ് അബ്ബാസ്സും ആമിനയും അതിഥികളോട് പറഞ്ഞത്. സത്യത്തിൽ എന്താണ് സംഭവിച്ചത് എന്ന് എനിക്കും അറിയില്ല.
✍️
ജിനാസ്. വി
